ਸਾਈਬਰ ਠੱਗਾਂ ਨੇ 8,100 ਰੁਪਏ ਦੀ ਠੱਗੀ ਮਾਰੀ

ਪੱਤਰ ਪ੍ਰੇਰਕ.ਪੰਜਾਬੀ ਜਾਗਰਣ, ਫਾਜ਼ਿਲਕਾ : ਫਾਜ਼ਿਲਕਾ ਜ਼ਿਲ੍ਹੇ ਦੇ ਪਿੰਡ ਝੰਗਰ ਭੈਣੀ ਢਾਣੀ ਰੇਸ਼ਮ ਸਿੰਘ ਵਿਖੇ ਨੇ ਪਰਿਵਾਰ ਨੂੰ 5 ਲੱਖ ਰੁਪਏ ਦੀ ਵਿੱਤੀ ਸਹਾਇਤਾ ਦਾ ਲਾਲਚ ਦੇ ਕੇ ਹਜ਼ਾਰਾਂ ਰੁਪਏ ਦੀ ਠੱਗੀ ਮਾਰ ਲਈ। ਪੀੜਤ ਰੇਸ਼ਮ ਸਿੰਘ ਨੇ ਦੱਸਿਆ ਕਿ ਉਸਨੂੰ ਵਟਸਐਪ ’ਤੇ ਕਾਲਾਂ ਆਉਣ ਲੱਗੀਆਂ। ਕਾਲ ਕਰਨ ਵਾਲੇ ਨੇ ਆਪਣੀ ਪਛਾਣ ਪੰਜਾਬੀ ਗਾਇਕ ਮਨਕੀਰਤ ਔਲਖ ਵਜੋਂ ਦੱਸੀ ਤੇ ਉਨ੍ਹਾਂ ਦੀ 5 ਲੱਖ ਰੁਪਏ ਦੀ ਮਦਦ ਕਰਨ ਦੀ ਇੱਛਾ ਪ੍ਰਗਟਾਈ। ਪਰਿਵਾਰ ਦਾ ਵਿਸ਼ਵਾਸ ਹਾਸਲ ਕਰਨ ਲਈ, ਧੋਖੇਬਾਜ਼ ਨੇ ਵਟਸਐਪ ਰਾਹੀਂ ਇੱਕ ਵੀਡੀਓ ਕਾਲ ਵੀ ਕੀਤੀ। ਕਾਲ ਦੌਰਾਨ ਉਸਦਾ ਚਿਹਰਾ ਸਿਰਫ਼ ਅੱਧਾ ਹੀ ਦਿਖਾਈ ਦੇ ਰਿਹਾ ਸੀ। ਉਸਨੂੰ ਆਪਣਾ ਪੂਰਾ ਚਿਹਰਾ ਦਿਖਾਉਣ ਲਈ ਕਿਹਾ ਤਾਂ ਉਹ ਬਹਾਨੇ ਬਣਾਉਣ ਲੱਗ ਪਿਆ। ਧੋਖੇਬਾਜ਼ ਨੇ ਉਨ੍ਹਾਂ ਨੂੰ ਇਹ ਕਹਿ ਕੇ ਜਾਲ ਵਿਛਾਇਆ ਕਿ ਪੈਸੇ ਟ੍ਰਾਂਸਫਰ ਕਰਨ ਲਈ, ਉਨ੍ਹਾਂ ਨੂੰ ਇੱਕ ਔਰਤ ਨਾਲ ਗੱਲ ਕਰਨੀ ਪਵੇਗੀ ਅਤੇ ਫਾਈਲ ਪ੍ਰੋਸੈਸਿੰਗ ਫੀਸ ਦੇ ਨਾਮ ਤੇ 8100 ਰੁਪਏ ਜਮ੍ਹਾ ਕਰਵਾਉਣੇ ਪੈਣਗੇ। ਮਦਦ ਦੀ ਉਮੀਦ ਵਿੱਚ, ਪਰਿਵਾਰ ਨੇ ਆਪਣੀ ਛੋਟੀ ਧੀ ਦਾ ਪਿਗੀ ਬੈਂਕ ਤੋੜ ਦਿੱਤਾ। ਪਿਤਾ ਤੇ ਪੁੱਤਰ ਨੇ ਪੈਸੇ ਬੈਂਕ ਖਾਤੇ ਵਿੱਚ ਜਮ੍ਹਾ ਕਰਵਾ ਦਿੱਤੇ। ਜਿਵੇਂ ਹੀ ਪੈਸੇ ਜਮ੍ਹਾ ਕਰਵਾਏ ਗਏ, ਕਥਿਤ ਗਾਇਕ ਦਾ ਫੋਨ ਬੰਦ ਹੋ ਗਿਆ। ਫਾਜ਼ਿਲਕਾ ਪੁਲਿਸ ਨਾਲ ਗੱਲਬਾਤ ਕੀਤੀ ਤਾ ਉਨ੍ਹਾਂ ਕਿਹਾ ਕਿ ਮਾਮਲੇ ਦੀ ਤਫਤੀਸ਼ ਕੀਤੀ ਜਾ ਰਹੀ ਹੈ।