ਪੰਜਾਬੀ ਯੂਨੀਵਰਸਿਟੀ ਅਧਿਆਪਕ ਸੰਘ ਚੋਣਾਂ ’ਚ ਡਾ. ਦਿਓਲ ਬਣੇ ਪ੍ਰਧਾਨ, ਡਾ. ਵਿਰਕ ਤੇ ਡਾ. ਦਿਓਲ ਧੜੇ ’ਚ ਰਿਹਾ ਸਖ਼ਤ ਮੁਕਾਬਲਾ

ਨਵਦੀਪ ਢੀਂਗਰਾ, ਪੰਜਾਬੀ ਜਾਗਰਣ, ਪਟਿਆਲਾ : ਪੰਜਾਬੀ ਯੂਨੀਵਰਸਿਟੀ ਵਿਖੇ ਬੁੱਧਵਾਰ ਨੂੰ ਹੋਈਆਂ ਅਧਿਆਪਕ ਸੰਘ (ਪੁਟਾ) ਦੀਆਂ ਚੋਣਾਂ ਦੇ ਨਤੀਜੇ ਐਲਾਨ ਦਿੱਤੇ ਗਏ ਹਨ। ਇਨ੍ਹਾਂ ਚੋਣਾਂ ਵਿਚ 'ਪ੍ਰੋਗਰੈਸਿਵ ਟੀਚਰਜ਼ ਫਰੰਟ' ਅਤੇ 'ਪ੍ਰੋਗਰੈਸਿਵ ਟੀਚਰਜ਼ ਅਲਾਇੰਸ' ਵਿਚਾਲੇ ਬਹੁਤ ਹੀ ਫਸਵਾਂ ਮੁਕਾਬਲਾ ਦੇਖਣ ਨੂੰ ਮਿਲਿਆ। ਪ੍ਰਧਾਨਗੀ ਅਹੁਦੇ ਲਈ ਹੋਈ ਵੋਟਿੰਗ ਵਿਚ ਪ੍ਰੋਗਰੈਸਿਵ ਟੀਚਰਜ਼ ਫਰੰਟ ਦੇ ਉਮੀਦਵਾਰ ਡਾ. ਨਿਸ਼ਾਨ ਸਿੰਘ ਦਿਓਲ ਨੇ ਵੱਡੀ ਜਿੱਤ ਦਰਜ ਕੀਤੀ ਹੈ। ਉਨ੍ਹਾਂ ਨੇ ਕੁੱਲ 209 ਵੋਟਾਂ ਹਾਸਲ ਕਰਕੇ ਆਪਣੇ ਵਿਰੋਧੀ ਉਮੀਦਵਾਰਾਂ ਨੂੰ ਪਛਾੜਿਆ। ਦੂਜੇ ਪਾਸੇ, ਪ੍ਰੋਗਰੈਸਿਵ ਟੀਚਰਜ਼ ਅਲਾਇੰਸ ਦੇ ਡਾ. ਗੁਰਨਾਮ ਸਿੰਘ ਵਿਰਕ ਨੂੰ 183 ਵੋਟਾਂ ਮਿਲੀਆਂ, ਜਦਕਿ ਟੀ.ਏ.ਜੀ.ਟੀ ਦੀ ਉਮੀਦਵਾਰ ਡਾ. ਮੋਨਿਕਾ ਚਾਵਲਾ ਸਿਰਫ 13 ਵੋਟਾਂ ਹੀ ਪ੍ਰਾਪਤ ਕਰ ਸਕੇ। ਇਸ ਚੋਣ ਦੌਰਾਨ 36 ਵੋਟਾਂ ਅਯੋਗ ਪਾਈਆਂ ਗਈਆਂ। ਯੂਨੀਵਰਸਿਟੀ ਦੇ ਅਧਿਆਪਕ ਵਰਗ ਵਿਚ ਇਨ੍ਹਾਂ ਚੋਣਾਂ ਨੂੰ ਲੈ ਕੇ ਭਾਰੀ ਉਤਸ਼ਾਹ ਦੇਖਣ ਨੂੰ ਮਿਲਿਆ ਅਤੇ ਚੋਣ ਨਤੀਜਿਆਂ ਤੋਂ ਬਾਅਦ ਜੇਤੂ ਉਮੀਦਵਾਰਾਂ ਦੇ ਸਮਰਥਕਾਂ ਨੇ ਜਸ਼ਨ ਮਨਾਇਆ।

--ਸਕੱਤਰ ਦੇ ਅਹੁਦੇ 'ਤੇ ਰਿਹਾ ਸਭ ਤੋਂ ਫਸਵਾਂ ਮੁਕਾਬਲਾ

ਸਕੱਤਰ ਦੇ ਅਹੁਦੇ ਲਈ ਹੋਈ ਚੋਣ ਵਿਚ ਮੁਕਾਬਲਾ ਕਾਫੀ ਰੋਮਾਂਚਕ ਰਿਹਾ। ਪ੍ਰੋਗਰੈਸਿਵ ਟੀਚਰਜ਼ ਫਰੰਟ ਦੇ ਡਾ. ਅਵਨੀਤ ਪਾਲ ਨੇ ਮਹਿਜ਼ 11 ਵੋਟਾਂ ਦੇ ਫਰਕ ਨਾਲ ਜਿੱਤ ਹਾਸਲ ਕੀਤੀ। ਉਨ੍ਹਾਂ ਨੂੰ 212 ਵੋਟਾਂ ਪਈਆਂ, ਜਦਕਿ ਪ੍ਰੋਗਰੈਸਿਵ ਟੀਚਰਜ਼ ਅਲਾਇੰਸ ਦੇ ਮਨਿੰਦਰ ਸਿੰਘ 201 ਵੋਟਾਂ ਨਾਲ ਦੂਜੇ ਸਥਾਨ 'ਤੇ ਰਹੇ। ਟੀ.ਏ.ਜੀ.ਟੀ ਦੀ ਉਮੀਦਵਾਰ ਨਿੰਮੀ ਨੂੰ 15 ਵੋਟਾਂ ਮਿਲੀਆਂ।

-ਮੀਤ ਪ੍ਰਧਾਨ ਅਤੇ ਖ਼ਜ਼ਾਨਚੀ ਦੇ ਅਹੁਦਿਆਂ 'ਤੇ ਅਲਾਇੰਸ ਦਾ ਕਬਜ਼ਾ

ਹਾਲਾਂਕਿ ਪ੍ਰਧਾਨਗੀ ਅਤੇ ਸਕੱਤਰ ਦੇ ਅਹੁਦੇ 'ਫਰੰਟ' ਦੇ ਹਿੱਸੇ ਆਏ, ਪਰ ਬਾਕੀ ਅਹੁਦਿਆਂ 'ਤੇ ਪ੍ਰੋਗਰੈਸਿਵ ਟੀਚਰਜ਼ ਅਲਾਇੰਸ ਨੇ ਬਾਜ਼ੀ ਮਾਰੀ ਹੈ। ਖਜਾਨਚੀ-ਕਮ-ਜੁਆਇੰਟ ਸਕੱਤਰ ਦੇ ਅਹੁਦੇ ਲਈ ਡਾ. ਕੰਵਲਪ੍ਰੀਤ ਸਿੰਘ ਅਟਵਾਲ (ਪ੍ਰੋਗਰੈਸਿਵ ਟੀਚਰਜ਼ ਅਲਾਇੰਸ) ਨੇ 220 ਵੋਟਾਂ ਲੈ ਕੇ ਸ਼ਾਨਦਾਰ ਜਿੱਤ ਪ੍ਰਾਪਤ ਕੀਤੀ। ਉਨ੍ਹਾਂ ਨੇ ਆਪਣੇ ਵਿਰੋਧੀ ਡਾ. ਅਮਰਪ੍ਰੀਤ ਸਿੰਘ ਨੂੰ 44 ਵੋਟਾਂ ਦੇ ਫਰਕ ਨਾਲ ਹਰਾਇਆ। ਅਲਾਇੰਸ ਦੇ ਡਾ. ਸਿਕੰਦਰ ਸਿੰਘ ਚੀਮਾ ਨੇ 206 ਵੋਟਾਂ ਹਾਸਲ ਕਰਕੇ ਮੀਤ ਪ੍ਰਧਾਨਗੀ ਦਾ ਅਹੁਦਾ ਆਪਣੇ ਨਾਂ ਕੀਤਾ। ਉਨ੍ਹਾਂ ਨੇ ਫਰੰਟ ਦੇ ਡਾ. ਗੁਰਜੀਤ ਸਿੰਘ ਭੱਠਲ ਨੂੰ ਮਾਤ ਦਿੱਤੀ।

ਪੰਜਾਬੀ ਯੂਨੀਵਰਸਿਟੀ ਚੋਣ ਨਤੀਜੇ