ਹੁਣ ਤੱਕ ਜ਼ਿਲ੍ਹੇ ’ਚ 466,919 ਮੀਟ੍ਰਿਕ ਟਨ ਕਣਕ ਦੀ ਆਮਦ

ਵਿਕਾਸ ਕੁਮਾਰ ਗਰਗ ਪੰਜਾਬੀ ਜਾਗਰਣ, ਫਰੀਦਕੋਟ : ਫਰੀਦਕੋਟ ਜ਼ਿਲ੍ਹੇ ਦੀਆਂ ਮੰਡੀਆਂ ਵਿੱਚ ਕਣਕ ਦੀ ਖਰੀਦ ਬੇਰੋਕ ਜਾਰੀ ਹੈ ਅਤੇ ਆਪਣੇ ਟੀਚੇ ਦੇ ਨੇੜੇ ਹੁੰਦੀ ਜਾਪਦੀ ਹੈ। ਇਸ ਵਾਰ, ਫਰੀਦਕੋਟ ਜ਼ਿਲ੍ਹੇ ਵਿੱਚ ਕਣਕ ਦੀ ਖਰੀਦ ਦਾ ਟੀਚਾ 5,20,000 ਮੀਟ੍ਰਿਕ ਟਨ ਸੀ। ਹਾਲਾਂਕਿ, ਹੁਣ ਤੱਕ, ਜ਼ਿਲ੍ਹੇ ਦੀਆਂ ਮੰਡੀਆਂ ਵਿੱਚ 466,919 ਮੀਟ੍ਰਿਕ ਟਨ ਕਣਕ ਦੀ ਆਮਦ ਹੋ ਚੁੱਕੀ ਹੈ। ਖਰੀਦ ਦੀ ਗੱਲ ਕਰੀਏ ਤਾਂ, 2 ਮਈ ਤੱਕ, ਫਰੀਦਕੋਟ ਜ਼ਿਲ੍ਹੇ ਦੇ 68 ਖਰੀਦ ਕੇਂਦਰਾਂ ਤੇ ਸਰਕਾਰੀ ਏਜੰਸੀਆਂ ਦੁਆਰਾ 465,758 ਮੀਟ੍ਰਿਕ ਟਨ ਕਣਕ ਦੀ ਖਰੀਦ ਕੀਤੀ ਜਾ ਚੁੱਕੀ ਹੈ। ਲਿਫਟਿੰਗ ਦੀ ਗੱਲ ਕਰੀਏ ਤਾਂ, ਹੁਣ ਤੱਕ 297,294 ਮੀਟ੍ਰਿਕ ਟਨ ਕਣਕ ਦੀ ਲਿਫਟਿੰਗ ਕੀਤੀ ਜਾ ਚੁੱਕੀ ਹੈ। ਵੱਖ-ਵੱਖ ਏਜੰਸੀਆਂ ਵੱਲੋਂ ਕਣਕ ਦੀ ਖਰੀਦ ਅਤੇ ਲਿਫਟਿੰਗ ਪਨਗ੍ਰੇਨ ਨੇ ਹੁਣ ਤੱਕ 1,34,068 ਮੀਟ੍ਰਿਕ ਟਨ ਕਣਕ ਖਰੀਦੀ ਹੈ, ਜਦੋਂ ਕਿ ਲਿਫਟਿੰਗ 87,139 ਮੀਟ੍ਰਿਕ ਟਨ ਹੋ ਚੁੱਕੀ ਹੈ। ਪਨਸਪ ਨੇ 1,05,091 ਮੀਟ੍ਰਿਕ ਟਨ ਕਣਕ ਖਰੀਦੀ ਹੈ, ਜਦੋਂ ਕਿ ਲਿਫਟਿੰਗ 52,461 ਮੀਟ੍ਰਿਕ ਟਨ ਹੋ ਚੁੱਕੀ ਹੈ। ਮਾਰਕਫੈੱਡ ਨੇ 1,19,770 ਮੀਟ੍ਰਿਕ ਟਨ ਕਣਕ ਖਰੀਦੀ ਹੈ, ਜਦੋਂ ਕਿ ਲਿਫਟਿੰਗ 70,969 ਮੀਟ੍ਰਿਕ ਟਨ ਹੋ ਚੁੱਕੀ ਹੈ। ਵੇਅਰ ਹਾਊਸ ਨੇ 81,230 ਮੀਟ੍ਰਿਕ ਟਨ ਕਣਕ ਖਰੀਦੀ ਹੈ, ਜਦੋਂ ਕਿ ਲਿਫਟਿੰਗ 43,128 ਮੀਟ੍ਰਿਕ ਟਨ ਹੋ ਚੁੱਕੀ ਹੈ। ਜੇਕਰ ਅਸੀਂ ਨਿੱਜੀ ਵਪਾਰੀਆਂ ਦੀ ਗੱਲ ਕਰੀਏ, ਤਾਂ ਇਸ ਸਾਲ ਨਿੱਜੀ ਵਪਾਰੀਆਂ ਨੇ 25,596 ਮੀਟ੍ਰਿਕ ਟਨ ਕਣਕ ਖਰੀਦੀ ਹੈ, ਜਦੋਂ ਕਿ ਨਿੱਜੀ ਲਿਫਟਿੰਗ 25,596 ਮੀਟ੍ਰਿਕ ਟਨ ਹੋ ਚੁੱਕੀ ਹੈ। ਹੁਣ, ਮੰਡੀਆਂ ਵਿੱਚ ਕਣਕ ਦੀ ਆਮਦ ਹੌਲੀ-ਹੌਲੀ ਘੱਟ ਰਹੀ ਹੈ। ਲਿਫਟਿੰਗ ਦੀ ਗਤੀ ਵੀ ਵਧ ਗਈ ਹੈ, ਜਿਸ ਕਾਰਨ ਮੰਡੀਆਂ ਖਾਲੀ ਹੋਣ ਲੱਗ ਪਈਆਂ ਹਨ। ਇਸ ਵੇਲੇ ਕਣਕ ਦੀ ਖਰੀਦ ਟੀਚੇ ਤੋਂ 50,000 ਮੀਟ੍ਰਿਕ ਟਨ ਦੇ ਲਗਭਗ ਘੱਟ ਹੈ। ਨਾਲ ਹੀ ਹੁਣ 1 ਮਈ ਤੋਂ ਕਣਕ ਦੀ ਖਰੀਦ ਨਿਯਮਾਂ ਵਿੱਚ ਵੀ ਬਦਲਾਅ ਕੀਤੇ ਗਏ ਹਨ, ਕਣਕ ਮੰਡੀ ਵਿੱਚ ਲਿਆਉਣ ਵਾਲੇ ਕਿਸਾਨਾਂ ਨੂੰ ਹੁਣ ਆਪਣੇ ਕਣਕ ਦੇ ਢੇਰ ਦੇ ਕੋਲ ਖੜ੍ਹੇ ਹੋ ਕੇ ਆਪਣੀਆਂ ਫੋਟੋਆਂ ਖਿੱਚਣੀਆਂ ਜ਼ਰੂਰੀ ਹਨ। ਫੂਡ ਸਪਲਾਈ ਅਫ਼ਸਰ ਗੁਰਜੀਤ ਸਿੰਘ ਨੇ ਕਿਹਾ ਕਿ ਮੰਡੀ ਵਿੱਚ ਕਣਕ ਲਿਆਉਣ ਵਾਲੇ ਕਿਸੇ ਵੀ ਕਿਸਾਨ ਨੂੰ ਹੁਣ ਆਪਣੀ ਕਣਕ ਦੇ ਢੇਰ ਦੇ ਕੋਲ ਉਸ ਦਿਨ ਦੀ ਅਖਬਾਰ ਨਾਲ ਆਪਣੀ ਫੋਟੋ ਖਿੱਚਵਾਉਣੀ ਪਵੇਗੀ, ਅਤੇ ਵੀਡੀਓਗ੍ਰਾਫੀ ਕਰਵਾਉਣੀ ਪਵੇਗੀ, ਜਿਸ ਨਾਲ ਕਿਸਾਨ ਨੂੰ ਆਪਣਾ ਨਾਮ, ਪਿੰਡ ਅਤੇ ਪਤਾ ਦੱਸਣਾ ਹੋਵੇਗਾ। ਉਨ੍ਹਾਂ ਦੱਸਿਆ ਕਿ ਇਹ ਨਿਯਮ ਕਈ ਜ਼ਿਲ੍ਹਿਆਂ ਵਿੱਚ ਟੀਚੇ ਤੋਂ ਵੱਧ ਕਣਕ ਦੀ ਆਮਦ ਹੋਣ ਕਾਰਨ ਲਾਗੂ ਕੀਤਾ ਗਿਆ ਹੈ। ਜਿਸ ਦੇ ਨਾਲ ਬਾਹਰੀ ਸੂਬਿਆਂ ਤੋਂ ਆਉਣ ਵਾਲੀ ਕਣਕ ਤੇ ਵੀ ਰੋਕ ਲੱਗੇਗੀ।