Patiala News : ਸਰਕਾਰੀ ਬੱਸ ਦਾ ਕੰਡਕਟਰ ਪਾਣੀ ਵਾਲੀ ਟੈਂਕੀ ’ਤੇ ਚੜ੍ਹਿਆ, ਸਾਥੀ ਕੰਡਕਟਰ ਨੂੰ ਬਰਖ਼ਾਸਤ ਕਰਨ ਦੇ ਵਿਰੋਧ ’ਚ ਕੀਤਾ ਰੋਸ ਪ੍ਰਦਰਸ਼ਨ
ਪਟਿਆਲਾ ਪੀਆਰਟੀਸੀ ਡੀਪੂ ਵਿੱਚ ਸਥਿਤੀ ਉਸ ਵੇਲੇ ਤਣਾਅਪੂਰਨ ਬਣ ਗਈ ਜਦੋਂ ਕੰਡਕਟਰ ਸੁਲਤਾਨ ਸਿੰਘ ਸਾਥੀ ਕੰਡਕਟਰ ਨੂੰ ਬਰਖਾਸਤ ਕਰਨ ਦੇ ਰੋਸ ’ਚ ਡੀਪੂ ਦੀ ਪਾਣੀ ਵਾਲੀ ਟੈਂਕੀ ’ਤੇ ਚੜ੍ਹ ਗਿਆ ਅਤੇ ਖੁਦਕੁਸ਼ੀ ਦੀ ਧਮਕੀ ਦਿੱਤੀ।
Posted By Jagjit Singh
Publish Date: Mon, 08 Sep 2025 07:27 PM (IST)
Updated Date: Mon, 08 Sep 2025 07:28 PM (IST)
ਪੱਤਰ ਪ੍ਰੇਰਕ• ਪੰਜਾਬੀ ਜਾਗਰਣ, ਪਟਿਆਲਾ : ਪਟਿਆਲਾ ਪੀਆਰਟੀਸੀ ਡੀਪੂ ਵਿੱਚ ਸਥਿਤੀ ਉਸ ਵੇਲੇ ਤਣਾਅਪੂਰਨ ਬਣ ਗਈ ਜਦੋਂ ਕੰਡਕਟਰ ਸੁਲਤਾਨ ਸਿੰਘ ਸਾਥੀ ਕੰਡਕਟਰ ਨੂੰ ਬਰਖਾਸਤ ਕਰਨ ਦੇ ਰੋਸ ’ਚ ਡੀਪੂ ਦੀ ਪਾਣੀ ਵਾਲੀ ਟੈਂਕੀ ’ਤੇ ਚੜ੍ਹ ਗਿਆ ਅਤੇ ਖੁਦਕੁਸ਼ੀ ਦੀ ਧਮਕੀ ਦਿੱਤੀ।
ਉਸ ਨੇ ਵੀਡੀਓ ਜਾਰੀ ਕਰ ਕੇ ਦੋਸ਼ ਲਾਇਆ ਕਿ ਮੈਨੇਜਮੈਂਟ ਨੇ ਉਸ ਦੇ ਸਾਥੀ ਨਾਲ ਉਸ ਦਾ ਪੱਖ ਸੁਣੇ ਬਿਨਾਂ ਉਸ ਨੂੰ ਬਰਖਾਸਤ ਕਰ ਕੇ ਬੇਇਨਸਾਫ਼ੀ ਕੀਤੀ ਹੈ। ਉਸ ਨੇ ਚਿਤਾਵਨੀ ਦਿੱਤੀ ਕਿ ਜੇਕਰ ਪ੍ਰਸ਼ਾਸਨ ਨੇ ਉਸ ਨੂੰ ਹੇਠਾਂ ਉਤਰਨ ਲਈ ਮਜਬੂਰ ਕਰਨ ਦੀ ਕੋਸ਼ਿਸ਼ ਕੀਤੀ ਤਾਂ ਉਹ ਖੁਦਕੁਸ਼ੀ ਕਰ ਲਵੇਗਾ। ਉਸ ਦਾ ਦਾਅਵਾ ਹੈ ਕਿ ਉਸ ਦੇ ਕੋਲ ਪੈਟਰੋਲ, ਮਾਚਿਸ ਅਤੇ ਜ਼ਹਿਰੀਲਾ ਪਦਾਰਥ ਹੈ। ਸੂਚਨਾ ਮਿਲਦੇ ਹੀ ਪੁਲਿਸ ਅਤੇ ਪੀਆਰਟੀਸੀ ਦੇ ਅਧਿਕਾਰੀ ਮੌਕੇ ’ਤੇ ਪਹੁੰਚ ਗਏ।
ਟੈਂਕੀ ਦੇ ਉੱਪਰੋਂ ਇੰਟਰਨੈੱਟ ਮੀਡੀਆ ’ਤੇ ਵੀਡੀਓ ਜਾਰੀ ਕਰਦਿਆਂ ਕੰਡਕਟਰ ਨੇ ਦੋਸ਼ ਲਗਾਇਆ ਕਿ ਕਰਮਚਾਰੀ ਓਵਰਲੋਡ ਯਾਤਰੀਆਂ ਨੂੰ ਚੁੱਕ ਕੇ ਵਿਭਾਗ ਨੂੰ ਫਾਇਦਾ ਪਹੁੰਚਾਉਂਦੇ ਹਨ ਪਰ ਜੇਕਰ ਇਸ ਸਮੇਂ ਦੌਰਾਨ ਕਿਸੇ ਯਾਤਰੀ ਨਾਲ ਬਹਿਸ ਜਾਂ ਝਗੜਾ ਹੁੰਦਾ ਹੈ ਤਾਂ ਮੈਨੇਜਮੈਂਟ ਸਜ਼ਾ ਵਜੋਂ ਉਨ੍ਹਾਂ ਨੂੰ ਬਰਖ਼ਾਸਤ ਕਰ ਦਿੰਦੀ ਹੈ।
ਉਸ ਨੇ ਦੱਸਿਆ ਕਿ ਜਨਵਰੀ ਵਿੱਚ ਉਸ ਦੇ ਸਾਥੀ ਕੰਡਕਟਰ ਨਾਲ ਵੀ ਅਜਿਹਾ ਹੀ ਹੋਇਆ ਸੀ। ਓਵਰਲੋਡ ਯਾਤਰੀਆਂ ਨੂੰ ਲੈ ਕੇ ਹੋਏ ਮਾਮੂਲੀ ਝਗੜੇ ਤੋਂ ਬਾਅਦ ਪੁਲਿਸ ਨੇ ਐੱਫਆਈਆਰ ਦਰਜ ਕੀਤੀ ਅਤੇ ਜੀਐੱਮ ਨੇ ਉਸੇ ਆਧਾਰ ’ਤੇ ਉਸ ਦੀਆਂ ਸੇਵਾਵਾਂ ਖ਼ਤਮ ਕਰ ਦਿੱਤੀਆਂ। ਸੁਲਤਾਨ ਸਿੰਘ ਦਾ ਕਹਿਣਾ ਹੈ ਕਿ ਸਾਥੀ ਕੰਡਕਟਰ ਲਗਾਤਾਰ ਮੈਨੇਜਮੈਂਟ ਦੇ ਸੰਪਰਕ ਵਿੱਚ ਸੀ ਪਰ ਕੋਈ ਸੁਣਵਾਈ ਨਹੀਂ ਹੋਈ ਜਿਸ ਕਾਰਨ ਉਹ ਡਿਪਰੈਸ਼ਨ ਦਾ ਸ਼ਿਕਾਰ ਹੋ ਗਿਆ।
ਇਸ ਮਾਮਲੇ ’ਤੇ ਯੂਨੀਅਨ ਦੇ ਸੂਬਾਈ ਉਪ ਪ੍ਰਧਾਨ ਹਰਕੇਸ਼ ਵਿੱਕੀ ਨੇ ਕਿਹਾ ਕਿ ਝਗੜਾ ਬੱਸਾਂ ਦੀ ਘਾਟ ਅਤੇ ਓਵਰਲੋਡ ਯਾਤਰੀਆਂ ਕਾਰਨ ਹੋਇਆ ਹੈ। ਜੇਕਰ ਮੈਨੇਜਮੈਂਟ ਇਸ ਦਾ ਕੋਈ ਠੋਸ ਹੱਲ ਨਹੀਂ ਲੱਭਦੀ ਹੈ ਤਾਂ ਯੂਨੀਅਨ ਅੱਗੇ ਦੀ ਰਣਨੀਤੀ ਬਣਾਏਗੀ। ਫਿਲਹਾਲ ਸ਼ਾਮ ਤੱਕ ਮੈਨੇਜਮੈਂਟ ਅਤੇ ਕਰਮਚਾਰੀਆਂ ਵਿਚਕਾਰ ਕੋਈ ਸਹਿਮਤੀ ਨਹੀਂ ਬਣ ਸਕੀ ਤੇ ਉਕਤ ਵਿਅਕਤੀ ਟੈਂਕੀ ’ਤੇ ਹੀ ਚੜ੍ਹਿਆ ਹੋਇਆ ਸੀ।