ਕੀ ਤੁਹਾਡੀ ਕਾਰ 'ਚ ਲੱਗ ਸਕਦੀ ਹੈ CNG ਕਿੱਟ? ਲਗਵਾਉਣ ਤੋਂ ਪਹਿਲਾਂ ਜਾਣ ਲਓ ਸਰਕਾਰੀ ਨਿਯਮ ਤੇ ਖਰਚਾ

ਆਟੋ ਡੈਸਕ, ਨਵੀਂ ਦਿੱਲੀ: ਪੈਟਰੋਲ ਦੀਆਂ ਕੀਮਤਾਂ ਵਿੱਚ ਉਛਾਲ ਕਾਰਨ CNG ਕਾਰਾਂ ਦੀ ਮੰਗ ਹੁਣ ਵਧ ਰਹੀ ਹੈ। ਇਸ ਕਾਰਨ ਲੋਕ ਹੁਣ ਆਪਣੀਆਂ ਪੁਰਾਣੀਆਂ ਕਾਰਾਂ ਵਿੱਚ ਵੀ CNG ਕਿੱਟ ਲਗਵਾ ਰਹੇ ਹਨ। ਜੇਕਰ ਤੁਸੀਂ ਵੀ ਆਪਣੀ ਪੈਟਰੋਲ ਕਾਰ ਵਿੱਚ CNG ਕਿੱਟ ਲਗਾਉਣ ਬਾਰੇ ਸੋਚ ਰਹੇ ਹੋ, ਤਾਂ ਕੁਝ ਗੱਲਾਂ ਦਾ ਪਤਾ ਹੋਣਾ ਬਹੁਤ ਜ਼ਰੂਰੀ ਹੈ। ਨਾਲ ਹੀ ਇਹ ਵੀ ਜਾਣਨਾ ਚਾਹੀਦਾ ਹੈ ਕਿ ਕੀ ਤੁਹਾਡੀ ਕਾਰ ਵਿੱਚ CNG ਲੱਗ ਸਕਦੀ ਹੈ?

ਕਾਰ ਦੇ ਭਾਰ ਦਾ ਰੱਖੋ ਧਿਆਨ

ਰਿਪੋਰਟਾਂ ਮੁਤਾਬਕ, ਕੇਂਦਰ ਸਰਕਾਰ ਦੇ ਨਿਯਮਾਂ ਅਨੁਸਾਰ ਤੁਸੀਂ ਸਿਰਫ਼ ਉਨ੍ਹਾਂ ਕਾਰਾਂ ਵਿੱਚ CNG ਕਿੱਟ ਲਗਵਾ ਸਕਦੇ ਹੋ ਜਿਨ੍ਹਾਂ ਦਾ ਭਾਰ 3.5 ਟਨ ਤੋਂ ਘੱਟ ਹੈ। ਇਸ ਦਾ ਮਤਲਬ ਹੈ ਕਿ ਕਿੱਟ ਲਗਵਾਉਣ ਤੋਂ ਪਹਿਲਾਂ ਤੁਹਾਨੂੰ ਉਸ ਦਾ ਸਹੀ ਭਾਰ ਪਤਾ ਹੋਣਾ ਬਹੁਤ ਜ਼ਰੂਰੀ ਹੈ। ਨਾਲ ਹੀ, ਕਾਰ ਲਈ ਉਸੇ CNG ਕਿੱਟ ਦੀ ਵਰਤੋਂ ਕਰੋ ਜਿਸ ਨੂੰ RTO ਨੇ ਮਨਜ਼ੂਰੀ ਦਿੱਤੀ ਹੈ।

ਕਿਸ ਡੀਲਰ ਤੋਂ ਲਗਵਾਈਏ ਕਿੱਟ?

ਜੇਕਰ ਤੁਸੀਂ ਆਪਣੀ ਗੱਡੀ ਵਿੱਚ CNG ਕਿੱਟ ਲਗਵਾਉਣਾ ਚਾਹੁੰਦੇ ਹੋ, ਤਾਂ ਇਸ ਗੱਲ ਦਾ ਧਿਆਨ ਰੱਖੋ ਕਿ ਕਿੱਟ ਹਮੇਸ਼ਾ ਅਥਾਰਾਈਜ਼ਡ (Authorized) ਡੀਲਰ ਤੋਂ ਹੀ ਲਗਵਾਓ। ਇਸ ਤੋਂ ਬਾਅਦ, ਜਦੋਂ ਕਿੱਟ ਲਗਾਉਣ ਦਾ ਕੰਮ ਪੂਰਾ ਹੋ ਜਾਵੇ ਤਾਂ ਡੀਲਰ ਤੋਂ ਉਸ ਦਾ ਬਿੱਲ ਲੈਣਾ ਨਾ ਭੁੱਲੋ। ਇਹ ਤੁਹਾਡੇ ਕੋਲ ਇੱਕ ਜ਼ਰੂਰੀ ਸਬੂਤ ਜਾਂ ਪ੍ਰਮਾਣ ਵਜੋਂ ਰਹੇਗਾ।

ਕਿੰਨਾ ਆਉਂਦਾ ਹੈ ਖਰਚਾ?

ਭਾਰਤ ਵਿੱਚ CNG ਕਿੱਟ ਲਗਵਾਉਣ ਦਾ ਕੁੱਲ ਖਰਚਾ ਆਮ ਤੌਰ 'ਤੇ 35,000 ਤੋਂ 80,000 ਰੁਪਏ ਦੇ ਵਿਚਕਾਰ ਆਉਂਦਾ ਹੈ। ਇਹ ਖਰਚਾ ਇਸ ਗੱਲ 'ਤੇ ਵੀ ਨਿਰਭਰ ਕਰਦਾ ਹੈ ਕਿ ਤੁਹਾਡੀ ਲਗਵਾਈ ਹੋਈ ਕਿੱਟ ਕਿਸ ਬ੍ਰਾਂਡ ਦੀ ਹੈ। ਇਸ ਕੁੱਲ ਖਰਚੇ ਵਿੱਚ ਕਿੱਟ ਦੀ ਕੀਮਤ ਦੇ ਨਾਲ ਕਿੱਟ ਲਗਾਉਣ ਦਾ ਚਾਰਜ (ਇੰਸਟਾਲੇਸ਼ਨ), RTO ਤੋਂ ਮਨਜ਼ੂਰੀ ਦਾ ਖਰਚਾ ਅਤੇ ਇੰਸ਼ੋਰੈਂਸ ਅਪਡੇਟ ਕਰਵਾਉਣ ਦਾ ਖਰਚਾ ਵੀ ਸ਼ਾਮਲ ਹੈ।