19 ਮਾਰਚ ਤੋਂ ਸ਼ੁਰੂ ਹੋ ਚੁੱਕਾ ਹੈ Hindu Nav Varsh, ਦੇਸ਼-ਦੁਨੀਆ ਲਈ ਕਿਹੋ ਜਿਹਾ ਰਹੇਗਾ ਇਹ ਸਾਲ?

ਆਨੰਦ ਸਾਗਰ ਪਾਠਕ, ਐਸਟ੍ਰੋਪੱਤਰੀ: ਇਸ ਨਵੇਂ ਸੰਵਤਸਰ ਦਾ ਨਾਂ 'ਰੌਦਰ' ਹੈ, ਜੋ ਆਪਣੇ ਆਪ 'ਚ ਵੱਡੀਆਂ ਤਬਦੀਲੀਆਂ ਤੇ ਤੇਜ਼ ਘਟਨਾਵਾਂ ਦਾ ਸੰਕੇਤ ਦਿੰਦਾ ਹੈ। ਜੋਤਿਸ਼ ਗਣਨਾ ਅਨੁਸਾਰ, ਜਦੋਂ ਗਿਆਨ ਦੇ ਕਾਰਕ ਬ੍ਰਹਿਸਪਤੀ ਦੇਵ ਰਾਜਾ ਤੇ ਊਰਜਾ ਦੇ ਪ੍ਰਤੀਕ ਮੰਗਲ ਦੇਵ ਮੰਤਰੀ ਹੁੰਦੇ ਹਨ ਤਾਂ ਸਮਾਜ ਵਿਚ ਬੁੱਧੀ ਅਤੇ ਸਾਹਸ ਦਾ ਇਕ ਅਨੋਖਾ ਸੰਗਮ ਦੇਖਣ ਨੂੰ ਮਿਲਦਾ ਹੈ। ਇਹ ਸਾਲ ਸ਼ਾਸਨ ਵਿਵਸਥਾ, ਧਰਮ ਤੇ ਵਿਸ਼ਵ ਸਬੰਧਾਂ 'ਚ ਨਵੀਂ ਦਿਸ਼ਾ ਤੈਅ ਕਰਨ ਵਾਲਾ ਸਿੱਧ ਹੋ ਸਕਦਾ ਹੈ।

ਭਾਰਤ ਲਈ ਮਾਣ ਤੇ ਫੌਜੀ ਸ਼ਕਤੀ ਦਾ ਵਿਸਥਾਰ

ਭਾਰਤ ਦੇ ਸੰਦਰਭ 'ਚ ਇਹ ਸਾਲ ਬੇਹੱਦ ਮਹੱਤਵਪੂਰਨ ਅਤੇ ਗੌਰਵਸ਼ਾਲੀ ਰਹਿਣ ਵਾਲਾ ਹੈ। ਰਾਜਾ ਬ੍ਰਹਿਸਪਤੀ ਦੇਵ ਦੇ ਪ੍ਰਭਾਵ ਨਾਲ ਦੇਸ਼ 'ਚ ਸਿੱਖਿਆ, ਨਿਆਂ ਤੇ ਧਾਰਮਿਕ ਸੰਸਥਾਵਾਂ 'ਚ ਵੱਡੇ ਸਕਾਰਾਤਮਕ ਸੁਧਾਰ ਦੇਖਣ ਨੂੰ ਮਿਲ ਸਕਦੇ ਹਨ। ਉੱਥੇ ਹੀ, ਮੰਤਰੀ ਮੰਗਲ ਦੇਵ ਦੇ ਸੰਚਾਲਨ 'ਚ ਭਾਰਤ ਦੀ ਫੌਜੀ ਸ਼ਕਤੀ ਅਤੇ ਸੁਰੱਖਿਆ ਵਿਵਸਥਾ ਪਹਿਲਾਂ ਨਾਲੋਂ ਕਿਤੇ ਵੱਧ ਕੇ ਉਭਰੇਗੀ।

ਰੱਖਿਆ ਖੇਤਰ 'ਚ ਨਵੇਂ ਤਕਨੀਕੀ ਪ੍ਰਯੋਗ ਤੇ ਸਵਦੇਸ਼ੀ ਉਪਕਰਣਾਂ ਦਾ ਨਿਰਮਾਣ ਦੇਸ਼ ਨੂੰ ਵਿਸ਼ਵ ਪੱਧਰ 'ਤੇ ਮਜ਼ਬੂਤ ਪਛਾਣ ਦਿਵਾਏਗਾ। ਇਹ ਸਮਾਂ ਭਾਰਤ ਲਈ ਆਪਣੀਆਂ ਸਰਹੱਦਾਂ ਨੂੰ ਸੁਰੱਖਿਅਤ ਕਰਨ ਤੇ ਅੰਤਰਰਾਸ਼ਟਰੀ ਮੰਚ 'ਤੇ ਆਪਣੀ ਗੱਲ ਮਜ਼ਬੂਤੀ ਨਾਲ ਰੱਖਣ ਦਾ ਹੈ।

ਵਿਸ਼ਵਵਿਆਪੀ ਉਥਲ-ਪੁਥਲ ਤੇ ਕੂਟਨੀਤੀ ਦੀ ਭੂਮਿਕਾ

ਦੁਨੀਆ ਭਰ ਦੇ ਹਾਲਾਤ ਦੀ ਗੱਲ ਕਰੀਏ ਤਾਂ ਇਸ ਸਾਲ ਦਾ ਨਾਂ 'ਰੌਦਰ' ਹੋਣ ਕਰਕੇ ਕੁਝ ਥਾਵਾਂ 'ਤੇ ਤਣਾਅ ਜਾਂ ਆਪਸੀ ਮਨਮੁਟਾਵ ਦੀ ਸ਼ੰਕਾ ਬਣੀ ਰਹਿ ਸਕਦੀ ਹੈ। ਮੰਗਲ ਦੇਵ ਦੇ ਮੰਤਰੀ ਹੋਣ ਨਾਲ ਕੁਝ ਦੇਸ਼ ਕਾਫ਼ੀ ਸਖ਼ਤ ਫੈਸਲੇ ਤੇ ਵੱਡੇ ਕਦਮ ਚੁੱਕ ਸਕਦੇ ਹਨ।

ਹਾਲਾਂਕਿ, ਰਾਜਾ ਬ੍ਰਹਿਸਪਤੀ ਦੇਵ ਦੀ ਕਿਰਪਾ ਨਾਲ ਵੱਡੇ ਲੀਡਰਾਂ ਵਿਚਾਲੇ ਸਮਝਦਾਰੀ ਅਤੇ ਗੱਲਬਾਤ ਦਾ ਰਸਤਾ ਵੀ ਖੁੱਲ੍ਹਾ ਰਹੇਗਾ, ਜੋ ਵੱਡੀਆਂ ਮੁਸੀਬਤਾਂ ਨੂੰ ਟਾਲਣ ਵਿੱਚ ਮਦਦ ਕਰੇਗਾ। ਦੇਸ਼ਾਂ ਵਿਚਕਾਰ ਹੋਣ ਵਾਲੇ ਸਮਝੌਤਿਆਂ 'ਚ ਇਮਾਨਦਾਰੀ ਅਤੇ ਭਵਿੱਖ ਦੀ ਸੋਚ ਨੂੰ ਜ਼ਿਆਦਾ ਮਹੱਤਵ ਦਿੱਤਾ ਜਾਵੇਗਾ। ਦੁਨੀਆ ਦੇ ਕਈ ਹਿੱਸਿਆਂ ਵਿੱਚ ਰਾਜ-ਕਾਜ ਚਲਾਉਣ ਦੇ ਤਰੀਕਿਆਂ ਵਿੱਚ ਵੱਡੇ ਅਤੇ ਚੰਗੇ ਸੁਧਾਰ ਦੇਖਣ ਨੂੰ ਮਿਲ ਸਕਦੇ ਹਨ।

ਆਰਥਿਕ ਤਰੱਕੀ ਅਤੇ ਖੇਤੀਬਾੜੀ ਖੇਤਰ 'ਚ ਖੁਸ਼ਹਾਲੀ

ਆਰਥਿਕ ਪੱਖੋਂ ਇਹ ਸਾਲ ਕਾਫ਼ੀ ਸੰਤੁਲਿਤ ਰਹਿਣ ਦੇ ਸੰਕੇਤ ਦੇ ਰਿਹਾ ਹੈ। ਬ੍ਰਹਿਸਪਤੀ ਦੇਵ ਦੇ ਪ੍ਰਭਾਵ ਨਾਲ ਬੈਂਕਿੰਗ, ਫਾਇਨਾਂਸ ਤੇ ਨਿਵੇਸ਼ ਦੇ ਖੇਤਰਾਂ 'ਚ ਸਥਿਰਤਾ ਅਤੇ ਵਾਧਾ ਦੇਖਿਆ ਜਾ ਸਕਦਾ ਹੈ। ਸੋਨੇ ਅਤੇ ਤਾਂਬੇ ਵਰਗੀਆਂ ਧਾਤਾਂ ਦੀਆਂ ਕੀਮਤਾਂ 'ਚ ਸਕਾਰਾਤਮਕ ਬਦਲਾਅ ਆ ਸਕਦੇ ਹਨ।

ਖੇਤੀਬਾੜੀ ਦੇ ਖੇਤਰ 'ਚ ਚੰਗੀ ਵਰਖਾ ਅਤੇ ਬਿਹਤਰ ਪੈਦਾਵਾਰ ਦੀ ਸੰਭਾਵਨਾ ਹੈ ਜਿਸ ਨਾਲ ਖਾਧ ਪਦਾਰਥਾਂ ਦੀ ਸਪਲਾਈ ਆਮ ਬਣੀ ਰਹੇਗੀ। ਵਪਾਰ ਜਗਤ 'ਚ ਨਵੀਆਂ ਕਾਢਾਂ ਤੇ ਤਕਨੀਕ ਦੀ ਵਰਤੋਂ ਕਾਰੋਬਾਰ ਨੂੰ ਨਵੀਆਂ ਉਚਾਈਆਂ ਪ੍ਰਦਾਨ ਕਰੇਗੀ। ਇਹ ਸਮਾਂ ਉਨ੍ਹਾਂ ਲੋਕਾਂ ਲਈ ਬਹੁਤ ਵਧੀਆ ਹੈ ਜੋ ਇਮਾਨਦਾਰੀ ਤੇ ਮਿਹਨਤ ਨਾਲ ਆਪਣੇ ਕਾਰੋਬਾਰ ਦਾ ਸੰਚਾਲਨ ਕਰ ਰਹੇ ਹਨ।

ਸਮਾਜਿਕ ਜਾਗਰੂਕਤਾ ਤੇ ਅਧਿਆਤਮਕ ਜਾਗ੍ਰਿਤੀ

ਸਮਾਜ ਵਿਚ ਇਸ ਸਾਲ ਨੈਤਿਕਤਾ ਅਤੇ ਮਨੁੱਖੀ ਕਦਰਾਂ-ਕੀਮਤਾਂ ਪ੍ਰਤੀ ਜਾਗਰੂਕਤਾ ਵਧੇਗੀ। ਬ੍ਰਹਿਸਪਤੀ ਦੇਵ ਲੋਕਾਂ ਨੂੰ ਧਰਮ ਅਤੇ ਅਧਿਆਤਮ ਵੱਲ ਪ੍ਰੇਰਿਤ ਕਰਨਗੇ, ਜਿਸ ਨਾਲ ਸਮੂਹਿਕ ਤੌਰ 'ਤੇ ਗ੍ਰੈਟੀਟਿਊਡ ਮੈਡੀਟੇਸ਼ਨ ਤੇ ਸੇਵਾ ਕਾਰਜਾਂ 'ਚ ਵਾਧਾ ਹੋਵੇਗਾ। ਲੋਕ ਆਪਣੀਆਂ ਜੜ੍ਹਾਂ ਅਤੇ ਸੱਭਿਆਚਾਰ ਪ੍ਰਤੀ ਵਧੇਰੇ ਗੰਭੀਰ ਹੋਣਗੇ।

ਹਾਲਾਂਕਿ, ਮੰਗਲ ਦੇਵ ਦਾ ਪ੍ਰਭਾਵ ਕਦੇ-ਕਦੇ ਵਿਚਾਰਾਂ 'ਚ ਤੇਜ਼ੀ ਲਿਆ ਸਕਦਾ ਹੈ ਪਰ ਅਧਿਆਤਮਕ ਸਿੱਖਿਆ ਦੇ ਮਾਧਿਅਮ ਰਾਹੀਂ ਇਸ ਨੂੰ ਸਕਾਰਾਤਮਕ ਊਰਜਾ 'ਚ ਬਦਲਿਆ ਜਾ ਸਕਦਾ ਹੈ। ਇਹ ਸਾਲ ਸਾਨੂੰ ਸਿਖਾਏਗਾ ਕਿ ਕਿਵੇਂ ਸਾਹਸ ਅਤੇ ਗਿਆਨ ਦੇ ਮੇਲ ਨਾਲ ਅਸੀਂ ਆਪਣੀਆਂ ਵੱਡੀਆਂ ਇੱਛਾਵਾਂ ਪੂਰੀਆਂ ਕਰ ਸਕਦੇ ਹਾਂ ਅਤੇ ਸਮਾਜ ਵਿੱਚ ਸੁਖਦ ਬਦਲਾਅ ਲਿਆ ਸਕਦੇ ਹਾਂ।

ਲੇਖਕ: ਸ਼੍ਰੀ ਆਨੰਦ ਸਾਗਰ ਪਾਠਕ, astropatri.com, ਫੀਡਬੈਕ ਲਈ ਲਿਖੋ: hello@astropatri.com