PU 'ਚ ਉਪ-ਕੁਲਪਤੀ ਦੇ ਅਹੁਦੇ ਲਈ ਦੌੜ; ਅਰਜ਼ੀਆਂ ਦੀ ਭਰਮਾਰ, 30 ਨਾਮ ਸ਼ਾਰਟਲਿਸਟ, ਜਲਦ ਬਣੇਗਾ ਪੈਨਲ

ਜਾਗਰਣ ਪ੍ਰਤੀਨਿਧ, ਚੰਡੀਗੜ੍ਹ : ਪੰਜਾਬ ਯੂਨੀਵਰਸਿਟੀ (PU) 'ਚ ਨਵੇਂ ਵਾਈਸ ਚਾਂਸਲਰ ਦੇ ਅਹੁਦੇ ਲਈ 30 ਨਾਂ ਸ਼ਾਰਟਲਿਸਟ ਕੀਤੇ ਗਏ ਹਨ। ਚੋਣ ਪ੍ਰਕਿਰਿਆ ਲਈ ਬਣੀ ਕਮੇਟੀ ਜਲਦ ਹੀ ਤਿੰਨ ਤੋਂ ਪੰਜ ਨਾਵਾਂ ਦਾ ਪੈਨਲ ਚਾਂਸਲਰ ਨੂੰ ਸੌਂਪੇਗੀ। ਚਾਂਸਲਰ ਦੀ ਪ੍ਰਵਾਨਗੀ ਤੋਂ ਬਾਅਦ ਪੰਜਾਬ ਯੂਨੀਵਰਸਿਟੀ ਨੂੰ ਨਵਾਂ ਉਪ-ਕੁਲਪਤੀ ਮਿਲ ਜਾਵੇਗਾ।

ਉਪ-ਕੁਲਪਤੀ ਲਈ 100 ਤੋਂ ਵੱਧ ਆਈਆਂ ਅਰਜ਼ੀਆਂ 'ਚੋਂ ਸਭ ਤੋਂ ਵੱਧ ਪੀਯੂ ਦੇ ਪ੍ਰੋਫੈਸਰਾਂ ਦੀਆਂ ਹੀ ਸਨ। ਇਸ ਤੋਂ ਇਲਾਵਾ ਪੰਜਾਬ, ਹਰਿਆਣਾ, ਉੱਤਰ ਪ੍ਰਦੇਸ਼, ਬਿਹਾਰ, ਰਾਜਸਥਾਨ ਸਮੇਤ ਹੋਰਨਾਂ ਸੂਬਿਆਂ ਤੋਂ ਵੀ ਅਰਜ਼ੀਆਂ ਆਈਆਂ ਸਨ।

ਕਈ ਪ੍ਰੋਫੈਸਰਾਂ ਨੇ ਉਪ-ਕੁਲਪਤੀ ਦੇ ਅਹੁਦੇ ਲਈ ਦੋ ਵਾਰ ਅਪਲਾਈ ਕੀਤਾ, ਜਿਸ ਕਾਰਨ ਸਕ੍ਰੀਨਿੰਗ ਕਮੇਟੀ ਨੂੰ ਸ਼ਾਰਟਲਿਸਟਿੰਗ ਕਰਨ 'ਚ ਮੁਸ਼ਕਲ ਦਾ ਸਾਹਮਣਾ ਕਰਨਾ ਪਿਆ। ਮੌਜੂਦਾ ਉਪ-ਕੁਲਪਤੀ ਪ੍ਰੋ. ਰੇਣੂ ਵਿਜ ਦਾ ਕਾਰਜਕਾਲ 28 ਮਾਰਚ ਨੂੰ ਖ਼ਤਮ ਹੋ ਚੁੱਕਾ ਹੈ, ਜਿਸ ਤੋਂ ਬਾਅਦ ਉਨ੍ਹਾਂ ਨੂੰ ਚਾਰ ਮਹੀਨਿਆਂ ਦਾ ਕਾਰਜਕਾਲ ਵਾਧਾ ਮਿਲਿਆ ਹੈ।

ਜੁਲਾਈ 'ਚ ਰੇਣੂ ਵਿਜ ਦਾ ਕਾਰਜਕਾਲ ਵਾਧਾ ਪੂਰਾ ਹੋ ਰਿਹਾ ਹੈ ਜਿਸ ਕਾਰਨ ਨਵੇਂ ਉਪ-ਕੁਲਪਤੀ ਦੀ ਚੋਣ ਪ੍ਰਕਿਰਿਆ ਤੇਜ਼ ਹੋ ਗਈ ਹੈ। ਨਵੇਂ ਉਪ-ਕੁਲਪਤੀ ਦੀ ਨਿਯੁਕਤੀ ਲਈ ਤਿੰਨ ਮੈਂਬਰੀ ਸਰਚ ਕਮੇਟੀ ਦਾ ਗਠਨ ਕੀਤਾ ਗਿਆ ਹੈ ਜਿਸ ਵਿਚ ਸਾਰੀਆਂ ਮਹਿਲਾ ਮੈਂਬਰ ਸ਼ਾਮਲ ਹਨ।

ਕਮੇਟੀ ਦੀ ਅਗਵਾਈ ਮਹਾਰਾਸ਼ਟਰ ਯੂਨੀਵਰਸਿਟੀ ਆਫ਼ ਹੈਲਥ ਸਾਇੰਸਜ਼, ਨਾਸਿਕ ਦੀ ਵੀਸੀ ਰਿਟਾਇਰਡ ਲੈਫਟੀਨੈਂਟ ਜਨਰਲ ਮਾਧੁਰੀ ਕਾਨਿਟਕਰ ਕਰ ਰਹੇ ਹਨ। ਐਨਆਈਈਪੀਏ ਨਵੀਂ ਦਿੱਲੀ ਦੀ ਵੀਸੀ ਸ਼ਸ਼ੀਕਲਾ ਵੰਜਾਰੀ ਅਤੇ ਸੀਐਸਆਈਆਰ- ਇੰਡੀਅਨ ਇੰਸਟੀਚਿਊਟ ਆਫ਼ ਕੈਮੀਕਲ ਬਾਇਓਲੋਜੀ, ਕੋਲਕਾਤਾ ਦੀ ਡਾਇਰੈਕਟਰ ਵਿਭਾ ਟੰਡਨ ਵੀ ਇਸ ਕਮੇਟੀ 'ਚ ਸ਼ਾਮਲ ਹਨ।