Kapurthala News : RCF 'ਚ ਵਾਪਰਿਆ ਭਿਆਨਕ ਹਾਦਸਾ, ਪ੍ਰੀਖਣ ਦੌਰਾਨ ਬੇਕਾਬੂ ਹੋਏ MEMU ਰੇਕ ਨੇ ਤੋੜੇ ਗੇਟ

ਸਟਾਫ ਰਿਪੋਰਟਰ, ਪੰਜਾਬੀ ਜਾਗਰਣ, ਕਪੂਰਥਲਾ : ਰੇਲ ਕੋਚ ਫੈਕਟਰੀ (ਆਰ.ਸੀ.ਐਫ.) ਕਪੂਰਥਲਾ ਵਿੱਚ ਅੱਜ ਇੱਕ ਅਜਿਹੀ ਭਿਆਨਕ ਦੁਰਘਟਨਾ ਵਾਪਰੀ ਜਿਸ ਨੇ ਫੈਕਟਰੀ ਪ੍ਰਸ਼ਾਸਨ ਦੇ ਸੁਰੱਖਿਆ ਦਾਅਵਿਆਂ ਅਤੇ ਕਾਰਜ ਪ੍ਰਣਾਲੀ 'ਤੇ ਗੰਭੀਰ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।

ਪ੍ਰਾਪਤ ਜਾਣਕਾਰੀ ਅਨੁਸਾਰ, ਇੱਕ ਨਵੇਂ ਬਣੇ MEMU ਰੇਕ ਦੀ ਟੈਸਟਿੰਗ ਦੌਰਾਨ ਭਾਰੀ ਤਕਨੀਕੀ ਲਾਪਰਵਾਹੀ ਵਰਤੀ ਗਈ, ਜਿਸ ਕਾਰਨ ਰੇਕ ਪੂਰੀ ਤਰ੍ਹਾਂ ਬੇਕਾਬੂ ਹੋ ਗਿਆ। ਇਹ ਬੇਕਾਬੂ ਰੇਕ ਕੋਚ ਕੰਪਲੀਸ਼ਨ ਸ਼ਾਪ ਦੇ ਰਸਤੇ ਵਿੱਚ ਲੱਗੇ ਭਾਰੀ ਲੋਹੇ ਦੇ ਦੋਵੇਂ ਗੇਟਾਂ ਨੂੰ ਉਖਾੜਦਾ ਹੋਇਆ ਵੈਸਟ ਕਲੋਨੀ ਦੀ ਮੁੱਖ ਲਾਈਨ ਵੱਲ ਨਿਕਲ ਗਿਆ। ਇਸ ਭਿਆਨਕ ਟੱਕਰ ਵਿੱਚ ਰੇਕ ਦਾ DMC (Driving Motor Coach) ਪਟੜੀ ਤੋਂ ਉਤਰ (Derail) ਗਿਆ। ਪ੍ਰਤੱਖਦਰਸ਼ੀਆਂ ਮੁਤਾਬਕ, ਹਾਦਸਾ ਇੰਨਾ ਜ਼ਬਰਦਸਤ ਸੀ ਕਿ ਉੱਥੋਂ ਲੰਘ ਰਹੀ ਇੱਕ ਕਾਰ ਵਾਲ-ਵਾਲ ਬਚੀ, ਨਹੀਂ ਤਾਂ ਇੱਕ ਵੱਡੀ ਜਾਨੀ ਹਾਨੀ ਨਿਸ਼ਚਿਤ ਸੀ। ਹਾਲਾਂਕਿ ਇਸ ਘਟਨਾ ਵਿੱਚ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ, ਪਰ ਰੇਲਵੇ ਦੀ ਕਰੋੜਾਂ ਰੁਪਏ ਦੀ ਜਾਇਦਾਦ ਨੂੰ ਭਾਰੀ ਨੁਕਸਾਨ ਪਹੁੰਚਿਆ ਹੈ।

ਆਰ.ਸੀ.ਐਫ. ਇੰਮਪਲਾਈਜ਼ ਯੂਨੀਅਨ ਦੇ ਪ੍ਰਧਾਨ ਅਮਰੀਕ ਸਿੰਘ ਅਤੇ ਜਨਰਲ ਸਕੱਤਰ ਸਰਵਜੀਤ ਸਿੰਘ ਨੇ ਇਸ ਘਟਨਾ 'ਤੇ ਸਖ਼ਤ ਰੋਸ ਪ੍ਰਗਟ ਕਰਦਿਆਂ ਕਿਹਾ ਕਿ ਪ੍ਰਸ਼ਾਸਨ ਦੀ 'ਅੰਨ੍ਹੇਵਾਹ ਆਊਟਸੋਰਸਿੰਗ' ਅਤੇ ਨਿੱਜੀਕਰਨ ਦੀਆਂ ਨੀਤੀਆਂ ਇਸ ਵਿਨਾਸ਼ਕਾਰੀ ਹਾਦਸੇ ਦੀ ਮੁੱਖ ਜੜ੍ਹ ਹਨ। ਯੂਨੀਅਨ ਨੇ ਦੋਸ਼ ਲਾਇਆ ਕਿ ਪ੍ਰਸ਼ਾਸਨ ਮਹੱਤਵਪੂਰਨ ਤਕਨੀਕੀ ਕੰਮਾਂ ਅਤੇ ਸੁਰੱਖਿਆ ਪ੍ਰੋਟੋਕੋਲ ਨਾਲ ਜੁੜੇ ਸੰਵੇਦਨਸ਼ੀਲ ਖੇਤਰਾਂ ਵਿੱਚ ਵੀ ਅਣਸਿੱਖਿਅਤ (Untrained) ਠੇਕਾ ਕਰਮਚਾਰੀਆਂ ਨੂੰ ਤਾਇਨਾਤ ਕਰ ਰਿਹਾ ਹੈ। ਇਹਨਾਂ ਕਰਮਚਾਰੀਆਂ ਕੋਲ ਨਾ ਤਾਂ ਲੋੜੀਂਦਾ ਤਕਨੀਕੀ ਹੁਨਰ ਹੈ ਅਤੇ ਨਾ ਹੀ ਰੇਲਵੇ ਦੇ ਸੁਰੱਖਿਆ ਮਾਪਦੰਡਾਂ ਦਾ ਗਿਆਨ।

ਸੁਰੱਖਿਆ ਵਰਗੇ ਗੰਭੀਰ ਵਿਸ਼ੇ 'ਤੇ ਠੇਕਾ ਪ੍ਰਥਾ ਰਾਹੀਂ ਕੀਤਾ ਜਾ ਰਿਹਾ ਇਹ ਸਮਝੌਤਾ ਨਾ ਕੇਵਲ ਰੇਲਵੇ ਦੀ ਜਾਇਦਾਦ, ਬਲਕਿ ਕਰਮਚਾਰੀਆਂ ਅਤੇ ਕਲੋਨੀ ਨਿਵਾਸੀਆਂ ਦੇ ਜੀਵਨ ਲਈ ਵੀ ਇੱਕ ਵੱਡਾ ਖ਼ਤਰਾ ਬਣ ਚੁੱਕਾ ਹੈ। ਜਨਰਲ ਸਕੱਤਰ ਸਰਵਜੀਤ ਸਿੰਘ ਨੇ ਪ੍ਰਸ਼ਾਸਨ ਨੂੰ ਸਪੱਸ਼ਟ ਚੇਤਾਵਨੀ ਦਿੰਦੇ ਹੋਏ ਮੰਗ ਕੀਤੀ ਕਿ ਇਸ ਗੰਭੀਰ ਚੂਕ ਲਈ ਜ਼ਿੰਮੇਵਾਰ ਸਬੰਧਤ ਅਧਿਕਾਰੀਆਂ ਅਤੇ ਸੁਪਰਵਾਈਜ਼ਰਾਂ ਦੇ ਵਿਰੁੱਧ ਤੁਰੰਤ ਸਖ਼ਤ ਅਨੁਸ਼ਾਸਨੀ ਅਤੇ ਵਿਭਾਗੀ ਕਾਰਵਾਈ (D&AR) ਕੀਤੀ ਜਾਵੇ, ਜਿਸ ਨਿੱਜੀ ਕੰਪਨੀ ਦੇ ਅਣਸਿੱਖਿਅਤ ਕਰਮਚਾਰੀਆਂ ਕਾਰਨ ਇਹ ਹਾਦਸਾ ਹੋਇਆ, ਉਸ ਦਾ ਟੈਂਡਰ ਤੁਰੰਤ ਪ੍ਰਭਾਵ ਨਾਲ ਰੱਦ (Terminate) ਕੀਤਾ ਜਾਵੇ, ਟੈਸਟਿੰਗ, ਸ਼ੰਟਿੰਗ ਅਤੇ ਹੋਰ ਸੁਰੱਖਿਆ ਨਾਲ ਜੁੜੇ ਮਹੱਤਵਪੂਰਨ ਕੰਮਾਂ ਵਿੱਚ ਆਊਟਸੋਰਸਿੰਗ ਨੂੰ ਪੂਰੀ ਤਰ੍ਹਾਂ ਬੰਦ ਕੀਤਾ ਜਾਵੇ ਅਤੇ ਕੇਵਲ ਕੁਸ਼ਲ ਤੇ ਤਜਰਬੇਕਾਰ ਰੈਗੂਲਰ ਰੇਲਵੇ ਕਰਮਚਾਰੀਆਂ ਨੂੰ ਹੀ ਤਾਇਨਾਤ ਕੀਤਾ ਜਾਵੇ ।

ਯੂਨੀਅਨ ਨੇ ਅੰਤ ਵਿੱਚ ਚਿਤਾਵਨੀ ਦਿੱਤੀ ਹੈ ਕਿ ਜੇਕਰ ਪ੍ਰਸ਼ਾਸਨ ਇਸ ਭ੍ਰਿਸ਼ਟ ਕਾਰਜ ਪ੍ਰਣਾਲੀ ਅਤੇ ਸੁਰੱਖਿਆ ਚੂਕ 'ਤੇ ਕੋਈ ਠੋਸ ਕਾਰਵਾਈ ਨਹੀਂ ਕਰਦਾ, ਤਾਂ ਆਰ.ਸੀ.ਐਫ. ਇੰਮਪਲਾਈਜ਼ ਯੂਨੀਅਨ ਕਰਮਚਾਰੀਆਂ ਅਤੇ ਕਲੋਨੀ ਨਿਵਾਸੀਆਂ ਦੀ ਸੁਰੱਖਿਆ ਲਈ ਵੱਡੇ ਪੱਧਰ 'ਤੇ ਰੋਸ ਪ੍ਰਦਰਸ਼ਨ ਅਤੇ ਅੰਦੋਲਨ ਕਰਨ ਲਈ ਮਜਬੂਰ ਹੋਵੇਗੀ।