ਪੰਜਾਬ ਦੇ ਬੱਚਿਆਂ ਨੂੰ ਮਿਲੇਗੀ ਆਲਮੀ ਪੱਧਰ ਦੀ ਸਿੱਖਿਆ, CM ਮਾਨ ਨੇ ਕਿਹਾ- ਪੰਜਾਬ ਫਿਨਲੈਂਡ ਸਹਿਯੋਗ ਨਾਲ ਕਲਾਸਰੂਮ ਅਧਿਆਪਨ ’ਚ ਆਇਆ ਵੱਡਾ ਬਦਲਾਅ

ਪੰਜਾਬੀ ਜਾਗਰਣ ਬਿਊਰੋ, ਚੰਡੀਗੜ੍ਹ : ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਕਿਹਾ ਹੈ ਕਿ ਪੰਜਾਬ ਸਰਕਾਰ ਤੇ ਫਿਨਲੈਂਡ ਦੀ ਟੁਰਕੂ ਯੂਨੀਵਰਿਸਟੀ ਵਿਚਕਾਰ ਸਹਿਯੋਗ ਨਾਲ ਪੰਜਾਬ ਦੇ ਕਲਾਸਰੂਮ ’ਚ ਪ੍ਰਤੱਖ ਬਦਲਾਅ ਦਿਸਣ ਲੱਗੇ ਹਨ। ਇਸ ਯਤਨ ਨਾਲ ਸਿੱਖਿਆ ਨੂੰ ਜ਼ਿਆਦਾ ਆਨੰਦਮਈ ਤੇ ਵਿਹਾਰ ਬਣਾ ਦਿੱਤਾ ਗਿਆ ਹੈ ਤੇ ਵਿਦਿਆਰਥੀਆਂ ਲਈ ਸਿੱਖਣ ਦਾ ਮਾਹੌਲ ਜ਼ਿਆਦਾ ਪ੍ਰਭਾਵਸ਼ਾਲੀ ਬਣ ਰਿਹਾ ਹੈ। ਹੁਣ ਪੰਜਾਬ ਦੇ ਬੱਚਿਆਂ ਨੂੰ ਆਲਮੀ ਪੱਧਰ ਦੀ ਸਿੱਖਿਆ ਮਿਲੇਗੀ।

ਮੁੱਖ ਮੰਤਰੀ ਨੇ ਕਿਹਾ ਕਿ ਪੰਜਾਬ ਦੀ ਸਿੱਖਿਆ ਕ੍ਰਾਂਤੀ ’ਚ ਸ਼ਾਮਲ ਇਹ ਪ੍ਰੋਗਰਾਮ ਸਥਾਨਕ ਕਲਾਸਰੂਮ ’ਚ ਆਲਮੀ ਮੁਹਾਰਤ ਨੂੰ ਸ਼ਾਮਲ ਕਰਨ ਦਾ ਕੇਂਦਰਤ ਹੈ। ਹੁਣ ਟ੍ਰੇਨ-ਦਿ-ਟ੍ਰੇਨਰਸ ਮਾਡਰ ਰਾਹੀਂ ਬੁਨਿਆਦੀ ਸਿੱਖਿਆ ਨੂੰ ਮਜ਼ਬੂਤ ਕਰਨ ਲਈ ਕਰੀਬ 300 ਅਧਿਆਪਕਾਂ ਨੂੰ ਟ੍ਰੇਨਿੰਗ ਦਿੱਤੀ ਜਾਵੇਗੀ।

ਫਿਨਲੈਂਡ ਦੀ ਯਾਤਰਾ ਦੌਰਾਨ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਕੁਕੁਲੋ-ਮੋਈਕੋਇ੍ਵਨੇ ਅਰਲੀ ਚਾਈਲਡਹੁੱਡ ਐਜੂਕੇਸ਼ਨ ਐਂਡ ਕੇਅਰ ਸੈਂਟਰ ਦਾ ਦੌਰਾ ਕੀਤਾ। ਮੁੱਖ ਮੰਤਰੀ ਨੇ ਕਿਹਾ ਕਿ ਸਕੂਲ ਸਿੱਖਿਆ ਵਿਭਾਗ ਤਹਿਤ ਸਟੇਟ ਕੌਂਸਲ ਆਫ ਐਜੂਕੇਸ਼ਨਲ ਰਿਸਰਚ ਐਂਡ ਟ੍ਰੇਨਿੰਗ ਰਾਹੀਂ ਸ਼ੁਰੂ ਕੀਤੀ ਗਈ ਇਹ ਭਾਈਵਾਲੀ ਮੁੱਢਲੀ ਤੇ ਬੁਨਿਆਦੀ ਸਿੱਖਿਆ ’ਚ ਅਧਿਆਪਕ ਦੀ ਭੂਮਿਕਾ ਨੂੰ ਮਜ਼ਬੂਤ ਕਰਨ ਦੇ ਯਤਨਾਂ ਵੱਲ ਕਦਮ ਹੈ। ਇਹ ਘੱਟਚਿਰੀ ਦਖ਼ਲ ਦੇ ਰੂਪ ’ਚ ਨਹੀਂ ਬਲਕਿ ਪੰਜਾਬ ਦੀ ਸਿੱਖਿਆ ਪ੍ਰਣਾਲੀ ’ਚ ਬਾਲ ਕੇਂਦਰਤ ਤੇ ਖੇਡ ਅਧਾਰਤ ਸਿੱਖਿਆ ਨੂੰ ਸ਼ਾਮਲ ਕਰਨ ਲਈ ਲੰਬਚਿਰੀ ਸੰਸਥਾਗਤ ਯਤਨ ਦੇ ਰੂਪ ’ਚ ਤਿਆਰ ਕੀਤੀ ਗਈ ਹੈ, ਜਿਸ ’ਚ ਬਿਹਤਰੀਨ ਸਿੱਖਿਆ ਰਵਾਇਤਾਂ ਨੂੰ ਵੀ ਸ਼ਾਮਲ ਕੀਤਾ ਗਿਆ ਹੈ। ਇਹ ਪ੍ਰੋਗਰਾਮ ਅਧਿਆਪਕਾਂ ਨੂੰ ਖੋਜ ਅਧਾਰਤ ਤਰੀਕਿਆਂ ਨਾਲ ਸਜਾਉਣ ’ਤੇ ਕੇਂਦਰਤ ਹੈ। ਉਨ੍ਹਾਂ ਕਿਹਾ ਕਿ ਇਹ ਟ੍ਰੇਨਿੰਗ ਸੈਸ਼ਨ ਚੰਡੀਗੜ੍ਹ ਤੇ ਫਿਨਲੈਂਡ ਦੇ ਸ਼ਹਿਰਾਂ ਟੁਰਕੂ ਤੇ ਰਾਉਣਾ ’ਚ ਕੀਤੇ ਗਏ, ਜਿਸ ’ਚ ਅਧਿਆਪਕਾਂ ਨੂੰ ਕਲਾਸਰੂਮ ਦੀਆਂ ਨਵੀਆਂ ਤਕਨੀਕਾਂ ਤੋਂ ਜਾਣੂ ਕਰਵਾਇਆ ਗਿਆ। ਮਈ 2026 ਤੱਕ ਚਾਰ ਸਮੂਹਾਂ ’ਚ ਕਰੀਬ 300 ਅਧਿਆਪਕ ਟ੍ਰੇਨਿੰਗ ਹਾਸਲ ਕਰ ਲੈਣਗੇ, ਜਿਸ ਨਾਲ ਪੂਰੇ ਪੰਜਾਬ ’ਚ ਦੇ ਵਿਦਿਆਰਥੀਆਂ ਨੂੰ ਲਾਭ ਮਿਲੇਗਾ।

ਰੱਟੇ ਦੀ ਬਜਾਏ ਬਾਲ ਕੇਂਦਰਤ, ਖੇਡ ਅਧਾਰਤ ਸਿੱਖਿਆ ’ਤੇ ਜ਼ੋਰ

ਮੁੱਖ ਮੰਤਰੀ ਨੇ ਕਿਹਾ ਕਿ ਸਿੱਖਿਆ ਨੂੰ ਆਨੰਦਮਈ ਤੇ ਦਿਲਚਸਪ ਬਣਾਉਣ ’ਤੇ ਜ਼ੋਰ ਦਿੱਤਾ ਜਾ ਰਿਹਾ ਹੈ। ਇਸ ਲਈ ਅਸੀਂ ਰੱਟੇ ਲਗਾਉਣ ਦੇ ਪੁਰਾਣੇ ਤਰੀਕਿਆਂ ਦੀ ਥਾਂ ਸਰਗਰਮ ਭਾਈਵਾਲੀ ਵੱਲ ਵਧ ਰਹੇ ਹਾਂ। ਹੁਣ ਬਾਲ-ਕੇਂਦਰਤ, ਖੇਡ ਅਧਾਰਤ ਸਿੱਖਿਆ ’ਤੇ ਜ਼ੋਰ ਦਿੱਤਾ ਜਾ ਰਿਹਾ ਹੈ। ਮੁੱਖ ਮੰਤਰੀ ਨੇ ਕਿਹਾ ਕਿ ਪੰਜਾਬ ਸਰਕਾਰ ਲੋਕ ਸਿੱਖਿਆ ਨੂੰ ਮਜ਼ਬੂਤ ਕਰਨ ਲਈ ਪ੍ਰਤੀਬੱਧਹੈ ਤਾਂ ਜੋ ਵਿਦਿਆਰਥੀ ਕਾਮਯਾਬ ਹੋਣ ਲਈ ਬਿਹਤਰ ਢੰਗ ਨਾਲ ਤਿਆਰ ਹੋ ਸਕਣ।

ਮੁੱਖ ਮੰਤਰੀ ਭਗਵੰਤ ਮਾਨ ਫਿਨਲੈਂਡ ਦੀ ਯੂਨੀਵਰਿਸਟੀ ਆਫ ਟੁਰਕੂ ਦੇ ਨੁਮਾਇੰਦੇ ਨੂੰ ਯਾਦਗਾਰੀ ਚਿੰਨ੍ਹ ਭੇਟ ਕਰਦੇ ਹੋਏ। ਨਾਲ ਹਨ ਸਿੱਖਿਆ ਮੰਤਰੀ ਹਰਜੋਤ ਸਿੰਘ ਬੈਂਸ। ਪੰਜਾਬੀ ਜਾਗਰਣ