ਮੌਤ ਨੂੰ ਮਾਤ ਦੇ ਕੇ ਐਵਰੇਸਟ ਦੀ ਚੋਟੀ 'ਤੇ ਗੱਡਿਆ ਝੰਡਾ! ਕੈਨੇਡਾ 'ਚ ਵਕੀਲ ਤੇ ਫਰੀਦਕੋਟ ਦੇ ਜੰਮਪਲ ਅੰਮ੍ਰਿਤਪਾਲ ਧਾਲੀਵਾਲ ਨੇ ਦੁਨੀਆ ਭਰ 'ਚ ਚਮਕਾਇਆ ਪੰਜਾਬ ਦਾ ਨਾਂ

ਧਾਲੀਵਾਲ ਨੇ ਦੱਸਿਆ ਕਿ ਐਵਰੇਸਟ ਤੋਂ ਵਾਪਸੀ ਦੌਰਾਨ 8 ਹਜ਼ਾਰ ਮੀਟਰ ਤੋਂ ਉੱਪਰ ਵਾਲਾ ‘ਡੈੱਥ ਜ਼ੋਨ’ ਸਭ ਤੋਂ ਖ਼ਤਰਨਾਕ ਸਾਬਤ ਹੋਇਆ। ਆਕਸੀਜਨ ਦੀ ਘਾਟ ਅਤੇ ਸ਼ੇਰਪਾ ਵੱਲੋਂ ਸਾਥ ਛੱਡਣ ਕਾਰਨ ਹਾਲਾਤ ਨਾਜ਼ੁਕ ਬਣ ਗਏ ਸਨ। ਉਨ੍ਹਾਂ ਕਿਹਾ ਕਿ ਇਕ ਸਮੇਂ ਉਹ ਬੇਹੋਸ਼ ਵੀ ਹੋ ਗਏ ਸਨ, ਪਰ ਹੋਸ਼ ਆਉਣ ਤੋਂ ਬਾਅਦ ਵੀ ਉਨ੍ਹਾਂ ਨੇ ਹਿੰਮਤ ਨਹੀਂ ਹਾਰੀ। ਹੈੱਡਲੈਂਪ ਜਗਾ ਕੇ ਮਦਦ ਲਈ ਸੰਕੇਤ ਦਿੱਤਾ, ਜਿਸ ਤੋਂ ਬਾਅਦ ਮਿੰਗਮਾ ਤੇਨਜ਼ਿੰਗ ਸ਼ੇਰਪਾ ਦੀ ਅਗਵਾਈ ਹੇਠ ਟੀਮ ਨੇ ਸਮੇਂ ਸਿਰ ਆਕਸੀਜਨ ਦੇ ਕੇ ਉਨ੍ਹਾਂ ਨੂੰ ਸੁਰੱਖਿਅਤ ਹੇਠਾਂ ਪਹੁੰਚਾਇਆ। ਉਨ੍ਹਾਂ ਦੱਸਿਆ ਕਿ ਇਸ ਮੁਹਿੰਮ ਦੌਰਾਨ ਦੋ ਹੋਰ ਪਹਾੜ ਚੜ੍ਹੂਆਂ ਦੀ ਮੌਤ ਵੀ ਹੋ ਗਈ ਸੀ। ਇਸ ਸਭ ਦੇ ਬਾਵਜੂਦ ਉਨ੍ਹਾਂ ਦਾ ਵਾਹਿਗੁਰੂ ’ਤੇ ਪੂਰਾ ਭਰੋਸਾ ਬਣਿਆ ਰਿਹਾ। ਧਾਲੀਵਾਲ ਨੇ ਮਾਊਂਟ ਐਵਰੇਸਟ ’ਤੇ “ਨਾਨਕ ਨਾਮ ਚੜ੍ਹਦੀ ਕਲਾ, ਤੇਰੇ ਭਾਣੇ ਸਰਬੱਤ ਦਾ ਭਲਾ” ਲਿਖਿਆ ਇੱਕ ਫਲੈਕਸ ਵੀ ਲਹਿਰਾਇਆ।