APAAR ID ਡਾਊਨਲੋਡ ਕਰਨ ਦਾ ਸਭ ਤੋਂ ਆਸਾਨ ਤਰੀਕਾ, ਮਿੰਟਾਂ 'ਚ ਪ੍ਰਾਪਤ ਕਰੋ ਆਪਣੀ ਸਟੂਡੈਂਟ ਆਈਡੀ

ਟੈਕਨਾਲੋਜੀ ਡੈਸਕ, ਨਵੀਂ ਦਿੱਲੀ : APAAR ID ਅਪਲਾਈ ਕਰਨ ਤੋਂ ਬਾਅਦ ਬਹੁਤ ਸਾਰੇ ਵਿਦਿਆਰਥੀ ਇਸ ਗੱਲ ਨੂੰ ਲੈ ਕੇ ਪਰੇਸ਼ਾਨ ਰਹਿੰਦੇ ਹਨ ਕਿ ਆਖਿਰ ਇਸਨੂੰ ਹੁਣ ਡਾਊਨਲੋਡ ਕਿਵੇਂ ਅਤੇ ਕਿੱਥੋਂ ਕੀਤਾ ਜਾਵੇ ਅਤੇ ਇਸਦਾ ਸਹੀ ਤਰੀਕਾ ਕੀ ਹੈ। ਇਸਦੇ ਲਈ ਸਭ ਤੋਂ ਆਮ ਅਤੇ ਆਸਾਨ ਮਾਧਿਅਮ ਡਿਜੀਲੌਕਰ (DigiLocker) ਨੂੰ ਮੰਨਿਆ ਜਾਂਦਾ ਹੈ, ਪਰ ਕਈ ਵਾਰ ਵਿਦਿਆਰਥੀਆਂ ਨੂੰ ਉੱਥੇ ਵੀ ਆਪਣੀ ਆਈਡੀ ਜਾਂ ਕਾਲਜ ਦੀ ਜਾਣਕਾਰੀ ਨਹੀਂ ਮਿਲਦੀ।

ਅਜਿਹੀ ਸਥਿਤੀ 'ਚ ਸਹੀ ਪਲੇਟਫਾਰਮ ਅਤੇ ਪ੍ਰਕਿਰਿਆ ਦੀ ਜਾਣਕਾਰੀ ਹੋਣਾ ਬਹੁਤ ਜ਼ਰੂਰੀ ਹੋ ਜਾਂਦਾ ਹੈ। ਅੱਜ ਅਸੀਂ ਤੁਹਾਨੂੰ ਇਸ ਲੇਖ ਵਿੱਚ ਦੱਸਾਂਗੇ ਕਿ ਆਪਣੀ APAAR ID ਕਿਵੇਂ ਅਤੇ ਕਿੱਥੋਂ ਡਾਊਨਲੋਡ ਕਰਨੀ ਹੈ। ਇਹ ਖਾਸ ਤੌਰ 'ਤੇ ਉਨ੍ਹਾਂ ਵਿਦਿਆਰਥੀਆਂ ਲਈ ਲਾਹੇਵੰਦ ਹੈ, ਜੋ ਆਪਣੀ APAAR ID ਆਨਲਾਈਨ ਪ੍ਰਾਪਤ ਕਰਨਾ ਚਾਹੁੰਦੇ ਹਨ।

APAAR ID ਕੀ ਹੈ ਅਤੇ ਕਿਉਂ ਹੈ ਜ਼ਰੂਰੀ?

ਦਰਅਸਲ, APAAR ID ਵਿਦਿਆਰਥੀਆਂ ਨੂੰ ਦਿੱਤੀ ਜਾਣ ਵਾਲੀ ਇੱਕ ਵਿਲੱਖਣ (Unique) ਡਿਜੀਟਲ ਪਛਾਣ ਹੈ, ਜਿਸ ਵਿੱਚ ਉਨ੍ਹਾਂ ਦੀ ਪੜ੍ਹਾਈ ਨਾਲ ਜੁੜੇ ਸਾਰੇ ਜ਼ਰੂਰੀ ਰਿਕਾਰਡ ਆਨਲਾਈਨ ਸੁਰੱਖਿਅਤ ਰਹਿੰਦੇ ਹਨ। ਨਵੀਂ ਸਿੱਖਿਆ ਨੀਤੀ (NEP) ਤਹਿਤ ਇਸ ਨੂੰ ਲਾਗੂ ਕੀਤਾ ਗਿਆ ਹੈ, ਤਾਂ ਜੋ ਸਕੂਲ ਤੋਂ ਲੈ ਕੇ ਉੱਚ ਸਿੱਖਿਆ ਤੱਕ ਦਾ ਪੂਰਾ ਵਿਦਿਅਕ ਡਾਟਾ ਇੱਕੋ ਥਾਂ ਉਪਲਬਧ ਹੋ ਸਕੇ।

ਇਸਦਾ ਸਭ ਤੋਂ ਵੱਡਾ ਫਾਇਦਾ ਇਹ ਹੈ ਕਿ ਵਿਦਿਆਰਥੀਆਂ ਨੂੰ ਭਵਿੱਖ ਵਿੱਚ ਆਪਣੇ ਸਰਟੀਫਿਕੇਟ ਅਤੇ ਅਕਾਦਮਿਕ ਜਾਣਕਾਰੀ ਵਾਰ-ਵਾਰ ਜਮ੍ਹਾ ਕਰਨ ਦੀ ਲੋੜ ਨਹੀਂ ਪਵੇਗੀ। ਇੰਨਾ ਹੀ ਨਹੀਂ, ਲੋੜ ਪੈਣ 'ਤੇ ਇਨ੍ਹਾਂ ਨੂੰ ਤੁਰੰਤ ਐਕਸੈਸ ਵੀ ਕੀਤਾ ਜਾ ਸਕਦਾ ਹੈ।

ਡਿਜੀਲੌਕਰ ਤੋਂ APAAR ID ਡਾਊਨਲੋਡ ਕਰਨ ਦਾ ਤਰੀਕਾ

ਤੁਸੀਂ ਡਿਜੀਲੌਕਰ ਐਪ ਰਾਹੀਂ APAAR ID ਡਾਊਨਲੋਡ ਕਰ ਸਕਦੇ ਹੋ। ਇਸਦੇ ਲਈ ਹੇਠਾਂ ਦਿੱਤੇ ਸਟੈਪਸ ਦੀ ਪਾਲਣਾ ਕਰੋ:

• ਸਭ ਤੋਂ ਪਹਿਲਾਂ ਆਪਣੇ ਮੋਬਾਈਲ 'ਚ DigiLocker ਐਪ ਡਾਊਨਲੋਡ ਅਤੇ ਇੰਸਟਾਲ ਕਰੋ।
• ਇਸ ਤੋਂ ਬਾਅਦ ਆਧਾਰ ਕਾਰਡ ਦੀ ਮਦਦ ਨਾਲ ਐਪ 'ਚ ਆਪਣਾ ਅਕਾਊਂਟ ਬਣਾਓ।
• ਲੌਗਇਨ ਕਰਨ ਤੋਂ ਬਾਅਦ ਇਕ ਸੁਰੱਖਿਆ ਪਿੰਨ (Security Pin) ਸੈੱਟ ਕਰ ਲਓ।
• ਹੁਣ ਸਰਚ ਆਪਸ਼ਨ 'ਚ ਜਾ ਕੇ APAAR ID ਟਾਈਪ ਕਰੋ।
• ਤੁਸੀਂ ਚਾਹੋ ਤਾਂ Academic Bank of Credits ਸਰਚ ਕਰਕੇ ਵੀ ਇਸਨੂੰ ਲੱਭ ਸਕਦੇ ਹੋ।
• ਇੱਥੇ ਮੰਗੀ ਗਈ ਜ਼ਰੂਰੀ ਜਾਣਕਾਰੀ ਭਰੋ।
• ਇਸ ਤੋਂ ਬਾਅਦ Get Document 'ਤੇ ਕਲਿੱਕ ਕਰੋ।
• ਆਈਡੀ ਜਨਰੇਟ ਹੁੰਦੇ ਹੀ ਡਾਊਨਲੋਡ ਦਾ ਆਪਸ਼ਨ ਦਿਖਾਈ ਦੇਵੇਗਾ।
• ਇਸਨੂੰ PDF ਫਾਈਲ ਵਜੋਂ ਸੇਵ ਕਰ ਲਓ ਤਾਂ ਜੋ ਲੋੜ ਪੈਣ 'ਤੇ ਵਰਤਿਆ ਜਾ ਸਕੇ।

ਜੇਕਰ ਡਿਜੀਲੌਕਰ ਨਾ ਹੋਵੇ, ਤਾਂ ABC ਪੋਰਟਲ ਤੋਂ ਇੰਝ ਕਰੋ ਡਾਊਨਲੋਡ

ਜੇਕਰ ਤੁਹਾਡੇ ਕੋਲ ਡਿਜੀਲੌਕਰ ਐਪ ਨਹੀਂ ਹੈ ਜਾਂ ਐਪ 'ਚ ਆਈਡੀ ਸ਼ੋਅ ਨਹੀਂ ਹੋ ਰਹੀ ਤਾਂ ਘਬਰਾਉਣ ਦੀ ਲੋੜ ਨਹੀਂ। ਤੁਸੀਂ Academic Bank of Credits (ABC) ਪੋਰਟਲ ਰਾਹੀਂ ਵੀ APAAR ID ਡਾਊਨਲੋਡ ਕਰ ਸਕਦੇ ਹੋ। ਇਸਦੇ ਲਈ ਤੁਹਾਨੂੰ ਸਿਰਫ਼ ਪੋਰਟਲ 'ਤੇ ਲੌਗਇਨ ਕਰਨਾ ਪਵੇਗਾ, ਜਿਸ ਤੋਂ ਬਾਅਦ ਤੁਹਾਨੂੰ ਡਾਊਨਲੋਡ ਦਾ ਆਪਸ਼ਨ ਮਿਲ ਜਾਵੇਗਾ।