ਕਰਾਸ-ਬਾਰਡਰ ਹੈਰੋਇਨ ਤਸਕਰੀ ਨੈੱਟਵਰਕ ਦਾ ਪਰਦਾਫਾਸ਼, ਪੰਜਾਬ ਪੁਲਿਸ ਨੇ ਦਬੋਚੇ 5 ਨਸ਼ਾ ਤਸਕਰ, 10 ਤੋਂ ਵੱਧ ਟਿਕਾਣਿਆਂ 'ਤੇ ਛਾਪੇਮਾਰੀ

ਜਾਗਰਣ ਸੰਵਾਦਦਾਤਾ, ਮੋਹਾਲੀ : ਨਸ਼ਿਆਂ ਵਿਰੁੱਧ ਵੱਡੀ ਕਾਰਵਾਈ ਕਰਦੇ ਹੋਏ ਨਾਰਕੋਟਿਕਸ ਕੰਟਰੋਲ ਬਿਊਰੋ (NCB) ਦੀ ਚੰਡੀਗੜ੍ਹ ਜ਼ੋਨਲ ਯੂਨਿਟ (ਮੋਹਾਲੀ ਸਥਿਤ) ਅਤੇ ਪੰਜਾਬ ਪੁਲਿਸ ਨੇ ਇੱਕ ਸਾਂਝੇ ਆਪ੍ਰੇਸ਼ਨ ਦੌਰਾਨ ਅੰਤਰਰਾਸ਼ਟਰੀ ਹੈਰੋਇਨ ਤਸਕਰੀ ਨਾਲ ਜੁੜੇ ਇੱਕ ਵੱਡੇ ਨੈੱਟਵਰਕ ਦਾ ਭੰਡਾਫੋੜ ਕੀਤਾ ਹੈ।

ਦੋ ਦਿਨਾਂ ਤਕ ਚੱਲੀ ਇਸ ਮੁਹਿੰਮ 'ਚ 5 ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ ਜਦਕਿ 150 ਗ੍ਰਾਮ ਤੋਂ ਵੱਧ ਹਾਈ-ਪਿਊਰਿਟੀ (ਉੱਚ ਗੁਣਵੱਤਾ ਵਾਲੀ) ਹੈਰੋਇਨ ਬਰਾਮਦ ਕੀਤੀ ਗਈ ਹੈ। NCB ਨੂੰ ਸੂਚਨਾ ਮਿਲੀ ਸੀ ਕਿ ਟ੍ਰਾਈਸਿਟੀ ਖੇਤਰ, ਖਾਸ ਕਰਕੇ ਖਰੜ ਵਿੱਚ ਹੈਰੋਇਨ ਦੀ ਸਪਲਾਈ ਵੱਡੇ ਪੱਧਰ 'ਤੇ ਹੋ ਰਹੀ ਹੈ।

ਇਸ ਤੋਂ ਬਾਅਦ 30 ਜਨਵਰੀ ਨੂੰ ਮੋਹਾਲੀ, ਖਰੜ ਅਤੇ ਸਰਹੱਦੀ ਜ਼ਿਲ੍ਹੇ ਤਰਨਤਾਰਨ ਵਿੱਚ ਇੱਕੋ ਸਮੇਂ ਛਾਪੇਮਾਰੀ ਕੀਤੀ ਗਈ। ਟੀਮਾਂ ਨੇ 10 ਤੋਂ ਵੱਧ ਅਜਿਹੇ ਟਿਕਾਣਿਆਂ 'ਤੇ ਦਸਤਕ ਦਿੱਤੀ, ਜਿਨ੍ਹਾਂ ਦੀ ਵਰਤੋਂ ਨਸ਼ੇ ਦੀ ਖੇਪ ਛੁਪਾਉਣ ਅਤੇ ਸਪਲਾਈ ਕਰਨ ਲਈ ਕੀਤੀ ਜਾ ਰਹੀ ਸੀ।

ਨਵੀਂ ਰਣਨੀਤੀ: 'ਪੈਨ ਟੂ ਪੋਰਟ-ਬਾਰਡਰ'

ਇਸ ਕਾਰਵਾਈ 'ਚ NCB ਅਤੇ ਪੰਜਾਬ ਪੁਲਿਸ ਨੇ ਖੁਫ਼ੀਆ ਜਾਣਕਾਰੀ 'ਤੇ ਅਧਾਰਿਤ ਇਕ ਨਵੀਂ ਰਣਨੀਤੀ ਅਪਣਾਈ, ਜਿਸ ਨੂੰ 'ਪੈਨ ਟੂ ਪੋਰਟ-ਬਾਰਡਰ' ਦਾ ਨਾਂ ਦਿੱਤਾ ਗਿਆ ਹੈ। ਇਸ ਤਹਿਤ ਜਾਂਚ ਦੀ ਸ਼ੁਰੂਆਤ ਛੋਟੇ ਪੱਧਰ ਦੇ ਪੈਡਲਰਾਂ ਤੋਂ ਕੀਤੀ ਗਈ:

ਪਹਿਲੇ ਪੜਾਅ 'ਚ 1-2 ਗ੍ਰਾਮ ਹੈਰੋਇਨ ਨਾਲ ਫੜੇ ਗਏ ਸਪਲਾਇਰਾਂ ਤੋਂ ਪੁੱਛਗਿੱਛ ਕੀਤੀ ਗਈ।

ਇਸ ਤੋਂ ਬਾਅਦ 10 ਗ੍ਰਾਮ ਤੋਂ ਵੱਧ ਨਸ਼ਾ ਰੱਖਣ ਵਾਲੇ ਮਿਡ-ਲੈਵਲ (ਦਰਮਿਆਨੇ ਪੱਧਰ) ਦੇ ਸਪਲਾਇਰਾਂ ਤੱਕ ਪਹੁੰਚ ਕੀਤੀ ਗਈ। ਅਖੀਰ 'ਚ 100 ਗ੍ਰਾਮ ਤੋਂ ਵੱਧ ਹੈਰੋਇਨ ਸਮੇਤ ਇੱਕ ਵੱਡੇ ਸਪਲਾਇਰ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ।

ਪਾਕਿਸਤਾਨ ਸਰਹੱਦ ਨਾਲ ਜੁੜੇ ਤਾਰ

ਪੁੱਛਗਿੱਛ ਦੌਰਾਨ ਇਹ ਗੱਲ ਸਾਹਮਣੇ ਆਈ ਹੈ ਕਿ ਹੈਰੋਇਨ ਦੀ ਸਪਲਾਈ ਪਾਕਿਸਤਾਨ ਸਰਹੱਦ ਤੋਂ ਹੁੰਦੀ ਸੀ ਅਤੇ ਤਰਨਤਾਰਨ ਜ਼ਿਲ੍ਹੇ ਰਾਹੀਂ ਇਹ ਨੈੱਟਵਰਕ ਸਰਗਰਮ ਸੀ। NCB ਨੇ ਪੁਸ਼ਟੀ ਕੀਤੀ ਹੈ ਕਿ ਇਸ ਨੈੱਟਵਰਕ ਦੇ ਤਾਰ ਭਾਰਤ-ਪਾਕਿਸਤਾਨ ਸਰਹੱਦ ਨਾਲ ਜੁੜੇ ਹੋਏ ਹਨ।

ਜਾਂਚ ਏਜੰਸੀਆਂ ਦਾ ਹੁਣ ਮੁੱਖ ਫੋਕਸ ਸਰਹੱਦੀ ਇਲਾਕੇ 'ਚ ਸਰਗਰਮ ਮੁੱਖ ਸਪਲਾਇਰਾਂ ਅਤੇ ਫਾਇਨਾਂਸਰਾਂ (ਪੈਸਾ ਲਗਾਉਣ ਵਾਲਿਆਂ) ਤਕ ਪਹੁੰਚਣਾ ਹੈ ਤਾਂ ਜੋ ਪੂਰੇ ਨੈੱਟਵਰਕ ਨੂੰ ਜੜ੍ਹ ਤੋਂ ਖ਼ਤਮ ਕੀਤਾ ਜਾ ਸਕੇ। NCB ਚੰਡੀਗੜ੍ਹ ਜ਼ੋਨਲ ਯੂਨਿਟ ਨੇ ਕਿਹਾ ਹੈ ਕਿ 'ਡਰੱਗ ਫ੍ਰੀ ਭਾਰਤ' ਦੇ ਟੀਚੇ ਤਹਿਤ ਵੱਖ-ਵੱਖ ਏਜੰਸੀਆਂ ਦੇ ਤਾਲਮੇਲ ਨਾਲ ਨਸ਼ੇ ਦੇ ਕਾਰੋਬਾਰ 'ਤੇ ਲਗਾਤਾਰ ਸ਼ਿਕੰਜਾ ਕੱਸਿਆ ਜਾਵੇਗਾ।