ਸੜਕ 'ਤੇ ਚੱਲਦੀ ਰੇਂਜ ਰੋਵਰ ਨੂੰ ਪਈਆਂ ਅੱਗ ਦੀਆਂ ਲਪਟਾਂ; ਜੋੜੇ ਦੀ ਮੁਸਤੈਦੀ ਨਾਲ ਟਲਿਆ ਵੱਡਾ ਹਾਦਸਾ

ਜਗਸੀਰ ਸਿੰਘ ਛੱਤਿਆਣਾ, ਪੰਜਾਬੀ ਜਾਗਰਣ, ਗਿੱਦੜਬਾਹਾ : ਬੀਤੀ ਰਾਤ ਗਿੱਦੜਬਾਹਾ ਮਲੋਟ ਰੋਡ ’ਤੇ ਇਕ ਚਲਦੀ ਰੇਂਜ ਰੋਵਰ ਕਾਰ ਨੂੰ ਅਚਾਨਕ ਅੱਗ ਗਈ। ਇਸ ਹਾਦਸੇ ’ਚ ਜਿੱਥੇ ਕਾਰ ਪੂਰੀ ਤਰ੍ਹਾਂ ਸੜ੍ਹ ਗਈ ਉਥੇ ਹੀ ਸਮੇਂ ਸਿਰ ਕਾਰ ਨੂੰ ਅੱਗ ਲੱਗਣ ਬਾਰੇ ਪਤਾ ਲੱਗਣ ਦੇ ਚੱਲਦਿਆਂ ਕਾਰ ਸਵਾਰ ਪਤੀ ਪਤਨੀ ਕਾਰ ਵਿਚੋਂ ਸੁਰੱਖਿਅਤ ਬਾਹਰ ਆ ਗਏ, ਜਿਸ ਨਾਲ ਵੱਡਾ ਜਾਨੀ ਨੁਕਾਸਨ ਹੋਣ ਬਚਾਅ ਹੋ ਗਿਆ।

ਹਾਦਸੇ ਸੰਬੰਧੀ ਕਾਰ ਮਾਲਿਕ ਜਸਵਿੰਦਰ ਸਿੰਘ ਢਿੱਲੋਂ ਪੁੱਤਰ ਪ੍ਰੀਤਮ ਸਿੰਘ ਵਾਸੀ ਜੰਡਵਾਲਾ ਨੇ ਦੱਸਿਆ ਕਿ ਉਹ ਆਪਣੀ ਪਤਨੀ ਰਣਦੀਪ ਕੌਰ ਰੂਬੀ ਨਾਲ ਰੇਂਜ ਰੋਵਰ ਕਾਰ ਨੰਬਰ ਸੀਐੱਚ01-ਏਵੀ 1778 ਰਾਹੀਂ ਬਠਿੰਡਾ ਤੋਂ ਆਪਣੇ ਪਿੰਡ ਜੰਡਵਾਲਾ ਨੂੰ ਜਾ ਰਹੇ ਸਨ। ਜਦੋਂ ਉਹ ਗਿੱਦੜਬਾਹਾ ਦੇ ਭਾਰੂ ਚੌਂਕ ਫਲਾਈਓਵਰ ਨੂੰ ਕ੍ਰਾਸ ਕਰਕੇ ਹੁਸਨਰ ਚੌਂਕ ਫਲਾਈਓਵਰ ਦੇ ਨਜ਼ਦੀਕ ਪੁੱਜੇ ਤਾਂ ਉਨ੍ਹਾਂ ਦੀ ਕਾਰ ਵਿਚੋਂ ਸ਼ੂੰ- ਸ਼ੂੰ ਦੀ ਆਵਾਜ਼ ਆਈ, ਜਿਸ 'ਤੇ ਉਨ੍ਹਾਂ ਵੱਲੋਂ ਕਾਰ ਦੇ ਪੈਡਲ ਬ੍ਰੇਕ ਲਗਾਉਣ 'ਤੇ ਬ੍ਰੇਕ ਨੇ ਕੰਮ ਨਾ ਕੀਤਾ ਅਤੇ ਇਸੇ ਦੌਰਾਨ ਹੀ ਕਾਰ ਦਾ ਸਟੇਅਰਿੰਗ ਵੀ ਕੰਮ ਛੱਡ ਗਿਆ। ਕਾਰ ਦੀ ਰਫਤਾਰ ਘੱਟ ਹੋਣ ਕਾਰਨ ਉਨ੍ਹਾਂ ਤੁਰੰਤ ਹੈਂਡ ਬ੍ਰੇਕ ਲਗਾਈ, ਜਿਸ ਨਾਲ ਕਾਰ ਰੁੱਕ ਗਈ।

ਇਸੇ ਦੌਰਾਨ ਕਾਰ ਅੰਦਰ ਧੂੰਆਂ ਆਉਣ ਲੱਗਾ, ਜਿਸ 'ਤੇ ਉਹ ਅਤੇ ਉਨ੍ਹਾਂ ਦੀ ਪਤਨੀ ਕਾਰ ਵਿਚੋਂ ਬਾਹਰ ਆਏ ਤਾਂ ਦੇਖਦਿਆਂ ਹੀ ਦੇਖਦਿਆਂ ਕਾਰ ਦੇ ਅਗਲੇ ਹਿੱਸੇ ਵਿਚ ਅੱਗ ਫੈਲ ਗਈ। ਉਨ੍ਹਾਂ ਦੱਸਿਆ ਕਿ ਕਾਰ ਵਿਚ ਉਨ੍ਹਾਂ ਦੀ ਨਗਦੀ ਅਤੇ ਕਾਗਜਾਤ ਵੀ ਸਨ, ਜਿਨਾਂ ਨੂੰ ਮੌਕੇ ’ਤੇ ਮੌਜੂਦ ਇਕ ਨੌਜਵਾਨ ਨੇ ਸੁਰੱਖਿਅਤ ਬਾਹਰ ਕੱਢ ਲਿਆਂਦਾ। ਓਧਰ ਕਾਰ ਨੂੰ ਅੱਗ ਲਗਣ ਦੀ ਸੂਚਨਾ ਮਿਲਣ ਦੇ ਫਾਇਰ ਬ੍ਰਿਗੇਡ ਮੌਕੇ ’ਤੇ ਪੁੱਜੀ ਅਤੇ ਉਨ੍ਹਾਂ ਅੱਗ ’ਤੇ ਕਾਬੂ ਪਾਇਆ। ਜਸਵਿੰਦਰ ਸਿੰਘ ਨੇ ਦੱਸਿਆ ਕਿ ਇੰਨੀ ਮਹਿੰਗੀ ਅਤੇ ਸੁਰੱਖਿਅਤ ਕਾਰ ਨੂੰ ਅੱਗ ਕਿਸ ਤਰ੍ਹਾਂ ਲੱਗੀ ਇਸ ਬਾਰੇ ਉਨ੍ਹਾਂ ਨੂੰ ਕੁਝ ਵੀ ਸਮਝ ਨਹੀਂ ਆ ਰਿਹਾ।