ਪਿਤਾ ਦੀ ਯਾਦ ’ਚ ਆਧੁਨਿਕ ਹਾਲ ਤਿਆਰ ਕਰਵਾਇਆ

ਵਿਕਾਸ ਕੁਮਾਰ ਗਰਗ, ਪੰਜਾਬੀ ਜਾਗਰਣ, ਫ਼ਰੀਦਕੋਟ : ਫਰੀਦਕੋਟ ਦੇ ਸਿੱਖਿਆ ਖੇਤਰ ਲਈ ’ਚ ਇੱਕ ਇਤਿਹਾਸਕ ਅਤੇ ਯਾਦਗਾਰ ਅਵਸਰ ਉਸ ਵੇਲੇ ਦਰਜ ਹੋ ਗਿਆ, ਜਿਸ ਸਮੇ ਸਿੱਖਿਆ ਖੇਤਰ ਅੰਦਰ ਇੱਕ ਨਵਾਂ ਅਧਿਆਇ ਜੋੜਦਿਆਂ, ਸਮਾਜਿਕ ਜਿੰਮੇਵਾਰੀ ਅਤੇ ਮਨੁੱਖਤਾ ਦੀ ਉੱਚੀ ਮਿਸਾਲ ਵੀ ਕਾਇਮ ਕਰਦਿਆਂ ਬਲਾਕ ਫਰੀਦਕੋਟ-3 ਦੇ ਬਲਾਕ ਪ੍ਰਾਇਮਰੀ ਸਿੱਖਿਆ ਅਫ਼ਸਰ ਭਰਪੂਰ ਸਿੰਘ ਵੱਲੋਂ ਆਪਣੇ ਪਿਤਾ ਮੁਕੰਦ ਸਿੰਘ ਦੀ ਮਿੱਠੀ ਯਾਦ ਅੰਦਰ ਇੱਕ ਵਿਸ਼ਾਲ, ਆਧੁਨਿਕ ਅਤੇ ਸੁਵਿਧਾ-ਸੰਪੰਨ ਹਾਲ ਤਿਆਰ ਕਰਵਾ ਕੇ ਵਿਦਿਆਰਥੀਆਂ ਅਤੇ ਅਧਿਆਪਕ ਵਰਗ ਨੂੰ ਸਮਰਪਿਤ ਕੀਤਾ ਗਿਆ। ਲਗਭਗ 1500 ਵਰਗ ਫੁੱਟ ਅੰਦਰ ਫੈਲਿਆ ਇਹ ਹਾਲ ਆਪਣੀ ਸੁੰਦਰ ਨਿਰਮਾਣ ਕਲਾ, ਖੁੱਲ੍ਹੇ ਅਤੇ ਹਵਾਦਾਰ ਮਾਹੌਲ, ਅਤੇ ਆਧੁਨਿਕ ਸਹੂਲਤਾਂ ਨਾਲ ਹਰ ਕਿਸੇ ਨੂੰ ਆਕਰਸ਼ਿਤ ਕਰਦਾ ਹੈ। ਇਸ ਦੀ ਰਚਨਾ ’ਚ ਨਾ ਸਿਰਫ ਭੌਤਿਕ ਸਹੂਲਤਾਂ ਦਾ ਧਿਆਨ ਰੱਖਿਆ ਗਿਆ ਹੈ, ਬਲਕਿ ਵਿਦਿਆਰਥੀਆਂ ਦੀ ਸਿੱਖਣ-ਸਮਝਣ ਦੀ ਲੋੜ ਨੂੰ ਵੀ ਬੜੀ ਸੁਝਬੁਝ ਨਾਲ ਸਮਝਿਆ ਗਿਆ ਹੈ। ਇਹ ਹਾਲ ਭਵਿੱਖ ਅੰਦਰ ਸਿੱਖਿਆਕ ਗਤੀਵਿਧੀਆਂ, ਸੈਮੀਨਾਰਾਂ, ਸੰਸਕਿ੍ਰਤਿਕ ਪ੍ਰੋਗਰਾਮਾਂ ਅਤੇ ਹੋਰ ਸਮਾਜਿਕ ਇਕੱਠਾਂ ਲਈ ਇੱਕ ਕੇਂਦਰੀ ਮੰਚ ਵਜੋਂ ਆਪਣੀ ਭੂਮਿਕਾ ਨਿਭਾਏਗਾ। ਇਸ ਪ੍ਰੋਜੈਕਟ ਦੀ ਸਭ ਤੋਂ ਵੱਡੀ ਵਿਸ਼ੇਸਤਾ ਇਹ ਹੈ ਕਿ ਇਸ ਦੇ ਨਿਰਮਾਣ ‘ਤੇ ਆਇਆ ਲਗਭਗ ਬਾਈ ਲੱਖ ਰੁਪਏ ਦਾ ਸਾਰਾ ਖਰਚ ਸ੍ਰੀ ਭਰਪੂਰ ਸਿੰਘ ਬਲਾਕ ਪ੍ਰਾਇਮਰੀ ਸਿੱਖਿਆ ਅਫ਼ਸਰ, ਬਲਾਕ ਫ਼ਰੀਦਕੋਟ-3 ਵੱਲੋਂ ਆਪਣੇ ਨਿੱਜੀ ਸਰੋਤਾਂ ਰਾਹੀਂ, ਬਿਨਾਂ ਕਿਸੇ ਸਰਕਾਰੀ ਜਾਂ ਗੈਰ-ਸਰਕਾਰੀ ਸਹਿਯੋਗ ਦੇ, ਖੁਦ ਹੀ ਕੀਤਾ ਗਿਆ। ਅਜਿਹੀ ਨਿਸ਼ਕਾਮ ਭਾਵਨਾ ਅਤੇ ਦਾਨਵੀਰਤਾ ਅੱਜ ਦੇ ਸਮੇਂ ਵਿੱਚ ਬਹੁਤ ਹੀ ਵਿਰਲੀ ਵੇਖਣ ਨੂੰ ਮਿਲਦੀ ਹੈ, ਜੋ ਉਨ੍ਹਾਂ ਦੇ ਵੱਡੇ ਦਿਲ ਦੀ ਤਸਵੀਰ ਨੂੰ ਪੇਸ਼ ਕਰਦਾ ਹੈ। ਇਹ ਹਾਲ ਕੇਵਲ ਇੱਕ ਇਮਾਰਤ ਨਹੀਂ, ਸਗੋਂ ਮਾਤਾ-ਪਿਤਾ ਪ੍ਰਤੀ ਅਟੁੱਟ ਪਿਆਰ ਅਤੇ ਸਤਿਕਾਰ ਦਾ ਪ੍ਰਤੀਕ ਹੈ। ਇਹ ਇੱਕ ਪੁੱਤਰ ਵੱਲੋਂ ਆਪਣੇ ਪਿਤਾ ਦੀ ਯਾਦ ਨੂੰ ਸਦੀਵੀ ਬਣਾਉਣ ਦਾ ਸੁੰਦਰ ਉਪਰਾਲਾ ਹੈ, ਜੋ ਸਮਾਜ ਨੂੰ ਇਹ ਸੰਦੇਸ਼ ਦਿੰਦਾ ਹੈ ਕਿ ਸਾਡੇ ਜੀਵਨ ਵਿੱਚ ਮਾਤਾ-ਪਿਤਾ ਦੀ ਥਾਂ ਸਭ ਤੋਂ ਉੱਚੀ ਹੈ ਅਤੇ ਉਨ੍ਹਾਂ ਦੇ ਆਦਰ ’ਚ ਕੀਤੇ ਗਏ ਕਾਰਜ ਸਦਾ ਲਈ ਪ੍ਰੇਰਣਾ ਬਣ ਜਾਂਦੇ ਹਨ। ਇਸ ਦੇ ਨਾਲ ਹੀ, ਇਹ ਉਪਰਾਲਾ ਸਮਾਜ ਅੰਦਰ ਸੇਵਾ ਭਾਵਨਾ, ਸਾਂਝੀਵਾਲਤਾ ਅਤੇ ਸਮਾਜਿਕ ਜਿੰਮੇਵਾਰੀ ਦੀ ਮਹੱਤਤਾ ਨੂੰ ਵੀ ਉਜਾਗਰ ਕਰਦਾ ਹੈ। ਅਜਿਹੇ ਕਾਰਜ ਹੋਰ ਲੋਕਾਂ ਨੂੰ ਵੀ ਪ੍ਰੇਰਿਤ ਕਰਦੇ ਹਨ ਕਿ ਉਹ ਆਪਣੇ ਸਮਾਜ ਲਈ ਕੁਝ ਵੱਖਰਾ ਅਤੇ ਸਲਾਹਣਯੋਗ ਕਰਨ ਦੀ ਸੋਚਣ। ਨਿਸਚਤ ਤੌਰ ‘ਤੇ ਭਰਪੂਰ ਸਿੰਘ ਦਾ ਇਹ ਯੋਗਦਾਨ ਸਿਰਫ ਮੌਜੂਦਾ ਸਮੇਂ ਲਈ ਹੀ ਨਹੀਂ, ਸਗੋਂ ਆਉਣ ਵਾਲੀਆਂ ਪੀੜੀਆਂ ਲਈ ਵੀ ਇੱਕ ਰਾਹਦਾਰੀ ਸਾਬਤ ਹੋਵੇਗਾ। ਇਹ ਹਾਲ ਸਿੱਖਿਆ ਦੇ ਖੇਤਰ ’ਚ ਨਵੀਆਂ ਉੱਚਾਈਆਂ ਨੂੰ ਛੂਹਣ ਦਾ ਸਾਧਨ ਬਣੇਗਾ ਅਤੇ ਇਸ ਦੇ ਰਾਹੀਂ ਅਣਗਿਣਤ ਵਿਦਿਆਰਥੀ ਆਪਣੇ ਸੁਪਨੇ ਸਾਕਾਰ ਕਰਨ ਵੱਲ ਅੱਗੇ ਵਧਣਗੇ। ਇਹ ਉਪਰਾਲਾ ਹਮੇਸ਼ਾ ਲਈ ਇੱਕ ਪ੍ਰੇਰਣਾਦਾਇਕ ਕਹਾਣੀ ਵਜੋਂ ਯਾਦ ਰੱਖਿਆ ਜਾਵੇਗਾ। ਇੱਕ ਅਜਿਹੀ ਕਹਾਣੀ ਜੋ ਸੇਵਾ, ਸਤਿਕਾਰ ਅਤੇ ਸਮਰਪਣ ਦੇ ਮੂਲ ਨੂੰ ਜੀਵੰਤ ਰੱਖਦੀ ਹੈ। ਬਲਾਕ ਪ੍ਰਾਇਮਰੀ ਸਿੱਖਿਆ ਅਫ਼ਸਰ, ਬਲਾਕ ਫ਼ਰੀਦਕੋਟ-3 ਦੇ ਦਫ਼ਤਰ ਨੂੰ ਨਵੀਂ ਦਿੱਖ ਪ੍ਰਦਾਨ ਅਤੇ ਇਸ ਵਿਸ਼ੇਸ਼ ਹਾਲ ਨੂੰ ਤਿਆਰ ਤੇ ਭਰਪੂਰ ਸਿੰਘ ਦੀ ਹਰ ਪਾਸੇ ਪ੍ਰੰਸ਼ਸ਼ਾ ਹੋ ਰਹੀ ਹੈ।