ਪ੍ਰਮਾਤਮਾ ਦਾ ਦਰਸ਼ਨ ਕੇਵਲ ਪੂਰਨ ਗੁਰੂ ਦੀ ਸੰਗਤ ਨਾਲ ਹੀ ਸੰਭਵ : ਭਾਰਤੀ

ਅਮਰੀਕ ਸਿੰਘ ਮੱਲ੍ਹੀ, ਪੰਜਾਬੀ ਜਾਗਰਣ ਕਪੂਰਥਲਾ : ਦਿਵਯ ਜਯੋਤੀ ਜਾਗ੍ਰਿਤੀ ਸੰਸਥਾਨ ਵੱਲੋਂ ਢਿੱਲਵਾਂ ਦੇ ਸ਼ਿਵ ਮੰਦਿਰ ਵਿਖੇ ਪੰਜ ਦਿਨਾ ਸ਼੍ਰੀ ਰਾਮ ਕਥਾ ਦਾ ਆਯੋਜਨ ਕੀਤਾ ਗਿਆ। ਕਥਾ ਦੇ ਤੀਜੇ ਦਿਨ ਅੱਜ ਬ੍ਰਹਮਨਿਸ਼ਠ ਗੁਰੂ ਸ਼੍ਰੀ ਆਸ਼ੂਤੋਸ਼ ਮਹਾਰਾਜ ਜੀ ਦੀ ਸ਼ਿਸ਼ਿਆ ਸਾਧਵੀ ਮਨਸਵਿਨੀ ਭਾਰਤੀ ਨੇ ਸ਼੍ਰੀ ਰਾਮ ਜੀ ਦੀ ਕਥਾ ਸੁਣਾਉਂਦੇ ਦੱਸਿਆ ਕਿ ਕਿਵੇਂ ਭਗਵਾਨ ਸ਼੍ਰੀ ਰਾਮ ਆਪਣੀਆਂ ਦਿਵਿਆ ਲੀਲਾਵਾਂ ਨੂੰ ਕਰਦੇ ਹੋਏ ਗੁਰੂਕੁਲ ਵਿਚ ਆਪਣੀ ਸਿੱਖਿਆ ਪੂਰੀ ਕਰਨ ਤੋਂ ਬਾਅਦ ਅਯੁੱਧਿਆ ਵਾਪਸ ਆਉਂਦੇ ਹਨ। ਫਿਰ ਵਿਸ਼ਵਾਮਿੱਤਰ ਰਾਜਾ ਦਸ਼ਰਥ ਤੋਂ ਭਗਵਾਨ ਸ਼੍ਰੀ ਰਾਮ ਤੇ ਲਕਸ਼ਮਣ ਦੀ ਮੰਗ ਕਰਦੇ ਹਨ ਤੇ ਸ਼੍ਰੀ ਰਾਮ ਰਸਤੇ ਵਿਚ ਤਾੜਕਾ ਨੂੰ ਮਾਰਦੇ ਹਨ। ਉਹ ਗੌਤਮ ਰਿਸ਼ੀ ਦੀ ਪਤਨੀ ਅਹਿਲਿਆ ਨੂੰ ਬਚਾਉਂਦੇ ਤੇ ਯੱਗ ਦੀ ਰੱਖਿਆ ਕਰਨ ਤੋਂ ਬਾਅਦ, ਗੁਰੂ ਵਿਸ਼ਵਾਮਿੱਤਰ ਨਾਲ ਜਨਕਪੁਰੀ ਵਿਚ ਦਾਖਲ ਹੁੰਦੇ ਹੈ। ਸਾਧਵੀ ਮਨਸਵਿਨੀ ਭਾਰਤੀ ਨੇ ਸਮਝਾਇਆ ਕਿ ਅਹਿਲਿਆ, ਜੋ ਕਿ ਜੜ੍ਹ ਹੋ ਗਈ ਸੀ, ਪ੍ਰਭੂ ਦੇ ਪੈਰਾਂ ਦੀ ਧੂੜ ਪ੍ਰਾਪਤ ਕਰਨ ਤੋਂ ਬਾਅਦ ਚੇਤਨ ਹੋਈ। ਉਨ੍ਹਾਂ ਦੱਸਿਆ ਕਿ ਅਹਿਲਿਆ ਸਾਡੀ ਬੁੱਧੀ ਦਾ ਪ੍ਰਤੀਕ ਹੈ ਤੇ ਸ਼੍ਰੀ ਰਾਮ ਦੇ ਚਰਨਾਂ ਦੀ ਧੂੜ ਨਾਲ ਜੜ੍ਹ ਬੁੱਧੀ ਚੇਤਨਾ ਵਿਚ ਪਰਿਵਰਤਿਤ ਹੋਈ। ਉਨ੍ਹਾਂ ਦੱਸਿਆ ਕਿ ਸ਼੍ਰੀ ਰਾਮ ਦੀ ਸ਼੍ਰੀ ਜਾਨਕੀ ਨਾਲ ਪਹਿਲੀ ਮੁਲਾਕਾਤ ਇਕ ਪੁਸ਼ਪ ਵਾਟਿਕਾ ਵਿਚ ਹੁੰਦੀ ਹੈ। ਜਦੋਂ ਸਤਿਸੰਗ ਸਾਡੇ ਜੀਵਨ ਵਿਚ ਆਉਦਾ ਹੈ, ਤਾਂ ਅਸੀਂ ਪਰਮਾਤਮਾ ਤੇ ਭਗਤੀ ਨੂੰ ਮਿਲਦੇ ਹਾਂ। ਉਨ੍ਹਾਂ ਨੇ ਸਮਝਾਇਆ ਕਿ ਸਤਿਸੰਗ ਦੋ ਸ਼ਬਦਾਂ ਦਾ ਸੁਮੇਲ ਹੈ : ਸਤ ਤੇ ਸੰਗ; ਸਤ ਦਾ ਅਰਥ ਹੈ ਪਰਮਾਤਮਾ ਤੇ ਸੰਗ ਦਾ ਅਰਥ ਹੈ ਮੇਲ। ਇਸਦਾ ਅਰਥ ਹੈ ਕਿ ਜਦੋਂ ਤੱਕ ਅਸੀਂ ਪਰਮਾਤਮਾ ਨੂੰ ਨਹੀਂ ਮਿਲਦੇ, ਜਦੋਂ ਤੱਕ ਅਸੀਂ ਉਸਨੂੰ ਅਨੁਭਵ ਨਹੀਂ ਕਰਦੇ, ਸਾਡੇ ਜੀਵਨ ਵਿਚ ਕੋਈ ਸਤਿਸੰਗ ਨਹੀਂ ਹੋ ਸਕਦਾ। ਸਤਿਸੰਗ ਸਿਰਫ਼ ਗੱਲਬਾਤ ਜਾਂ ਚਰਚਾ ਦਾ ਵਿਸ਼ਾ ਨਹੀਂ ਹੈ। ਸੱਚਾ ਸਤਸੰਗ ਸਾਡੇ ਜੀਵਨ ਵਿਚ ਉਦੋਂ ਹੋਵੇਗਾ, ਜਦੋਂ ਅਸੀਂ ਇਕ ਪਰਮਾਤਮਾ ਨੂੰ ਜਾਣਦੇ ਹਾਂ, ਪਰ ਸਵਾਲ ਉੱਠਦਾ ਹੈ ਸਾਨੂੰ ਪਰਮਾਤਮਾ ਨਾਲ ਕੌਣ ਜੋੜੇਗਾ? ਸਿਰਫ਼ ਇਕ ਗੁਰੂ, ਕਿਉਂਕਿ ਉਹ ਉਹ ਹੈ, ਜੋ ਸਾਡੇ ਹਨੇਰੇ ਨੂੰ ਦੂਰ ਕਰ ਸਕਦਾ ਹੈ ਤੇ ਸਾਨੂੰ ਸਾਡੇ ਅੰਦਰ ਪਰਮਾਤਮਾ ਦਾ ਸਿੱਧਾ ਅਨੁਭਵ ਕਰਵਾ ਸਕਦਾ ਹੈ। ਅੱਜ ਸਮਾਜ ਨੂੰ ਅਜਿਹੇ ਗੁਰੂ ਦੀ ਲੋੜ ਹੈ। ਕਥਾ ਦੌਰਾਨ, ਸਾਧਵੀ ਸਦਾਯਾ ਭਾਰਤੀ, ਸਾਧਵੀ ਮੀਹੀ ਭਾਰਤੀ ਅਤੇ ਸਾਧਵੀ ਪੁਨੀਆ ਭਾਰਤੀ ਨੇ ਸੁਰੀਲੀ ਆਵਾਜ਼ ਨਾਲ ਭਜਨ ਗਾਏ, ਜਿਸ ਨੂੰ ਸੁਣ ਸ਼ਰਧਾਲੂਆਂ ਨੇ ਬਹੁਤ ਆਨੰਦ ਨੂੰ ਪ੍ਰਾਪਤ ਕੀਤਾ। ਸੰਸਥਾ ਵੱਲੋਂ ਸਵਾਮੀ ਵਿਸ਼ਨੂੰਦੇਵਾਨੰਦ ਨੇ ਸ਼ਰਧਾਲੂਆਂ ਦਾ ਧੰਨਵਾਦ ਕੀਤਾ ਤੇ ਉਨ੍ਹਾਂ ਨੂੰ ਆਉਣ ਵਾਲੇ ਦਿਨਾਂ ਵਿਚ ਵੀ ਇਸੇ ਉਤਸ਼ਾਹ ਨਾਲ ਕਥਾ ਵਿਚ ਸ਼ਾਮਲ ਹੋਣ ਦਾ ਸੱਦਾ ਦਿੱਤਾ। ਕਥਾ ਦੇ ਅੰਤ ਵਿਚ ਸਵਾਮੀ ਰਣਜੀਤਾਨੰਦ, ਸਵਾਮੀ ਵਿਸ਼ਨੂੰਦੇਵਾਨੰਦ, ਸਾਧਵੀ ਸੰਦੀਪ ਭਾਰਤੀ, ਮਨਜੀਤ ਸਿੰਘ ਮਨਾ (ਬਾਬਾ ਬਕਾਲਾ ਸਾਹਿਬ ਦੇ ਸਾਬਕਾ ਵਿਧਾਇਕ ਤੇ ਸੀਨੀਅਰ ਭਾਜਪਾ ਨੇਤਾ), ਰਾਜੇਸ਼ ਟੋਂਗਰੀ, ਰਾਜੇਸ਼ ਸ਼ਰਮਾ, ਚੇਤਨ ਸ਼ਰਮਾ, ਹਰੀ ਭਗਤ ਸ਼ਰਮਾ, ਨਵੀਨ ਸ਼ਰਮਾ, ਮਲਕੀਤ ਸਿੰਘ, ਰਾਮ ਠਾਕੁਰ ਨਿਵਾਸ, ਅਨਮੋਲ ਸਿੰਘ, ਜੈਦੇਵ, ਸਤਨਾਮ ਸਿੰਘ, ਹੀਰਾਲਾਲ ਤੇ ਹੋਰਾਂ ਸਮੇਤ ਵਿਸ਼ੇਸ਼ ਪਤਵੰਤਿਆਂ ਨੇ ਆਰਤੀ ਕੀਤੀ ਤੇ ਪ੍ਰਭੂ ਦਾ ਆਸ਼ੀਰਵਾਦ ਪ੍ਰਾਪਤ ਕੀਤਾ।