Holika Dahan 2026: ਕਿਉਂ ਸਾੜਿਆ ਜਾਂਦੈ ਪੁਰਾਣਾ ਸਾਮਾਨ ਤੇ ਪਾਥੀਆਂ? ਜਾਣੋ ਧਾਰਮਿਕ ਤੇ ਵਿਗਿਆਨਕ ਮਹੱਤਵ

ਧਰਮ ਡੈਸਕ, ਨਵੀਂ ਦਿੱਲੀ: ਹੋਲੀ ਦਾ ਤਿਉਹਾਰ ਕੇਵਲ ਰੰਗਾਂ ਅਤੇ ਖ਼ੁਸ਼ੀਆਂ ਦਾ ਮਿਲਾਪ ਨਹੀਂ ਹੈ, ਬਲਕਿ ਇਹ ਨਵੀਂ ਸ਼ੁਰੂਆਤ ਅਤੇ ਪਵਿੱਤਰਤਾ ਦਾ ਵੀ ਤਿਉਹਾਰ ਹੈ। ਰੰਗਾਂ ਵਾਲੀ ਹੋਲੀ ਤੋਂ ਠੀਕ ਇੱਕ ਰਾਤ ਪਹਿਲਾਂ ਹੋਲਿਕਾ ਦਹਿਨ (Holika Dahan 2026) ਕੀਤਾ ਜਾਂਦਾ ਹੈ। ਇਸ ਅਗਨੀ ਵਿੱਚ ਪੁਰਾਣਾ ਸਾਮਾਨ, ਸੁੱਕੇ ਪੱਤੇ ਅਤੇ ਵਿਸ਼ੇਸ਼ ਤੌਰ 'ਤੇ ਗਾਂ ਦੇ ਗੋਹੇ ਦੀਆਂ ਪਾਥੀਆਂ ਅਰਪਣ ਕਰਨ ਦੀ ਪਰੰਪਰਾ ਸਦੀਆਂ ਤੋਂ ਚਲੀ ਆ ਰਹੀ ਹੈ, ਪਰ ਕੀ ਤੁਸੀਂ ਕਦੇ ਸੋਚਿਆ ਹੈ ਕਿ ਅਜਿਹਾ ਕਿਉਂ ਕੀਤਾ ਜਾਂਦਾ ਹੈ? ਆਓ ਇਸ ਦੇ ਪਿੱਛੇ ਦੇ ਕਾਰਨਾਂ ਨੂੰ ਜਾਣਦੇ ਹਾਂ।

ਨਕਾਰਾਤਮਕਤਾ ਦਾ ਅੰਤ ਅਤੇ ਨਵੀਂ ਸ਼ੁਰੂਆਤ

ਹੋਲਿਕਾ ਦਹਿਨ ਦੀ ਅਗਨੀ ਨੂੰ ਬਹੁਤ ਪਵਿੱਤਰ ਮੰਨਿਆ ਜਾਂਦਾ ਹੈ, ਜੋ ਬੁਰਾਈਆਂ ਦਾ ਅੰਤ ਕਰਦੀ ਹੈ। ਘਰ ਦਾ ਪੁਰਾਣਾ ਸਾਮਾਨ, ਜਿਵੇਂ ਪੁਰਾਣੀਆਂ ਲੱਕੜਾਂ ਜਾਂ ਟੁੱਟੀਆਂ-ਫੁੱਟੀਆਂ ਚੀਜ਼ਾਂ, ਸਾਡੇ ਅਤੀਤ ਦਾ ਪ੍ਰਤੀਕ ਹਨ। ਇਨ੍ਹਾਂ ਨੂੰ ਅਗਨੀ ਵਿੱਚ ਸਮਰਪਿਤ ਕਰਨ ਦਾ ਮਤਲਬ ਹੈ ਕਿ ਅਸੀਂ ਆਪਣੇ ਜੀਵਨ ਵਿੱਚੋਂ ਪੁਰਾਣੀ ਕੜਵਾਹਟ, ਆਲਸ ਅਤੇ ਨਕਾਰਾਤਮਕ ਊਰਜਾ ਨੂੰ ਸਾੜ ਕੇ ਨਵੇਂ ਉਤਸ਼ਾਹ ਨਾਲ ਅੱਗੇ ਵੱਧ ਰਹੇ ਹਾਂ। ਇਹ ਇੱਕ ਤਰ੍ਹਾਂ ਨਾਲ ਨਵੀਂ ਸ਼ੁਰੂਆਤ ਦਾ ਪ੍ਰਤੀਕ ਹੈ।

ਪਾਥੀਆਂ ਦਾ ਮਹੱਤਵ

ਹੋਲਿਕਾ ਦਹਿਨ ਵਿੱਚ ਗਾਂ ਦੇ ਗੋਹੇ ਤੋਂ ਬਣੀਆਂ ਛੋਟੀਆਂ-ਛੋਟੀਆਂ ਪਾਥੀਆਂ ਦੀ ਮਾਲਾ ਚੜ੍ਹਾਉਣਾ ਬਹੁਤ ਜ਼ਰੂਰੀ ਹੁੰਦਾ ਹੈ। ਧਾਰਮਿਕ ਮਾਨਤਾ ਹੈ ਕਿ ਇਹ ਪਾਥੀਆਂ ਭਗਤ ਪ੍ਰਹਿਲਾਦ ਦੀ ਰੱਖਿਆ ਅਤੇ ਹੋਲਿਕਾ ਦੇ ਹੰਕਾਰ ਦੇ ਦਹਿਨ ਦਾ ਪ੍ਰਤੀਕ ਹਨ। ਕਿਹਾ ਜਾਂਦਾ ਹੈ ਕਿ ਘਰ ਦੀ ਸੁੱਖ-ਸ਼ਾਂਤੀ ਅਤੇ ਖ਼ੁਸ਼ਹਾਲੀ ਲਈ ਪਰਿਵਾਰ ਦੇ ਹਰ ਮੈਂਬਰ ਦੇ ਨਾਂ ਦੀ ਇੱਕ-ਇੱਕ ਪਾਥੀ ਅਗਨੀ ਵਿੱਚ ਪਾਈ ਜਾਂਦੀ ਹੈ, ਜਿਸ ਨੂੰ 'ਸੁਰੱਖਿਆ ਕਵਚ' ਮੰਨਿਆ ਜਾਂਦਾ ਹੈ।

ਵਿਗਿਆਨਕ ਕਾਰਨ

ਹੋਲੀ ਦਾ ਸਮਾਂ ਰੁੱਤ ਤਬਦੀਲੀ (ਮੌਸਮ ਬਦਲਣ) ਦਾ ਹੁੰਦਾ ਹੈ। ਇਸ ਦੌਰਾਨ ਹਵਾ ਵਿੱਚ ਬੈਕਟੀਰੀਆ ਅਤੇ ਹਾਨੀਕਾਰਕ ਕੀਟਾਣੂਆਂ ਦੀ ਗਿਣਤੀ ਵੱਧ ਜਾਂਦੀ ਹੈ, ਜਿਸ ਨਾਲ ਬਿਮਾਰੀਆਂ ਫੈਲਣ ਦਾ ਡਰ ਰਹਿੰਦਾ ਹੈ। ਜਦੋਂ ਗਾਂ ਦੇ ਗੋਹੇ ਦੀਆਂ ਪਾਥੀਆਂ, ਕਪੂਰ, ਘਿਓ ਅਤੇ ਸੁੱਕੀਆਂ ਲੱਕੜਾਂ ਇੱਕਠੀਆਂ ਜਲਦੀਆਂ ਹਨ, ਤਾਂ ਉਨ੍ਹਾਂ ਵਿੱਚੋਂ ਨਿਕਲਣ ਵਾਲਾ ਧੂੰਆਂ ਕੀਟਨਾਸ਼ਕ ਦਾ ਕੰਮ ਕਰਦਾ ਹੈ, ਜਿਸ ਨਾਲ ਹਵਾ ਵਿੱਚ ਸ਼ੁੱਧਤਾ ਫੈਲਦੀ ਹੈ।

ਪਵਿੱਤਰਤਾ

ਪੁਰਾਣੇ ਸਮਿਆਂ ਵਿੱਚ ਹੋਲੀ ਦੇ ਬਹਾਨੇ ਪੂਰੇ ਪਿੰਡ ਅਤੇ ਘਰਾਂ ਦੀ ਸਫਾਈ ਕੀਤੀ ਜਾਂਦੀ ਸੀ। ਸਰਦੀਆਂ ਦੌਰਾਨ ਜਮ੍ਹਾਂ ਹੋਇਆ ਕੂੜਾ ਅਤੇ ਬਿਨਾਂ ਲੋੜ ਦਾ ਸਾਮਾਨ ਇਕੱਠਾ ਕਰਕੇ ਇੱਕ ਥਾਂ ਸਾੜ ਦਿੱਤਾ ਜਾਂਦਾ ਸੀ। ਇਸ ਨਾਲ ਨਾ ਸਿਰਫ਼ ਗੰਦਗੀ ਦੂਰ ਹੁੰਦੀ ਸੀ, ਬਲਕਿ ਪਵਿੱਤਰਤਾ ਵੀ ਬਣੀ ਰਹਿੰਦੀ ਸੀ।

ਸਾਵਧਾਨੀ ਵਰਤੋ

ਇਸ ਦੌਰਾਨ ਪੁਰਾਣੇ ਸਾਮਾਨ ਦੇ ਨਾਂ 'ਤੇ ਪਲਾਸਟਿਕ, ਰਬੜ ਜਾਂ ਸਿੰਥੈਟਿਕ ਚੀਜ਼ਾਂ ਅਗਨੀ ਵਿੱਚ ਨਾ ਪਾਓ।

ਇਸ ਪਵਿੱਤਰ ਅਗਨੀ ਦੇ ਆਲੇ-ਦੁਆਲੇ ਗੰਦਗੀ ਨਾ ਫੈਲਾਓ।

ਇਸ ਵਿੱਚ ਤਾਮਸਿਕ ਚੀਜ਼ਾਂ ਗਲਤੀ ਨਾਲ ਵੀ ਨਾ ਪਾਓ।

Disclaimer: ਇਸ ਲੇਖ ਵਿੱਚ ਦੱਸੇ ਗਏ ਉਪਾਅ/ਲਾਭ/ਸਲਾਹ ਅਤੇ ਕਥਨ ਕੇਵਲ ਆਮ ਜਾਣਕਾਰੀ ਲਈ ਹਨ। ਇਹ ਜਾਣਕਾਰੀ ਵੱਖ-ਵੱਖ ਮਾਧਿਅਮਾਂ/ਜੋਤਸ਼ੀਆਂ/ਪੰਚਾਂਗ/ਮਾਨਤਾਵਾਂ ਅਤੇ ਧਰਮ ਗ੍ਰੰਥਾਂ ਤੋਂ ਇਕੱਠੀ ਕੀਤੀ ਗਈ ਹੈ। ਪਾਠਕਾਂ ਨੂੰ ਬੇਨਤੀ ਹੈ ਕਿ ਇਸ ਨੂੰ ਅੰਤਿਮ ਸੱਚ ਨਾ ਮੰਨਣ ਅਤੇ ਆਪਣੇ ਵਿਵੇਕ ਦੀ ਵਰਤੋਂ ਕਰਨ।