PGI ਦੀ ਵੱਡੀ ਉਪਲਬਧੀ: AI ਤਕਨੀਕ ਨਾਲ ਹੁਣ ਸ਼ੁਰੂਆਤੀ ਪੜਾਅ 'ਚ ਹੀ ਹੋਵੇਗੀ ਗਾਲਬਲੇਡਰ ਕੈਂਸਰ ਦੀ ਪਛਾਣ
ਉੱਤਰੀ ਭਾਰਤ ਵਿੱਚ ਮਹਿਲਾਵਾਂ ਵਿੱਚ ਤੇਜ਼ੀ ਨਾਲ ਵੱਧ ਰਹੇ ਗਾਲਬਲੇਡਰ ਕੈਂਸਰ ਦੀ ਸਮੇਂ ਸਿਰ ਪਛਾਣ ਹੁਣ ਸੌਖੀ ਹੋ ਸਕਦੀ ਹੈ। ਪੀ.ਜੀ.ਆਈ. ਦੀ ਇੱਕ ਮਲਟੀਡਿਸਿਪਲਿਨਰੀ ਟੀਮ ਨੇ ਅਜਿਹਾ ਆਰਟੀਫੀਸ਼ਲ ਇੰਟੈਲੀਜੈਂਸ (ਏ.ਆਈ.) ਆਧਾਰਿਤ ਮਾਡਲ ਤਿਆਰ ਕੀਤਾ ਹੈ, ਜੋ ਅਲਟਰਾਸਾਊਂਡ ਤਸਵੀਰਾਂ ਰਾਹੀਂ ਗਾਲਬਲੇਡਰ ਕੈਂਸਰ ਦੀ ਸਹੀ ਪਛਾਣ ਕਰਨ ਵਿੱਚ ਮਦਦ ਕਰੇਗਾ।
Posted By Anuradha Bains
Publish Date: Sat, 23 May 2026 12:58 PM (IST)
Updated Date: Sat, 23 May 2026 01:01 PM (IST)
ਤਰੁਣ ਭਜਨੀ, ਪੰਜਾਬੀ ਜਾਗਰਣ, ਚੰਡੀਗੜ੍ਹ। ਉੱਤਰੀ ਭਾਰਤ ਵਿੱਚ ਮਹਿਲਾਵਾਂ ਵਿੱਚ ਤੇਜ਼ੀ ਨਾਲ ਵੱਧ ਰਹੇ ਗਾਲਬਲੇਡਰ ਕੈਂਸਰ ਦੀ ਸਮੇਂ ਸਿਰ ਪਛਾਣ ਹੁਣ ਸੌਖੀ ਹੋ ਸਕਦੀ ਹੈ। ਪੀ.ਜੀ.ਆਈ. ਦੀ ਇੱਕ ਮਲਟੀਡਿਸਿਪਲਿਨਰੀ ਟੀਮ ਨੇ ਅਜਿਹਾ ਆਰਟੀਫੀਸ਼ਲ ਇੰਟੈਲੀਜੈਂਸ (ਏ.ਆਈ.) ਆਧਾਰਿਤ ਮਾਡਲ ਤਿਆਰ ਕੀਤਾ ਹੈ, ਜੋ ਅਲਟਰਾਸਾਊਂਡ ਤਸਵੀਰਾਂ ਰਾਹੀਂ ਗਾਲਬਲੇਡਰ ਕੈਂਸਰ ਦੀ ਸਹੀ ਪਛਾਣ ਕਰਨ ਵਿੱਚ ਮਦਦ ਕਰੇਗਾ।
ਟੀਮ ਦੇ ਅਨੁਸਾਰ ਇਸ ਏ.ਆਈ. ਮਾਡਲ ਦੀ ਸਭ ਤੋਂ ਵੱਡੀ ਖਾਸੀਅਤ ਇਹ ਹੈ ਕਿ ਇਹ ਤਕਨਾਲੋਜੀ ਛੋਟੇ ਸ਼ਹਿਰਾਂ ਅਤੇ ਪਿੰਡਾਂ ਵਿੱਚ ਵੀ ਕੈਂਸਰ ਦੀ ਸ਼ੁਰੂਆਤੀ ਜਾਂਚ ਨੂੰ ਆਸਾਨ ਬਣਾ ਸਕਦੀ ਹੈ, ਜਿੱਥੇ ਮਾਹਿਰ ਡਾਕਟਰਾਂ ਦੀ ਕਮੀ ਹੁੰਦੀ ਹੈ।
ਪੀ.ਜੀ.ਆਈ. ਦੇ ਰੇਡੀਓਡਾਇਗਨੋਸਿਸ ਅਤੇ ਇਮੇਜਿੰਗ ਵਿਭਾਗ ਦੇ ਡਾ. ਪੰਕਜ ਗੁਪਤਾ ਦੀ ਅਗਵਾਈ ਹੇਠ ਕੀਤੀ ਗਈ ਇਸ ਖੋਜ ਨੂੰ ਦ ਲੈਂਸੇਟ ਰੀਜਨਲ ਹੈਲਥ – ਸਾਊਥਈਸਟ ਏਸ਼ੀਆ ਵਿੱਚ ਪ੍ਰਕਾਸ਼ਿਤ ਕੀਤਾ ਗਿਆ ਹੈ। ਮਾਹਿਰਾਂ ਦੇ ਮੁਤਾਬਕ ਗਾਲਬਲੇਡਰ ਕੈਂਸਰ ਉੱਤਰੀ ਭਾਰਤ ਵਿੱਚ ਇੱਕ ਗੰਭੀਰ ਸਿਹਤ ਸਮੱਸਿਆ ਬਣ ਚੁੱਕਾ ਹੈ ਅਤੇ ਇਸ ਦੇ ਮਾਮਲੇ ਮਹਿਲਾਵਾਂ ਵਿੱਚ ਵੱਧ ਦੇਖੇ ਜਾਂਦੇ ਹਨ।
ਪਿੱਤ ਦੀ ਥੈਲੀ ਵਿੱਚ ਪੱਥਰੀ (ਗਾਲਸਟੋਨ) ਇਸ ਕੈਂਸਰ ਦਾ ਇੱਕ ਵੱਡਾ ਕਾਰਨ ਮੰਨੀ ਜਾਂਦੀ ਹੈ। ਸਭ ਤੋਂ ਵੱਡੀ ਸਮੱਸਿਆ ਇਹ ਹੈ ਕਿ ਜ਼ਿਆਦਾਤਰ ਮਾਮਲਿਆਂ ਵਿੱਚ ਕੈਂਸਰ ਦਾ ਪਤਾ ਕਾਫੀ ਦੇਰ ਨਾਲ ਲੱਗਦਾ ਹੈ, ਜਦੋਂ ਇਲਾਜ ਦੇ ਵਿਕਲਪ ਸੀਮਿਤ ਰਹਿ ਜਾਂਦੇ ਹਨ।
ਇਸ ਤਰ੍ਹਾਂ ਕੰਮ ਕਰੇਗਾ ਏ.ਆਈ. ਮਾਡਲ
ਇਹ ਏ.ਆਈ. ਮਾਡਲ ਮਰੀਜ਼ ਦੀਆਂ ਕਈ ਅਲਟਰਾਸਾਊਂਡ ਤਸਵੀਰਾਂ ਦਾ ਇਕੱਠੇ ਵਿਸ਼ਲੇਸ਼ਣ ਕਰਦਾ ਹੈ ਅਤੇ ਕੈਂਸਰ ਜਾਂ ਗੈਰ-ਕੈਂਸਰ ਦੀ ਰਿਪੋਰਟ ਦਿੰਦਾ ਹੈ। ਨਾਲ ਹੀ ਇਹ ਵੀ ਦੱਸਦਾ ਹੈ ਕਿ ਰਿਪੋਰਟ ਕਿੰਨੀ ਭਰੋਸੇਯੋਗ ਹੈ। ਸਭ ਤੋਂ ਖਾਸ ਗੱਲ ਇਹ ਹੈ ਕਿ ਮਾਡਲ ਅਲਟਰਾਸਾਊਂਡ ਦੀਆਂ ਉਨ੍ਹਾਂ ਥਾਵਾਂ ਨੂੰ ਵੀ ਹਾਈਲਾਈਟ ਕਰਦਾ ਹੈ, ਜਿਨ੍ਹਾਂ ਦੇ ਆਧਾਰ ’ਤੇ ਉਸ ਨੇ ਆਪਣਾ ਨਤੀਜਾ ਦਿੱਤਾ ਹੁੰਦਾ ਹੈ। ਇਸ ਨਾਲ ਡਾਕਟਰਾਂ ਨੂੰ ਰਿਪੋਰਟ ਸਮਝਣ ਅਤੇ ਉਸ ਦੀ ਪੁਸ਼ਟੀ ਕਰਨ ਵਿੱਚ ਆਸਾਨੀ ਹੋਵੇਗੀ।
ਪਿੰਡਾਂ ਦੇ ਮਰੀਜ਼ਾਂ ਨੂੰ ਹੋਵੇਗਾ ਸਭ ਤੋਂ ਵੱਧ ਲਾਭ
ਅਲਟਰਾਸਾਊਂਡ ਇੱਕ ਸਸਤੀ ਅਤੇ ਆਸਾਨੀ ਨਾਲ ਉਪਲਬਧ ਜਾਂਚ ਹੈ ਪਰ ਸ਼ੁਰੂਆਤੀ ਕੈਂਸਰ ਦੀ ਪਛਾਣ ਲਈ ਮਾਹਰਾਂ ਦੀ ਲੋੜ ਹੁੰਦੀ ਹੈ, ਜੋ ਛੋਟੇ ਸ਼ਹਿਰਾਂ ਅਤੇ ਪਿੰਡਾਂ ਵਿੱਚ ਅਕਸਰ ਉਪਲਬਧ ਨਹੀਂ ਹੁੰਦੀ। ਅਜਿਹੇ ਵਿੱਚ ਇਹ ਏਆਈ ਉੱਥੇ ਦੇ ਡਾਕਟਰਾਂ ਲਈ ਵੱਡੀ ਮਦਦ ਸਾਬਤ ਹੋ ਸਕਦੀ ਹੈ।
ਦੇਸ਼ ਭਰ ਦੇ ਡਾਕਟਰਾਂ ਲਈ ਮੁਫ਼ਤ ਉਪਲਬਧ ਕਰਵਾਇਆ ਸਾਫਟਵੇਅਰ
ਟੀਮ ਦੇ ਕੰਪਿਊਟਰ ਵਿਗਿਆਨੀ ਕਾਰਤਿਕ ਬੋਸ ਨੇ ਡਾ. ਪੰਕਜ ਗੁਪਤਾ ਦੀ ਰਹਿਨੁਮਾਈ ਹੇਠ ਇੱਕ ਆਸਾਨ ਕੰਪਿਊਟਰ ਐਪਲੀਕੇਸ਼ਨ ਵੀ ਤਿਆਰ ਕੀਤੀ ਹੈ, ਜਿਸਨੂੰ ਦੇਸ਼ ਭਰ ਦੇ ਡਾਕਟਰ ਅਤੇ ਖੋਜਕਰਤਾ ਮੁਫ਼ਤ ਵਰਤ ਸਕਣਗੇ। ਪੀਜੀਆਈ ਦੀ ਟੀਮ ਹੁਣ ਇਸ ਮਾਡਲ ਨੂੰ ਵੱਡੇ ਪੱਧਰ ’ਤੇ ਕਲੀਨਿਕਲ ਟ੍ਰਾਇਲ ਰਾਹੀਂ ਪਰਖਣ ਦੀ ਤਿਆਰੀ ਕਰ ਰਹੀ ਹੈ। ਮਾਹਿਰਾਂ ਦਾ ਟੀਚਾ ਭਵਿੱਖ ਵਿੱਚ ਏਆਈ ਆਧਾਰਿਤ ਗਾਲਬਲੇਡਰ ਕੈਂਸਰ ਸਕ੍ਰੀਨਿੰਗ ਨੂੰ ਦੇਸ਼ ਭਰ ਦੇ ਹਸਪਤਾਲਾਂ ਤੱਕ ਪਹੁੰਚਾਉਣਾ ਹੈ।