Hindu Nav Varsh 2026 : ਕੀ ਕਹਿੰਦਾ ਹੈ ਕਾਸ਼ੀ ਦਾ ਪੰਚਾਂਗ? ਰਾਜਾ ਬ੍ਰਹਿਸਪਤੀ ਅਤੇ ਮੰਤਰੀ ਮੰਗਲ ਦਾ ਰਹੇਗਾ ਪ੍ਰਭਾਵ

ਵਾਰਾਣਸੀ/ਕਾਸ਼ੀ (ਆਚਾਰੀਆ ਨਾਰਾਇਣ ਦਾਸ): ਭਾਰਤੀ ਜੋਤਿਸ਼ ਕਾਲ-ਗਣਨਾ ਦੀ ਸ਼ਾਨਦਾਰ ਪੱਧਤੀ 'ਚ ਨਵਾਂ ਸੰਵਤਸਰ ਸਿਰਫ਼ ਤਰੀਕਾਂ ਦਾ ਬਦਲਾਅ ਨਹੀਂ ਹੈ, ਸਗੋਂ ਇਹ ਜੜ੍ਹ-ਚੇਤਨ ਪ੍ਰਕਿਰਤੀ ਤੇ ਸੱਭਿਆਚਾਰਕ ਕਦਰਾਂ-ਕੀਮਤਾਂ ਦੇ ਪੁਨਰ-ਜਾਗਰਣ ਦਾ ਮਹਾਂ-ਤਿਉਹਾਰ ਹੈ। ਕਾਸ਼ੀ ਦੇ ਵੱਕਾਰੀ 'ਮਹਾਬੀਰ ਪੰਚਾਂਗ' ਅਨੁਸਾਰ, ਆਉਣ ਵਾਲੀ 19 ਮਾਰਚ, 2026 ਨੂੰ ਚੇਤ ਸ਼ੁਕਲ ਪ੍ਰਤੀਪਦਾ ਦੇ ਪਵਿੱਤਰ ਮੌਕੇ 'ਤੇ 'ਰੌਦਰ' ਨਾਮਕ ਸੰਵਤਸਰ ਦਾ ਸ਼ੁਭ ਆਗਮਨ ਹੋ ਰਿਹਾ ਹੈ।

ਵਸੰਤ ਰੁੱਤ ਦਾ ਆਗਮਨ ਤੇ ਗ੍ਰਹਿ ਮੰਡਲ ਦੀ ਸਥਿਤੀ

ਇਸ ਸਾਲ ਦੇ ਗ੍ਰਹਿ-ਮੰਡਲ 'ਚ ਇਕ ਵਿਸ਼ੇਸ਼ ਸੰਯੋਗ ਬਣ ਰਿਹਾ ਹੈ, ਜਿੱਥੇ ਦੇਵਗੁਰੂ ਬ੍ਰਹਿਸਪਤੀ 'ਰਾਜਾ' ਤੇ ਸਾਹਸ ਦੇ ਪ੍ਰਤੀਕ ਮੰਗਲ 'ਮੰਤਰੀ' ਦੇ ਅਹੁਦੇ 'ਤੇ ਬਿਰਾਜਮਾਨ ਹੋਣਗੇ। ਬਸੰਤ ਰੁੱਤ ਦੇ ਆਗਮਨ ਨਾਲ ਜਦੋਂ ਕੁਦਰਤ ਨਵੇਂ ਰੂਪ 'ਚ ਸ਼ਿੰਗਾਰ ਕਰਦੀ ਹੈ ਤਾਂ ਇਹ ਸਾਨੂੰ ਆਪਣੇ ਵਿਚਾਰਾਂ ਵਿੱਚ ਵੀ ਨਵੀਨਤਾ ਲਿਆਉਣ ਦਾ ਸੰਦੇਸ਼ ਦਿੰਦੀ ਹੈ।

ਇਸ ਰੁੱਤ 'ਚ ਗਰਮੀ ਅਤੇ ਸਰਦੀ ਦੌਰਾਨ ਜੋ 'ਸਮਾਨਤਾ' ਦੇਖਣ ਨੂੰ ਮਿਲਦੀ ਹੈ, ਉਹੀ ਸਾਡੇ ਜੀਵਨ ਦਾ ਆਦਰਸ਼ ਹੋਣੀ ਚਾਹੀਦੀ ਹੈ। ਸਾਡਾ ਵਿਵਹਾਰ ਪ੍ਰੇਮ, ਤਿਆਗ ਅਤੇ ਵਿਵੇਕ ਦੇ ਸੁਮੇਲ ਨਾਲ ਭਰਪੂਰ ਹੋਣਾ ਚਾਹੀਦਾ ਹੈ। ਕੁਦਰਤੀ ਸਰੋਤਾਂ ਦੀ ਅੰਨ੍ਹੇਵਾਹ ਵਰਤੋਂ ਕਰਨ ਦੀ ਬਜਾਏ ਉਨ੍ਹਾਂ ਦੀ ਸੰਭਾਲ ਕਰਨਾ ਹੀ ਕੁਦਰਤ ਪ੍ਰਤੀ ਸਾਡੀ ਸੱਚੀ ਸ਼ੁਕਰਗੁਜ਼ਾਰੀ ਹੋਵੇਗੀ।

ਸਵੈ-ਸੁਧਾਰ ਤੇ ਅਨੁਸ਼ਾਸਨ ਦਾ ਸੁਨੇਹਾ

ਨਵਾਂ ਸਾਲ ਸਵੈ-ਸੁਧਾਰ ਦਾ ਸੁਨਹਿਰੀ ਮੌਕਾ ਹੈ। ਅਨੁਸ਼ਾਸਨ ਦਾ ਮਤਲਬ ਸਿਰਫ਼ ਸਮੇਂ ਦੀ ਪਾਬੰਦੀ ਨਹੀਂ, ਸਗੋਂ ਆਪਣੀਆਂ ਇੰਦਰੀਆਂ 'ਤੇ ਕਾਬੂ ਅਤੇ ਬਾਣੀ 'ਚ ਮਿਠਾਸ ਪੈਦਾ ਕਰਨਾ ਹੈ। ਗੁੱਸੇ ਅਤੇ ਈਰਖਾ ਵਰਗੀਆਂ ਬੁਰਾਈਆਂ ਨੂੰ ਤਿਆਗ ਕੇ 'ਵਸੁਧੈਵ ਕੁਟੁੰਬਕਮ' (ਸਾਰੀ ਦੁਨੀਆ ਇੱਕ ਪਰਿਵਾਰ ਹੈ) ਦੀ ਭਾਵਨਾ ਨੂੰ ਅਪਣਾਉਣਾ ਹੀ ਇਸ ਸਾਲ ਦਾ ਮੁੱਖ ਉਦੇਸ਼ ਹੈ।

ਆਧੁਨਿਕਤਾ ਦੇ ਨਾਲ ਨੈਤਿਕ ਕਦਰਾਂ-ਕੀਮਤਾਂ ਦਾ ਸੁਮੇਲ

ਸਾਨੂੰ ਆਧੁਨਿਕਤਾ ਤੇ ਨਵੀਂ ਤਕਨੀਕ ਦਾ ਸਵਾਗਤ ਜ਼ਰੂਰ ਕਰਨਾ ਚਾਹੀਦਾ ਹੈ, ਪਰ ਆਪਣੀਆਂ ਨੈਤਿਕ ਮਰਿਆਦਾਵਾਂ ਤੇ ਪਰਿਵਾਰਕ ਕਦਰਾਂ-ਕੀਮਤਾਂ ਦੀ ਕੀਮਤ 'ਤੇ ਨਹੀਂ। ਆਉਣ ਵਾਲਾ ਸਾਲ ਸਿਰਫ਼ ਆਰਥਿਕ ਤਰੱਕੀ ਦਾ ਹੀ ਨਹੀਂ, ਸਗੋਂ ਸਾਡੇ ਅਧਿਆਤਮਕ ਤੇ ਚਰਿੱਤਰ ਦੇ ਨਿਰਮਾਣ ਦਾ ਸਾਲ ਬਣਨਾ ਚਾਹੀਦਾ ਹੈ।

ਜਦੋਂ ਸਾਡੇ ਵਿਵਹਾਰ 'ਚ ਦਯਾ, ਸ਼ੁਕਰਗੁਜ਼ਾਰੀ ਤੇ ਪਵਿੱਤਰਤਾ ਝਲਕਦੀ ਹੈ ਤਾਂ ਵਿਸ਼ਵ-ਭਾਈਚਾਰੇ ਦੀ ਭਾਵਨਾ ਆਪਣੇ ਆਪ ਪੈਦਾ ਹੁੰਦੀ ਹੈ। ਜਦੋਂ ਅਸੀਂ ਭੇਦਭਾਵ ਮਿਟਾ ਕੇ ਸਾਰਿਆਂ ਵਿਚ ਇੱਕੋ ਪਰਮਾਤਮਾ ਦੇ ਦਰਸ਼ਨ ਕਰਾਂਗੇ, ਤਾਂ ਹੀ ਇਹ ਨਵਾਂ ਸਾਲ ਸਮੁੱਚੇ ਸੰਸਾਰ ਲਈ ਕਲਿਆਣਕਾਰੀ ਸਿੱਧ ਹੋਵੇਗਾ।