ਹਾਂਗਕਾਂਗ ਵਿੱਚ ਪਿਛਲੇ ਸਾਲ ਲੱਗੀ ਭਿਆਨਕ ਅੱਗ ਮਾਮਲੇ ਵਿੱਚ 7 ਲੋਕਾਂ ਅਤੇ 2 ਕੰਪਨੀਆਂ ‘ਤੇ ਦੋਸ਼

ਜਾਗਰਣ ਸੰਵਾਦਦਾਤਾ, ਪੰਜਾਬੀ ਜਾਗਰਣ ,ਦਿੱਲੀ ; ਹਾਂਗਕਾਂਗ ਵਿੱਚ ਅਧਿਕਾਰੀਆਂ ਨੇ ਬੁੱਧਵਾਰ ਨੂੰ ਪਿਛਲੇ ਸਾਲ ਹੋਈ ਭਿਆਨਕ ਅੱਗ ਦੇ ਮਾਮਲੇ ਵਿੱਚ 7 ਲੋਕਾਂ ਅਤੇ 2 ਕੰਪਨੀਆਂ ‘ਤੇ ਗੈਰ-ਇਰਾਦਤਨ ਕਤਲ ਅਤੇ ਧੋਖਾਧੜੀ ਦੀ ਸਾਜ਼ਿਸ਼ ਸਮੇਤ ਕਈ ਗੰਭੀਰ ਦੋਸ਼ ਲਗਾਏ ਹਨ। ਇਹ ਅੱਗ 26 ਨਵੰਬਰ 2025 ਨੂੰ ਲੱਗੀ ਸੀ, ਜਿਸ ਨੇ 7 ਇਮਾਰਤਾਂ ਨੂੰ ਆਪਣੀ ਲਪੇਟ ਵਿੱਚ ਲੈ ਲਿਆ ਸੀ ਅਤੇ ਇਸ ਵਿੱਚ 168 ਲੋਕਾਂ ਦੀ ਮੌਤ ਹੋ ਗਈ ਸੀ।

ਇਹ ਹਾਦਸਾ ਤਾਈ ਪੋ ਦੇ ਉਪਨਗਰੀ ਇਲਾਕੇ ਵਿੱਚ ਸਥਿਤ ਵਾਂਗ ਫੁਕ ਕੋਰਟ ਵਿੱਚ ਵਾਪਰਿਆ ਸੀ, ਜਿੱਥੇ ਹਜ਼ਾਰਾਂ ਲੋਕ ਰਹਿੰਦੇ ਸਨ।

ਜਾਂਚ ਅਤੇ ਦੋਸ਼

ਪੁਲਿਸ ਅਤੇ ਇੰਡੀਪੈਂਡੈਂਟ ਕਮਿਸ਼ਨ ਅਗੇਂਸਟ ਕਰਪਸ਼ਨ ਨੇ ਕੁੱਲ 25 ਦੋਸ਼ ਦਰਜ ਕੀਤੇ ਹਨ। ਇਨ੍ਹਾਂ ਵਿੱਚ ਸ਼ਾਮਲ ਹਨ:

• ਮਨੀ ਲਾਂਡਰਿੰਗ
• ਸਰਕਾਰੀ ਨਿਆਂ ਪ੍ਰਕਿਰਿਆ ਵਿੱਚ ਰੁਕਾਵਟ ਪੈਦਾ ਕਰਨ ਦੀ ਕੋਸ਼ਿਸ਼
• ਟੈਕਸ ਚੋਰੀ

ਇਨ੍ਹਾਂ ਦੋਸ਼ਾਂ ਵਿੱਚ ਵਾਂਗ ਫੁਕ ਕੋਰਟ ਦੇ ਵੱਡੇ ਰੀਨੋਵੇਸ਼ਨ ਪ੍ਰੋਜੈਕਟ ਨਾਲ ਜੁੜੀਆਂ ਗੜਬੜਾਂ ਦਾ ਵੀ ਜ਼ਿਕਰ ਹੈ।

ਕੰਪਨੀਆਂ ਅਤੇ ਮੁਲਜ਼ਮ

ਦੋ ਕੰਪਨੀਆਂ ‘ਤੇ ਵੀ ਦੋਸ਼ ਲਗੇ ਹਨ:

• ਵਿਲ ਪਾਵਰ ਆਰਕੀਟੈਕਟਸ ਕੰਪਨੀ
• ਪ੍ਰੈਸਟੀਜ ਕਨਸਟਰਕਸ਼ਨ ਐਂਡ ਇੰਜੀਨੀਅਰਿੰਗ ਕੰਪਨੀ

ਕੁੱਲ 7 ਮੁਲਜ਼ਮਾਂ ਨੂੰ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ, ਜਿਨ੍ਹਾਂ ਵਿੱਚ ਦੋਵਾਂ ਕੰਪਨੀਆਂ ਦੇ ਡਾਇਰੈਕਟਰ ਵੀ ਸ਼ਾਮਲ ਹਨ। ਉਨ੍ਹਾਂ ਨੇ ਅਦਾਲਤ ਨੂੰ ਦੱਸਿਆ ਕਿ ਉਹ ਆਪਣੇ ਖ਼ਿਲਾਫ਼ ਲਗੇ ਦੋਸ਼ ਸਮਝ ਗਏ ਹਨ ਅਤੇ ਜ਼ਿਆਦਾਤਰ ਸ਼ਾਂਤ ਨਜ਼ਰ ਆਏ।