ਕਿਤੇ ਤੁਸੀਂ ਵੀ ਤਾਂ ਨਹੀਂ ਕਰ ਰਹੇ ਝਾੜੂ ਨਾਲ ਜੁੜੀਆਂ ਇਹ 5 ਗਲਤੀਆਂ? ਘਰ ਦੀ ਬਰਕਤ ਲਈ ਜਾਣੋ ਵਾਸਤੂ ਦੇ ਜ਼ਰੂਰੀ ਨਿਯਮ

ਧਰਮ ਡੈਸਕ, ਨਵੀਂ ਦਿੱਲੀ: ਸਨਾਤਨ ਧਰਮ ਤੇ ਵਾਸਤੂ ਸ਼ਾਸਤਰ 'ਚ ਝਾੜੂ ਨੂੰ ਸਿਰਫ਼ ਸਫ਼ਾਈ ਦਾ ਸਾਧਨ ਨਹੀਂ, ਸਗੋਂ ਧਨ ਦੀ ਦੇਵੀ ਮਾਤਾ ਲਕਸ਼ਮੀ ਦਾ ਰੂਪ ਮੰਨਿਆ ਗਿਆ ਹੈ। ਅਜਿਹਾ ਕਿਹਾ ਜਾਂਦਾ ਹੈ ਕਿ ਜਿਸ ਘਰ ਵਿਚ ਝਾੜੂ ਦਾ ਸਨਮਾਨ ਹੁੰਦਾ ਹੈ ਤੇ ਨਿਯਮਾਂ ਦੀ ਪਾਲਣਾ ਕੀਤੀ ਜਾਂਦੀ ਹੈ, ਉੱਥੇ ਦਲਿੱਦਰ ਕਦੇ ਪ੍ਰਵੇਸ਼ ਨਹੀਂ ਕਰਦਾ। ਅਜਿਹੇ ਵਿਚ ਝਾੜੂ ਲਗਾਉਂਦੇ ਸਮੇਂ ਕੁਝ ਖਾਸ ਗੱਲਾਂ ਦਾ ਧਿਆਨ ਜ਼ਰੂਰ ਰੱਖੋ, ਜੋ ਇਸ ਪ੍ਰਕਾਰ ਹਨ:

ਝਾੜੂ ਨੂੰ ਕਦੇ ਖੜ੍ਹਾ ਨਾ ਰੱਖੋ

ਵਾਸਤੂ ਸ਼ਾਸਤਰ ਅਨੁਸਾਰ, ਝਾੜੂ ਨੂੰ ਕਦੇ ਵੀ ਖੜ੍ਹਾ ਕਰ ਕੇ ਨਹੀਂ ਰੱਖਣਾ ਚਾਹੀਦਾ। ਖੜ੍ਹਾ ਝਾੜੂ ਘਰ ਵਿਚ ਕਲੇਸ਼ ਤੇ ਤਣਾਅ ਦਾ ਮਾਹੌਲ ਪੈਦਾ ਕਰਦਾ ਹੈ। ਝਾੜੂ ਨੂੰ ਹਮੇਸ਼ਾ ਲਿਟਾ ਕੇ ਰੱਖਣਾ ਚਾਹੀਦਾ ਹੈ। ਨਾਲ ਹੀ, ਇਸ ਨੂੰ ਅਜਿਹੀ ਜਗ੍ਹਾ 'ਤੇ ਰੱਖੋ ਜਿੱਥੇ ਬਾਹਰੋਂ ਆਉਣ ਵਾਲੇ ਕਿਸੇ ਵੀ ਵਿਅਕਤੀ ਦੀ ਸਿੱਧੀ ਨਜ਼ਰ ਇਸ 'ਤੇ ਨਾ ਪਵੇ। ਜਿਸ ਤਰ੍ਹਾਂ ਅਸੀਂ ਆਪਣੇ ਧਨ ਨੂੰ ਛੁਪਾ ਕੇ ਰੱਖਦੇ ਹਾਂ, ਉਸੇ ਤਰ੍ਹਾਂ ਝਾੜੂ ਨੂੰ ਵੀ ਛੁਪਾ ਕੇ ਰੱਖਣਾ ਚਾਹੀਦਾ ਹੈ।

ਸੂਰਜ ਡੁੱਬਣ ਤੋਂ ਬਾਅਦ ਝਾੜੂ ਲਗਾਉਣਾ

ਸ਼ਾਸਤਰਾਂ ਅਨੁਸਾਰ, ਸ਼ਾਮ ਦੇ ਸਮੇਂ ਯਾਨੀ ਸੂਰਜ ਡੁੱਬਣ ਤੋਂ ਬਾਅਦ ਝਾੜੂ ਲਗਾਉਣ ਦੀ ਮਨਾਹੀ ਹੁੰਦੀ ਹੈ। ਮੰਨਿਆ ਜਾਂਦਾ ਹੈ ਕਿ ਗੋਧੂਲੀ ਵੇਲੇ ਮਾਤਾ ਲਕਸ਼ਮੀ ਘਰ ਵਿਚ ਪ੍ਰਵੇਸ਼ ਕਰਦੀ ਹੈ। ਜੇਕਰ ਇਸ ਸਮੇਂ ਘਰ ਦੀ ਸਫ਼ਾਈ ਕੀਤੀ ਜਾਂਦੀ ਹੈ ਜਾਂ ਕੂੜਾ ਬਾਹਰ ਸੁੱਟਿਆ ਜਾਂਦਾ ਹੈ ਤਾਂ ਘਰ ਦੀ ਲਕਸ਼ਮੀ ਵੀ ਬਾਹਰ ਚਲੀ ਜਾਂਦੀ ਹੈ। ਜੇਕਰ ਕਿਸੇ ਕਾਰਨ ਝਾੜੂ ਲਗਾਉਣਾ ਪਵੇ ਤਾਂ ਕੂੜੇ ਨੂੰ ਘਰੋਂ ਬਾਹਰ ਨਾ ਸੁੱਟੋ, ਉਸ ਨੂੰ ਇਕ ਕੋਨੇ 'ਚ ਇਕੱਠਾ ਕਰ ਦਿਓ ਅਤੇ ਸਵੇਰੇ ਬਾਹਰ ਕੱਢੋ।

ਝਾੜੂ ਨੂੰ ਪੈਰ ਮਾਰਨਾ

ਝਾੜੂ ਨੂੰ ਲਕਸ਼ਮੀ ਦਾ ਪ੍ਰਤੀਕ ਮੰਨਿਆ ਜਾਂਦਾ ਹੈ, ਇਸ ਲਈ ਇਸ ਨੂੰ ਪੈਰ ਮਾਰਨਾ ਜਾਂ ਇਸ ਦੇ ਉੱਪਰੋਂ ਲੰਘਣਾ ਮਾਤਾ ਲਕਸ਼ਮੀ ਦਾ ਨਿਰਾਦਰ ਮੰਨਿਆ ਜਾਂਦਾ ਹੈ। ਜੇਕਰ ਗਲਤੀ ਨਾਲ ਝਾੜੂ ਨੂੰ ਪੈਰ ਲੱਗ ਜਾਵੇ ਤਾਂ ਉਸ ਨੂੰ ਤੁਰੰਤ ਹੱਥ ਨਾਲ ਛੂਹ ਕੇ ਮਾਫ਼ੀ ਮੰਗਣੀ ਚਾਹੀਦੀ ਹੈ। ਇਸ ਤੋਂ ਇਲਾਵਾ ਕਦੇ ਵੀ ਝਾੜੂ ਨੂੰ ਲੰਘ ਕੇ ਅੱਗੇ ਨਾ ਵਧੋ, ਇਹ ਘਰ ਵਿਚ ਨਕਾਰਾਤਮਕਤਾ ਵਧਾਉਂਦਾ ਹੈ।

ਟੁੱਟੇ ਹੋਏ ਝਾੜੂ ਦਾ ਇਸਤੇਮਾਲ

ਅਕਸਰ ਲੋਕ ਪੁਰਾਣੇ ਜਾਂ ਟੁੱਟੇ ਹੋਏ ਝਾੜੂ ਦੀ ਵਰਤੋਂ ਉਦੋਂ ਤੱਕ ਕਰਦੇ ਹਨ, ਜਦੋਂ ਤੱਕ ਉਹ ਪੂਰੀ ਤਰ੍ਹਾਂ ਖ਼ਤਮ ਨਾ ਹੋ ਜਾਵੇ। ਵਾਸਤੂ ਅਨੁਸਾਰ, ਟੁੱਟਿਆ ਹੋਇਆ ਝਾੜੂ ਘਰ ਵਿੱਚ ਵਾਸਤੂ ਦੋਸ਼ ਪੈਦਾ ਕਰਦਾ ਹੈ। ਇਸ ਨਾਲ ਆਰਥਿਕ ਕੰਮਾਂ 'ਚ ਰੁਕਾਵਟ ਆਉਂਦੀ ਹੈ। ਸ਼ਨੀਵਾਰ ਦੇ ਦਿਨ ਪੁਰਾਣੇ ਝਾੜੂ ਨੂੰ ਘਰੋਂ ਹਟਾ ਕੇ ਨਵਾਂ ਝਾੜੂ ਲਿਆਉਣਾ ਸਭ ਤੋਂ ਸ਼ੁਭ ਮੰਨਿਆ ਜਾਂਦਾ ਹੈ।

ਰਸੋਈ ਘਰ ਦੇ ਕੋਲ ਝਾੜੂ ਨਾ ਰੱਖੋ

ਰਸੋਈ ਘਰ ਜਾਂ ਡਾਇਨਿੰਗ ਏਰੀਆ 'ਚ ਝਾੜੂ ਰੱਖਣਾ ਸਿਹਤ ਤੇ ਸੁਭਾਗ ਦੋਵਾਂ ਲਈ ਨੁਕਸਾਨਦੇਹ ਹੈ। ਮੰਨਿਆ ਜਾਂਦਾ ਹੈ ਕਿ ਇਸ ਨਾਲ ਘਰ ਵਿੱਚ ਅੰਨ-ਧਨ ਦੀ ਕਮੀ ਹੁੰਦੀ ਹੈ ਅਤੇ ਪਰਿਵਾਰ ਦੇ ਮੈਂਬਰਾਂ ਦੀ ਸਿਹਤ ਪ੍ਰਭਾਵਿਤ ਹੋ ਸਕਦੀ ਹੈ।

ਡਿਸਕਲੇਮਰ: ਇਸ ਲੇਖ ਵਿੱਚ ਦੱਸੇ ਗਏ ਉਪਾਅ/ਲਾਭ/ਸਲਾਹ ਅਤੇ ਬਿਆਨ ਸਿਰਫ਼ ਆਮ ਜਾਣਕਾਰੀ ਲਈ ਹਨ। ਪੰਜਾਬੀ ਜਾਗਰਣ ਅਤੇ ਜਾਗਰਣ ਨਿਊ ਮੀਡੀਆ ਇੱਥੇ ਇਸ ਲੇਖ ਫੀਚਰ ਵਿੱਚ ਲਿਖੀਆਂ ਗੱਲਾਂ ਦਾ ਸਮਰਥਨ ਨਹੀਂ ਕਰਦਾ। ਇਸ ਲੇਖ ਵਿੱਚ ਸ਼ਾਮਲ ਜਾਣਕਾਰੀ ਵੱਖ-ਵੱਖ ਮਾਧਿਅਮਾਂ/ਜੋਤਸ਼ੀਆਂ/ਪੰਚਾਂਗ/ਪ੍ਰਵਚਨਾਂ/ਮਾਨਤਾਵਾਂ/ਧਰਮ ਗ੍ਰੰਥਾਂ ਤੋਂ ਇਕੱਠੀ ਕੀਤੀ ਗਈ ਹੈ। ਪਾਠਕਾਂ ਨੂੰ ਬੇਨਤੀ ਹੈ ਕਿ ਲੇਖ ਨੂੰ ਅੰਤਿਮ ਸੱਚ ਜਾਂ ਦਾਅਵਾ ਨਾ ਮੰਨਣ ਅਤੇ ਆਪਣੇ ਵਿਵੇਕ ਦੀ ਵਰਤੋਂ ਕਰਨ। ਪੰਜਾਬੀ ਜਾਗਰਣ ਅਤੇ ਜਾਗਰਣ ਨਿਊ ਮੀਡੀਆ ਅੰਧਵਿਸ਼ਵਾਸ ਦੇ ਖ਼ਿਲਾਫ਼ ਹੈ।