ਹਾਈਕੋਰਟ ਨੇ ਰੁੱਖਾਂ ਦੀ ਕਟਾਈ ਤੋਂ ਰੋਕ ਹਟਾਈ; ਮੋਹਾਲੀ 'ਚ ਤਿੰਨ ਨਵੇਂ ਸਰਕਲ ਬਣਾਉਣ ਤੇ ਸੜਕਾਂ ਦੇ ਵਿਸਥਾਰ ਦਾ ਰਸਤਾ ਸਾਫ਼

ਜਾਗਰਣ ਸੰਵਾਦਦਾਤਾ, ਮੋਹਾਲੀ: ਮੋਹਾਲੀ 'ਚ ਟ੍ਰੈਫਿਕ ਵਿਵਸਥਾ ਨੂੰ ਬਿਹਤਰ ਬਣਾਉਣ ਲਈ ਤਜਵੀਜ਼ਸ਼ੁਦਾ ਤਿੰਨ ਨਵੇਂ ਸਰਕਲਾਂ ਤੇ ਸੜਕਾਂ ਦੇ ਵਿਸਥਾਰ ਦਾ ਕੰਮ ਹੁਣ ਨੇਪਰੇ ਚੜ੍ਹੇਗਾ। ਇਨ੍ਹਾਂ ਪ੍ਰੋਜੈਕਟਾਂ 'ਚ ਅੜਿੱਕਾ ਬਣ ਰਹੀ ਰੁੱਖਾਂ ਦੀ ਕਟਾਈ 'ਤੇ ਲੱਗੀ ਅੰਤਰਿਮ ਰੋਕ ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ਨੇ ਹਟਾ ਦਿੱਤੀ ਹੈ।

ਹੁਣ ਗ੍ਰੇਟਰ ਮੋਹਾਲੀ ਏਰੀਆ ਡਿਵੈਲਪਮੈਂਟ ਅਥਾਰਟੀ (ਗਮਾਡਾ) ਸਰਕਲ ਨਿਰਮਾਣ ਦਾ ਕੰਮ ਤੇਜ਼ੀ ਨਾਲ ਕਰ ਸਕੇਗਾ।ਹਾਲਾਂਕਿ, ਹਾਈਕੋਰਟ ਨੇ ਸ਼ਰਤ ਰੱਖੀ ਹੈ ਕਿ ਕੱਟੇ ਗਏ ਇੱਕ ਰੁੱਖ ਦੇ ਬਦਲੇ ਪੰਜ ਤੋਂ ਦਸ ਨਵੇਂ ਰੁੱਖ ਲਗਾਏ ਜਾਣਗੇ।

ਪਟੀਸ਼ਨਕਰਤਾਵਾਂ ਨੇ ਮੁੱਖ ਸੜਕਾਂ ਦੇ ਇੰਟਰ-ਸੈਕਸ਼ਨਾਂ 'ਤੇ ਸਰਕਲ ਬਣਾਉਣ ਲਈ ਸੈਂਕੜੇ ਰੁੱਖ ਕੱਟਣ ਦਾ ਵਿਰੋਧ ਕੀਤਾ ਸੀ। ਹਾਈਕੋਰਟ ਨੇ ਪਹਿਲਾਂ ਹੁਕਮ ਦਿੱਤਾ ਸੀ ਕਿ ਅਗਲੀ ਸੁਣਵਾਈ ਤੱਕ ਅਦਾਲਤ ਦੀ ਇਜਾਜ਼ਤ ਤੋਂ ਬਿਨਾਂ ਕੋਈ ਵੀ ਰੁੱਖ ਨਹੀਂ ਕੱਟਿਆ ਜਾਵੇਗਾ। ਹੁਣ ਅਦਾਲਤ ਨੇ ਰੋਕ ਹਟਾਉਂਦੇ ਹੋਏ ਗਮਾਡਾ ਨੂੰ ਅੱਗੇ ਵਧਣ ਦੀ ਇਜਾਜ਼ਤ ਦੇ ਦਿੱਤੀ ਹੈ।

ਇਸ ਨਾਲ ਗੁਰਦੁਆਰਾ ਸਿੰਘ ਸਭਾ (ਸੈਕਟਰ 69-78) ਦੇ ਕੋਲ, ਸੈਕਟਰ 67-80 ਦੇ ਵਿਚਕਾਰ ਅਤੇ ਹੋਰ ਪ੍ਰਮੁੱਖ ਜੰਕਸ਼ਨਾਂ 'ਤੇ ਪ੍ਰਸਤਾਵਿਤ ਸਰਕਲ ਟ੍ਰੈਫਿਕ ਜਾਮ ਅਤੇ ਹਾਦਸਿਆਂ ਨੂੰ ਕਾਫੀ ਹੱਦ ਤਕ ਘਟਾਉਣਗੇ। ਆਈਸਰ (IISER) ਦੇ ਬਾਹਰ ਤੇ ਚੀਮਾ ਚੌਕ 'ਤੇ ਦੋ ਟੀ-ਪੁਆਇੰਟ ਵੀ ਬਣਾਏ ਜਾਣਗੇ। ਇਹ ਪ੍ਰੋਜੈਕਟ ਗਮਾਡਾ ਅਤੇ ਨਗਰ ਨਿਗਮ ਦੇ ਸਹਿਯੋਗ ਨਾਲ ਤਿਆਰ ਕੀਤੇ ਜਾ ਰਹੇ ਹਨ। ਜ਼ਮੀਨ ਦੀ ਨਿਸ਼ਾਨਦੇਹੀ, ਸਰਵੇਖਣ ਅਤੇ ਡਿਜ਼ਾਈਨ ਫਾਈਨਲ ਹੋ ਚੁੱਕੇ ਹਨ। ਹੁਣ ਟੈਂਡਰ ਪ੍ਰਕਿਰਿਆ ਜਲਦੀ ਹੀ ਸ਼ੁਰੂ ਹੋਵੇਗੀ।

ਰੁੱਖ ਦੇ ਬਦਲੇ ਲਗਾਏ ਜਾਣਗੇ ਨਵੇਂ ਰੁੱਖ

ਗਮਾਡਾ ਅਧਿਕਾਰੀਆਂ ਨੇ ਕਿਹਾ ਕਿ ਸਰਕਲਾਂ ਲਈ ਜ਼ਰੂਰੀ ਰੁੱਖਾਂ ਦੀ ਕਟਾਈ ਘੱਟ ਤੋਂ ਘੱਟ ਹੋਵੇਗੀ ਅਤੇ ਕੱਟੇ ਗਏ ਹਰ ਰੁੱਖ ਦੇ ਬਦਲੇ 5-10 ਨਵੇਂ ਰੁੱਖ ਲਗਾਏ ਜਾਣਗੇ। ਅਦਾਲਤ ਨੇ ਸਖ਼ਤੀ ਨਾਲ ਕਿਹਾ ਹੈ ਕਿ ਵਾਤਾਵਰਣ ਦਾ ਸੰਤੁਲਨ ਬਣਾਈ ਰੱਖਿਆ ਜਾਵੇ। ਨਿਵਾਸੀਆਂ ਨੇ ਇਸ 'ਤੇ ਵੱਖ-ਵੱਖ ਪ੍ਰਤੀਕਿਰਿਆਵਾਂ ਦਿੱਤੀਆਂ ਹਨ। ਫੇਜ਼-7 ਅਤੇ ਸੈਕਟਰ-69 ਦੇ ਲੋਕ ਟ੍ਰੈਫਿਕ ਸੁਧਾਰ ਤੋਂ ਖੁਸ਼ ਹਨ, ਪਰ ਵਾਤਾਵਰਣ ਪ੍ਰੇਮੀਆਂ ਨੇ ਕਿਹਾ ਕਿ ਰੁੱਖਾਂ ਦੀ ਕਟਾਈ ਨਾਲ ਸ਼ਹਿਰ ਦੀ ਹਰਿਆਲੀ ਪ੍ਰਭਾਵਿਤ ਹੋਵੇਗੀ।

ਅਗਲੇ ਸਾਲ ਤਕ ਪੂਰਾ ਹੋਵੇਗਾ ਕੰਮ

ਮੋਹਾਲੀ 'ਚ ਪ੍ਰਸਤਾਵਿਤ ਸਰਕਲ ਅਤੇ ਟੀ-ਪੁਆਇੰਟ ਸ਼ਹਿਰ ਦੀ ਆਵਾਜਾਈ ਵਿਵਸਥਾ ਵਿੱਚ ਵੱਡੀ ਤਬਦੀਲੀ ਲਿਆਉਣ ਵਾਲੇ ਹਨ। ਇਨ੍ਹਾਂ ਪ੍ਰੋਜੈਕਟਾਂ ਨਾਲ ਟ੍ਰੈਫਿਕ ਜਾਮ ਅਤੇ ਹਾਦਸਿਆਂ ਵਿੱਚ ਕਮੀ ਆਉਣ ਦੀ ਉਮੀਦ ਹੈ। ਨਗਰ ਨਿਗਮ ਅਤੇ ਗਮਾਡਾ ਨੇ ਇਨ੍ਹਾਂ ਨੂੰ ਤਰਜੀਹ 'ਤੇ ਰੱਖਿਆ ਹੈ ਤਾਂ ਜੋ ਵਿਅਸਤ ਚੌਕਾਂ 'ਤੇ ਸੁਚਾਰੂ ਆਵਾਜਾਈ ਨੂੰ ਯਕੀਨੀ ਬਣਾਇਆ ਜਾ ਸਕੇ।

ਯੋਜਨਾਵਾਂ ਤਹਿਤ ਸੜਕਾਂ ਨੂੰ ਚੌੜਾ ਕਰਨਾ, ਰੋਟਰੀ ਨਿਰਮਾਣ ਅਤੇ ਆਧੁਨਿਕ ਟ੍ਰੈਫਿਕ ਪ੍ਰਬੰਧਨ ਪ੍ਰਣਾਲੀ ਲਾਗੂ ਕੀਤੀ ਜਾਵੇਗੀ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਨ੍ਹਾਂ ਪ੍ਰੋਜੈਕਟਾਂ ਦੇ ਪੂਰੇ ਹੋਣ ਨਾਲ ਸ਼ਹਿਰ ਵਾਸੀਆਂ ਨੂੰ ਰਾਹਤ ਮਿਲੇਗੀ ਅਤੇ ਸਫ਼ਰ ਵਧੇਰੇ ਸੁਰੱਖਿਅਤ ਹੋਵੇਗਾ। ਇਹ ਪ੍ਰੋਜੈਕਟ ਸਾਲ 2026-27 ਤੱਕ ਪੂਰਾ ਹੋਣ ਦੀ ਸੰਭਾਵਨਾ ਹੈ।