ਪੰਜਾਬੀ ਲਿਖਾਰੀ ਸਭਾ ਦੀ ਮਾਸਿਕ ਮੀਟਿੰਗ ’ਚ ਚੱਲਿਆ ਰਚਨਾਵਾਂ ਦਾ ਦੌਰ

ਗਰਗ, ਪੰਜਾਬੀ ਜਾਗਰਣ, ਅਮਲੋਹ : ਪੰਜਾਬੀ ਲਿਖਾਰੀ ਸਭਾ ਮੰਡੀ ਗੋਬਿੰਦਗੜ੍ਹ ਦੀ ਮਾਸਿਕ ਮੀਟਿੰਗ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ (ਕੰਨਿਆ) ਵਿਖੇ ਹੋਈ। ਮੀਟਿੰਗ ਦੀ ਸ਼ੁਰੂਆਤ ਸਭਾ ਦੇ ਪ੍ਰਧਾਨ ਉਪਕਾਰ ਸਿੰਘ ਦਿਆਲਪੁਰੀ ਨੇ ਕੀਤੀ। ਇਸ ਦੌਰਾਨ ਜ਼ੋਰਾਵਰ ਸਿੰਘ ਪੰਛੀ ਦਾ ਗਾਇਆ ਭਗਤ ਕਬੀਰ ਜੀ ਦੇ ਸ਼ਬਦ ਦਾ ਪੋਸਟਰ ਰਿਲੀਜ਼ ਕੀਤਾ ਗਿਆ। ਸਭਾ ਵੱਲੋਂ ਗੁਰਪ੍ਰੀਤ ਸਿੰਘ ਬੀੜ ਕਿਸ਼ਨ ਨੂੰ ਪੁਸਤਕ ਰਿਲੀਜ਼ ਕਰਨ ’ਤੇ ਵਧਾਈ ਦਿੱਤੀ ਗਈ। ਮੀਟਿੰਗ ਦੌਰਾਨ ਇਕ ਸ਼ੋਕ ਮਤੇ ਰਾਹੀਂ ਨਾਮਵਰ ਲੇਖਕ ਤੇ ਕਵਿਸ਼ਰ ਪ੍ਰੀਤ ਸਿੰਘ ਸੰਦਲ, ਕਹਾਣੀਕਾਰ ਮੁਖਤਿਆਰ ਸਿੰਘ ਦੀ ਪਤਨੀ ਚਰਨਜੀਤ ਕੌਰ ਅਤੇ ਲੇਖਕ ਤੇ ਪੱਤਰਕਾਰ ਸੁਖਵਿੰਦਰ ਸਿੰਘ ਭਾਦਲਾ ਦੇ ਭਰਾ ਅਵਤਾਰ ਸਿੰਘ ਦੇ ਅਕਾਲ ਚਲਾਣੇ ’ਤੇ ਦੁੱਖ ਪ੍ਰਗਟ ਕੀਤਾ ਗਿਆ ਅਤੇ ਦੋ ਮਿੰਟ ਦਾ ਮੋਨ ਧਾਰਿਆ ਗਿਆ। ਰਚਨਾਵਾਂ ਦੇ ਦੌਰ ਦੌਰਾਨ ਅਮਰ ਸਿੰਘ ਸੈਂਪਲਾਂ ਨੇ ਕਹਾਣੀ ‘ਕੀਟ ਭਰਿੰਗ ਦਾ ਆਲਣਾ’ ਸੁਣਾਈ। ਬਘੇਲ ਸਿੰਘ ਚੰਦਨ ਨੇ ਗੀਤ ‘ਅੱਜ ਕੱਲ ਕੁੜੀਆਂ ਨੂੰ ਰਹੀ ਨਾ ਦੁਪੱਟਿਆਂ ਦੀ ਲੋੜ’, ਮੀਤ ਪਾਣੀਪਤ ਨੇ ਗ਼ਜ਼ਲ ‘ਟੂਟੀ ਤਰਬੇ ਸਾਜ ਹਮ ਬਜਾਏ ਕੈਸੇ’ ਅਤੇ ਜ਼ੋਰਾਵਰ ਸਿੰਘ ਪੰਛੀ ਨੇ ਗ਼ਜ਼ਲ ‘ਹਿਜਰ ਦਾ ਗਮ ਹੈ ਪਹਾੜ ਵਰਗਾ’ ਪੇਸ਼ ਕੀਤੀ। ਇੰਦਰਜੀਤ ਕੌਰ ਲੋਟੇ ਨੇ ‘ਮਾਂ ਦੀਆਂ ਦੁਆਵਾਂ ਛਾਂਵਾਂ ਬਣ ਜਾਵਣ’, ਰਾਜ ਸਿੰਘ ਬਧੌਛੀਂ ਨੇ ਕਹਾਣੀ ‘ਮਾਂ ਦੀਆਂ ਆਂਦਰਾਂ ਦਾ ਦਰਦ’, ਜਗਜੀਤ ਸਿੰਘ ਗੁਰਮ ਨੇ ਮਾਂ ਦਿਵਸ ਨੂੰ ਸਮਰਪਿਤ ਕਵਿਤਾ ‘ਬੰਦ ਘਰਾਂ ਵਿੱਚ ਚਮ ਚੜਿੱਕਾਂ ਰਹਿੰਦੀਆਂ ਨੇ’ ਅਤੇ ਗੁਰਪ੍ਰੀਤ ਸਿੰਘ ਬੀੜ ਕਿਸ਼ਨ ਨੇ ਕਵਿਤਾ ‘ਮਾਂ ਦੀਆਂ ਨਿਆਮਤਾਂ’ ਸੁਣਾਈ। ਲੋਕ ਨਾਥ ਸ਼ਰਮਾ ਨੇ ਆਪਣਾ ਲੇਖ ਪੜ੍ਹਿਆ। ਅਖ਼ੀਰ ਵਿੱਚ ਉਪਕਾਰ ਸਿੰਘ ਦਿਆਲਪੁਰੀ ਨੇ ਗੀਤ ‘ਮਾਂ ਤਾਂ ਜੱਗ ਵਿੱਚ ਹੁੰਦੀ ਠੰਡੜੀ ਛਾਂ वे ਲੋਕੋ’ ਗਾ ਕੇ ਸਭ ਦਾ ਦਿਲ ਮੋਹ ਲਿਆ। ਪੜ੍ਹੀਆਂ ਗਈਆਂ ਰਚਨਾਵਾਂ ’ਤੇ ਹਾਜ਼ਰ ਲੇਖਕਾਂ ਵੱਲੋਂ ਉਸਾਰੂ ਪੜਚੋਲ ਕੀਤੀ ਗਈ ਅਤੇ ਕੀਮਤੀ ਸੁਝਾਅ ਦਿੱਤੇ ਗਏ। ਇਸ ਮੌਕੇ ਮੀਡੀਆ ਸਲਾਹਕਾਰ ਨਰਿੰਦਰ ਭਾਟੀਆ, ਪਰਮਜੀਤ ਸਿੰਘ ਧੀਮਾਨ, ਚੰਨਪ੍ਰੀਤ ਸਿੰਘ ਗਿੱਲ ਅਤੇ ਤੇਜਪਾਲ ਸਿੰਘ ਮਰਜਾਰਾ ਨੇ ਵੀ ਆਪਣੇ ਵਿਚਾਰ ਸਾਂਝੇ ਕੀਤੇ। ਮੀਟਿੰਗ ਦੀ ਕਾਰਵਾਈ ਜਨਰਲ ਸਕੱਤਰ ਜਗਜੀਤ ਸਿੰਘ ਗੁਰਮ ਅਤੇ ਗੁਰਪ੍ਰੀਤ ਸਿੰਘ ਬੀੜ ਕਿਸ਼ਨ ਨੇ ਚਲਾਈ।