'ਕਮਰੇ ਬੰਦ ਕਰਕੇ ਆਪਣਾ ਕੰਮ ਕਰਾਂਗੇ...' ਚੋਣਾਂ ਦੌਰਾਨ ਹਲਕਾ ਸ਼ੁਤਰਾਣਾ ਦੇ ਵਿਧਾਇਕ ਦੀ ਵੀਡੀਓ ਵਾਇਰਲ; ਵਿਰੋਧੀਆਂ ਮਚਾਇਆ ਬਵਾਲ

ਵਾਇਰਲ ਹੋਈ ਵੀਡੀਓ ਵਿੱਚ ਵਿਧਾਇਕ ਕੁਲਵੰਤ ਸਿੰਘ ਬਾਜੀਗਰ ਜਨਤਕ ਤੌਰ 'ਤੇ ਕਹਿ ਰਹੇ ਹਨ, "ਸਭ ਨੂੰ ਪਤਾ ਹੈ ਕਿ ਜੇਕਰ ਭਾਜਪਾ, ਕਾਂਗਰਸ ਜਾਂ ਅਕਾਲੀ ਦਲ ਦਾ ਪ੍ਰਧਾਨ ਬਣਿਆ ਤਾਂ ਕੋਈ ਕੰਮ ਨਹੀਂ ਹੋਣਾ। ਜੇਕਰ ਸਾਡੀ ਪਾਰਟੀ ਦਾ ਪ੍ਰਧਾਨ ਬਣੇਗਾ, ਕੰਮ ਤਾਂ ਹੀ ਹੋਣਗੇ। ਇਸ ਲਈ ਵਿਰੋਧੀਆਂ ਨੂੰ ਬੇਨਤੀ ਕਰਦਾ ਹਾਂ ਕਿ ਬੈਠ ਜਾਓ, ਤੁਹਾਡਾ ਪੈਸਾ ਨਾਜਾਇਜ਼ ਖ਼ਰਾਬ ਹੋਵੇਗਾ। ਤੁਸੀਂ ਜਿੱਤਣਾ ਹੈ ਨਹੀਂ।" ਵੀਡੀਓ ਦੇ ਅਖੀਰ ਵਿੱਚ ਉਹ ਵਿਵਾਦਿਤ ਬਿਆਨ ਦਿੰਦੇ ਹੋਏ ਕਹਿੰਦੇ ਹਨ, "ਜੇ ਕੋਈ ਮਾੜੀ-ਮੋਟੀ ਕਸਰ ਰਹਿ ਗਈ, ਅਸੀਂ ਕਮਰੇ ਬੰਦ ਕਰਕੇ ਕੱਢ ਲਵਾਂਗੇ। ਅਸੀਂ ਕੋਈ ਕੁੱਟਮਾਰ ਨਹੀਂ ਕਰਾਂਗੇ, ਇਹ ਵਾਅਦਾ ਹੈ। ਸਿਰਫ਼ ਗੇਟ ਬੰਦ ਕਰਕੇ ਆਪਣਾ ਕੰਮ ਕਰਾਂਗੇ ਤੇ ਵੱਡੇ ਮਾਰਜਨ ਨਾਲ ਜਿੱਤਾਂਗੇ।" ਇਸ ਦੌਰਾਨ ਮੰਚ 'ਤੇ ਮੌਜੂਦ 'ਆਪ' ਦੇ ਜ਼ਿਲ੍ਹਾ ਇੰਚਾਰਜ ਤੇਜਿੰਦਰ ਮਹਿਤਾ ਵੀ ਇਹ ਸਭ ਸੁਣ ਕੇ ਖ਼ੁਸ਼ ਹੁੰਦੇ ਦਿਖਾਈ ਦੇ ਰਹੇ ਹਨ।