ਯੂਰਪੀਅਨ ਫੁੱਟਬਾਲ ’ਚ ਖ਼ਿਤਾਬੀ ਜੰਗ ਹੋਈ ਤੇਜ਼

ਨਵੇਂ ਵਰ੍ਹੇ ਦਾ ਆਗ਼ਾਜ਼ ਹੋ ਗਿਆ ਹੈ ਪਰ ਕਲੱਬ ਫੁੱਟਬਾਲ ਦੀ ਦੁਨੀਆ ਵਿਚ ਸਾਲ ਦਾ ਇਹ ਸਮਾਂ ਸੀਜ਼ਨ ਦੇ ਮੱਧ ਦਾ ਸਮਾਂ ਹੁੰਦਾ ਹੈ ਜਦੋਂ ਹਰੇਕ ਫੁੱਟਬਾਲ ਲੀਗ ਵਿਚ ਅੱਧੇ ਮੈਚ ਖੇਡੇ ਜਾ ਚੁੱਕੇ ਹੁੰਦੇ ਹਨ ਅਤੇ ਇਸ ਸਮੇਂ ਟੀਮਾਂ ਦੀ ਸਥਿਤੀ ਦਾ ਅੰਦਾਜ਼ਾ ਅਤੇ ਸੰਭਾਵਿਤ ਜੇਤੂ ਖ਼ਿਤਾਬ ਜਿੱਤਣ ਦੇ ਦਾਅਵੇਦਾਰਾਂ ਬਾਰੇ ਵੀ ਪਤਾ ਲੱਗਣਾ ਸ਼ੁਰੂ ਹੋ ਜਾਂਦਾ ਹੈ। ਦੁਨੀਆ ਦੀਆਂ ਚੋਟੀ ਦੀਆਂ ਪੰਜ ਲੀਗਾਂ-ਇੰਗਲੈਂਡ ਦੀ ਪ੍ਰੀਮੀਅਰ ਲੀਗ, ਸਪੇਨ ਦੀ ‘ਲਾ ਲੀਗਾ’, ਇਟਲੀ ਦੀ ‘ਸੀਰੀਆ ਆ’, ਜਰਮਨੀ ਦੀ ‘ਬੁੰਡੇਸਲੀਗਾ’, ਤੇ ਫਰਾਂਸ ਦੀ ‘ਲੀਗ 1’ ਦੀ ਸਥਿਤੀ ਵਿਚ ਐਤਕੀਂ ਨਾਟਕੀ ਬਦਲਾਅ ਆ ਰਹੇ ਹਨ। ਸੋ ਜਨਵਰੀ ਮਹੀਨੇ ਕਲੱਬ ਫੁੱਟਬਾਲ ਦੇ ਸੀਜ਼ਨ ਦੇ ਅੱਧ ਸਮੇਂ ਤੱਕ ਦੁਨੀਆ ਦੀਆਂ ਚੋਟੀ ਦੀਆਂ ਫੁੱਟਬਾਲ ਲੀਗਾਂ ਵਿਚ ਟੀਮਾਂ ਦੀ ਕੀ ਸਥਿਤੀ ਹੈ ਆਓ ਇਸ ਬਾਰੇ ਜਾਣਦੇ ਹਾਂ।

ਦੁਨੀਆ ਦੀ ਸਭ ਤੋਂ ਪ੍ਰਸਿੱਧ ਅਤੇ ਰੋਮਾਂਚਕ ਲੀਗ, ਇੰਗਲੈਂਡ ਦੀ ‘ਪ੍ਰੀਮੀਅਰ ਲੀਗ’ ਵਿਚ, ਜਨਵਰੀ 2026 ਦੀ ਸ਼ੁਰੂਆਤ ਮੌਕੇ ਅੰਕ ਸੂਚੀ ਪਿਛਲੇ ਕਈ ਦਹਾਕਿਆਂ ਵਿਚ ਆਪਣੇ ਪਹਿਲੇ ਖ਼ਿਤਾਬ ਵੱਲ ਆਰਸਨਲ ਕਲੱਬ ਦੇ ਮਜ਼ਬੂਤ ਦਾਅਵੇ ਦੀ ਨਿਰੰਤਰਤਾ ਨੂੰ ਦਰਸਾ ਰਹੀ ਹੈ। ਆਰਸਨਲ ਕਲੱਬ ਨੇ 20 ਮੈਚਾਂ ਵਿੱਚੋਂ 48 ਅੰਕਾਂ ਨਾਲ ਸਿਖ਼ਰ ’ਤੇ ਮਜ਼ਬੂਤੀ ਬਣਾਈ ਹੋਈ ਹੈ ਅਤੇ ਹੈੱਡ ਕੋਚ, ਮਿਕੇਲ ਆਰਟੇਟਾ ਦੇ ਮਾਰਗਦਰਸ਼ਨ ਵਿਚ ਸ਼ਾਨਦਾਰ ਇਕਸਾਰਤਾ ਅਤੇ ਲਚਕੀਲਾਪਣ ਦਾ ਪ੍ਰਦਰਸ਼ਨ ਕੀਤਾ ਹੈ। ਆਰਸਨਲ ਤੋਂ ਠੀਕ ਬਾਅਦ, ਮੈਨਚੈਸਟਰ ਸਿਟੀ, ਘਰੇਲੂ ਅਤੇ ਮਹਾਦੀਪੀ ਮੁਕਾਬਲਿਆਂ ਦੋਵਾਂ ਵਿਚ ਦਾਅਵੇਦਾਰ ਹੋਣ ਲਈ ਪੂਰਾ ਜ਼ੋਰ ਲਾ ਰਿਹਾ ਕਲੱਬ ਹੈ। ਇਸੇ ਤਰ੍ਹਾਂ, ਐਸਟਨ ਵਿਲਾ ਕਲੱਬ ਸਭ ਨੂੰ ਹੈਰਾਨ ਕਰਦੇ ਹੋਏ 42 ਅੰਕਾਂ ਨਾਲ ਦਾਅਵੇਦਾਰ ਬਣਿਆ ਹੋਇਆ ਹੈ, ਜਿਸ ਬਾਰੇ ਬਹੁਤ ਘੱਟ ਲੋਕਾਂ ਨੇ ਭਵਿੱਖਬਾਣੀ ਕੀਤੀ ਹੋਵੇਗੀ। ਉਨਾਈ ਐਮਰੀ ਦੀ ਅਗਵਾਈ ਵਿਚ ਐਸਟਨ ਵਿਲਾ ਦਾ ਪੁਨਰ-ਉਥਾਨ ਇਕ ਸ਼ਕਤੀਸ਼ਾਲੀ ਘਰੇਲੂ ਰਿਕਾਰਡ ਅਤੇ ਚੋਟੀ ਦੇ ਵਿਰੋਧੀਆਂ ਦੇ ਵਿਰੁੱਧ ਸਖ਼ਤ ਨਤੀਜੇ ਪ੍ਰਾਪਤ ਕਰਨ ਦੀ ਯੋਗਤਾ ’ਤੇ ਸਥਾਪਤ ਹੈ। ਮੌਜੂਦਾ ਜੇਤੂ ਲਿਵਰਪੂਲ ਫੁੱਟਬਾਲ ਕਲੱਬ 33 ਅੰਕਾਂ ਨਾਲ ਚੌਥੇ ਸਥਾਨ ’ਤੇ ਹੈ ਅਤੇ ਉਨ੍ਹਾਂ ਨੇ ਇਸ ਸੀਜ਼ਨ ਵਿਚ ਕਈ ਮੌਕਿਆਂ ’ਤੇ ਕੀਮਤੀ ਅੰਕ ਗੁਆਏ ਹਨ। ਚੈਲਸੀ ਅਤੇ ਮੈਨਚੈਸਟਰ ਯੂਨਾਈਟਿਡ ਵਰਗੇ ਸਥਾਪਿਤ ਕਲੱਬ ਲਗਾਤਾਰ ਉੱਪਰ-ਹੇਠਾਂ ਹੋ ਰਹੇ ਹਨ, ਜਦਕਿ ਅੰਕ ਸੂਚੀ ਦੇ ਹੇਠਲੇ ਸਥਾਨਾਂ ਵੱਲ ਵੁਲਵਰਹੈਂਪਟਨ ਵਾਂਡਰਰਜ਼ ਅਤੇ ਵੈਸਟ ਹੈਮ ਵਰਗੀਆਂ ਟੀਮਾਂ ਲੀਗ ’ਚ ਬਣੇ ਰਹਿਣ ਲਈ ਸੰਘਰਸ਼ ਕਰ ਰਹੀਆਂ ਹਨ। ਕੁੱਲ ਮਿਲਾ ਕੇ, ‘ਪ੍ਰੀਮੀਅਰ ਲੀਗ’ ਵਿਚ ਆਰਸਨਲ ਦੀ ਟੀਮ ਸਭ ਤੋਂ ਮਜ਼ਬੂਤ ਲੱਗ ਰਹੀ ਹੈ ਜੋ ਕਿ ਸਾਲ 2004 ਤੋਂ ਬਾਅਦ ਆਪਣਾ ਪਹਿਲਾ ਖ਼ਿਤਾਬ ਜਿੱਤਣ ਵੱਲ ਵੱਧ ਰਹੀ ਨਜ਼ਰ ਆਉਂਦੀ ਹੈ।

ਸਪੇਨ ਦੀ ਘਰੇਲੂ ਲੀਗ, ‘ਲਾ ਲੀਗਾ’ ਵਿਚ ਬਾਰਸੀਲੋਨਾ ਅੱਗੇ ਚੱਲ ਰਿਹਾ ਹੈ, ਲਗਪਗ 20 ਮੈਚਾਂ ਤੋਂ ਬਾਅਦ 49 ਅੰਕਾਂ ਨਾਲ ਟੇਬਲ ਦੇ ਸਿਖਰ ’ਤੇ ਹੈ ਅਤੇ ਇਕ ਕੁਸ਼ਲ ਰੱਖਿਆ ਅਤੇ ਸ਼ਾਨਦਾਰ ਹਮਲਾਵਰ ਅੰਦਾਜ਼ ਤੋਂ ਬਾਅਦ ਖ਼ਿਤਾਬ ਵੱਲ ਵਾਪਸੀ ਕਰ ਰਿਹਾ ਹੈ। ਰਿਆਲ ਮੈਡ੍ਰਿਡ, 42 ਅੰਕਾਂ ਨਾਲ ਦੂਜੇ ਸਥਾਨ ’ਤੇ ਹਨ, ਜੋ ਇਹ ਦਰਸਾਉਂਦਾ ਹੈ ਕਿ ਇਨ੍ਹਾਂ ਦੋਵਾਂ ਕਲੱਬਾਂ ਵਿਚਕਾਰ ਇਤਿਹਾਸਕ ਦੁਸ਼ਮਣੀ ਸਪੈਨਿਸ਼ ਖ਼ਿਤਾਬ ਦੀ ਦੌੜ ਨੂੰ ਪਰਿਭਾਸ਼ਿਤ ਕਰਦੀ ਰਹਿੰਦੀ ਹੈ। ਉਨ੍ਹਾਂ ਦੇ ਨੇੜੇ, ਵਿਲਾਰੀਅਲ ਅਤੇ ਐਟਲੇਟਿਕੋ ਮੈਡ੍ਰਿਡ ਕ੍ਰਮਵਾਰ ਤੀਜੇ ਅਤੇ ਚੌਥੇ ਸਥਾਨ ’ਤੇ ਹਨ, ਜੋ ਉਪਰੋਕਤ ਰਵਾਇਤੀ ਟੀਮਾਂ ਤੋਂ ਪਰੇ ਮੁਕਾਬਲੇ ਦੀ ਡੂੰਘਾਈ ਦਾ ਪ੍ਰਦਰਸ਼ਨ ਕਰ ਰਹੇ ਹਨ। ਵਿਲਾਰੀਅਲ ਦੇ ਇਸ ਸੀਜ਼ਨ ਦੇ ਮਜ਼ਬੂਤ ਲੈਅ ਨੇ ਉਨ੍ਹਾਂ ਨੂੰ ਯੂਰਪੀਅਨ ਸਥਾਨਾਂ ਲਈ ਮੁਕਾਬਲੇ ਵਿਚ ਰਹਿ ਕੇ ਬਹੁਤਿਆਂ ਨੂੰ ਹੈਰਾਨ ਕਰ ਦਿੱਤਾ ਹੈ ਜਦਕਿ ਡਿਏਗੋ ਸਿਮਿਓਨ ਦੇ ਅਧੀਨ ਐਟਲੇਟਿਕੋ ਟੀਮ ਦੀ ਦ੍ਰਿੜਤਾ ਉਨ੍ਹਾਂ ਨੂੰ ਚੈਂਪੀਅਨਜ਼ ਲੀਗ ਕੁਆਲੀਫਾਈ ਕਰਨ ਲਈ ਦੌੜ ਵਿਚ ਰੱਖਦੀ ਹੈ। ਟੇਬਲ ਦੇ ਮੱਧ ਸਥਾਨਾਂ ਲਈ ਲੜਾਈ ਸਖ਼ਤ ਹੋ ਰਹੀ ਹੈ, ਜਿੱਥੇ ਰੀਅਲ ਬੇਟਿਸ, ਰੀਅਲ ਸੋਸੀਏਡਾਡ ਅਤੇ ਹੋਰ ਟੀਮਾਂ ਸਥਿਤੀ ਲਈ ਜੂਝ ਰਹੀਆਂ ਹਨ ਅਤੇ ਸਿਖਰਲੇ ਪੱਧਰ ’ਤੇ ਪਹੁੰਚਣ ਦੀ ਕੋਸ਼ਿਸ਼ ਕਰ ਰਹੀਆਂ ਹਨ।

ਇਟਲੀ ਦੀ ਲੀਗ ‘ਸੀਰੀ-ਆ’ ਵਿਚ, ਜਨਵਰੀ ਦੇ ਸ਼ੁਰੂ ਤੱਕ, ਏ.ਸੀ ਮਿਲਾਨ ਕਲੱਬ 17 ਖੇਡਾਂ ਵਿੱਚੋਂ 38 ਅੰਕਾਂ ਨਾਲ ਸਿਖ਼ਰ ’ਤੇ ਬਣਿਆ ਹੋਇਆ ਹੈ, ਜੋ ਕਿ ਇਕਸਾਰਤਾ ਅਤੇ ਮਜ਼ਬੂਤ ਰੱਖਿਆਤਮਕ ਬੁਨਿਆਦ ਦੁਆਰਾ ਚਿੰਨ੍ਹਤ ਮੁਹਿੰਮ ਨੂੰ ਦਰਸਾਉਂਦਾ ਹੈ। ਉਨ੍ਹਾਂ ਦੇ ਨੇੜੇ ਇੰਟਰ ਮਿਲਾਨ ਹੈ, 36 ਅੰਕਾਂ ਦੇ ਨਾਲ ਸਿਰਫ਼ ਦੋ ਅੰਕ ਪਿੱਛੇ ਹੈ ਅਤੇ ਇਤਾਲਵੀ ਫੁੱਟਬਾਲ ਦੇ ਸਿਖਰ ’ਤੇ ਇਨ੍ਹਾਂ ਇੱਕੋ ਸ਼ਹਿਰ ਮਿਲਾਨ ਦੇ ਇਨਾਂ ਦੋ ਵਿਰੋਧੀ ਕਲੱਬਾਂ ਵਿਚਕਾਰ ਇਤਿਹਾਸਕ ਮੁਕਾਬਲੇ ਨੂੰ ਦਰਸਾ ਰਿਹਾ ਹੈ। ਮੌਜੂਦਾ ਚੈਂਪੀਅਨ ਨੈਪੋਲੀ, ਵੀ 34 ਅੰਕਾਂ ਦੇ ਨਾਲ ਅੰਕ ਸੂਚੀ ‘ਚ ਮਜ਼ਬੂਤੀ ਨਾਲ ਬਣਿਆ ਹੋਇਆ ਹੈ, ਜੋ ਇਤਾਲਵੀ ਫੁੱਟਬਾਲ ਵਿਚ ਕੁਲੀਨ ਵਰਗ ਵਿਚ ਆਪਣੀ ਨਿਰੰਤਰ ਮੌਜੂਦਗੀ ਅਤੇ ਖ਼ਿਤਾਬ ਦਾ ਬਚਾਅ ਕਰਨ ਦੇ ਦਬਾਅ ਦੇ ਅਨੁਕੂਲ ਹੋਣ ਵਿਚ ਉਨ੍ਹਾਂ ਦੀ ਲਚਕਤਾ ਨੂੰ ਉਜਾਗਰ ਕਰਦਾ ਹੈ। ਰੋਮਾ ਅਤੇ ਜੁਵੈਂਟਸ ਵਰਗੇ ਕਲੱਬ ਵੀ ਮੁਕਾਬਲੇ ਲਈ ਪੂਰਾ ਜ਼ੋਰ ਲਾ ਰਹੇ ਹਨ। ਲੀਗ ਵਿਚ ਬਣੇ ਰਹਿਣ ਲਈ ਹੇਠਲੇ ਸਥਾਨਾਂ ’ਤੇ ਹੋ ਰਹੇ ਸੰਘਰਸ਼ਾਂ ਵਿਚ ਕੈਗਲਿਆਰੀ, ਜੇਨੋਆ ਅਤੇ ਫਿਓਰੇਂਟੀਨਾ ਵਰਗੀਆਂ ਟੀਮਾਂ ਸ਼ਾਮਲ ਹਨ, ਜੋ ਆਪਣੇ ਆਪ ਨੂੰ ‘ਰੈਲੀਗੇਸ਼ਨ ਜ਼ੋਨ’ ਤੋਂ ਬਚਣ ਲਈ ਜੂਝਦੀਆਂ ਹੋਈਆਂ ਪਾਉਂਦੀਆਂ ਹਨ। ਇਤਾਲਵੀ ਲੀਗ ਵਿਚ ਐਤਕੀਂ ਫਿਲਹਾਲ ਹੁਣ ਤੱਕ ਕੋਈ ਵੀ ਕਲੱਬ ਅਜੇ ਤੱਕ ਮੁਕੰਮਲ ਦਬਦਬਾ ਨਹੀਂ ਬਣਾ ਸਕਿਆ ਭਾਵ ਕਾਫ਼ੀ ਉਤਰਾਅ-ਚੜਾਅ ਆਉਂਦੇ ਰਹਿਣ ਦੀ ਸੰਭਾਵਨਾ ਹੈ।

ਜਰਮਨੀ ਦੇਸ਼ ਦੀ ਲੀਗ, ‘ਬੁੰਡੇਸਲੀਗਾ’ ਵੱਲ ਵੇਖੀਏ ਤਾਂ ਓਥੇ, ਬਾਈਰਨ ਮਿਊਨਿਖ ਕਲੱਬ 41 ਅੰਕਾਂ ਨਾਲ ਬੁੰਡੇਸਲੀਗਾ ਵਿਚ ਆਰਾਮ ਨਾਲ ਚੋਟੀ ’ਤੇ ਡਟਿਆ ਹੋਇਆ ਹੈ ਅਤੇ ਇਹ ਦਰਸਾਉਂਦਾ ਹੈ ਕਿ ਉਹ ਜਰਮਨ ਫੁੱਟਬਾਲ ਦੇ ਮਿਆਰੀ ਧਾਰਕ ਕਿਉਂ ਬਣੇ ਹੋਏ ਹਨ। ਖ਼ਾਸ ਗੱਲ ਇਹ ਵੀ ਹੈ ਕਿ ਬਾਈਰਨ ਮਿਊਨਿਖ ਇਸ ਸਮੇਂ ਬੁੰਡੇਸਲੀਗਾ ਵਿਚ ਅਜੇਤੂ ਚੱਲ ਰਿਹਾ ਹੈ। ਉਨ੍ਹਾਂ ਨੇ ਹਾਰ ਦਾ ਸਾਹਮਣਾ ਕੀਤੇ ਬਿਨਾਂ ਕਾਫ਼ੀ ਮੈਚ ਖੇਡੇ ਹਨ ਅਤੇ ਆਪਣੇ ਲੀਗ ਰਿਕਾਰਡ ਵਿਚ ਮਜ਼ਬੂਤ ਅਜੇਤੂ ਰਿਕਾਰਡ ਦੇ ਨਾਲ ਸਿਖ਼ਰ ’ਤੇ ਪਹੁੰਚੇ ਹੋਏ ਹਨ। ਦੂਜੇ ਸਥਾਨ ’ਤੇ ਬਰੂਸ਼ੀਆ ਡੌਰਟਮੰਡ 32 ਅੰਕਾਂ ਨਾਲ ਮੌਜੂਦ ਹੈ, ਜੋ ਕਿ ਨੌਜਵਾਨ ਖਿਡਾਰੀਆਂ ਦੇ ਉਤਸ਼ਾਹ ਅਤੇ ਰਣਨੀਤਕ ਲਚਕਤਾ ਵਿਚ ਜੜ੍ਹਾਂ ਵਾਲੀ ਠੋਸ ਟਾਈਟਲ ਚੁਣੌਤੀ ਦੀ ਪੇਸ਼ ਕਰ ਸਕਦੇ ਹਨ। ਇਨ੍ਹਾਂ ਦੋਵਾਂ ਦੇ ਬਾਅਦ, ਬਾਇਰ ਲੇਵਰਕੁਸੇਨ ਅਤੇ ਆਰ.ਬੀ ਲਾਈਪਜ਼ਿਗ ਅੱਗਲੇ ਸਥਾਨਾਂ ’ਤੇ ਕਾਬਜ਼ ਹਨ। ਸੀਜ਼ਨ ਦੇ ਅੱਗੇ ਵਧਣ ਦੇ ਨਾਲ ਚੈਂਪੀਅਨਜ਼ ਲੀਗ ਅਤੇ ਯੂਰੋਪਾ ਲੀਗ ਸਥਾਨਾਂ ਲਈ ਵਿਸ਼ਾਲ ਅਤੇ ਦਿਲਚਸਪ ਦੌੜ ਇਸ ਲੀਗ ਜ਼ਰੀਏ ਸਾਹਮਣੇ ਆਵੇਗੀ।

ਓਧਰ, ਫਰਾਂਸ ਦੀ ਘਰੇਲੂ ਲੀਗ, ‘ਲੀਗ-1’ ਵਿਚ ਸਭ ਨੂੰ ਹੈਰਾਨ ਕਰਦੇ ਹੋਏ ਆਰ.ਸੀ ਲੈਂਸ ਕਲੱਬ ਨੇ 17 ਮੈਚਾਂ ਵਿੱਚੋਂ 40 ਅੰਕਾਂ ਨਾਲ ਹੈਰਾਨ ਕਰਦੀ ਪਰ ਪੂਰੀ ਤਰ੍ਹਾਂ ਹੱਕਦਾਰ ਲੀਡ ਹਾਸਲ ਕੀਤੀ ਹੈ ਅਤੇ ਇਕ ਸਮੂਹਿਕ ਤਾਕਤ ਅਤੇ ਰਣਨੀਤਕ ਅਨੁਸ਼ਾਸਨ ਦਾ ਪ੍ਰਦਰਸ਼ਨ ਕਰਦੇ ਹੋਏ, ਉਹਨਾਂ ਨੇ ਆਪਣੇ ਆਪ ਨੂੰ ਰਵਾਇਤੀ ਤੌਰ ’ਤੇ ਪ੍ਰਭਾਵਸ਼ਾਲੀ ਟੀਮ ਪੈਰਿਸ ਸੇਂਟ-ਜਰਮੇਨ (ਪੀ.ਐਸ.ਜੀ) ਤੋਂ ਅੱਗੇ ਰੱਖਿਆ ਹੈ। ਪੀਐੱਸਜੀ 36 ਅੰਕਾਂ ਨਾਲ ਫਿਲਹਾਲ ਪਿੱਛੇ ਹੈ ਪਰ ਪੈਰਿਸ ਟੀਮ ਦੀ ਸਟਾਰ ਪਾਵਰ ਅਤੇ ਹਮਲਾਵਰ ਖਿਡਾਰੀ ਉਹਨਾਂ ਨੂੰ ਇਸੇ ਕਰਕੇ ਖ਼ਿਤਾਬ ਦੇ ਪੱਖੋਂ ਮਜ਼ਬੂਤੀ ਨਾਲ ਸ਼ਾਮਲ ਰੱਖਦੇ ਹਨ। ਮਾਰਸੇਈ ਅਤੇ ਲਿਲ ਕਲੱਬ 32-32 ਅੰਕਾਂ ਨਾਲ ਇਸ ਤੋਂ ਬਾਅਦ ਦੇ ਸਥਾਨਾਂ ਉੱਤੇ ਬਣੇ ਹੋਏ ਹਨ। ਚੋਟੀ ਦੇ ਅੱਧ ਨੂੰ ਪੂਰਾ ਕਰਦੇ ਹੋਏ, ਲਿਓਨ ਅਤੇ ਰੇਨੇਸ ਯੂਰਪੀਅਨ ਯੋਗਤਾ ਸਥਾਨਾਂ ’ਤੇ ਖੜ੍ਹੇ ਹਨ, ਜਦੋਂ ਕਿ ਸਟਰਾਸਬਰਗ, ਮੋਨਾਕੋ ਅਤੇ ਟੂਲੂਸ ਵਰਗੇ ਕਲੱਬ ਇਸ ਤੋਂ ਬਾਅਦ ਆਉਂਦੇ ਹਨ। ਅੰਕ ਸੂਚੀ ’ਚ ਹੇਠਲੇ ਪੱਧਰ ਦੇ ਨੇੜੇ, ਨੈਨਟੇਸ ਅਤੇ ਮੈਟਜ਼ ਵਰਗੀਆਂ ਟੀਮਾਂ ਮੁਸ਼ਕਲਾਂ ਦਾ ਸਾਹਮਣਾ ਕਰ ਰਹੀਆਂ ਹਨ, ਜੋ ਕਿ ‘ਰੈਲੀਗੇਸ਼ਨ’ ਭਾਵ ਲੀਗ ਤੋਂ ਬਾਹਰ ਹੋਣ ਦੇ ਖ਼ਤਰੇ ਨਾਲ ਜੂਝ ਰਹੀਆਂ ਹਨ।

ਕੁੱਝ ਹੋਰ ਲੀਗਾਂ ਦੀ ਗੱਲ ਹੋਵੇ ਤਾਂ ਨੀਦਰਲੈਂਡਜ਼ ਦੀ ਲੀਗ ‘ਏਰੇਡੀਵਿਸੀ’ ਵਿਚ, 2025-26 ਸੀਜ਼ਨ ਹੁਣ ਤੱਕ ਪੀਐੱਸਵੀ ਆਇਡਹੋਵਨ ਦਾ ਦਬਦਬਾ ਨਜ਼ਰ ਆ ਰਿਹਾ ਹੈ। ਇਸ ਸਮੇਂ ਤੱਕ ਪੀਐੱਸਵੀ 17 ਮੈਚਾਂ ਵਿੱਚੋਂ 46 ਅੰਕਾਂ ਨਾਲ ਆਰਾਮ ਨਾਲ ਅੰਕ ਸੂਚੀ ਵਿਚ ਸਿਖ਼ਰ ’ਤੇ ਬੈਠਾ ਹੈ ਅਤੇ ਇਸ ਦਰਮਿਆਨ 15 ਜਿੱਤਾਂ, ਇਕ ਡਰਾਅ ਅਤੇ ਸਿਰਫ਼ ਇਕ ਹਾਰ ਦੇ ਸ਼ਾਨਦਾਰ ਰਿਕਾਰਡ ਸਦਕਾ ਉਨ੍ਹਾਂ ਨੇ ਇਹ ਮੁਕਾਮ ਬਣਾਇਆ ਹੈ। ਸਕਾਟਲੈਂਡ ਦੇਸ਼ ਦੀ ਲੀਗ, ‘ਸਕਾਟਿਸ਼ ਪ੍ਰੀਮੀਅਰਸ਼ਿਪ’ ’ਚ ਕਾਫ਼ੀ ਉਲਟਫੇਰ ਹੋ ਰਹੇ ਹਨ। ਇਤਿਹਾਸਕ ਤੌਰ ’ਤੇ ਦੋ ਮਜ਼ਬੂਤ ਟੀਮਾਂ, ਸੈਲਟਿਕ ਅਤੇ ਰੇਂਜਰਜ਼ ਦਾ ਹੀ ਖ਼ਿਤਾਬ ’ਤੇ ਦਬਦਬਾ ਰਿਹਾ ਹੈ ਪਰ ਇਸ ਸੀਜ਼ਨ ਵਿਚ ‘ਹਾਰਟਸ ਆਫ਼ ਮਿਡਲੋਥੀਅਨ’ ਕਲੱਬ ਇਕ ਅਸਲੀ ਖ਼ਿਤਾਬ ਦੇ ਦਾਅਵੇਦਾਰ ਵੱਜੋਂ ਉੱਭਰਦੇ ਹੋਏ ਦੇਖਿਆ ਜਾ ਰਿਹਾ ਹੈ। ਜਨਵਰੀ ਦੇ ਸ਼ੁਰੂ ਤੱਕ, ਹਾਰਟਸ ਕਲੱਬ 44 ਅੰਕਾਂ ਨਾਲ ਲੀਗ ਵਿਚ ਸਿਖ਼ਰ ’ਤੇ ਹੈ ਅਤੇ ਮੈਨੇਜਰ ਡੇਰੇਕ ਮੈਕਇਨਸ ਦੇ ਅਧੀਨ ਸ਼ਾਨਦਾਰ ਇਕਸਾਰਤਾ ਵਾਲੀ ਖੇਡ ਦਾ ਪ੍ਰਦਰਸ਼ਨ ਕਰ ਰਿਹਾ ਕਲੱਬ ਹੈ। ਸੈਲਟਿਕ ਅਤੇ ਰੇਂਜਰਜ਼ ਕਲੱਬ ਕ੍ਰਮਵਾਰ ਦੂਜੇ ਅਤੇ ਤੀਜੇ ਸਥਾਨ ’ਤੇ ਬਰਾਬਰ ਅੰਕਾਂ ਨਾਲ ਹਨ ਅਤੇ ਦੋਵਾਂ ਦੇ 38 ਅੰਕ ਹਨ। 2025-26 ਦੀ ‘ਸਾਊਦੀ ਪ੍ਰੋ ਲੀਗ’ ’ਚ ਅਲ ਨਾਸਰ ਕਲੱਬ ਕਲੱਬ ਨੇ ਮੋਹਰੀ ਹੋਣ ਦਾ ਮਾਣ ਹਾਸਲ ਕੀਤਾ ਹੋਇਆ ਹੈ, ਜਦਕਿ ਰਵਾਇਤੀ ਵਿਰੋਧੀ ਟੀਮਾਂ ਜਿਵੇਂ ਕਿ ਅਲ ਹਿਲਾਲ ਅਤੇ ਅਲ ਇਤਿਹਾਦ ਉਨ੍ਹਾਂ ਤੋਂ ਪਿੱਛੇ ਚੱਲ ਰਹੇ ਹਨ।

ਇਸ ਤਰ੍ਹਾਂ ਇੰਗਲੈਂਡ, ਸਪੇਨ, ਇਟਲੀ, ਜਰਮਨੀ ਅਤੇ ਫਰਾਂਸ ਵਿਚ, ਲੀਗ ਫੁੱਟਬਾਲ ਦਾ ਰੋਮਾਂਚ ਸਾਲ 2026 ਦੇ ਸ਼ੁਰੂ ਹੁੰਦੇ ਹੀ ਲੱਖਾਂ ਪ੍ਰਸ਼ੰਸਕਾਂ ਨੂੰ ਜਿੱਥੇ ਇਸ ਸਮੇਂ ਅੱਧ ਸਮੇਂ ਤੱਕ ਦੇ ਰੌਚਕ ਹਾਲਾਤ ਬਿਆਨ ਕਰਦਾ ਹੈ, ਉੱਥੇ ਹੀ ਸੀਜ਼ਨ ਦੇ ਦੂਜੇ ਅੱਧ ਦੇ ਵੀ ਜ਼ਬਰਦਸਤ ਰੋਮਾਂਚਕ ਹੋਣ ਦਾ ਵਾਅਦਾ ਕਰਨ ਵਾਲੇ ਪੜਾਅ ਦੀ ਝਲਕ ਬਖੂਬੀ ਪੇਸ਼ ਕਰ ਰਿਹਾ ਹੈ।

-ਸੁਦੀਪ ਸਿੰਘ ਢਿੱਲੋਂ

70093-57022