ਨੌਜਵਾਨ ਨੇ ਪਿੱਲੇ ਨੂੰ ਜਿਉਂਦਾ ਤੰਦੂਰ ’ਚ ਸੁੱਟਿਆ

ਤਰੁਣ ਭਜਨੀ, ਪੰਜਾਬੀ ਜਾਗਰਣ, ਚੰਡੀਗੜ੍ਹ : ਸੈਕਟਰ-26 ਸਥਿਤ ਬਾਪੂਧਾਮ ਕਾਲੋਨੀ ਵਿੱਚ ਇਨਸਾਨੀਅਤ ਨੂੰ ਸ਼ਰਮਸਾਰ ਕਰ ਦੇਣ ਵਾਲੀ ਇੱਕ ਬਹੁਤ ਹੀ ਦਰਦਨਾਕ ਘਟਨਾ ਸਾਹਮਣੇ ਆਈ ਹੈ। ਕੁੱਤੇ ਅਤੇ ਉਸਦੇ ਮਾਸੂਮ ਪਿੱਲੇ ਦੇ ਭੌਂਕਣ ਤੋਂ ਇੱਕ ਸ਼ਰਾਬੀ ਨੌਜਵਾਨ ਇੰਨਾ ਨਾਰਾਜ਼ ਹੋ ਗਿਆ ਕਿ ਉਸਨੇ ਉਸ ਦੀ ਆਵਾਜ਼ ਹਮੇਸ਼ਾ ਲਈ ਬੰਦ ਕਰਨ ਦਾ ਖੌਫਨਾਕ ਫੈਸਲਾ ਕਰ ਲਿਆ। ਨੌਜਵਾਨ ਨੇ ਜਿਉਂਦੇ ਪਿੱਲੇ ਨੂੰ ਸੜਦੇ ਤੰਦੂਰ ਵਿੱਚ ਸੁੱਟ ਦਿੱਤਾ, ਜਿਸ ਕਾਰਨ ਉਸਦੀ ਤੜਪ-ਤੜਪ ਕੇ ਮੌਤ ਹੋ ਗਈ। ਇਸ ਘਟਨਾ ਨੇ ਇਲਾਕੇ ਦੇ ਲੋਕਾਂ ਨੂੰ ਅੰਦਰ ਤੱਕ ਝੰਝੋੜ ਦਿੱਤਾ ਹੈ। ਘਟਨਾ ਤੋਂ ਬਾਅਦ ਲੋਕਾਂ ਅਤੇ ਪਸ਼ੂ ਪ੍ਰੇਮੀਆਂ ਵਿੱਚ ਭਾਰੀ ਗੁੱਸਾ ਹੈ। ਮਾਮਲੇ ਵਿੱਚ ਸੈਕਟਰ-26 ਥਾਣਾ ਪੁਲਿਸ ਨੇ ਤੁਰੰਤ ਕਾਰਵਾਈ ਕਰਦਿਆਂ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਮੁਲਜ਼ਮ ਦੀ ਪਛਾਣ ਬਾਪੂਧਾਮ ਫੇਜ਼-2 ਵਾਸੀ ਨੀਰਜ ਉਰਫ਼ ਭੋਲਾ (25) ਵਜੋਂ ਹੋਈ ਹੈ। ਪੁਲਿਸ ਅਨੁਸਾਰ ਮੁਲਜ਼ਮ ਨਸ਼ੇ ਦਾ ਆਦੀ ਹੈ। ਉਸਦੇ ਖ਼ਿਲਾਫ਼ ਪਸ਼ੂ ਕ੍ਰੂਰਤਾ ਐਕਟ ਸਮੇਤ ਹੋਰ ਸਬੰਧਤ ਧਾਰਾਵਾਂ ਹੇਠ ਮਾਮਲਾ ਦਰਜ ਕੀਤਾ ਗਿਆ ਹੈ। ਜਾਣਕਾਰੀ ਅਨੁਸਾਰ ਘਟਨਾ ਸ਼ਨੀਵਾਰ ਦੇਰ ਰਾਤ ਕਰੀਬ 1:40 ਵਜੇ ਦੀ ਹੈ। ਸੈਕਟਰ-26 ਸਬਜ਼ੀ ਮੰਡੀ ਵਿੱਚ ਪੱਲੇਦਾਰੀ ਦਾ ਕੰਮ ਕਰਨ ਵਾਲੇ ਸੰਜੇ ਕੰਮ ਖਤਮ ਕਰਕੇ ਘਰ ਵਾਪਸ ਆ ਰਹੇ ਸਨ। ਜਦੋਂ ਉਹ ਫੇਜ਼-2 ਸਥਿਤ ਨੂਰਾਨੀ ਢਾਬੇ ਕੋਲ ਪਹੁੰਚੇ ਤਾਂ ਉਨ੍ਹਾਂ ਨੇ ਇੱਕ ਨੌਜਵਾਨ ਨੂੰ ਹੱਥ ਵਿੱਚ ਕੁੱਤੇ ਦਾ ਛੋਟਾ ਪਿੱਲਾ ਚੁੱਕਿਆ ਹੋਇਆ ਦੇਖਿਆ। ਸੰਜੇ ਅਨੁਸਾਰ ਨੌਜਵਾਨ ਸੰਪਰਕ ਸੈਂਟਰ ਵੱਲੋਂ ਆਇਆ ਸੀ। ਕੁਝ ਹੀ ਪਲਾਂ ਬਾਅਦ ਉਸਨੇ ਅਚਾਨਕ ਢਾਬੇ ਦੇ ਬਾਹਰ ਰੱਖੇ ਸੜਦੇ ਤੰਦੂਰ ਵਿੱਚ ਪਿੱਲੇ ਨੂੰ ਸੁੱਟ ਦਿੱਤਾ ਅਤੇ ਉੱਥੋਂ ਭੱਜ ਗਿਆ । ਤੰਦੂਰ ਵਿੱਚ ਡਿੱਗਦੇ ਹੀ ਪਿੱਲੇ ਦੀਆਂ ਦਰਦਨਾਕ ਚੀਖਾਂ ਸੁਣਾਈ ਦੇਣ ਲੱਗੀਆਂ। ਇਹ ਭਿਆਨਕ ਦ੍ਰਿਸ਼ ਦੇਖ ਕੇ ਸੰਜੇ ਦੇ ਹੋਸ਼ ਉੱਡ ਗਏ। ਸੰਜੇ ਤੁਰੰਤ ਆਪਣੀ ਜਾਨ ਦੀ ਪਰਵਾਹ ਕੀਤੇ ਬਿਨਾਂ ਤੰਦੂਰ ਵੱਲ ਦੌੜੇ ਪਰ ਉਨ੍ਹਾਂ ਨੇ ਕਾਫ਼ੀ ਮੁਸ਼ੱਕਤ ਤੋਂ ਬਾਅਦ ਸੜਦੇ ਤੰਦੂਰ ਵਿੱਚੋਂ ਪਿੱਲੇ ਨੂੰ ਬਾਹਰ ਕੱਢਿਆ, ਪਰ ਤਦ ਤੱਕ ਬਹੁਤ ਦੇਰ ਹੋ ਚੁੱਕੀ ਸੀ। ਗੰਭੀਰ ਤੌਰ ‘ਤੇ ਝੁਲਸ ਚੁੱਕੇ ਮਾਸੂਮ ਪਿੱਲੇ ਨੇ ਦਮ ਤੋੜ ਦਿੱਤਾ ਸੀ। ਘਟਨਾ ਤੋਂ ਬਾਅਦ ਆਸ-ਪਾਸ ਦੇ ਲੋਕ ਮੌਕੇ ‘ਤੇ ਇਕੱਠੇ ਹੋ ਗਏ। ਹਰ ਕੋਈ ਇਸ ਅਣਮਨੁੱਖੀ ਘਟਨਾ ਨੂੰ ਦੇਖ ਕੇ ਹੈਰਾਨ ਸੀ। ਕਈ ਲੋਕਾਂ ਨੇ ਮੁਲਜ਼ਮ ਖ਼ਿਲਾਫ਼ ਸਖ਼ਤ ਕਾਰਵਾਈ ਦੀ ਮੰਗ ਕੀਤੀ। ਬਾਅਦ ਵਿੱਚ ਸੰਜੇ ਨੇ ਮਰੇ ਹੋਏ ਪਿੱਲੇ ਨੂੰ ਬਾਪੂਧਾਮ ਸਥਿਤ ਸੁਖਨਾ ਚੋਅ ਦੇ ਕੋਲ ਦਫ਼ਨਾ ਦਿੱਤਾ।ਜਾਂਚ ਦੌਰਾਨ ਪੁਲਿਸ ਨੇ ਦੋਸ਼ੀ ਦੀ ਪਛਾਣ ਕਰਕੇ ਉਸ ਨੂੰ ਗ੍ਰਿਫ਼ਤਾਰ ਕਰ ਲਿਆ।