iPhone 17e ਦੀ ਲਾਂਚਿੰਗ ਜਲਦ: ਘੱਟ ਕੀਮਤ 'ਚ ਮਿਲਣਗੇ ਸ਼ਾਨਦਾਰ ਫੀਚਰਜ਼, ਜਾਣੋ ਕੀ ਹੋਵੇਗਾ ਖਾਸ

ਟੈਕਨਾਲੋਜੀ ਡੈਸਕ, ਨਵੀਂ ਦਿੱਲੀ: ਐਪਲ ਨੇ ਪਿਛਲੇ ਸਾਲ iPhone 16e ਲਾਂਚ ਕੀਤਾ ਸੀ, ਜੋ ਇਸ ਸਮੇਂ ਐਪਲ ਦਾ ਸਭ ਤੋਂ ਕਿਫਾਇਤੀ ਆਈਫੋਨ ਹੈ। iPhone 16e ਨੇ ਕਈ ਨਵੇਂ ਯੂਜ਼ਰਜ਼ ਨੂੰ ਆਈਫੋਨ ਖਰੀਦਣ ਦਾ ਮੌਕਾ ਦਿੱਤਾ। ਹੁਣ ਇੱਕ ਵਾਰ ਫਿਰ ਐਪਲ ਇੱਕ ਸਾਲ ਬਾਅਦ ਘੱਟ ਕੀਮਤ ਵਾਲਾ iPhone 17e ਲਾਂਚ ਕਰਨ ਦੀ ਤਿਆਰੀ ਕਰ ਰਿਹਾ ਹੈ, ਜੋ ਪਿਛਲੇ ਸਾਲ ਦੇ ਮਾਡਲ ਦੇ ਮੁਕਾਬਲੇ ਕਾਫੀ ਸ਼ਾਨਦਾਰ ਅਪਗ੍ਰੇਡ ਲੈ ਕੇ ਆ ਸਕਦਾ ਹੈ।

ਹਾਲੀਆ ਰਿਪੋਰਟਾਂ ਦੱਸਦੀਆਂ ਹਨ ਕਿ ਐਪਲ iPhone 16e ਦਾ ਅਗਲਾ ਮਾਡਲ ਫਰਵਰੀ ਦੇ ਅਖੀਰ ਤੱਕ ਲਾਂਚ ਕਰ ਸਕਦਾ ਹੈ। ਹਾਲਾਂਕਿ ਅਜੇ ਵੀ ਇਹ ਸਵਾਲ ਬਣਿਆ ਹੋਇਆ ਹੈ ਕਿ ਕੀ ਨਵਾਂ iPhone 17e ਵੱਡੇ ਅਪਗ੍ਰੇਡ ਲਿਆਵੇਗਾ? ਅਤੇ ਜੇਕਰ ਕੁਝ ਨਵਾਂ ਆਵੇਗਾ ਤਾਂ ਐਪਲ ਇਸ ਸਾਲ ਕੀ ਵੱਖਰਾ ਕਰੇਗਾ? ਆਓ ਸਭ ਕੁਝ ਜਾਣਦੇ ਹਾਂ...

ਕਦੋਂ ਤੱਕ ਲਾਂਚ ਹੋਵੇਗਾ iPhone 17e?

ਇਨੀਂ ਦਿਨੀਂ ਇੰਟਰਨੈੱਟ 'ਤੇ iPhone 17e ਨੂੰ ਲੈ ਕੇ ਕਾਫੀ ਚਰਚਾਵਾਂ ਚੱਲ ਰਹੀਆਂ ਹਨ। ਬਲੂਮਬਰਗ ਦੀ ਤਾਜ਼ਾ ਰਿਪੋਰਟ ਵਿੱਚ ਦਾਅਵਾ ਕੀਤਾ ਗਿਆ ਹੈ ਕਿ ਲਾਂਚਿੰਗ ਬੱਸ ਕੁਝ ਹੀ ਦਿਨ ਦੂਰ ਹੈ। ਰਿਪੋਰਟਾਂ ਤੋਂ ਪਤਾ ਲੱਗਦਾ ਹੈ ਕਿ ਐਪਲ, ਗੂਗਲ ਦੇ Pixel 10a ਲਾਂਚ ਕਰਨ ਦੇ ਇੱਕ ਦਿਨ ਬਾਅਦ ਯਾਨੀ 19 ਫਰਵਰੀ ਨੂੰ ਇੱਕ ਪ੍ਰੈੱਸ ਰਿਲੀਜ਼ ਰਾਹੀਂ iPhone 17e ਲਾਂਚ ਕਰ ਸਕਦਾ ਹੈ।

ਹਾਲਾਂਕਿ ਦੂਜੇ ਪਾਸੇ ਐਪਲ ਨੇ ਅਜੇ ਤੱਕ iPhone 17e ਦੇ ਲਾਂਚ ਨੂੰ ਲੈ ਕੇ ਕੁਝ ਵੀ ਪੱਕਾ (Confirm) ਨਹੀਂ ਕੀਤਾ ਹੈ। ਪਿਛਲੇ ਸਾਲ ਦਾ iPhone 16e ਫਰਵਰੀ ਦੇ ਅੱਧ ਵਿੱਚ ਇੱਕ ਪ੍ਰੈੱਸ ਰਿਲੀਜ਼ ਰਾਹੀਂ ਹੀ ਲਾਂਚ ਹੋਇਆ ਸੀ, ਇਸ ਲਈ ਉਮੀਦ ਹੈ ਕਿ ਐਪਲ iPhone 17e ਨੂੰ ਵੀ ਇਸੇ ਤਰ੍ਹਾਂ ਪੇਸ਼ ਕਰ ਸਕਦਾ ਹੈ।

iPhone 17e ਦੀ ਕੀਮਤ ਕਿੰਨੀ ਹੋਵੇਗੀ?

ਪਿਛਲੇ ਸਾਲ iPhone 16e ਦੇ ਲਾਂਚ ਦੇ ਨਾਲ ਐਪਲ ਨੇ ਡਿਵਾਈਸ ਦੀ ਰਿਟੇਲ ਕੀਮਤ ਵਧਾ ਦਿੱਤੀ ਸੀ। ਭਾਰਤ ਵਿੱਚ ਮੌਜੂਦਾ iPhone 16e ਦੀ ਕੀਮਤ 59,900 ਰੁਪਏ ਹੈ ਅਤੇ ਉਮੀਦ ਹੈ ਕਿ ਨਵਾਂ iPhone 17e ਵੀ ਇਸੇ ਕੀਮਤ 'ਤੇ ਲਾਂਚ ਹੋਵੇਗਾ। ਹਾਲਾਂਕਿ ਇਸ ਦੀ ਕੀਮਤ ਜ਼ਿਆਦਾ ਵੀ ਹੋ ਸਕਦੀ ਹੈ।

iPhone 17e ਵਿੱਚ ਕੀ-ਕੀ ਖੂਬੀਆਂ ਹੋਣਗੀਆਂ?

iPhone 17e ਵਿੱਚ ਇਸ ਵਾਰ ਕਈ ਅਪਗ੍ਰੇਡ ਦੇਖਣ ਨੂੰ ਮਿਲ ਸਕਦੇ ਹਨ:

ਡਿਜ਼ਾਈਨ: ਜਿੱਥੇ iPhone 16e ਦਾ ਫਰੰਟ ਡਿਜ਼ਾਈਨ iPhone 14 ਵਰਗਾ ਸੀ, ਉੱਥੇ ਹੀ ਐਪਲ ਇਸ ਵਾਰ iPhone 17e ਨੂੰ ਰੀ-ਡਿਜ਼ਾਈਨ ਕਰ ਸਕਦਾ ਹੈ।

ਡਾਇਨਾਮਿਕ ਆਈਲੈਂਡ: ਨਵੇਂ iPhone 17e ਵਿੱਚ ਆਖਿਰਕਾਰ ਇੱਕ ਡਾਇਨਾਮਿਕ ਆਈਲੈਂਡ (Dynamic Island) ਕੱਟਆਊਟ ਮਿਲ ਸਕਦਾ ਹੈ, ਜੋ ਮਾਡਰਨ ਆਈਫੋਨਜ਼ ਵਿੱਚ ਮਿਲਦਾ ਹੈ।

ਡਿਸਪਲੇਅ: ਨਵੇਂ ਡਿਵਾਈਸ ਵਿੱਚ 6.1-ਇੰਚ ਦੀ ਡਿਸਪਲੇਅ ਮਿਲ ਸਕਦੀ ਹੈ। ਹਾਲਾਂਕਿ ਅਜੇ ਇਹ ਜਾਣਕਾਰੀ ਨਹੀਂ ਹੈ ਕਿ ਡਿਵਾਈਸ ਵਿੱਚ 'ਪ੍ਰੋ-ਮੋਸ਼ਨ' ਡਿਸਪਲੇਅ ਮਿਲੇਗੀ ਜਾਂ ਨਹੀਂ।