ਮਾਰਚ ’ਚ ਰਾਹਤ, ਇਸ ਸਾਲ ਗਰਮੀ ਦੇ ਨਹੀਂ ਦਿਖੇ ਤੇਵਰ

– ਅੱਠ ਸਾਲਾਂ ਦਾ ਰਿਕਾਰਡ ਟੁੱਟਿਆ, ਅਗਲੇ ਹਫ਼ਤੇ ਤੋਂ ਦੁਬਾਰਾ ਹਲਕੇ ਬੱਦਲ ਛਾਉਣ ਦੀ ਸੰਭਾਵਨਾ ਪਲਵਿੰਦਰ ਸਿੰਘ, ਪੰਜਾਬੀ ਜਾਗਰਣ ਗੁਰਦਾਸਪੁਰ : ਆਮ ਤੌਰ ’ਤੇ ਮਾਰਚ ਮਹੀਨਾ ਆਪਣੇ ਆਖ਼ਰੀ ਹਫ਼ਤੇ ਵਿਚ ਤਪਿਸ਼ ਦਾ ਅਹਿਸਾਸ ਕਰਾਉਣ ਲੱਗ ਜਾਂਦਾ ਹੈ ਪਰ ਇਸ ਵਾਰ ਸ਼ਹਿਰ ਵਾਸੀਆਂ ਨੂੰ ਗਰਮੀ ਤੋਂ ਵੱਡੀ ਰਾਹਤ ਮਿਲੀ ਹੈ। ਪਿਛਲੇ ਅੱਠ ਸਾਲਾਂ ਦੇ ਰਿਕਾਰਡ ਦੀ ਤੁਲਨਾ ਵਿਚ ਇਸ ਸਾਲ ਵੱਧ ਤੋਂ ਵੱਧ ਤਾਪਮਾਨ ਆਮ ਨਾਲੋਂ ਕਾਫ਼ੀ ਹੇਠਾਂ ਬਣਿਆ ਹੋਇਆ ਹੈ ਜਿਸ ਕਾਰਨ ਮੌਸਮ ਪੂਰੀ ਤਰ੍ਹਾਂ ਸੁਹਾਵਣਾ ਬਣਿਆ ਹੋਇਆ ਹੈ। ਐਤਵਾਰ ਨੂੰ ਸ਼ਹਿਰ ਦਾ ਵੱਧ ਤੋਂ ਵੱਧ ਤਾਪਮਾਨ 24 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ ਜਦਕਿ ਘੱਟ ਤੋਂ ਘੱਟ ਤਾਪਮਾਨ 14 ਡਿਗਰੀ ਸੈਲਸੀਅਸ ਰਿਹਾ। ਇਹ ਅੰਕੜਾ ਇਸ ਗੱਲ ਦਾ ਸੰਕੇਤ ਹੈ ਕਿ ਹੁਣ ਤੱਕ ਗਰਮੀ ਨੇ ਆਪਣਾ ਪੂਰਾ ਪ੍ਰਭਾਵ ਨਹੀਂ ਦਿਖਾਇਆ ਹੈ। ਮੌਸਮ ਵਿਭਾਗ ਅਨੁਸਾਰ ਆਮ ਤੌਰ ’ਤੇ ਮਾਰਚ ਦੇ ਅੰਤ ਤੱਕ ਪਾਰਾ 30 ਤੋਂ 31 ਡਿਗਰੀ ਦੇ ਵਿਚਕਾਰ ਪਹੁੰਚ ਜਾਂਦਾ ਹੈ ਪਰ ਇਸ ਵਾਰ ਇਹ ਅੰਕੜਾ 24 ਡਿਗਰੀ ਦੇ ਆਸਪਾਸ ਹੀ ਸੀਮਤ ਰਿਹਾ। ਐਤਵਾਰ ਸਵੇਰੇ ਸ਼ਹਿਰ ਦੇ ਬਾਹਰੀ ਇਲਾਕਿਆਂ ਵਿੱਚ ਹਲਕੀ ਧੁੰਦ ਛਾਈ ਰਹੀ। ਸਵੇਰੇ ਸਮੇਂ ਵਾਤਾਵਰਨ ਵਿਚ ਨਮੀ ਹੋਣ ਕਾਰਨ ਠੰਢਕ ਦਾ ਅਹਿਸਾਸ ਬਣਿਆ ਰਿਹਾ। ਹਾਲਾਂਕਿ ਸਵੇਰੇ ਕਰੀਬ ਨੌਂ ਵਜੇ ਤੋਂ ਬਾਅਦ ਮੌਸਮ ਸਾਫ਼ ਹੋ ਗਿਆ ਤੇ ਤੇਜ਼ ਧੁੱਪ ਨਿਕਲ ਆਈ। ਧੁੱਪ ਨਿਕਲਣ ਤੋਂ ਬਾਅਦ ਵੀ ਤਾਪਮਾਨ ਵਿਚ ਅਸਧਾਰਨ ਵਾਧਾ ਨਹੀਂ ਹੋਇਆ, ਜਿਸ ਕਾਰਨ ਦਿਨ ਦਾ ਸਮਾਂ ਵੀ ਅਰਾਮਦੇਹ ਬਣਿਆ ਰਿਹਾ। ਮੌਸਮ ਵਿਭਾਗ ਅਨੁਸਾਰ ਪੱਛਮੀ ਗੜਬੜੀ ਦੀ ਸਰਗਰਮੀ ਕਾਰਨ ਇਸ ਵਾਰ ਬਾਰਿਸ਼ ਤੇ ਬੱਦਲਾਂ ਦਾ ਦੌਰ ਲੰਬੇ ਸਮੇਂ ਤੱਕ ਬਣਿਆ ਰਿਹਾ, ਜਿਸਦਾ ਅਸਰ ਸ਼ਹਿਰ ਦੇ ਮੌਸਮ ’ਤੇ ਵੀ ਪਿਆ। ਇਸ ਕਾਰਨ ਗਰਮ ਹਵਾਵਾਂ ਦਾ ਆਗਮਨ ਸਮੇਂ ਸਿਰ ਨਹੀਂ ਹੋ ਸਕਿਆ ਤੇ ਤਾਪਮਾਨ ’ਤੇ ਕੰਟਰੋਲ ਬਣਿਆ ਰਿਹਾ। ਮੌਸਮ ਵਿਭਾਗ ਨੇ ਅਗਲੇ ਹਫ਼ਤੇ ਲਈ ਮੌਸਮ ਦਾ ਪੂਰਵ-ਅਨੁਮਾਨ ਜਾਰੀ ਕੀਤਾ ਹੈ। ਵਿਭਾਗ ਅਨੁਸਾਰ ਬੁੱਧਵਾਰ ਤੋਂ ਇੱਕ ਵਾਰ ਫਿਰ ਹਲਕੇ ਬੱਦਲ ਛਾਉਣ ਦੀ ਸੰਭਾਵਨਾ ਹੈ। ਇਨ੍ਹਾਂ ਬੱਦਲਾਂ ਕਾਰਨ ਦਿਨ ਦੇ ਤਾਪਮਾਨ ਵਿਚ ਜ਼ਿਆਦਾ ਵਾਧੇ ਦੀ ਸੰਭਾਵਨਾ ਨਹੀਂ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਅਪ੍ਰੈਲ ਦੇ ਪਹਿਲੇ ਹਫ਼ਤੇ ਤੱਕ ਮੌਸਮ ਇਸੇ ਤਰ੍ਹਾਂ ਆਮ ਨਾਲੋਂ ਘੱਟ ਤਾਪਮਾਨ ’ਤੇ ਬਣਿਆ ਰਹਿ ਸਕਦਾ ਹੈ। ਮੌਸਮ ਵਿਭਾਗ ਅਨੁਸਾਰ ਫਿਲਹਾਲ ਉੱਤਰ-ਪੱਛਮੀ ਹਵਾਵਾਂ ਸਰਗਰਮ ਨਹੀਂ ਹਨ। ਇਸ ਸਥਿਤੀ ਵਿਚ ਅਗਲੇ ਚਾਰ ਤੋਂ ਪੰਜ ਦਿਨਾਂ ਤੱਕ ਤਾਪਮਾਨ ਵਿਚ ਕੋਈ ਖ਼ਾਸ ਉਛਾਲ ਨਹੀਂ ਆਵੇਗਾ। ਬੁੱਧਵਾਰ ਤੋਂ ਬਾਅਦ ਹਲਕੇ ਬੱਦਲਾਂ ਦੀ ਆਵਾਜਾਈ ਰਹੇਗੀ, ਜਿਸ ਨਾਲ ਦਿਨ ਦਾ ਤਾਪਮਾਨ 30 ਡਿਗਰੀ ਦੇ ਕਰੀਬ ਤਾਂ ਜਾ ਸਕਦਾ ਹੈ, ਪਰ ਲੂ ਚੱਲਣ ਜਾਂ ਭਿਆਨਕ ਗਰਮੀ ਪੈਣ ਦੀ ਸੰਭਾਵਨਾ ਅਜੇ ਨਹੀਂ ਹੈ। ਆਮ ਨਾਲੋਂ ਘੱਟ ਤਾਪਮਾਨ ਦਾ ਲੋਕ ਖੂਬ ਆਨੰਦ ਮਾਣ ਰਹੇ ਹਨ। ਸਵੇਰੇ ਤੇ ਸ਼ਾਮ ਵੇਲੇ ਪਾਰਕਾਂ ਵਿਚ ਲੋਕਾਂ ਦੀ ਭੀੜ ਦਿਖਾਈ ਦੇ ਰਹੀ ਹੈ। ਪਿਛਲੇ ਸਾਲਾਂ ਵਿਚ ਮਾਰਚ ਆਉਂਦੇ-ਆਉਂਦੇ ਏਸੀ ਚੱਲਣੇ ਸ਼ੁਰੂ ਹੋ ਜਾਂਦੇ ਸਨ। ਇਸ ਵਾਰ ਹੁਣ ਤੱਕ ਪੱਖੇ ਦੀ ਵੀ ਲੋੜ ਨਹੀਂ ਪਈ। ਸਵੇਰ ਦੀ ਸੈਰ ਦਾ ਮਜ਼ਾ ਹੀ ਕੁਝ ਹੋਰ ਹੈ। ਵਪਾਰੀਆਂ ਲਈ ਹਾਲਾਂਕਿ ਇਹ ਬਦਲਾਅ ਮਿਸ਼ਰਤ ਰਿਹਾ। ਗਰਮੀ ਦੇ ਕੱਪੜਿਆਂ ਤੇ ਕੂਲਰਾਂ ਦੀ ਵਿਕਰੀ ਵਿਚ ਇਸ ਵਾਰ ਉਮੀਦ ਮੁਤਾਬਕ ਤੇਜ਼ੀ ਨਹੀਂ ਆਈ ਹੈ, ਜਦਕਿ ਠੰਢੇ ਪੀਣ ਵਾਲੇ ਪਦਾਰਥਾਂ ਦੀਆਂ ਦੁਕਾਨਾਂ ’ਤੇ ਵੀ ਹੁਣ ਤੱਕ ਉਨੀ ਭੀੜ ਨਹੀਂ ਜੁਟ ਸਕੀ ਹੈ। ਮੌਸਮ ਦਾ ਇਹ ਮਿਜਾਜ਼ ਕਿਸਾਨਾਂ ਲਈ ਵੀ ਫਾਇਦੇਮੰਦ ਸਾਬਤ ਹੋ ਰਿਹਾ ਹੈ। ਫ਼ਸਲਾਂ ਨੂੰ ਮਾਰਚ ਦੇ ਅੰਤ ਵਿਚ ਹੋਣ ਵਾਲੀ ਗਰਮੀ ਤੋਂ ਨੁਕਸਾਨ ਹੋਣ ਦੀ ਆਸ਼ੰਕਾ ਰਹਿੰਦੀ ਹੈ, ਪਰ ਇਸ ਵਾਰ ਤਾਪਮਾਨ ਆਮ ਬਣੇ ਰਹਿਣ ਕਾਰਨ ਕਣਕ ਨੂੰ ਲਾਭ ਮਿਲਣ ਦੀ ਉਮੀਦ ਜਤਾਈ ਜਾ ਰਹੀ ਹੈ। ਫਿਲਹਾਲ ਲੋਕਾਂ ਲਈ ਇਹ ਰਾਹਤ ਭਰਿਆ ਮੌਸਮ ਆਉਣ ਵਾਲੇ ਕੁਝ ਦਿਨਾਂ ਤੱਕ ਬਣਿਆ ਰਹੇਗਾ, ਜਿਸ ਤੋਂ ਬਾਅਦ ਅਪ੍ਰੈਲ ਦੇ ਦੂਜੇ ਹਫ਼ਤੇ ਤੋਂ ਤਾਪਮਾਨ ਵਿਚ ਹੌਲੀ-ਹੌਲੀ ਵਾਧਾ ਹੋਣ ਦੇ ਆਸਾਰ ਹਨ। ਪਿਛਲੇ ਅੱਠ ਸਾਲਾਂ ਦਾ ਤਾਪਮਾਨ ਸਾਲ – ਵੱਧ ਤੋਂ ਵੱਧ ਤੇ ਘੱਟ ਤੋਂ ਘੱਟ ਤਾਪਮਾਨ 2018 --- 30 --- 20 2019 --- 25 --- 15 2020 --- 27 --- 20 2021 --- 27 --- 18 2022 --- 31 --- 21 2023 --- 26 --- 18 2024 --- 30 --- 22 2025 --- 30 --- 20