ਫਤਿਹਗੜ੍ਹ ਸਾਹਿਬ 'ਚ ਵੱਡਾ ਹਾਦਸਾ: ਗੈਸ ਰਿਫਿਲਿੰਗ ਦੌਰਾਨ ਲਾਪਰਵਾਹੀ ਪਈ ਭਾਰੀ, ਅੱਗ ਦੀ ਲਪੇਟ 'ਚ ਆਏ 6 ਨੌਜਵਾਨ

ਦੀਪਕ ਸੂਦ, ਫਤਿਹਗੜ੍ਹ ਸਾਹਿਬ: ਭਾਦਲਾ ਸਾਈਡ ਖੇਤਰ 'ਚ ਗੈਸ ਰਿਫਿਲਿੰਗ ਦੌਰਾਨ ਵਰਤੀ ਗਈ ਲਾਪਰਵਾਹੀ ਇਕ ਵੱਡੇ ਹਾਦਸੇ ਦਾ ਕਾਰਨ ਬਣ ਗਈ। ਇਕ ਬੰਦ ਕਮਰੇ 'ਚ ਵੱਡੇ ਸਿਲੰਡਰ ਤੋਂ ਛੋਟੇ ਸਿਲੰਡਰ 'ਚ ਗੈਸ ਪਲਟਦੇ ਸਮੇਂ ਹੋਈ ਲੀਕੇਜ ਕਾਰਨ ਲੱਗੀ ਅੱਗ 'ਚ 6 ਨੌਜਵਾਨ ਬੁਰੀ ਤਰ੍ਹਾਂ ਝੁਲਸ ਗਏ, ਜਿਨ੍ਹਾਂ ਦੀ ਪਛਾਣ ਗੋਲੂ (20 ਸਾਲ), ਇਮਰਾਨ (18 ਸਾਲ), ਸੁਨੀਲ ਕੁਮਾਰ (25 ਸਾਲ), ਵਿਸ਼ਾਲ (18 ਸਾਲ), ਬਬਲੂ (18 ਸਾਲ) ਅਤੇ ਵਾਰਿਸ (17 ਸਾਲ) ਵਜੋਂ ਹੋਈ ਹੈ। ਸਾਰੇ ਜ਼ਖਮੀਆਂ ਨੂੰ ਤੁਰੰਤ ਇਲਾਜ ਲਈ ਸਥਾਨਕ ਨਿੱਜੀ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ ਹੈ।

ਮਿਲੀ ਜਾਣਕਾਰੀ ਅਨੁਸਾਰ, ਇਹ ਹਾਦਸਾ ਉਸ ਸਮੇਂ ਹੋਇਆ ਜਦੋਂ ਨੌਜਵਾਨ ਵੱਡੇ ਕਮਰਸ਼ੀਅਲ ਸਿਲੰਡਰ ਤੋਂ ਛੋਟੇ ਸਿਲੰਡਰ 'ਚ ਗੈਸ ਭਰ ਰਹੇ ਸਨ। ਇਸ ਪ੍ਰਕਿਰਿਆ ਦੌਰਾਨ ਗੈਸ ਲੀਕ ਹੋ ਕੇ ਕਮਰੇ ਵਿੱਚ ਫੈਲ ਗਈ। ਕਮਰੇ 'ਚ ਹਵਾ ਦੀ ਆਵਾਜਾਈ (ਵੈਂਟੀਲੇਸ਼ਨ) ਨਾ ਹੋਣ ਕਾਰਨ ਐਲਪੀਜੀ ਗੈਸ ਹੇਠਾਂ ਫਰਸ਼ 'ਤੇ ਜਮ੍ਹਾ ਹੋ ਗਈ। ਕਰੀਬ ਡੇਢ ਘੰਟੇ ਬਾਅਦ ਨੌਜਵਾਨਾਂ ਨੂੰ ਲੱਗਿਆ ਕਿ ਗੈਸ ਕਮਰੇ 'ਚੋਂ ਬਾਹਰ ਨਿਕਲ ਚੁੱਕੀ ਹੋਵੇਗੀ। ਇਸੇ ਗਲਤਫਹਿਮੀ 'ਚ ਜਿਵੇਂ ਹੀ ਇਕ ਨੌਜਵਾਨ ਨੇ ਖਾਣਾ ਬਣਾਉਣ ਲਈ ਮਾਚਿਸ ਜਲਾਈ, ਕਮਰੇ 'ਚ ਫੈਲੀ ਗੈਸ ਨੇ ਤੁਰੰਤ ਅੱਗ ਫੜ ਲਈ। ਗਨੀਮਤ ਇਹ ਰਹੀ ਕਿ ਸਿਲੰਡਰ 'ਚ ਕੋਈ ਧਮਾਕਾ ਨਹੀਂ ਹੋਇਆ, ਨਹੀਂ ਤਾਂ ਭਾਰੀ ਜਾਨੀ ਨੁਕਸਾਨ ਹੋ ਸਕਦਾ ਸੀ।

ਸਾਰੇ ਮਰੀਜ਼ਾਂ ਦੀ ਹਾਲਤ ਖਤਰੇ ਤੋਂ ਬਾਹਰ

ਹਾਦਸੇ 'ਚ ਜ਼ਖ਼ਮੀ ਸੁਨੀਲ ਨੇ ਦੱਸਿਆ ਕਿ ਸਿਲੰਡਰ ਫਟਿਆ ਨਹੀਂ ਸੀ, ਸਗੋਂ ਗੈਸ ਲੀਕੇਜ ਤੇ ਬੰਦ ਕਮਰੇ 'ਚ ਉਸਦੇ ਜਮ੍ਹਾ ਹੋਣ ਕਾਰਨ ਇਹ ਅੱਗ ਲੱਗੀ। ਉਧਰ, ਹਸਪਤਾਲ ਦੇ ਡਾਕਟਰਾਂ ਦਾ ਕਹਿਣਾ ਹੈ ਕਿ ਸਾਰੇ ਜ਼ਖਮੀਆਂ ਦਾ ਇਲਾਜ ਸ਼ੁਰੂ ਕਰ ਦਿੱਤਾ ਗਿਆ ਹੈ। ਫਿਲਹਾਲ ਸਾਰੇ ਮਰੀਜ਼ਾਂ ਦੀ ਸਥਿਤੀ ਖਤਰੇ ਤੋਂ ਬਾਹਰ ਦੱਸੀ ਜਾ ਰਹੀ ਹੈ ਅਤੇ ਉਹ ਡਾਕਟਰਾਂ ਦੀ ਨਿਗਰਾਨੀ ਹੇਠ ਹਨ।