ਕੀ ਹੈ 'ਈਜ਼ੀ ਰਜਿਸਟਰੀ'? ਪੰਜਾਬ ਦੇ ਲੋਕਾਂ ਨੂੰ ਘਰ ਬੈਠੇ ਮਿਲਣਗੇ ਕਾਗਜ਼; ਜਾਣੋ ਅਰਜ਼ੀ ਦੇਣ ਦੀ ਪ੍ਰਕਿਰਿਆ

ਜਾਗਰਣ ਸੰਵਾਦਦਾਤਾ, ਜਲੰਧਰ/ਲੁਧਿਆਣਾ : ਪੰਜਾਬ ਸਰਕਾਰ (Punjab Government) ਨੇ ਰਜਿਸਟਰੀ ਦਫ਼ਤਰਾਂ ਨੂੰ ਦਲਾਲਾਂ ਤੋਂ ਮੁਕਤ ਕਰਨ ਅਤੇ ਸਿਸਟਮ ਨੂੰ ਪਾਰਦਰਸ਼ੀ ਬਣਾਉਣ ਲਈ 'ਈਜ਼ੀ ਰਜਿਸਟਰੀ' (Easy Registry) ਦੀ ਸਹੂਲਤ ਸ਼ੁਰੂ ਕਰ ਕੇ ਲੋਕਾਂ ਨੂੰ ਵੱਡੀ ਰਾਹਤ ਦਿੱਤੀ ਹੈ। ਇਸ ਦੇ ਲਈ ਦਫ਼ਤਰਾਂ ਦੇ ਅੰਦਰ ਹੀ ਕਾਊਂਟਰ ਬਣਾਏ ਗਏ ਹਨ ਜਿੱਥੇ ਤਾਇਨਾਤ ਸਟਾਫ਼ ਸਿਰਫ਼ 500 ਰੁਪਏ 'ਚ ਰਜਿਸਟਰੀ ਦੀ ਪ੍ਰਕਿਰਿਆ ਪੂਰੀ ਕਰਵਾਉਂਦਾ ਹੈ।

ਇਸ ਦੇ ਬਾਵਜੂਦ ਇੱਥੇ ਏਜੰਟ ਅਜੇ ਵੀ ਸਰਗਰਮ ਹਨ ਤੇ ਰਜਿਸਟਰੀਆਂ ਕਰਵਾ ਕੇ ਆਪਣੀਆਂ ਜੇਬਾਂ ਭਰ ਰਹੇ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਇਨ੍ਹਾਂ ਏਜੰਟਾਂ ਦੀ ਕੁਝ ਅਧਿਕਾਰੀਆਂ ਨਾਲ 'ਸੈਟਿੰਗ' ਹੈ ਜਿਸ ਕਾਰਨ ਅਰਜ਼ੀ ਦੇਣ ਤੇ ਦਸਤਾਵੇਜ਼ ਲਗਾਉਣ 'ਤੇ ਇਨ੍ਹਾਂ ਨੂੰ ਦੂਜੇ ਆਮ ਲੋਕਾਂ ਦੇ ਮੁਕਾਬਲੇ ਪਹਿਲਾਂ ਸਮਾਂ (Appointment) ਮਿਲ ਜਾਂਦਾ ਹੈ। ਅਜਿਹੇ ਵਿਚ ਏਜੰਟਾਂ ਦੀ ਖੂਬ ਚਾਂਦੀ ਹੋ ਰਹੀ ਹੈ।

ਕਿਉਂਕਿ 'ਈਜ਼ੀ ਰਜਿਸਟਰੀ' ਦੀ ਸਹੂਲਤ 'ਚ ਸਾਰੇ ਦਸਤਾਵੇਜ਼ ਆਨਲਾਈਨ ਅਪਲੋਡ ਕਰਨੇ ਪੈਂਦੇ ਹਨ, ਇਸ ਲਈ ਇਹ ਏਜੰਟ ਲੋਕਾਂ ਨੂੰ ਜਲਦੀ ਰਜਿਸਟਰੀ ਕਰਵਾਉਣ ਅਤੇ ਦਸਤਾਵੇਜ਼ ਲੋਡ ਕਰਨ ਦੇ ਝੰਜਟ ਤੋਂ ਬਚਾਉਣ ਦਾ ਝਾਂਸਾ ਦੇ ਕੇ ਕੰਮ ਕਰਵਾ ਰਹੇ ਹਨ। ਇਸ ਕੰਮ ਬਦਲੇ ਉਹ ਲੋਕਾਂ ਤੋਂ 5 ਤੋਂ 10 ਹਜ਼ਾਰ ਰੁਪਏ ਤਕ ਵਸੂਲ ਰਹੇ ਹਨ।

ਕੀ ਹੈ ਈਜ਼ੀ ਰਜਿਸਟਰੀ ਦੀ ਪ੍ਰਕਿਰਿਆ?

ਅਸਲ ਵਿਚ, ਪੰਜਾਬ 'ਚ ਜਾਇਦਾਦ (ਪ੍ਰਾਪਰਟੀ) ਦੀ ਰਜਿਸਟਰੀ ਕਰਵਾਉਣ ਦੀ ਇੱਕ ਆਸਾਨ ਪ੍ਰਕਿਰਿਆ ਆਨਲਾਈਨ ਸਹੂਲਤ ਹੈ। ਇਹ ਨਾਗਰਿਕਾਂ ਨੂੰ ਘਰ ਬੈਠੇ ਜਾਂ ਸੇਵਾ ਕੇਂਦਰਾਂ ਰਾਹੀਂ ਬਹੁਤ ਹੀ ਘੱਟ ਫ਼ੀਸ (ਲਗਪਗ ₹500) 'ਚ ਡੀਡ ਤਿਆਰ ਕਰਨ ਅਤੇ 48 ਘੰਟਿਆਂ 'ਚ ਦਸਤਾਵੇਜ਼ ਜਮ੍ਹਾਂ ਕਰਵਾਉਣ ਦੀ ਸਹੂਲਤ ਦਿੰਦੀ ਹੈ। ਇਸ ਪ੍ਰਕਿਰਿਆ 'ਚ ਸਾਰੀ ਜਾਣਕਾਰੀ ਅਤੇ ਅੱਪਡੇਟ ਸਿੱਧੇ ਵ੍ਹਟਸਐਪ (WhatsApp) 'ਤੇ ਮਿਲ ਜਾਂਦੇ ਹਨ, ਜਿਸ ਕਾਰਨ ਦਲਾਲਾਂ ਦੀ ਜ਼ਰੂਰਤ ਖ਼ਤਮ ਹੋ ਜਾਂਦੀ ਹੈ। ਇਹ ਸਿਸਟਮ ਤੇਜ਼ ਅਤੇ ਪਾਰਦਰਸ਼ੀ ਹੈ। ਜੇਕਰ ਲੋਕ ਖ਼ੁਦ ਇਸ ਪ੍ਰਣਾਲੀ ਰਾਹੀਂ ਕੰਮ ਕਰਨ, ਤਾਂ ਉਹ ਦਲਾਲਾਂ ਨੂੰ ਦਿੱਤੇ ਜਾਣ ਵਾਲੇ ਵਾਧੂ ਪੈਸੇ ਬਚਾ ਸਕਦੇ ਹਨ। ਇਸ ਸਹੂਲਤ ਸਦਕਾ ਹੁਣ ਤਹਿਸੀਲ ਜਾਂ ਰਜਿਸਟਰਾਰ ਦਫ਼ਤਰਾਂ ਦੇ ਵਾਰ-ਵਾਰ ਚੱਕਰ ਲਗਾਉਣ ਦੀ ਲੋੜ ਨਹੀਂ ਰਹੀ। ਇਸ ਨਾਲ ਵਿਚੋਲਿਆਂ ਦੀ ਭੂਮਿਕਾ ਖ਼ਤਮ ਹੁੰਦੀ ਹੈ ਜਿਸ ਨਾਲ ਲੋਕਾਂ ਦਾ ਕੀਮਤੀ ਸਮਾਂ ਅਤੇ ਪੈਸਾ ਦੋਵੇਂ ਬਚਦੇ ਹਨ।

ਅਰਜ਼ੀ ਦੇਣ ਦੀ ਪ੍ਰਕਿਰਿਆ

ਤੁਸੀਂ ਰਜਿਸਟਰੀ ਕਰਵਾਉਣ ਲਈ eservices.punjab.gov.in ਪੋਰਟਲ 'ਤੇ ਜਾ ਕੇ ਜਾਂ ਨਜ਼ਦੀਕੀ ਸੇਵਾ ਕੇਂਦਰਾਂ ਰਾਹੀਂ ਅਰਜ਼ੀ ਦੇ ਸਕਦੇ ਹੋ। ਦਸਤਾਵੇਜ਼ ਜਮ੍ਹਾਂ ਕਰਵਾਉਣ ਲਈ ਆਪਣਾ ਪਛਾਣ ਪੱਤਰ (ਆਧਾਰ ਕਾਰਡ, ਪੈਨ ਕਾਰਡ), ਮਾਲਕੀ ਦੇ ਦਸਤਾਵੇਜ਼ (ਖਸਰਾ-ਖਤੌਨੀ) ਤੇ ਹੋਰ ਲੋੜੀਂਦੇ ਕਾਗਜ਼ਾਤ ਆਨਲਾਈਨ ਅਪਲੋਡ ਕਰੋ। ਇਸ ਤੋਂ ਬਾਅਦ ਨਿਰਧਾਰਿਤ ਫ਼ੀਸ ਦਾ ਭੁਗਤਾਨ ਆਨਲਾਈਨ ਕਰੋ। ਫ਼ੀਸ ਭਰਨ ਤੋਂ ਬਾਅਦ ਪੜਤਾਲੀਆ ਅਧਿਕਾਰੀ (Verification Officer) 48 ਘੰਟਿਆਂ ਦੇ ਅੰਦਰ ਤੁਹਾਡੇ ਦਸਤਾਵੇਜ਼ਾਂ ਦੀ ਜਾਂਚ ਕਰਦੇ ਹਨ। ਸਫਲਤਾਪੂਰਵਕ ਜਾਂਚ ਤੋਂ ਬਾਅਦ ਤੁਹਾਨੂੰ ਰਜਿਸਟਰੀ ਲਈ ਸਮਾਂ (Appointment) ਮਿਲ ਜਾਂਦਾ ਹੈ। ਕਿਸੇ ਵੀ ਤਰ੍ਹਾਂ ਦੀ ਮਦਦ ਜਾਂ ਜਾਣਕਾਰੀ ਲਈ ਤੁਸੀਂ ਸੇਵਾ ਦੇ ਹੈਲਪਲਾਈਨ ਨੰਬਰ 1076 'ਤੇ ਕਾਲ ਕਰ ਸਕਦੇ ਹੋ।

— ਵਿਜੇ ਮੌਰਿਆ