ਕੀ ਸੱਚਮੁੱਚ ਫ਼ੋਨ ਦੇ RAM Boost ਫੀਚਰ ਨਾਲ ਫਾਸਟ ਹੋ ਜਾਂਦੈ ਸਮਾਰਟਫ਼ੋਨ? ਜ਼ਿਆਦਾਤਰ ਲੋਕ ਨਹੀਂ ਜਾਣਦੇ ਸੱਚਾਈ

ਟੈਕਨਾਲੋਜੀ ਡੈਸਕ, ਨਵੀਂ ਦਿੱਲੀ: ਅੱਜਕੱਲ੍ਹ ਲਗਪਗ ਹਰ ਨਵੇਂ ਸਮਾਰਟਫ਼ੋਨ ਵਿੱਚ ਤੁਸੀਂ RAM Boost, Virtual RAM, Extended RAM ਜਾਂ RAM Expansion ਵਰਗੇ ਫੀਚਰਾਂ ਬਾਰੇ ਜ਼ਰੂਰ ਸੁਣਿਆ ਹੋਵੇਗਾ। ਕੰਪਨੀਆਂ ਅਕਸਰ ਬਜਟ ਫ਼ੋਨਾਂ ਵਿੱਚ ਇਸ ਫੀਚਰ ਨੂੰ ਜੋੜ ਕੇ ਵੱਡੇ-ਵੱਡੇ ਦਾਅਵੇ ਕਰਦੀਆਂ ਹਨ ਕਿ ਇਸ ਨੂੰ ਆਨ (On) ਕਰਦੇ ਹੀ ਤੁਹਾਡੇ ਫ਼ੋਨ ਦੀ ਪਰਫਾਰਮੈਂਸ ਬਹੁਤ ਜ਼ਿਆਦਾ ਤੇਜ਼ ਹੋ ਜਾਵੇਗੀ।

ਇਹ ਵੀ ਕਿਹਾ ਜਾਂਦਾ ਹੈ ਕਿ ਇਹ ਫੀਚਰ ਆਨ ਕਰਦੇ ਹੀ ਐਪਸ ਵੀ ਸਮੂਥ ਚੱਲਣ ਲੱਗਦੇ ਹਨ ਅਤੇ ਡਿਵਾਈਸ ਦੇ ਹੈਂਗ ਹੋਣ ਦੀ ਸਮੱਸਿਆ ਵੀ ਲਗਪਗ ਖ਼ਤਮ ਹੋ ਜਾਂਦੀ ਹੈ। ਪਰ ਵੱਡਾ ਸਵਾਲ ਇਹ ਹੈ ਕਿ ਕੀ ਸੱਚਮੁੱਚ RAM Boost ਫੀਚਰ ਫ਼ੋਨ ਨੂੰ ਫਾਸਟ ਬਣਾ ਸਕਦਾ ਹੈ? ਆਓ ਇਸ ਬਾਰੇ ਵਿਸਥਾਰ ਨਾਲ ਜਾਣਦੇ ਹਾਂ...

ਪਹਿਲਾਂ ਸਮਝੋ ਕੀ ਹੈ RAM Boost ਫੀਚਰ?

ਸੌਖੇ ਸ਼ਬਦਾਂ ਵਿੱਚ ਕਹੀਏ ਤਾਂ RAM Boost ਫੀਚਰ ਫ਼ੋਨ ਦੀ ਇੰਟਰਨਲ ਸਟੋਰੇਜ (Internal Storage) ਦੇ ਹੀ ਇੱਕ ਹਿੱਸੇ ਨੂੰ ਵਰਚੁਅਲ ਰੈਮ (Virtual RAM) ਵਜੋਂ ਵਰਤਦਾ ਹੈ। ਯਾਨੀ ਜੇਕਰ ਤੁਹਾਡੇ ਡਿਵਾਈਸ ਵਿੱਚ 6GB ਫਿਜ਼ੀਕਲ ਰੈਮ ਹੈ, ਤਾਂ RAM Boost ਫੀਚਰ ਆਨ ਕਰਨ 'ਤੇ ਸਿਸਟਮ ਸਟੋਰੇਜ ਵਿੱਚੋਂ 2GB ਜਾਂ 4GB ਤੱਕ ਦਾ ਹਿੱਸਾ ਲੈ ਕੇ ਕੁੱਲ ਰੈਮ ਨੂੰ ਵਧਾ ਦਿੰਦਾ ਹੈ। ਅਜਿਹੀ ਸਥਿਤੀ ਵਿੱਚ ਜਦੋਂ ਫ਼ੋਨ ਦੀ ਅਸਲ (Physical) ਰੈਮ ਭਰ ਜਾਂਦੀ ਹੈ, ਤਾਂ ਬੈਕਗ੍ਰਾਊਂਡ ਐਪਸ ਅਤੇ ਕੁਝ ਪ੍ਰੋਸੈਸ ਸਟੋਰੇਜ ਵਿੱਚ ਸ਼ਿਫਟ ਹੋ ਜਾਂਦੇ ਹਨ।

ਕੀ ਸੱਚਮੁੱਚ RAM Boost ਫੀਚਰ ਫ਼ੋਨ ਨੂੰ ਫਾਸਟ ਕਰਦਾ ਹੈ?

ਇਸ ਦਾ ਸਿੱਧਾ ਜਵਾਬ 'ਨਹੀਂ' ਹੈ। ਕਿਉਂਕਿ ਫ਼ੋਨ ਦੀ ਸਪੀਡ ਕਈ ਹੋਰ ਚੀਜ਼ਾਂ (ਜਿਵੇਂ ਪ੍ਰੋਸੈਸਰ) 'ਤੇ ਵੀ ਨਿਰਭਰ ਕਰਦੀ ਹੈ। ਅਜਿਹੇ ਵਿੱਚ RAM Boost ਫੀਚਰ ਨਾਲ ਕੋਈ ਜਾਦੂਈ ਵਾਧਾ ਨਹੀਂ ਹੁੰਦਾ। ਫਿਜ਼ੀਕਲ ਰੈਮ ਦੀ ਸਪੀਡ ਫ਼ੋਨ ਦੀ ਸਟੋਰੇਜ (Storage) ਨਾਲੋਂ ਕਈ ਗੁਣਾ ਜ਼ਿਆਦਾ ਹੁੰਦੀ ਹੈ।

ਇਸ ਲਈ ਸਟੋਰੇਜ ਨੂੰ ਰੈਮ ਵਜੋਂ ਵਰਤਣ ਨਾਲ ਐਪਸ ਤੇਜ਼ੀ ਨਾਲ ਨਹੀਂ ਚੱਲਦੇ, ਸਗੋਂ ਕੁਝ ਮਾਮਲਿਆਂ ਵਿੱਚ ਤਾਂ ਉਹ ਹੋਰ ਵੀ ਸਲੋਅ (Slow) ਹੋ ਸਕਦੇ ਹਨ। ਜੇਕਰ ਤੁਸੀਂ ਹੈਵੀ ਗੇਮਿੰਗ ਜਾਂ ਹਾਈ-ਪਰਫਾਰਮੈਂਸ ਵਾਲੇ ਕੰਮ ਕਰਦੇ ਹੋ, ਤਾਂ ਤੁਹਾਨੂੰ ਇਸ ਫੀਚਰ ਦਾ ਕੋਈ ਖ਼ਾਸ ਫਾਇਦਾ ਨਹੀਂ ਮਿਲੇਗਾ।