ਮੀਂਹ ਕਾਰਨ ਝਬਾਲ ਨਾਲ ਲੱਗਦੇ ਅੱਧਾ ਦਰਜਨ ਪਿੰਡਾਂ ’ਚ ਕਈ ਥਾਵਾਂ ’ਤੇ ਡਿੱਗੀਆਂ ਘਰਾਂ ਦੀਆਂ ਛੱਤਾਂ

ਤੇਜਿੰਦਰ ਸਿੰਘ ਬੱਬੂ•, ਪੰਜਾਬੀ ਜਾਗਰਣ, ਝਬਾਲ : ਇਕ ਪਾਸੇ ਦਰਿਆਵਾਂ ’ਚ ਆਏ ਹੜ੍ਹਾਂ ਦੇ ਪਾਣੀ ਨਾਲ ਲੋਕਾਂ ਦੇ ਘਰ ਤੇ ਮਾਲ ਡੰਗਰ ਰੁੜ੍ਹ ਜਾਣ ਕਰ ਕੇ ਪੰਜਾਬ ’ਚ ਹਾਹਾਕਾਰ ਮਚੀ ਹੋਈ ਹੈ, ਉੱਥੇ ਹੀ ਪਾਣੀ ਦੇ ਵਹਾਅ ਨਾਲ ਵੱਡੇ ਪੱਧਰ ’ਤੇ ਲੋਕਾਂ ਦੇ ਰੁੜ੍ਹ ਜਾਣ ਨਾਲ ਜਾਨੀ ਨੁਕਸਾਨ ਵੀ ਹੋ ਚੁੱਕਾ ਹੈ। ਉੱਥੇ ਹੀ ਦੂਸਰੇ ਪਾਸੇ ਜਿਨ੍ਹਾਂ ਥਾਵਾਂ ’ਤੇ ਦਰਿਆਵਾਂ ਦੇ ਪਾਣੀ ਦੀ ਮਾਰ ਨਹੀਂ ਪਈ ਤੇ ਲੋਕ ਕਿਸੇ ਵੀ ਤਰ੍ਹਾਂ ਦੇ ਜਾਨੀ ਜਾਂ ਮਾਲੀ ਨੁਕਸਾਨ ਤੋਂ ਬਚੇ ਹਨ ਤੇ ਹੜ੍ਹ ਪ੍ਰਭਾਵਿਤ ਇਲਾਕਿਆਂ ’ਚ ਜਾ ਕੇ ਪੀੜਤਾਂ ਦੀ ਮਦਦ ਕਰ ਰਹੇ ਹਨ। ਪਰ ਨਾਲ ਹੀ ਇਨ੍ਹਾਂ ਇਲਾਕਿਆਂ ’ਚ ਰਹਿੰਦੇ ਉਹ ਲੋਕ ਵੀ ਹਨ, ਜਿਨ੍ਹਾਂ ਦੇ ਕੱਚੇ ਘਰਾਂ ’ਤੇ ਲਗਾਤਾਰ ਮੀਂਹ ਆਫਤ ਬਣ ਕੇ ਵਰ੍ਹ ਰਿਹਾ ਹੈ। ਲਗਾਤਾਰ ਹੋ ਰਹੀ ਭਾਰੀ ਬਾਰਿਸ਼ ਨੇ ਇਨ੍ਹਾਂ ਪਰਿਵਾਰਾਂ ਨੂੰ ਬਿਪਤਾ ’ਚ ਪਾ ਦਿੱਤਾ ਹੈ। ਕਿਉਂਕਿ ਬਾਲਿਆਂ ਵਾਲੀਆਂ ਛੱਤਾਂ ਦਾ ਤਾਂ ਬੁਰਾ ਹਾਲ ਹੋ ਚੁੱਕਾ ਹੈ ਤੇ ਲੋਕ ਲਾਚਾਰ ਹੋਏ ਛੱਤਾਂ ’ਤੇ ਤਰਪਾਲਾਂ ਪਾ ਕੇ ਸਾਰੀ-ਸਾਰੀ ਰਾਤ ਜਾਗ ਕੇ ਲੰਘਾ ਰਹੇ ਹਨ। ਜਦੋਂਕਿ ਛੱਤਾਂ ਦੇ ਚੋਣ ਕਰ ਕੇ ਲੋਕਾਂ ਦਾ ਸਾਮਾਨ ਵੀ ਖ਼ਰਾਬ ਹੋ ਰਿਹਾ ਹੈ। ਇੰਨਾ ਹੀ ਨਹੀਂ ਬਾਲਿਆਂ ਵਾਲੇ ਕੋਠੇ ਡਿੱਗਣੇ ਵੀ ਸ਼ੁਰੂ ਹੋ ਗਏ ਹਨ। ਹਲਾਤ ਤਾਂ ਇਹ ਬਣੇ ਹੋਏ ਹਨ ਕਿ ਹੁਣ ਲਗਾਤਾਰ ਮੀਂਹ ਦੇ ਕਾਰਨ ਲੋਕਾਂ ਦੇ ਲੈਂਟਰ ਤੱਕ ਵੀ ਚੋਣ ਲੱਗੇ ਹਨ। ਜਿਸ ਨੇ ਲੋਕਾਂ ਦੀਆਂ ਚਿੰਤਾਵਾਂ ਵਧਾ ਦਿੱਤੀਆਂ ਹਨ। ਜੇਕਰ ਕੁਝ ਦਿਨ ਹੋਰ ਇਸੇ ਤਰ੍ਹਾਂ ਦੀ ਬਾਰਿਸ਼ ਹੁੰਦੀ ਰਹੀ ਤਾਂ ਲੋਕਾਂ ਦੇ ਪੱਕੇ ਮਕਾਨ ਵੀ ਚੋਣ ਲੱਗ ਪੈਣਗੇ। ਇਸ ਤੋਂ ਇਲਾਵਾ ਲਗਾਤਾਰ ਬਾਰਿਸ਼ ਨੇ ਪਿੰਡਾਂ ਤੇ ਸ਼ਹਿਰਾਂ ਦੀਆਂ ਸੜਕਾਂ ’ਤੇ ਵੀ ਪਾਣੀ ਹੀ ਪਾਣੀ ਕਰ ਦਿੱਤਾ ਹੈ। ਜਿਸ ਨਾਲ ਸੜਕਾਂ ਵੀ ਟੁੱਟਣ ਲੱਗ ਪਈਆਂ ਹਨ। ਲੋਕ ਪਾਣੀ ’ਚੋਂ ਲੰਘਣ ਲਈ ਮਜਬੂਰ ਹੋਏ ਪਏ ਹਨ। ਕੁਝ ਵੀ ਹੋਵੇ ਹੁਣ ਤਾਂ ਲਗਾਤਾਰ ਹੋ ਰਹੀ ਬਰਸਾਤ ਨੇ ਉੱਚੇ ਥਾਵਾਂ ’ਤੇ ਰਹਿੰਦੇ ਲੋਕਾਂ ਦੀਆਂ ਚਿੰਤਾਵਾਂ ਵੀ ਵਧਾ ਦਿੱਤੀਆਂ ਹਨ। ਚਾਰੇ ਪਾਸੇ ਲੋਕ ਹੁਣ ਮੀਂਹ ਰੁਕਣ ਦੀਆਂ ਲੋਕ ਅਰਦਾਸਾਂ ਕਰ ਰਹੇ ਹਨ, ਉੱਥੇ ਪਿੰਡਾਂ ਦੇ ਪੀੜਤ ਲੋਕਾਂ ਨੇ ਜ਼ਿਲ੍ਹਾ ਪ੍ਰਸ਼ਾਸਨ ਤੇ ਸਮਾਜ ਸੇਵੀ ਸੰਸਥਾਵਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਉਨ੍ਹਾਂ ਦੀ ਸਾਰ ਲੈਣ ਤੇ ਉਨ੍ਹਾਂ ਦੇ ਸਿਰ ਲੁਕਾਵਿਆਂ ’ਤੇ ਪਾਉਣ ਲਈ ਤਰਪਾਲਾਂ ਹੀ ਦੇ ਦੇਣ, ਜਿਸ ਨਾਲ ਉਹ ਆਪਣੇ ਕੋਠਿਆਂ ਨੂੰ ਚੋਣ ਤੋਂ ਬਚਾ ਸਕਣ। ਵੱਖ-ਵੱਖ ਪਿੰਡਾਂ ਦੇ ਵਾਸੀਆਂ ਸੁਖਦੇਵ ਸਿੰਘ, ਹਰਜੀਤ ਸਿੰਘ, ਹਰਜਿੰਦਰ ਕੌਰ ਆਦਿ ਨੇ ਦੱਸਿਆ ਕਿ ਲਗਾਤਾਰ ਪੈ ਰਹੇ ਮੀਂਹ ਦੇ ਕਾਰਨ ਕਈ ਘਰਾਂ ’ਤੇ ਖ਼ਤਰਾ ਬਣਿਆ ਹੋਇਆ ਹੈ ਤੇ ਕਈ ਘਰਾਂ ਦੀਆਂ ਛੱਤਾਂ ਡਿੱਗ ਵੀ ਚੁੱਕੀਆਂ ਹਨ। ਉਨ੍ਹਾਂ ਨੇ ਕਿਹਾ ਕਿ ਪ੍ਰਸ਼ਾਸਨ ਤੁਰੰਤ ਇਨ੍ਹਾਂ ਇਲਾਕਿਆਂ ਦੀ ਸਾਰ ਲਵੇ ਤਾਂ ਜੋ ਛੱਤ ਡਿੱਗਣ ਨਾਲ ਕਿਸੇ ਦਾ ਜਾਨੀ ਨੁਕਸਾਨ ਨਾ ਹੋ ਜਾਵੇ। ====== ਅੱਧਾ ਦਰਜਨ ਪਿੰਡਾਂ ’ਚ ਕੱਚੇ ਘਰਾਂ ’ਤੇ ਮੰਡਰਾ ਰਿਹੈ ਖ਼ਤਰਾ ਕਸਬਾ ਝਬਾਲ ਇਲਾਕੇ ਦੇ ਪਿੰਡਾਂ ਝਾਮਕਾ ਕਲਾਂ, ਝਾਮਕਾ ਖੁਰਦ, ਪੱਧਰੀ, ਖੈਰਦੀਨਕੇ, ਪੰਡੋਰੀ ਤਖ਼ਤ ਮੱਲ, ਪੰਡੋਰੀ ਹੱਸਣ ਆਦਿ ਪਿੰਡਾਂ ਵਿਚ ਲਗਾਤਾਰ ਕੋਠੇ ਚੋਣ ਨਾਲ ਜਿੱਥੇ ਛੱਤਾਂ ਡਿੱਗਣ ਦਾ ਖ਼ਤਰਾ ਮੰਡਰਾ ਰਿਹਾ ਹੈ, ਉੱਥੇ ਲੋਕ ਡਰ ਦੇ ਸਾਏ ਹੇਠ ਰਾਤਾਂ ਕੱਟਦੇ ਹਨ। ਕਈ ਥਾਵਾਂ ’ਤੇ ਬਾਲਿਆਂ ਵਾਲੀਆਂ ਛੱਤਾਂ ਡਿੱਗਣ ਦਾ ਵੀ ਮਾਮਲਾ ਸਾਹਮਣੇ ਆਇਆ ਹੈ ਤੇ ਲਗਾਤਾਰ ਹੋ ਰਹੇ ਮੀਂਹ ਦੇ ਚੱਲਦਿਆਂ ਲੋਕਾਂ ’ਚ ਸਹਿਮ ਦਾ ਮਾਹੌਲ ਹੈ। ਇਸ ਸਬੰਧੀ ਡਿਪਟੀ ਕਮਿਸ਼ਨਰ ਰਾਹੁਲ ਨਾਲ ਸੰਪਰਕ ਕੀਤਾ ਤਾਂ ਉਨ੍ਹਾਂ ਕਿਹਾ ਕਿ ਪ੍ਰਸ਼ਾਸਨ ਦਾ ਸਾਰਾ ਧਿਆਨ ਹੜ੍ਹ ਪ੍ਰਭਾਵਿਤ ਇਲਾਕਿਆਂ ’ਚ ਲੱਗਾ ਹੋਇਆ ਹੈ। ਪਰ ਉਹ ਇਨ੍ਹਾਂ ਪਿੰਡਾਂ ’ਚ ਵੀ ਜਲਦ ਦੌਰਾ ਕਰਵਾ ਕੇ ਪੀੜਤ ਲੋਕਾਂ ਦੀ ਮਦਦ ਦਾ ਰਾਹ ਬਣਾਉਣਗੇ।