TATA Motors ਦੀਆਂ ਗੱਡੀਆਂ ਇਸ ਤਰੀਕ ਤੋਂ ਹੋਣਗੀਆਂ ਮਹਿੰਗੀਆਂ, ਜਾਣੋ ਵਜ੍ਹਾ ਤੇ ਕਿੰਨੀ ਵਧੇਗੀ ਕੀਮਤ

ਆਟੋ ਡੈਸਕ, ਨਵੀਂ ਦਿੱਲੀ: ਟਾਟਾ ਮੋਟਰਜ਼ ਪੈਸੈਂਜਰ ਵਹੀਕਲਜ਼ ਨੇ ਭਾਰਤੀ ਬਾਜ਼ਾਰ ਵਿੱਚ ਵੇਚੀਆਂ ਜਾਣ ਵਾਲੀਆਂ ਇੰਟਰਨਲ ਕੰਬਸ਼ਨ ਇੰਜਣ (ICE) ਅਤੇ ਇਲੈਕਟ੍ਰਿਕ ਗੱਡੀਆਂ (EVs) ਦੀਆਂ ਕੀਮਤਾਂ ਵਧਾਉਣ ਦਾ ਐਲਾਨ ਕੀਤਾ ਹੈ। 1 ਜੁਲਾਈ 2026 ਤੋਂ ਇਨ੍ਹਾਂ ਮਾਡਲਾਂ ਦੀਆਂ ਕੀਮਤਾਂ ਵਿੱਚ 1.5 ਫ਼ੀਸਦੀ ਤੱਕ ਦਾ ਵਾਧਾ ਕੀਤਾ ਜਾਵੇਗਾ। ਦੱਸ ਦੇਈਏ ਕਿ ਨਵੀਂਆਂ ਕੀਮਤਾਂ ਦਾ ਐਲਾਨ 1 ਤਰੀਕ ਨੂੰ ਹੀ ਕੀਤਾ ਜਾਵੇਗਾ।

ਕਿਉਂ ਵਧੀਆਂ ਕੀਮਤਾਂ?

ਕੰਪਨੀ ਨੇ ਲਾਗਤ ਖ਼ਰਚੇ ਵਿੱਚ ਵਾਧੇ ਅਤੇ ਮਹਿੰਗਾਈ ਨੂੰ ਇਸ ਕੀਮਤ ਵਾਧੇ ਦੀ ਮੁੱਖ ਵਜ੍ਹਾ ਦੱਸਿਆ ਹੈ। ਕੰਪਨੀ ਵੱਲੋਂ ਇਹ ਕਿਹਾ ਗਿਆ ਹੈ ਕਿ ਲਾਗਤ ਖ਼ਰਚ ਵਿੱਚ ਵਾਧੇ ਅਤੇ ਲਗਾਤਾਰ ਵਧ ਰਹੇ ਮਹਿੰਗਾਈ ਦੇ ਦਬਾਅ ਦੇ ਅਸਰ ਨੂੰ ਕੁਝ ਘੱਟ ਕਰਨ ਲਈ ਕੀਮਤਾਂ ਵਿੱਚ ਇਹ ਬਦਲਾਅ ਕੀਤਾ ਜਾ ਰਿਹਾ ਹੈ। ਹਾਲਾਂਕਿ, TMPV ਇਸ ਵਧੀ ਹੋਈ ਲਾਗਤ ਦਾ ਇੱਕ ਹਿੱਸਾ ਖ਼ੁਦ ਬਰਦਾਸ਼ਤ ਕਰ ਰਹੀ ਹੈ।

ਵੇਰੀਐਂਟ ਦੇ ਹਿਸਾਬ ਨਾਲ ਵਧਣਗੇ ਭਾਅ

TATA Motors ਨੇ ਇਹ ਵੀ ਸਾਫ਼ ਕੀਤਾ ਹੈ ਕਿ ਕੀਮਤਾਂ ਵਿੱਚ ਵਾਧਾ ਵੱਖ-ਵੱਖ ਮਾਡਲ ਅਤੇ ਵੇਰੀਐਂਟ ਦੇ ਆਧਾਰ 'ਤੇ ਵੱਖੋ-ਵੱਖਰਾ ਹੋਵੇਗਾ ਤਾਂ ਜੋ ਹਰ ਗੱਡੀ ਦੀ ਵੈਲਿਊ ਬਣੀ ਰਹੇ। ਫਿਲਹਾਲ, ਕੰਪਨੀ ਕੋਲ ਸ਼ੁਰੂਆਤੀ ਹੈਚਬੈਕ ਤੋਂ ਲੈ ਕੇ 7-ਸੀਟਰ SUV ਤੱਕ ਗੱਡੀਆਂ ਦੀ ਇੱਕ ਵੱਡੀ ਰੇਂਜ ਮੌਜੂਦ ਹੈ। ਕੰਪਨੀ ਦੇ ਮੌਜੂਦਾ ਲਾਈਨਅੱਪ ਵਿੱਚ Tiago, Tigor, Punch, Nexon, Sierra ਜਿਹੇ ਮਾਡਲ ਸ਼ਾਮਲ ਹਨ।

ਜੇਕਰ EV (ਇਲੈਕਟ੍ਰਿਕ ਵਹੀਕਲਜ਼) ਦੀ ਗੱਲ ਕਰੀਏ ਤਾਂ ਕੰਪਨੀ ਕੋਲ Punch EV, Nexon EV ਅਤੇ Harrier EV ਹਨ ਅਤੇ ਟਾਟਾ ਦੇਸ਼ ਵਿੱਚ 30 ਜੂਨ ਨੂੰ Sierra EV ਨੂੰ ਲਾਂਚ ਕਰਨ ਦੀ ਯੋਜਨਾ ਬਣਾ ਰਿਹਾ ਹੈ।

ਬਾਕੀ ਕੰਪਨੀਆਂ ਨੇ ਵੀ ਵਧਾਏ ਭਾਅ

ਇਹ ਕਦਮ ਅਜਿਹੇ ਸਮੇਂ ਚੁੱਕਿਆ ਜਾ ਰਿਹਾ ਹੈ ਜਦੋਂ ਆਟੋਮੋਬਾਈਲ ਇੰਡਸਟਰੀ ਵਧਦੀ ਲਾਗਤ ਅਤੇ ਕਰੰਸੀ ਦੇ ਉਤਾਰ-ਚੜ੍ਹਾਅ ਨਾਲ ਜੂਝ ਰਹੀ ਹੈ। TATA Motors ਤੋਂ ਇਲਾਵਾ BMW India, Mercedes-Benz, Maruti Suzuki, Hyundai Motor India ਅਤੇ Nissan India ਜਿਹੀਆਂ ਕੰਪਨੀਆਂ ਨੇ ਵੀ ਹਾਲ ਹੀ ਵਿੱਚ ਆਪਣੀਆਂ ਗੱਡੀਆਂ ਦੀਆਂ ਕੀਮਤਾਂ ਵਿੱਚ ਵਾਧਾ ਕੀਤਾ ਹੈ।

ਦੱਸ ਦੇਈਏ ਕਿ Maruti Suzuki ਨੇ ਭਾਰਤੀ ਬਾਜ਼ਾਰ ਵਿੱਚ ਵਿਕਣ ਵਾਲੀਆਂ ਆਪਣੀਆਂ ਕਾਰਾਂ ਦੀਆਂ ਕੀਮਤਾਂ ਵਿੱਚ 30,000 ਰੁਪਏ ਤੱਕ ਦੇ ਵਾਧੇ ਦਾ ਐਲਾਨ ਕੀਤਾ ਸੀ, ਜੋ ਕਿ 1 ਜੂਨ ਤੋਂ ਲਾਗੂ ਹੋ ਚੁੱਕਾ ਹੈ।