ਬਿਜਲੀ ਖੇਤਰ ਦੀਆਂ ਚੁਣੌਤੀਆਂ 'ਤੇ ਕੀਤੀ ਵਿਚਾਰ-ਚਰਚਾ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਫਤਹਿਗੜ੍ਹ ਸਾਹਿਬ : ਪੰਜਾਬ ਸਟੇਟ ਪਾਵਰ ਕਾਰਪੋਰੇਸ਼ਨ ਲਿਮਿਟੇਡ (ਪੀਐਸਪੀਸੀਐਲ) ਦੇ ਇੰਜੀਨੀਅਰਿੰਗ, ਅਕਾਊਂਟਸ ਅਤੇ ਐਚਆਰ ਸਮੇਤ ਸਾਰੇ ਕੈਡਰਾਂ ਦੇ ਅਧਿਕਾਰੀ ਅੱਜ ਫਤਹਿਗੜ੍ਹ ਸਾਹਿਬ ਵਿਖੇ ਇਕੱਠੇ ਹੋਏ। ਇਸ ਮੌਕੇ ਉਨ੍ਹਾਂ ਨੇ ਗਰਮੀ ਦੇ ਮੌਸਮ ਦੀ ਅਗੇਤੀ ਸ਼ੁਰੂਆਤ ਅਤੇ ਤਾਪਮਾਨ ਵਿੱਚ ਤੇਜ਼ ਵਾਧੇ ਕਾਰਨ ਪੰਜਾਬ ਭਰ ਵਿੱਚ ਅਧਿਕਾਰੀਆਂ ਅਤੇ ਖਪਤਕਾਰਾਂ ਨੂੰ ਆ ਰਹੀਆਂ ਚੁਣੌਤੀਆਂ ’ਤੇ ਗੰਭੀਰ ਵਿਚਾਰ-ਵਟਾਂਦਰਾ ਕੀਤਾ। ਮੀਟਿੰਗ ਦੌਰਾਨ ਵੱਧ ਰਹੀ ਬਿਜਲੀ ਦੀ ਮੰਗ ਨੂੰ ਪੂਰਾ ਕਰਨ ਲਈ ਪੀਐਸਪੀਸੀਐਲ ਪ੍ਰਬੰਧਨ ਦੇ ਯਤਨਾਂ ਦੀ ਸਰਾਹਣਾ ਕੀਤੀ ਗਈ। ਇਸ ਮੌਕੇ ਅਧਿਕਾਰੀਆਂ ਨੇ ਦੱਸਿਆ ਕਿ ਦੇਸ਼ ਭਰ ਵਿੱਚ ਅਚਾਨਕ ਤਾਪਮਾਨ ਵਧਣ ਨਾਲ ਬਿਜਲੀ ਦੀ ਮੰਗ ਵਿੱਚ ਤੇਜ਼ ਵਾਧਾ ਹੋਇਆ ਹੈ, ਜਿਸ ਕਾਰਨ ਰਾਸ਼ਟਰੀ ਪੱਧਰ ’ਤੇ ਸਪਲਾਈ ਦੀ ਘਾਟ ਆ ਰਹੀ ਹੈ। ਇਸ ਤੋਂ ਇਲਾਵਾ, ਆਉਣ ਵਾਲੇ ਝੋਨੇ ਦੇ ਸੀਜ਼ਨ ਦੀ ਤਿਆਰੀ ਲਈ ਕੀਤੀਆਂ ਜਾ ਰਹੀਆਂ ਪੂਰਵ-ਨਿਰਧਾਰਤ ਮੁਰੰਮਤ ਕਾਰਵਾਈਆਂ ਅਤੇ ਸਥਾਨਕ ਖ਼ਰਾਬੀਆਂ ਕਾਰਨ ਵੀ ਬਿਜਲੀ ਸਪਲਾਈ ਵਿੱਚ ਅਸਥਾਈ ਰੁਕਾਵਟਾਂ ਆਈਆਂ ਹਨ। ਮੀਟਿੰਗ ਵਿੱਚ ਸਹਿਮਤੀ ਪ੍ਰਗਟਾਈ ਗਈ ਕਿ ਮੌਜੂਦਾ ਸਮੇਂ ਵਿੱਚ ਸਾਰੇ ਅਧਿਕਾਰੀਆਂ ਦਾ ਮੁੱਖ ਉਦੇਸ਼ ਖਪਤਕਾਰਾਂ ਨੂੰ ਭਰੋਸੇਯੋਗ ਅਤੇ ਕਿਫਾਇਤੀ ਬਿਜਲੀ ਸਪਲਾਈ ਪ੍ਰਦਾਨ ਕਰਨਾ ਹੈ। ਅਧਿਕਾਰੀਆਂ ਦੇ ਪੈਂਡਿੰਗ ਮੁੱਦਿਆਂ ਨੂੰ ਹੱਲ ਕਰਨ ਲਈ ਸਾਰੇ ਬਿਜਲੀ ਅਧਿਕਾਰੀਆਂ ਦੀ ਇੱਕਜੁਟਤਾ ਵਾਸਤੇ ‘ਪ੍ਰੋਗਰੈਸਿਵ ਅਲਾਇੰਸ ਆਫ ਪਾਵਰ ਆਫੀਸਰਜ਼’ ਦੇ ਗਠਨ ਦਾ ਫੈਸਲਾ ਕੀਤਾ ਗਿਆ, ਜੋ ਸਾਰੇ ਕੈਡਰਾਂ ਲਈ ਸਾਂਝਾ ਮੰਚ ਹੋਵੇਗਾ। ਉਨ੍ਹਾਂ ਮੌਜੂਦਾ ਮੈਨੇਜਮੈਂਟ ਪ੍ਰਤੀ ਆਪਣਾ ਸਮਰਥਨ ਦੁਹਰਾਇਆ ਅਤੇ ਬਿਜਲੀ ਮੰਤਰੀ ਦੀ ਸਰਗਰਮ ਲੀਡਰਸ਼ਿਪ ਦੀ ਪ੍ਰਸ਼ੰਸਾ ਕੀਤੀ। ਅਧਿਕਾਰੀਆਂ ਨੇ ਕਿਹਾ ਕਿ ਬਿਜਲੀ ਕਟੌਤੀਆਂ ਅਤੇ ਨੁਕਸਾਂ ਦੇ ਸਮੇਂ ਨੂੰ ਘਟਾਉਣ ਲਈ ਕਾਰਗਰ ਨੁਕਤੇ ਤਿਆਰ ਕਰਕੇ ਮੈਨੇਜਮੈਂਟ ਨੂੰ ਪੇਸ਼ ਕੀਤੇ ਜਾਣਗੇ। ਅਧਿਕਾਰੀਆਂ ਦੇ ਮੁੱਖ ਮੁੱਦੇ ਵੀ ਬਿਜਲੀ ਮੰਤਰੀ ਅਤੇ ਸੀਐਮਡੀ ਪੀਐਸਪੀਸੀਐਲ ਦੇ ਸਾਹਮਣੇ ਰੱਖੇ ਜਾਣਗੇ। ਮੀਟਿੰਗ ਵਿੱਚ ਇੰਜੀ. ਜਸਤੇਜ ਸਿੰਘ ਟਿਵਾਣਾ, ਇੰਜੀ. ਬਲਜਿੰਦਰ ਸਿੰਘ ਲਹਿਰਾ ਮੋਹੱਬਤ, ਇੰਜੀ. ਅਮਨਦੀਪ ਸਿੰਘ ਢੀਂਡਸਾ, ਸੀਏ ਰੋਹਿਤ ਜਿੰਦਲ, ਬਲਤੇਜ ਗਰੇਵਾਲ (ਡਿਪਟੀ ਮੈਨੇਜਰ), ਇੰਜੀ. ਹਰਜਿੰਦਰਪਾਲ ਸਿੰਘ ਚਾਹਲ, ਇੰਜੀ. ਸਾਹਿਲ ਗਰਗ, ਇੰਜੀ. ਨਿਤਿਨ ਪਰਾਸ਼ਰ, ਇੰਜੀ. ਸਰਬਜੀਤ ਸਿੰਘ ਮੋਹਾਲੀ, ਇੰਜੀ. ਗੁਰਮਨਪ੍ਰੀਤ ਸਿੰਘ ਸੋਮਲ, ਇੰਜੀ. ਸਵਰਨਜੀਤ ਸਿੰਘ, ਇੰਜੀ. ਅਜੈ ਗਰਗ, ਇੰਜੀ. ਵਿਵੇਕ ਗੋਏਲ, ਇੰਜੀ. ਅਭਿਰਾਜ ਸਿੰਘ ਰੰਧਾਵਾ, ਇੰਜੀ. ਜਸਦੀਪ ਸਿੰਘ ਘੁੰਮਣ, ਇੰਜੀ. ਮਨਿੰਦਰ ਸਿੰਘ, ਇੰਜੀ. ਸ਼ਿਵ ਕੁਮਾਰ, ਇੰਜੀ. ਜਤਿੰਦਰ ਸਿੰਘ ਅਤੇ ਪੰਜਾਬ ਭਰ ਤੋਂ ਕਈ ਹੋਰ ਅਧਿਕਾਰੀ ਸ਼ਾਮਲ ਸਨ।