ਪਾਦਰੀਆਂ ਦੀ ਹੱਤਿਆ ਦੀ ਨਿਰਪੱਖ ਜਾਂਚ ਹੋਣੀ ਚਾਹੀਦੀ : ਸਰਬਜੀਤ ਰਾਜ

ਆਲ ਇੰਡੀਆ ਕ੍ਰਿਸ਼ਚੀਨ ਫੈਲੋਸ਼ਿਪ ਨੇ ਮਨੀਪੁਰ ’ਚ ਚਰਚ ਦੇ ਆਗੂਆਂ ਦੀ ਹੱਤਿਆ ਦੀ ਕੀਤੀ ਨਿੰਦਾ ਗੁਰਵਿੰਦਰ ਕੌਰ ਪੰਜਾਬੀ ਜਾਗਰਣ ਕਪੂਰਥਲਾ : ਆਲ ਇੰਡੀਆ ਕ੍ਰਿਸ਼ਚੀਨ ਫੈਲੋਸ਼ਿਪ ਨੇ ਵੀਰਵਾਰ ਨੂੰ ਮਨੀਪੁਰ ਦੇ ਕਾਂਗਪੋਕਪੀ ਜ਼ਿਲ੍ਹੇ ਵਿਚ ਥੈਡੋ ਬੈਪਟਿਸਟ ਐਸੋਸੀਏਸ਼ਨ ਇੰਡੀਆ (ਟੀਬੀਏਆਈ) ਨਾਲ ਜੁੜੇ ਚਰਚ ਪਾਦਰੀਆਂ ਦੀ ਹੱਤਿਆ ’ਤੇ ਡੂੰਘਾ ਦੁੱਖ ਪ੍ਰਗਟ ਕੀਤਾ। ਪੀੜਤ ਚੁਰਾਚੰਦਪੁਰ ਵਿਚ ਆਯੋਜਿਤ ਇਕ ਯੂਨਾਈਟਿਡ ਬੈਪਟਿਸਟ ਕਨਵੈਨਸ਼ਨ ਮੀਟਿੰਗ ਤੋਂ ਵਾਪਸ ਆ ਰਹੇ ਸਨ ਜਦੋਂ ਉਨ੍ਹਾਂ ਤੇ ਕਾਂਗਪੋਕਪੀ ਵੱਲ ਜਾਂਦੇ ਸਮੇਂ ਹਮਲਾ ਕੀਤਾ ਗਿਆ। ਵੀਰਵਾਰ ਨੂੰ ਜਾਰੀ ਇਕ ਬਿਆਨ ਵਿਚ ਆਲ ਇੰਡੀਆ ਕ੍ਰਿਸ਼ਚੀਨ ਫੈਲੋਸ਼ਿਪ ਦੇ ਸੰਸਥਾਪਕ ਸਰਬਜੀਤ ਰਾਜ ਨੇ ਈਸਾਈ ਫੈਲੋਸ਼ਿਪ ਤੇ ਸੇਵਾ ਤੋਂ ਵਾਪਸ ਆ ਰਹੇ ਨਿਹੱਥੇ ਚਰਚ ਆਗੂਆਂ ਦੀ ਹੱਤਿਆ ਨੂੰ ਬਹੁਤ ਹੀ ਪਰੇਸ਼ਾਨ ਕਰਨ ਵਾਲਾ ਤੇ ਦੁਖਦਾਈ ਦੱਸਿਆ, ਖਾਸ ਕਰਕੇ ਮਨੀਪੁਰ ਵਿਚ ਚੱਲ ਰਹੀ ਅਸ਼ਾਂਤੀ ਤੇ ਮਨੁੱਖੀ ਦੁੱਖਾਂ ਦੇ ਵਿਚਕਾਰ। ਬਿਆਨ ਵਿਚ ਕਿਹਾ ਗਿਆ ਹੈ ਕਿ ਇਹ ਦੁਖਾਂਤ ਉੱਤਰ-ਪੂਰਬ ਵਿਚ ਚਰਚ ਲਈ ਖਾਸ ਤੌਰ ’ਤੇ ਦਰਦਨਾਕ ਹੈ, ਜਿਥੇ ਇਕ ਸਾਂਝੇ ਵਿਸ਼ਵਾਸ ਨਾਲ ਬੱਝੇ ਭਾਈਚਾਰੇ ਲੰਬੇ ਸਮੇਂ ਤੋਂ ਚੱਲ ਰਹੇ ਟਕਰਾਅ ਤੇ ਵੰਡ ਦੇ ਜ਼ਖ਼ਮ ਝੱਲ ਰਹੇ ਹਨ। ਸਰਬਜੀਤ ਰਾਜ ਨੇ ਦੋਸ਼ੀਆਂ ਨੂੰ ਨਿਆਂ ਦੇ ਕਟਹਿਰੇ ਵਿਚ ਲਿਆਉਣ ਲਈ ਨਿਰਪੱਖ ਜਾਂਚ ਕਰਨ ਦੀ ਅਪੀਲ ਕੀਤੀ। ਉਨ੍ਹਾਂ ਨੇ ਭਾਈਚਾਰਿਆਂ ਤੇ ਆਗੂਆਂ ਨੂੰ ਸੰਜਮ ਵਰਤਣ ਤੇ ਰਾਜ ਵਿਚ ਹਿੰਸਾ ਨੂੰ ਹੋਰ ਵਧਣ ਤੋਂ ਰੋਕਣ ਦੀ ਵੀ ਅਪੀਲ ਕੀਤੀ।