ਮਹਿਲ ਕਲਾਂ ਬਲਾਕ ਸੰਮਤੀ 'ਚ ਦਿਖੀ ਏਕਤਾ; ਨਾਈਵਾਲਾ ਨੇ ਸੰਭਾਲੀ ਚੇਅਰਮੈਨ ਦੀ ਕਮਾਨ, ਮਠਾੜੂ ਬਣੀ ਵਾਈਸ ਚੇਅਰਪਰਸਨ

ਚੋਣ ਪ੍ਰਕਿਰਿਆ ਸਬ ਡਿਵੀਜ਼ਨ ਮਹਿਲ ਕਲਾਂ ਦੀ ਐਸ.ਡੀ.ਐਮ. ਮੈਡਮ ਕ੍ਰਿਤਿਕਾ ਗੋਇਲ ਦੀ ਅਗਵਾਈ ਹੇਠ ਅਤੇ ਬੀਡੀਪੀਓ ਬੰਨਦੀਪ ਸਿੰਘ ਦੀ ਰਹਿਨੁਮਾਈ ’ਚ ਕਰਵਾਈ ਗਈ। ਇਸ ਦੌਰਾਨ ਇਲੈਕਸ਼ਨ ਇੰਚਾਰਜ ਸਤੀਸ਼ ਕੁਮਾਰ ਅਤੇ ਇਲੈਕਸ਼ਨ ਦਫ਼ਤਰ ਇੰਚਾਰਜ ਸੁਖਵਿੰਦਰ ਸਿੰਘ ਨੇ ਵੀ ਚੋਣ ਪ੍ਰਕਿਰਿਆ ਦੀ ਦੇਖਰੇਖ ਕੀਤੀ। ਚੋਣ ਦੌਰਾਨ ਬਲਾਕ ਸੰਮਤੀ ਮਹਿਲ ਕਲਾਂ ਦੇ ਜੋਨ ਨਾਈਵਾਲਾ (ਰਿਜ਼ਰਵ) ਤੋਂ ਸੰਮਤੀ ਮੈਂਬਰ ਕਰਮਜੀਤ ਸਿੰਘ ਨਾਈਵਾਲਾ ਦੇ ਨਾਂ ਦੀ ਤਜਵੀਜ਼ ਸੰਮਤੀ ਮੈਂਬਰ ਰਸਪਾਲ ਸਿੰਘ ਵੱਲੋਂ ਪੇਸ਼ ਕੀਤੀ ਗਈ, ਜਿਸ ਨੂੰ ਇੱਕ ਮੈਂਬਰ ਤੋਂ ਇਲਾਵਾ ਸਾਰੇ ਮੈਂਬਰਾਂ ਨੇ ਹੱਥ ਖੜੇ ਕਰਕੇ ਮਨਜ਼ੂਰੀ ਦਿੱਤੀ। ਇਸ ਤਰ੍ਹਾਂ ਕਰਮਜੀਤ ਸਿੰਘ ਨਾਈਵਾਲਾ ਨੂੰ ਸਰਬਸੰਮਤੀ ਨਾਲ ਬਲਾਕ ਸੰਮਤੀ ਮਹਿਲ ਕਲਾਂ ਦਾ ਚੇਅਰਮੈਨ ਚੁਣਿਆ ਗਿਆ।ਇਸੇ ਤਰ੍ਹਾਂ ਜੋਨ ਚੰਨਣਵਾਲ (ਜਨਰਲ) ਤੋਂ ਸੰਮਤੀ ਮੈਂਬਰ ਕਿਰਨਜੀਤ ਕੌਰ ਮਠਾੜੂ ਦੇ ਨਾਂ ਦੀ ਪੇਸ਼ਕਸ਼ ਜੋਨ ਠੁੱਲੀਵਾਲ ਤੋਂ ਸੰਮਤੀ ਮੈਂਬਰ ਹਰਜੀਤ ਸਿੰਘ ਵੱਲੋਂ ਕੀਤੀ ਗਈ, ਜਿਸ ’ਤੇ ਸਾਰੇ ਮੈਂਬਰਾਂ ਨੇ ਆਪਣੀ ਸਹਿਮਤੀ ਜਤਾਉਂਦਿਆਂ ਕਿਰਨਜੀਤ ਕੌਰ ਮਠਾੜੂ ਨੂੰ ਬਲਾਕ ਸੰਮਤੀ ਮਹਿਲ ਕਲਾਂ ਦੀ ਵਾਇਸ ਚੇਅਰਪਰਸਨ ਚੁਣ ਲਿਆ। ਚੋਣ ਉਪਰੰਤ ਸਮੂਹ ਬਲਾਕ ਸੰਮਤੀ ਮੈਂਬਰਾਂ ਵੱਲੋਂ ਨਵੇਂ ਚੁਣੇ ਚੇਅਰਮੈਨ ਕਰਮਜੀਤ ਸਿੰਘ ਨਾਈਵਾਲਾ ਅਤੇ ਵਾਇਸ ਚੇਅਰਪਰਸਨ ਕਿਰਨਜੀਤ ਕੌਰ ਮਠਾੜੂ ਦਾ ਭਰਪੂਰ ਸਨਮਾਨ ਕੀਤਾ ਗਿਆ।