ਲਿੰਗ ਨਿਰਧਾਰਨ ਟੈਸਟ ਤੋਂ ਇਨਕਾਰ ਕਰਨ 'ਤੇ ਪਤਨੀ ’ਤੇ ਚਾਕੂ ਨਾਲ ਹਮਲਾ

ਪੰਜਾਬੀ ਜਾਗਰਣ ਟੀਮ, ਸ੍ਰੀ ਮੁਕਤਸਰ ਸਾਹਿਬ : ਇਕ ਔਰਤ ਨੇ ਆਪਣੇ ਪਤੀ ਤੇ ਉਸਦੀ ਕੁੱਟਮਾਰ ਕਰਨ ਤੇ ਗਰਭ ’ਚ ਬੱਚੇ ਨੂੰ ਮਾਰਨ ਦੀ ਕੋਸ਼ਿਸ਼ ਕਰਨ ਦਾ ਦੋਸ਼ ਲਗਾਇਆ ਹੈ। ਜ਼ਖਮੀ ਗਰਭਵਤੀ ਔਰਤ ਨੂੰ ਪਹਿਲਾਂ ਮੁਕਤਸਰ ਤੇ ਫਿਰ ਉੱਥੋਂ ਫਰੀਦਕੋਟ ਰੈਫਰ ਕੀਤਾ ਗਿਆ। ਥਾਣਾ ਲੱਖੇਵਾਲੀ ਪੁਲਿਸ ਨੇ ਮੁਲਜ਼ਮ ਪਤੀ ਵਿਰੁੱਧ ਮਾਮਲਾ ਦਰਜ ਕਰਕੇ ਭਾਲ ਸ਼ੁਰੂ ਕਰ ਦਿੱਤੀ ਹੈ। ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ’ਚ ਪਿੰਡ ਰਾਮਗੜ੍ਹ ਚੂੰਘਾਂ ਵਾਸੀ ਜੋਗਿੰਦਰ ਕੌਰ ਨੇ ਦੱਸਿਆ ਕਿ ਉਸਦਾ ਵਿਆਹ 5 ਮਈ 2019 ਨੂੰ ਗੁਰਬੰਸ ਸਿੰਘ ਨਾਲ ਹੋਇਆ ਸੀ। ਵਿਆਹ ਤੋਂ ਬਾਅਦ ਉਨ੍ਹਾਂ ਦੀਆਂ ਦੋ ਧੀਆਂ ਹੋਈਆਂ ਵੱਡੀ ਲਗਭਗ ਸਾਢੇ ਪੰਜ ਸਾਲ ਦੀ ਤੇ ਛੋਟੀ ਲਗਭਗ ਦੋ ਸਾਲ ਦੀ ਹੈ। ਉਹ ਇਸ ਸਮੇਂ ਲਗਭਗ ਤਿੰਨ ਮਹੀਨਿਆਂ ਦੀ ਗਰਭਵਤੀ ਹੈ। ਉਸ ਅਨੁਸਾਰ ਉਸਦਾ ਪਤੀ ਗੁਰਬੰਸ ਸਿੰਘ ਦਰਜੀ ਦਾ ਕੰਮ ਕਰਦਾ ਹੈ ਜੋ ਕਿ ਸ਼ਰਾਬ ਪੀਣ ਦਾ ਆਦੀ ਹੈ। ਉਹ ਅਕਸਰ ਉਸ ਨਾਲ ਲੜਦਾ ਤੇ ਕੁੱਟਦਾ ਹੈ ਤੇ ਕਹਿੰਦਾ ਹੈ ਕਿ ਸਾਡੇ ਘਰ ਪਹਿਲਾਂ ਹੀ ਦੋ ਕੁੜੀਆਂ ਹਨ ਤੇ ਜੇਕਰ ਤੀਜਾ ਬੱਚਾ ਵੀ ਕੁੜੀ ਹੋਈ ਤਾਂ ਉਨ੍ਹਾਂ ਦੀ ਦੇਖਭਾਲ ਕੌਣ ਕਰੇਗਾ? ਇਸ ਲਈ ਉਹ ਅਲਟਰਾਸਾਊਂਡ ਕਰਵਾ ਕੇ ਬੱਚੇ ਦਾ ਲਿੰਗ ਨਿਰਧਾਰਤ ਕਰਨਾ ਚਾਹੁੰਦਾ ਸੀ ਤੇ ਕਿਹਾ ਕਿ ਜੇਕਰ ਇਹ ਕੁੜੀ ਹੈ ਤਾਂ ਉਸਨੂੰ ਗਰਭਪਾਤ ਕਰਵਾਉਣਾ ਪਵੇਗਾ ਜਿਸ ਲਈ ਮੈਂ ਸਹਿਮਤ ਨਹੀਂ ਸੀ। ਮੇਰੇ ਪਤੀ ਨੇ 14 ਅਪ੍ਰੈਲ ਨੂੰ ਸ਼ਾਮ 4 ਵਜੇ ਦੇ ਕਰੀਬ ਮੈਨੂੰ ਕੁੱਟਿਆ ਤੇ ਫਿਰ ਅਗਲੇ ਦਿਨ ਅੱਠ ਵਜੇ ਉਸਨੇ ਮੇਰੇ ਤੇ ਹਮਲਾ ਕਰਨਾ ਸ਼ੁਰੂ ਕਰ ਦਿੱਤਾ। ਉਸਨੇ ਕਿਹਾ ਕਿ ਜੇਕਰ ਮੈਂ ਅਲਟਰਾਸਾਊਂਡ ਨਹੀਂ ਕਰਵਾਇਆ ਤਾਂ ਮੈਂ ਬੱਚੇ ਨੂੰ ਕੁੱਖ ’ਚ ਮਾਰ ਦਿਆਂਗਾ। ਉਸਨੇ ਮੇਰੇ ਪੇਟ ’ਚ ਲੱਤ ਮਾਰੀ। ਮੈਨੂੰ ਵਾਲਾਂ ਤੋਂ ਫੜਿਆ ਤੇ ਮੇਰਾ ਸਿਰ ਕੰਧ ਨਾਲ ਮਾਰਿਆ ਤੇ ਸਾਰੇ ਸਰੀਰ, ਦੋਵੇਂ ਬਾਹਾਂ ਤੇ ਦੋਵੇਂ ਲੱਤਾਂ ਤੇ ਮੁੱਕੇ ਤੇ ਲੱਤਾਂ ਮਾਰੀਆਂ। ਰਸੋਈ ’ਚੋਂ ਚਾਕੂ ਫੜਿਆ ਤੇ ਵਾਰ ਕਰਨਾ ਸ਼ੁਰੂ ਕਰ ਦਿੱਤਾ। ਮੇਰੀਆਂ ਚੀਕਾਂ ਸੁਣ ਕੇ, ਗੁਆਂਢੀ ਗਲੀ ’ਚ ਇਕੱਠੇ ਹੋ ਗਏ ਤੇ ਮੇਰਾ ਪਤੀ ਘਰੋਂ ਭੱਜ ਗਿਆ। ਗੰਭੀਰ ਸੱਟਾਂ ਕਾਰਨ ਮੇਰੀ ਹਾਲਤ ਗੰਭੀਰ ਸੀ। ਮੈਨੂੰ ਸਿਵਲ ਹਸਪਤਾਲ ਮੁਕਤਸਰ ’ਚ ਦਾਖਲ ਕਰਵਾਇਆ ਗਿਆ ਜਿੱਥੇ ਮੇਰੀ ਹਾਲਤ ਵਿਗੜ ਗਈ ਤੇ ਮੈਨੂੰ ਫਰੀਦਕੋਟ ਮੈਡੀਕਲ ਕਾਲਜ ਰੈਫਰ ਕਰ ਦਿੱਤਾ ਗਿਆ ਜਿੱਥੇ ਇਸ ਸਮੇਂ ਮੈਟਰਨਿਟੀ ਵਾਰਡ ’ਚ ਮੇਰਾ ਇਲਾਜ ਚੱਲ ਰਿਹਾ ਹੈ। ਪੁਲਿਸ ਨੇ ਮੁਲਜ਼ਮ ਵਿਰੁੱਧ ਮਾਮਲਾ ਦਰਜ ਕਰ ਲਿਆ ਹੈ ਤੇ ਜਾਂਚ ਜਾਰੀ ਹੈ।