Patiala News : ਗਊਵੰਸ਼ ਲਿਜਾ ਰਹੀ ਗੱਡੀ ਫੜੀ, 12 ਗਾਵਾਂ ਤੇ ਤਿੰਨ ਵੱਛੇ ਬਰਾਮਦ; ਪੰਜ ਲੋਕਾਂ ਵਿਰੁੱਧ ਮਾਮਲਾ ਦਰਜ

ਪੱਤਰ ਪ੍ਰੇਰਕ•ਪੰਜਾਬੀ ਜਾਗਰਣ•ਪਟਿਆਲਾ : ਗਊ ਰੱਖਿਆ ਬਲ ਦੇ ਮੈਂਬਰਾਂ ਵੱਲੋਂ ਥਾਣਾ ਅਰਬਨ ਅਸਟੇਟ ਦੇ ਇਲਾਕੇ ’ਚ ਬੁੱਚੜਖਾਨੇ ਵਿੱਚ ਪਸ਼ੂਆਂ ਨੂੰ ਲਿਜਾ ਰਹੀ ਇੱਕ ਗੱਡੀ ਫੜੀ ਗਈ ਹੈ। ਇਹ ਗੱਡੀ 5 ਅਕਤੂਬਰ ਨੂੰ ਸਾਧੂ ਬੇਲਾ ਰੋਡ 'ਤੇ ਫੜੀ ਗਈ ਸੀ, ਜਿੱਥੋਂ ਗੱਡੀ ਚਾਲਕ ਮੌਕੇ ਤੋਂ ਭੱਜ ਗਿਆ ਪਰ ਗੱਡੀ ਜ਼ਬਤ ਕਰ ਲਈ ਗਈ। ਗਊ ਰੱਖਿਆ ਬਲ ਦੇ ਸੰਯੁਕਤ ਸਕੱਤਰ ਵਿਕਾਸ ਕੰਬੋਜ ਦੇ ਬਿਆਨਾਂ ਦੇ ਆਧਾਰ 'ਤੇ, ਕੈਂਟਰ ਦੇ ਅਣਪਛਾਤੇ ਡਰਾਈਵਰ, ਕਾਕਾ ਸਲੀਮ, ਸ਼ਾਹਲਾਜ ਵਾਸੀ ਜਮਾਲਪੁਰ ਜ਼ਿਲ੍ਹਾ ਮਲੇਰਕੋਟਲਾ, ਕਾਲਾ, ਆਸ਼ੂ ਅਤੇ ਬਲਾਲ, ਵਾਸੀ ਮਲੇਰਕੋਟਲਾ ਵਿਰੁੱਧ ਐਫਆਈਆਰ ਦਰਜ ਕੀਤੀ ਗਈ ਹੈ।

ਸ਼ਿਕਾਇਤਕਰਤਾ ਵਿਕਾਸ ਕੰਬੋਜ ਨੇ ਦੱਸਿਆ ਕਿ ਉਨ੍ਹਾਂ ਨੇ ਸਤੀਸ਼ ਕੁਮਾਰ, ਸ਼ੰਕਰ ਨੰਦ ਗਿਰੀ, ਰਾਜੇਸ਼ ਕੇਹਰ, ਰਾਜੇਸ਼ ਕੌਸ਼ਿਕ, ਐਡਵੋਕੇਟ ਦਵਿੰਦਰ ਰਾਜਪੂਤ, ਦੀਪਕ ਵਧਵਾ, ਆਦਿਤਿਆ, ਸੰਨੀ, ਸਾਜਨ, ਅਮਨ, ਗੋਲੂ, ਰਵਿੰਦਰ ਸਿੰਗਲਾ, ਮਹੰਤ ਰਵੀ ਕਾਂਤ ਅਤੇ ਮੋਹਿਤ ਨਾਲ ਮਿਲ ਕੇ ਪਸ਼ੂਆਂ ਨੂੰ ਮਲੇਰਕੋਟਲਾ ਤੋਂ ਹਰਿਆਣਾ ’ਚ ਬੁੱਚੜਖਾਨੇ ਲਿਜਾਏ ਜਾਣ ਦੀ ਸੂਚਨਾ ਮਿਲਣ ਤੋਂ ਬਾਅਦ ਗੱਡੀ ਨੂੰ ਰੋਕਿਆ ਅਤੇ ਪੁਲਿਸ ਨੂੰ ਸੂਚਿਤ ਕੀਤਾ।

ਉਨ੍ਹਾਂ ਨੇ ਰਾਜਪੁਰਾ ਰੋਡ 'ਤੇ ਗੱਡੀ ਨੂੰ ਰੋਕਿਆ ਪਰ ਡਰਾਈਵਰ ਭੱਜ ਗਿਆ। ਉਨ੍ਹਾਂ ਦੱਸਿਆ ਕਿ ਕੈਂਟਰ ਵਿੱਚ 12 ਗਾਵਾਂ ਅਤੇ ਤਿੰਨ ਵੱਛੇ ਮਿਲੇ, ਜਿਨ੍ਹਾਂ ਵਿੱਚੋਂ ਇੱਕ ਮਰਿਆ ਹੋਇਆ ਸੀ। ਵਿਕਾਸ ਕੰਬੋਜ ਨੇ ਦੱਸਿਆ ਕਿ ਮੁਲਜਮ ਕਾਕਾ ਸਲੀਮ, ਸ਼ਹਿਲਾਜ ਅਤੇ ਹੋਰਾਂ ਨੇ ਮਲੇਰਕੋਟਲਾ ਤੋਂ ਸਾਰੇ ਪਸ਼ੂਆਂ ਨੂੰ ਲੋਡ ਕਰਕੇ ਲਿਜਾਏ ਸੀ ਅਤੇ ਉਨ੍ਹਾਂ ਵਿਰੁੱਧ ਪਹਿਲਾਂ ਵੀ ਮਾਮਲੇ ਦਰਜ ਹਨ।

ਵਿਕਾਸ ਕੰਬੋਜ ਨੇ ਕਿਹਾ ਕਿ ਇਸ ਤੋਂ ਪਹਿਲਾਂ 9 ਸਤੰਬਰ ਨੂੰ ਅਰਬਨ ਅਸਟੇਟ ਖੇਤਰ ਤੋਂ ਪਸ਼ੂਆਂ ਨਾਲ ਭਰੀ ਇੱਕ ਗੱਡੀ ਜ਼ਬਤ ਕੀਤੀ ਗਈ ਸੀ, ਜਿਸ ਤੋਂ ਬਾਅਦ ਅਰਬਨ ਅਸਟੇਟ ਪੁਲਿਸ ਸਟੇਸ਼ਨ ਵਿੱਚ ਐਫਆਈਆਰ ਦਰਜ ਕੀਤੀ ਗਈ ਸੀ। ਇਸ ਵਾਰ ਵੀ ਉਹੀ ਮੁਲਜ਼ਮ ਪਸ਼ੂਆਂ ਨੂੰ ਲੱਦ ਕੇ ਲਿਜਾ ਰਹੇ ਸਨ। ਥਾਣਾ ਅਰਬਨ ਅਸਟੇਟ ਥਾਣੇ ਦੇ ਇੰਚਾਰਜ ਅਮਨਦੀਪ ਬਰਾੜ ਨੇ ਕਿਹਾ ਕਿ ਪੁਲਿਸ ਨੇ ਮੁਲਜਮ ਕੈਂਟਰ ਡਰਾਈਵਰ ਅਤੇ ਹੋਰ ਮੁਲਜ਼ਮਾਂ ਨੂੰ ਫੜਨ ਲਈ ਛਾਪੇਮਾਰੀ ਸ਼ੁਰੂ ਕਰ ਦਿੱਤੀ ਹੈ।