ਸਾਵਧਾਨ! ਕੀ ਤੁਸੀਂ ਵੀ ਪੈਟਰੋਲ ਨਾਲ ਸਾਫ਼ ਕਰਦੇ ਹੋ ਗੱਡੀ ਦੇ ਪਾਰਟਸ? ਜਾਣੋ ਕਿਹੜੇ ਹੋ ਸਕਦੈ ਹਨ ਫਾਇਦੇ ਤੇ ਨੁਕਸਾਨ

ਆਟੋ ਡੈਸਕ, ਨਵੀਂ ਦਿੱਲੀ: ਭਾਰਤ ਵਿੱਚ ਵੱਡੀ ਗਿਣਤੀ ਵਿੱਚ ਲੋਕ ਗੱਡੀਆਂ ਦੀ ਵਰਤੋਂ ਕਰਦੇ ਹਨ। ਕਈ ਲੋਕ ਗੱਡੀ ਤਾਂ ਖਰੀਦ ਲੈਂਦੇ ਹਨ ਪਰ ਉਸ ਦੀ ਸਹੀ ਢੰਗ ਨਾਲ ਸਾਂਭ-ਸੰਭਾਲ ਨਹੀਂ ਕਰ ਪਾਉਂਦੇ। ਜਿਸ ਕਾਰਨ ਗੱਡੀ ਵਿੱਚ ਕਈ ਤਰ੍ਹਾਂ ਦੀਆਂ ਮੁਸ਼ਕਲਾਂ ਆ ਜਾਂਦੀਆਂ ਹਨ ਅਤੇ ਉਸਨੂੰ ਠੀਕ ਕਰਵਾਉਣ ਲਈ ਸਰਵਿਸ ਸੈਂਟਰ ਜਾਣਾ ਪੈਂਦਾ ਹੈ। ਉੱਥੇ ਕਈ ਵਾਰ ਮਕੈਨਿਕ ਕੁਝ ਹਿੱਸਿਆਂ (ਪਾਰਟਸ) ਨੂੰ ਚੰਗੀ ਤਰ੍ਹਾਂ ਸਾਫ਼ ਕਰਨ ਲਈ ਪੈਟਰੋਲ ਦੀ ਵਰਤੋਂ ਵੀ ਕਰਦੇ ਹਨ। ਕੀ ਪੈਟਰੋਲ ਨਾਲ ਗੱਡੀ ਦੇ ਪਾਰਟਸ ਸਾਫ਼ ਕਰਨਾ ਸਹੀ ਹੈ, ਜਾਂ ਅਜਿਹਾ ਕਰਨ ਨਾਲ ਹਾਦਸੇ ਦਾ ਖ਼ਤਰਾ ਵੱਧ ਜਾਂਦਾ ਹੈ? ਅਸੀਂ ਤੁਹਾਨੂੰ ਇਸ ਖ਼ਬਰ ਵਿੱਚ ਦੱਸ ਰਹੇ ਹਾਂ।

ਪੈਟਰੋਲ ਨਾਲ ਕਰਦੇ ਹਨ ਸਫ਼ਾਈ

ਕਈ ਵਾਰ ਮਕੈਨਿਕ ਕਾਰ ਦੀ ਸਫ਼ਾਈ ਲਈ ਪੈਟਰੋਲ ਦੀ ਵਰਤੋਂ ਕਰਦੇ ਹਨ। ਇਸ ਤਰੀਕੇ ਨਾਲ ਪੈਟਰੋਲ ਨਾਲ ਪਾਰਟਸ ਨੂੰ ਸਾਫ਼ ਤਾਂ ਕੀਤਾ ਜਾ ਸਕਦਾ ਹੈ, ਪਰ ਇਹ ਪੂਰੀ ਤਰ੍ਹਾਂ ਸੁਰੱਖਿਅਤ ਨਹੀਂ ਹੁੰਦਾ। ਹਾਲਾਂਕਿ, ਜੇਕਰ ਕੋਈ ਸਿਖਲਾਈ ਪ੍ਰਾਪਤ (trained) ਮਕੈਨਿਕ ਇਸ ਤਰ੍ਹਾਂ ਸਫ਼ਾਈ ਕਰਦਾ ਹੈ, ਤਾਂ ਜ਼ਿਆਦਾ ਮੁਸ਼ਕਲ ਨਹੀਂ ਆਉਂਦੀ।

ਕਿਸੇ ਵੀ ਕੈਮੀਕਲ ਦੇ ਮੁਕਾਬਲੇ ਜੇਕਰ ਗੱਡੀ ਦੇ ਕੁਝ ਖਾਸ ਹਿੱਸਿਆਂ ਨੂੰ ਪੈਟਰੋਲ ਨਾਲ ਸਾਫ਼ ਕੀਤਾ ਜਾਵੇ, ਤਾਂ ਇਹ ਇੱਕ ਬਿਹਤਰ ਆਪਸ਼ਨ ਸਾਬਤ ਹੁੰਦਾ ਹੈ। ਪੈਟਰੋਲ ਇੱਕ ਵਧੀਆ 'ਸੌਲਵੈਂਟ' (Solvent) ਹੈ ਜਿਸ ਨਾਲ ਕਿਸੇ ਵੀ ਤਰ੍ਹਾਂ ਦੀ ਗੰਦਗੀ ਨੂੰ ਬਹੁਤ ਆਸਾਨੀ ਨਾਲ ਸਾਫ਼ ਕੀਤਾ ਜਾ ਸਕਦਾ ਹੈ।

ਗਰੀਸ ਵੀ ਹੋ ਜਾਂਦੀ ਹੈ ਸਾਫ਼

ਕਈ ਵਾਰ ਗੱਡੀ ਦੇ ਕਿਸੇ ਖਾਸ ਹਿੱਸੇ 'ਤੇ ਬਹੁਤ ਜ਼ਿਆਦਾ ਗੰਦਗੀ ਜੰਮ ਜਾਂਦੀ ਹੈ, ਜਿਸ ਨੂੰ ਸਾਫ਼ ਕਰਨਾ ਕਾਫ਼ੀ ਮੁਸ਼ਕਲ ਹੁੰਦਾ ਹੈ। ਅਜਿਹੀ ਸਥਿਤੀ ਵਿੱਚ ਜੇਕਰ ਉਸਨੂੰ ਪੈਟਰੋਲ ਨਾਲ ਸਾਫ਼ ਕੀਤਾ ਜਾਵੇ, ਤਾਂ ਉਹ ਬਹੁਤ ਆਸਾਨੀ ਨਾਲ ਸਾਫ਼ ਹੋ ਜਾਂਦੀ ਹੈ। ਪੈਟਰੋਲ ਨਾਲ ਗਰੀਸ, ਤੇਲ ਅਤੇ ਕਾਰਬਨ ਨੂੰ ਵੀ ਆਸਾਨੀ ਨਾਲ ਹਟਾਇਆ ਜਾ ਸਕਦਾ ਹੈ।

ਛੇਤੀ ਸੁੱਕਦਾ ਹੈ

ਕਿਸੇ ਵੀ ਹੋਰ ਤਰੀਕੇ ਦੀ ਸਫ਼ਾਈ ਦੇ ਮੁਕਾਬਲੇ ਜੇਕਰ ਪਾਰਟਸ ਨੂੰ ਪੈਟਰੋਲ ਨਾਲ ਸਾਫ਼ ਕੀਤਾ ਜਾਂਦਾ ਹੈ, ਤਾਂ ਉਹ ਜਲਦੀ ਸੁੱਕ ਜਾਂਦੇ ਹਨ ਅਤੇ ਤੁਰੰਤ ਗੱਡੀ ਵਿੱਚ ਫਿੱਟ ਕੀਤੇ ਜਾ ਸਕਦੇ ਹਨ। ਇਸ ਨਾਲ ਸਮੇਂ ਦੀ ਵੀ ਬੱਚਤ ਹੁੰਦੀ ਹੈ।

ਪੈਟਰੋਲ ਨਾਲ ਸਫ਼ਾਈ ਕਰਨ ਦੇ ਨੁਕਸਾਨ

ਪਾਰਟਸ ਦਾ ਖ਼ਰਾਬ ਹੋਣਾ: ਪੈਟਰੋਲ ਇੱਕ ਬਹੁਤ ਹੀ ਤੇਜ਼ ਪਦਾਰਥ ਹੈ। ਇਸ ਦੀ ਵਰਤੋਂ ਨਾਲ ਗੱਡੀ ਦੇ ਮਹਿੰਗੇ ਹਿੱਸੇ, ਜਿਵੇਂ ਕਿ ਰਬੜ ਜਾਂ ਪਲਾਸਟਿਕ ਦੇ ਪਾਰਟਸ ਖ਼ਰਾਬ ਹੋ ਸਕਦੇ ਹਨ। ਪੈਟਰੋਲ ਇਹਨਾਂ ਚੀਜ਼ਾਂ ਨੂੰ ਕਮਜ਼ੋਰ ਕਰ ਦਿੰਦਾ ਹੈ, ਜਿਸ ਨਾਲ ਉਹਨਾਂ ਦੇ ਟੁੱਟਣ ਜਾਂ ਜਲਦੀ ਖ਼ਰਾਬ ਹੋਣ ਦਾ ਖ਼ਤਰਾ ਵੱਧ ਜਾਂਦਾ ਹੈ।

ਅੱਗ ਲੱਗਣ ਦਾ ਖ਼ਤਰਾ: ਪੈਟਰੋਲ ਬਹੁਤ ਜ਼ਿਆਦਾ ਜਲਣਸ਼ੀਲ ਹੁੰਦਾ ਹੈ। ਸਫ਼ਾਈ ਕਰਦੇ ਸਮੇਂ ਜੇਕਰ ਮਾੜੀ ਜਿਹੀ ਵੀ ਲਾਪਰਵਾਹੀ ਵਰਤੀ ਜਾਵੇ, ਤਾਂ ਭਿਆਨਕ ਅੱਗ ਲੱਗ ਸਕਦੀ ਹੈ, ਜੋ ਕਿਸੇ ਵੱਡੇ ਹਾਦਸੇ ਦਾ ਕਾਰਨ ਬਣ ਸਕਦੀ ਹੈ।

ਸਿਹਤ 'ਤੇ ਮਾੜਾ ਅਸਰ: ਪੈਟਰੋਲ ਦੀ ਗੰਧ (ਧੂੰਏਂ) ਅਤੇ ਇਸ ਦੇ ਸੰਪਰਕ ਵਿੱਚ ਆਉਣ ਨਾਲ ਸਿਹਤ ਸੰਬੰਧੀ ਮੁਸ਼ਕਲਾਂ ਹੋ ਸਕਦੀਆਂ ਹਨ, ਜਿਵੇਂ ਕਿ ਸਾਹ ਲੈਣ ਵਿੱਚ ਤਕਲੀਫ਼, ਚੱਕਰ ਆਉਣਾ ਜਾਂ ਚਮੜੀ 'ਤੇ ਜਲਣ ਹੋਣਾ। ਇਸ ਲਈ ਪੈਟਰੋਲ ਦੀ ਵਰਤੋਂ ਕਰਦੇ ਸਮੇਂ ਖੁੱਲ੍ਹੀ ਹਵਾ ਅਤੇ ਸੁਰੱਖਿਆ ਉਪਕਰਨਾਂ ਦੀ ਵਰਤੋਂ ਜ਼ਰੂਰੀ ਹੈ।

ਵਾਤਾਵਰਣ ਨੂੰ ਨੁਕਸਾਨ: ਪੈਟਰੋਲ ਦੀ ਵਰਤੋਂ ਵਾਤਾਵਰਣ ਲਈ ਵੀ ਹਾਨੀਕਾਰਕ ਹੈ। ਇਸ ਦਾ ਰਿਸਾਅ ਮਿੱਟੀ ਅਤੇ ਪਾਣੀ ਦੇ ਸਰੋਤਾਂ ਨੂੰ ਪ੍ਰਦੂਸ਼ਿਤ ਕਰ ਸਕਦਾ ਹੈ, ਜੋ ਕੁਦਰਤੀ ਸੰਤੁਲਨ ਲਈ ਖ਼ਤਰਾ ਹੈ।