ਨਾਭਾ ਦੇ ਉਦਯੋਗਾਂ ਦੀ ਹਾਲਤ ਵਿਗੜੀ : ਕੈਂਥ

ਅਮਨਦੀਪ ਸਿੰਘ ਲਵਲੀ, ਪੰਜਾਬੀ ਜਾਗਰਣ, ਨਾਭਾ : ਮਜ਼ਦੂਰ ਦਿਵਸ ਮੌਕੇ ’ਤੇ ਪਰਮਜੀਤ ਸਿੰਘ ਕੈਂਥ, ਭਾਰਤੀ ਜਨਤਾ ਪਾਰਟੀ ਅਨੁਸੂਚਿਤ ਜਾਤੀ ਮੋਰਚਾ (ਪੰਜਾਬ) ਦੇ ਉਪ ਪ੍ਰਧਾਨ, ਨੇ ਨਾਭਾ ਦੇ ਉਦਯੋਗਾਂ ਦੀ ਬਿਗੜਦੀ ਹਾਲਤ ’ਤੇ ਗੰਭੀਰ ਚਿੰਤਾ ਜਤਾਈ। ਉਨ੍ਹਾਂ ਕਿਹਾ ਕਿ ਨਾਭਾ, ਜੋ ਕਦੇ ਖੇਤੀਬਾੜੀ ਮਸ਼ੀਨਰੀ—ਖਾਸ ਕਰਕੇ ਕਮਬਾਈਨ ਹਾਰਵੇਸਟਰ ਉਦਯੋਗ ਲਈ ਪ੍ਰਸਿੱਧ ਸੀ, ਅੱਜ ਕੁਸ਼ਲ ਮਜ਼ਦੂਰਾਂ ਦੀ ਭਾਰੀ ਘਾਟ ਕਾਰਨ ਸੰਰਚਨਾਤਮਕ ਸੰਕਟ ਦਾ ਸਾਹਮਣਾ ਕਰ ਰਿਹਾ ਹੈ। ਕੈਂਥ ਨੇ ਕਿਹਾ ਕਿ ਇਹ ਸਥਿਤੀ ਕਿਸੇ ਕੁਦਰਤੀ ਕਾਰਨ ਦਾ ਨਤੀਜਾ ਨਹੀਂ, ਸਗੋਂ ਲਗਾਤਾਰ ਚੱਲ ਰਹੀਆਂ ਨੀਤੀਗਤ ਨਾਕਾਮੀਆਂ ਦਾ ਪਰਿਣਾਮ ਹੈ। ਰਾਜ ਸਰਕਾਰਾਂ ਉਦਯੋਗਾਂ ਦੀ ਅਸਲ ਲੋੜ ਨੂੰ ਸਮਝਣ ਅਤੇ ਉਸ ਅਨੁਸਾਰ ਹੁਨਰ ਵਿਕਾਸ ਦੀ ਢੰਗਸਾਰ ਰੂਪਰੇਖਾ ਤਿਆਰ ਕਰਨ ਵਿਚ ਅਸਫਲ ਰਹੀਆਂ ਹਨ। ਉਨ੍ਹਾਂ ਮੰਗ ਕੀਤੀ ਕਿ ਨਾਭਾ ਵਿੱਚ ਉਦਯੋਗ-ਅਧਾਰਿਤ ਹੁਨਰ ਕੇਂਦਰ ਤੁਰੰਤ ਸਥਾਪਿਤ ਕੀਤੇ ਜਾਣ। ਇਸ ਮੌਕੇ ਮੁੱਖ ਮਹਿਮਾਨ ਭਗਵੰਤ ਸਿੰਘ ਰਾਮਗੜ੍ਹੀਆ, ਚੇਅਰਮੈਨ ਵਿਸ਼ਵਕਰਮਾ ਵੈਲਫੇਅਰ ਸੋਸਾਇਟੀ, ਨੂੰ ਸਨਮਾਨਿਤ ਕੀਤਾ ਗਿਆ। ਦਿਹਾੜੀਦਾਰ ਮਜ਼ਦੂਰ ਯੂਨੀਅਨ ਦੇ ਪ੍ਰਧਾਨ ਕੇਵਲ ਸਿੰਘ ਕੋਟ ਨੇ ਸਾਰੇ ਹਾਜ਼ਰ ਮਜ਼ਦੂਰਾਂ ਦਾ ਧੰਨਵਾਦ ਕੀਤਾ। ਇਸ ਮੌਕੇ ਸੁਖਦੇਵ ਸਿੰਘ ਪੀਟਰ, ਜੋਰਾ ਸਿੰਘ, ਇਸਰ ਸਿੰਘ ਅਤੇ ਪਰਮਜੀਤ ਸਿੰਘ ਮਨੂਰ ਵੀ ਮੌਜੂਦ ਰਹੇ। ਕਾਰਜਕ੍ਰਮ ਵਿਚ ਚਰਨ ਸਿੰਘ ਐਮਡੀ ਮਲਕੀਤ ਐਗਰੋਟੈਕ , ਬ੍ਰਿਜਲਾਲ ਮਿੱਤਲ, ਧਨੰਜੈ ਵਾਲੀਆ ਅਤੇ ਪਵਨ ਸਿੰਗਲਾ ਸਮੇਤ ਕਈ ਪ੍ਰਮੁੱਖ ਉਦਯੋਗਪਤੀ ਅਤੇ ਸਮਾਜਿਕ ਪ੍ਰਤੀਨਿਧੀ ਵੀ ਹਾਜ਼ਰ ਰਹੇ।