HDFC ਬੈਂਕ ਦੇ ਬਾਹਰ ਚੱਲੀ ਗੋਲ਼ੀ, ਸੁਰੱਖਿਆ ਗਾਰਡ ਦੀ ਉਂਗਲ ਕਟੀ, ਹਸਪਤਾਲ ਦਾਖ਼ਲ

ਤਰੁਣ ਭਜਨੀ, ਪੰਜਾਬੀ ਜਾਗਰਣ, ਚੰਡੀਗੜ੍ਹ : ਸੈਕਟਰ-17-ਸੀ ਵਿਚ ਮੰਗਲਵਾਰ ਦੁਪਹਿਰ ਐੱਚਡੀਐੱਫਸੀ ਬੈਂਕ ਦੇ ਬਾਹਰ ਅਚਾਨਕ ਗੋਲ਼ੀ ਚੱਲਣ ਨਾਲ ਭਾਜੜ ਪੈ ਗਈ । ਗੋਲ਼ੀ ਕੈਸ਼ ਵੈਨ ’ਚ ਤਾਇਨਾਤ ਸੁਰੱਖਿਆ ਗਾਰਡ ਦੀ ਡਬਲ ਬੈਰਲ ਗਨ ਤੋਂ ਗਲਤੀ ਨਾਲ ਚੱਲ ਗਈ ਅਤੇ ਉਸੇ ਨੂੰ ਹੀ ਲੱਗ ਗਈ। ਹਾਦਸੇ ਵਿਚ ਗਾਰਡ ਦੇ ਸੱਜੇ ਹੱਥ ਦੀ ਇੱਕ ਉਂਗਲ ਕੱਟ ਗਈ।

ਜਾਣਕਾਰੀ ਅਨੁਸਾਰ ਸੈਕਟਰ-17-ਸੀ ਸਥਿਤ ਐਸਸੀਓ ਨੰਬਰ 149-151 ਵਿੱਚ ਬੈਂਕ ਸ਼ਾਖਾ ‘ਤੇ ਦੁਪਹਿਰ ਕਰੀਬ 2:15 ਵਜੇ ਕੈਸ਼ ਵੈਨ ਪਹੁੰਚੀ ਸੀ। ਕੈਸ਼ ਵੈਨ ਦੇ ਕਰਮਚਾਰੀ ਬੈਂਕ ਤੋਂ ਨਕਦੀ ਲੈਣ ਦੀ ਪ੍ਰਕਿਰਿਆ ਵਿੱਚ ਸਨ। ਇਸ ਦੌਰਾਨ ਸੁਰੱਖਿਆ ਗਾਰਡ ਨੇਤ੍ਰ ਸਿੰਘ ਬੈਂਕ ਦੇ ਮੁੱਖ ਪ੍ਰਵੇਸ਼ ਦੁਆਰ ਦੇ ਬਾਹਰ ਕੁਰਸੀ ’ਤੇ ਬੈਠਾ ਸੀ ਅਤੇ ਸੁਰੱਖਿਆ ਲਈ ਡਬਲ ਬੈਰਲ ਗਨ ਆਪਣੇ ਹੱਥ ਵਿੱਚ ਫੜੀ ਹੋਈ ਸੀ।

ਗਾਰਡ ਨੇ ਬੰਦੂਕ ਨੂੰ ਸਿੱਧਾ ਫੜਿਆ ਹੋਇਆ ਸੀ। ਇਸ ਦੌਰਾਨ ਉਸਦਾ ਹੱਥ ਟ੍ਰਿਗਰ ‘ਤੇ ਰੱਖਿਆ ਗਿਆ, ਜਿਸ ਨਾਲ ਅਚਾਨਕ ਫਾਇਰ ਹੋ ਗਿਆ। ਗੋਲੀ ਸਿੱਧੀ ਉਸਦੇ ਸੱਜੇ ਹੱਥ ਵਿੱਚ ਲੱਗੀ। ਫਾਇਰ ਦੀ ਆਵਾਜ਼ ਨਾਲ ਨੇੜੇ ਤੇੜੇ ਮੌਜੂਦ ਲੋਕ ਅਤੇ ਬੈਂਕ ਕਰਮਚਾਰੀ ਘਬਰਾ ਗਏ। ਕੁਝ ਪਲਾਂ ਲਈ ਬੈਂਕ ਪਰਿਸਰ ਵਿੱਚ ਅਫ਼ਰਾ-ਤਫ਼ਰੀ ਦਾ ਮਾਹੌਲ ਬਣ ਗਿਆ।

ਘਟਨਾ ਦੀ ਸੂਚਨਾ ਦੁਪਹਿਰ 2:17 ਵਜੇ ਪੁਲਿਸ ਨੂੰ ਦਿੱਤੀ ਗਈ। ਸੂਚਨਾ ਮਿਲਦੇ ਹੀ ਪੀਸੀਆਰ ਟੀਮ ਅਤੇ ਥਾਣਾ ਸੈਕਟਰ-17 ਦੇ ਐਸਐਚਓ ਰੋਹਿਤ ਕੁਮਾਰ ਆਪਣੀ ਟੀਮ ਸਮੇਤ ਮੌਕੇ ‘ਤੇ ਪਹੁੰਚੇ। ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਗਾਰਡ ਨੂੰ ਤੁਰੰਤ ਪੀਸੀਆਰ ਵਾਹਨ ਰਾਹੀਂ ਸਰਕਾਰੀ ਮਲਟੀਸਪੈਸ਼ਲਟੀ ਹਸਪਤਾਲ (ਜੀਐਮਐਸਐਚ-16) ਲਿਜਾਇਆ ਗਿਆ।

ਡਾਕਟਰਾਂ ਅਨੁਸਾਰ ਗੋਲੀ ਲੱਗਣ ਨਾਲ ਗਾਰਡ ਦੀ ਇੱਕ ਉਂਗਲੀ ਪੂਰੀ ਤਰ੍ਹਾਂ ਖ਼ਰਾਬ ਹੋ ਗਈ ਹੈ। ਉਸਦਾ ਇਲਾਜ ਜਾਰੀ ਹੈ ਅਤੇ ਹਾਲਤ ਸਥਿਰ ਦੱਸੀ ਜਾ ਰਹੀ ਹੈ। ਬੈਂਕ ਕਰਮਚਾਰੀਆਂ ਨੇ ਪੁਲਿਸ ਨੂੰ ਦੱਸਿਆ ਕਿ ਅਚਾਨਕ ਤੇਜ਼ ਧਮਾਕੇ ਵਰਗੀ ਆਵਾਜ਼ ਆਈ, ਜਿਸ ਨਾਲ ਸਾਰੇ ਕਰਮਚਾਰੀ ਅਤੇ ਗਾਹਕ ਘਬਰਾ ਗਏ। ਮੌਕੇ ’ਤੇ ਫਰਸ਼ ’ਤੇ ਖ਼ੂਨ ਫੈਲ ਗਿਆ ਸੀ। ਕੁਝ ਸਮੇਂ ਲਈ ਬੈਂਕ ਦੀਆਂ ਗਤੀਵਿਧੀਆਂ ਵੀ ਪ੍ਰਭਾਵਿਤ ਰਹੀਆਂ।

ਪੁਲਿਸ ਨੇ ਮੌਕੇ ਦਾ ਨਿਰੀਖਣ ਕਰ ਕੇ ਬੰਦੂਕ ਨੂੰ ਕਬਜ਼ੇ ਵਿੱਚ ਲੈ ਲਿਆ ਹੈ। ਨਾਲ ਹੀ ਬੈਂਕ ਅਤੇ ਆਲੇ ਦੁਆਲੇ ਲੱਗੇ ਸੀਸੀਟੀਵੀ ਕੈਮਰਿਆਂ ਦੀ ਫੁਟੇਜ ਖੰਗਾਲੀ ਜਾ ਰਹੀ ਹੈ, ਤਾਂ ਜੋ ਇਹ ਸਪੱਸ਼ਟ ਹੋ ਸਕੇ ਕਿ ਟ੍ਰਿਗਰ ਕਿਹੜੀਆਂ ਪਰਿਸਥਿਤੀਆਂ ਵਿੱਚ ਦਬਿਆ ਅਤੇ ਸੁਰੱਖਿਆ ਮਾਪਦੰਡਾਂ ਦੀ ਪਾਲਣਾ ਕੀਤੀ ਜਾ ਰਹੀ ਸੀ ਜਾਂ ਨਹੀਂ।

ਘਟਨਾ ਸਮੇਂ ਬੈਂਕ ਦੇ ਬਾਹਰ ਕਾਫ਼ੀ ਗਿਣਤੀ ਵਿੱਚ ਲੋਕ ਮੌਜੂਦ ਸਨ। ਗਨੀਮਤ ਰਹੀ ਕਿ ਗੋਲੀ ਕਿਸੇ ਹੋਰ ਵਿਅਕਤੀ ਨੂੰ ਨਹੀਂ ਲੱਗੀ, ਨਹੀਂ ਤਾਂ ਜਾਨ-ਮਾਲ ਦਾ ਵੱਡਾ ਨੁਕਸਾਨ ਹੋ ਸਕਦਾ ਸੀ। ਪੁਲਿਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ। ਨਾਲ ਹੀ ਇਹ ਵੀ ਜਾਂਚ ਕੀਤੀ ਜਾ ਰਹੀ ਹੈ ਕਿ ਹਥਿਆਰ ਦੀ ਹੈਂਡਲਿੰਗ ਵਿੱਚ ਕੋਈ ਲਾਪਰਵਾਹੀ ਤਾਂ ਨਹੀਂ ਵਰਤੀ ਗਈ। ਜਾਂਚ ਰਿਪੋਰਟ ਦੇ ਆਧਾਰ ‘ਤੇ ਅਗਲੀ ਕਾਰਵਾਈ ਕੀਤੀ ਜਾਵੇਗੀ।