ਜੈਪੁਰ-ਅੰਮ੍ਰਿਤਸਰ ਐਕਸਪ੍ਰੈਸ 'ਚ ਚੋਰੀ, ਵਿਆਹ ’ਤੇ ਆ ਰਹੇ ਪਰਿਵਾਰ ਦੇ 10 ਲੱਖ ਦੇ ਸੋਨੇ ਦੇ ਗਹਿਣੇ ਹੋਏ ਗਾਇਬ

ਸੁਸ਼ੀਲ ਕੁਮਾਰ ਸ਼ਸ਼ੀ, ਪੰਜਾਬੀ ਜਾਗਰਣ, ਲੁਧਿਆਣਾ : ਜੈਪੁਰ ਤੋਂ ਲੁਧਿਆਣਾ ਵਿਆਹ ਸਮਾਰੋਹ ਵਿੱਚ ਸ਼ਾਮਲ ਹੋਣ ਆ ਰਹੇ ਇੱਕ ਪਰਿਵਾਰ ਨੂੰ ਰੇਲ ਯਾਤਰਾ ਦੌਰਾਨ ਚੋਰਾਂ ਨੇ ਨਿਸ਼ਾਨਾ ਬਣਾ ਲਿਆ। ਚੋਰਾਂ ਨੇ ਟ੍ਰੇਨ ਦੇ ਥਰਡ ਏਸੀ ਕੋਚ ਵਿੱਚੋਂ ਲੱਗਭਗ 10 ਲੱਖ ਰੁਪਏ ਦੇ ਸੋਨੇ ਦੇ ਗਹਿਣੇ ਚੋਰੀ ਕਰ ਲਏ। ਅੰਕੁਸ਼ ਜੈਨ ਨੇ ਦੱਸਿਆ ਕਿ ਉਹ ਟ੍ਰੇਨ ਨੰਬਰ 19613 ਜੈਪੁਰ-ਅੰਮ੍ਰਿਤਸਰ ਐਕਸਪ੍ਰੈਸ ਰਾਹੀਂ ਜੈਪੁਰ ਗਾਂਧੀ ਨਗਰ ਸਟੇਸ਼ਨ ਤੋਂ ਲੁਧਿਆਣਾ ਆ ਰਹੇ ਸਨ। ਉਨ੍ਹਾਂ ਨਾਲ ਉਨ੍ਹਾਂ ਦੀ ਪਤਨੀ, 70 ਸਾਲ ਦੀ ਮਾਤਾ ਅਤੇ 4 ਸਾਲ ਦੀ ਧੀ ਵੀ ਸਫ਼ਰ ਕਰ ਰਹੇ ਸਨ। ਉਨ੍ਹਾਂ ਨੇ ਸੁਰੱਖਿਅਤ ਯਾਤਰਾ ਦੀ ਉਮੀਦ ਨਾਲ ਥਰਡ ਏਸੀ ਕੋਚ ਵਿੱਚ ਟਿਕਟ ਬੁੱਕ ਕਰਵਾਈ ਸੀ।

ਅੰਕੁਸ਼ ਜੈਨ ਮੁਤਾਬਕ ਰਾਤ ਸਮੇਂ ਜਦੋਂ ਸਾਰਾ ਪਰਿਵਾਰ ਗਹਿਰੀ ਨੀਂਦ ਵਿੱਚ ਸੀ ਤਾਂ ਚੋਰਾਂ ਨੇ ਉਨ੍ਹਾਂ ਦਾ ਸਮਾਨ ਚੋਰੀ ਕਰ ਲਿਆ। ਜਦੋਂ ਪਰਿਵਾਰ ਲੁਧਿਆਣਾ ਰੇਲਵੇ ਸਟੇਸ਼ਨ ’ਤੇ ਉਤਰਿਆ ਤਾਂ ਉਨ੍ਹਾਂ ਨੂੰ ਪਤਾ ਲੱਗਿਆ ਕਿ ਬੈਗਾਂ ਵਿੱਚ ਪਏ ਗਹਿਣਿਆਂ ਦੇ ਡੱਬੇ ਖਾਲੀ ਹਨ। ਸੋਨਾ ਚੋਰੀ ਹੋਇਆ ਦੇਖ ਪੂਰੇ ਪਰਿਵਾਰ ਦੇ ਹੋਸ਼ ਉੱਡ ਗਏ।

ਚੋਰੀ ਦਾ ਸ਼ਿਕਾਰ ਹੋਏ ਜੈਨ ਨੇ ਦੱਸਿਆ ਕਿ ਚੋਰੀ ਹੋਏ ਸਮਾਨ ਵਿੱਚ ਤਕਰੀਬਨ 3 ਤੋਲੇ ਦੀ ਸੋਨੇ ਦੀ ਚੇਨ, ਇੱਕ ਸੋਨੇ ਦੀ ਅੰਗੂਠੀ ਅਤੇ ਕੀਮਤੀ ਹੀਰੇ ਦੇ ਟਾਪਸ ਸ਼ਾਮਲ ਹਨ। ਮੌਜੂਦਾ ਬਾਜ਼ਾਰ ਕੀਮਤ ਮੁਤਾਬਕ ਗਹਿਣਿਆਂ ਦੀ ਕੁੱਲ ਕੀਮਤ ਕਰੀਬ 10 ਲੱਖ ਰੁਪਏ ਦੱਸੀ ਜਾ ਰਹੀ ਹੈ।

ਅੰਕੁਸ਼ ਜੈਨ ਨੇ ਕਿਹਾ ਕਿ ਉਹ ਇੱਕ ਮੱਧ ਵਰਗ ਦੇ ਪਰਿਵਾਰ ਨਾਲ ਸੰਬੰਧਿਤ ਹਨ ਅਤੇ ਇਹ ਗਹਿਣੇ ਉਨ੍ਹਾਂ ਨੇ ਸਾਲਾਂ ਦੀ ਬਚਤ ਨਾਲ ਬਣਵਾਏ ਸਨ। ਉਨ੍ਹਾਂ ਨੇ ਕਿਹਾ ਕਿ ਸੁਰੱਖਿਅਤ ਯਾਤਰਾ ਲਈ ਏਸੀ ਕੋਚ ਦਾ ਕਿਰਾਇਆ ਭਰਿਆ ਸੀ, ਪਰ ਕੋਚ ਅੰਦਰ ਕਿਸੇ ਤਰ੍ਹਾਂ ਦੀ ਸੁਰੱਖਿਆ ਨਹੀਂ ਦਿਖੀ। ਇਸ ਘਟਨਾ ਨਾਲ ਰੇਲਵੇ ਪੁਲਿਸ ਦੀ ਸੁਰੱਖਿਆ ਵਿਵਸਥਾ ’ਤੇ ਸਵਾਲ ਖੜੇ ਹੋ ਗਏ ਹਨ। ਮਾਮਲੇ ਦੀ ਸੂਚਨਾ ਮਿਲਣ ’ਤੇ ਰੇਲਵੇ ਪੁਲਿਸ ਨੇ ਕੇਸ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।