ਭਾਜਪਾ ਨੇ ਨਗਰ ਨਿਗਮ ਚੋਣਾਂ ਸਬੰਧੀ ਜਾਰੀ ਕੀਤਾ ਸੰਕਲਪ ਪੱਤਰ

-ਸਿੰਗਲਾ ਅਨੁਸਾਰ ਬਠਿੰਡਾ ਸ਼ਹਿਰ ਨੂੰ ਸਾਫ਼, ਸੁਰੱਖਿਅਤ ਤੇ ਸੁਵਿਧਾ ਭਰਪੂਰ ਬਣਾਉਣਾ ਮੁੱਖ ਉਦੇਸ਼

ਵੀਰਪਾਲ ਭਗਤਾ, ਪੰਜਾਬੀ ਜਾਗਰਣ, ਬਠਿੰਡਾ

26 ਮਈ ਨੂੰ ਹੋਣ ਜਾ ਰਹੀਆਂ ਨਗਰ ਨਿਗਮ ਚੋਣਾਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਭਾਰਤੀ ਜਨਤਾ ਪਾਰਟੀ ਨੇ ਆਪਣਾ ਵਿਸਥਾਰਤ ਚੋਣ ਸੰਕਲਪ ਪੱਤਰ ਜਾਰੀ ਕਰ ਦਿੱਤਾ ਹੈ। ਪ੍ਰੈਸ ਕਾਨਫਰੰਸ ਦੌਰਾਨ ਸ਼ਹਿਰੀ ਜ਼ਿਲ੍ਹਾ ਪ੍ਰਧਾਨ ਸਰੂਪ ਚੰਦ ਸਿੰਗਲਾ, ਪ੍ਰਦੇਸ਼ ਕਮੇਟੀ ਮੈਂਬਰ ਸ਼ਾਮ ਲਾਲ ਬਾਂਸਲ, ਜਨਰਲ ਸਕੱਤਰ ਉਮੇਸ਼ ਸ਼ਰਮਾ, ਉਪ ਪ੍ਰਧਾਨ ਵਰਿੰਦਰ ਸ਼ਰਮਾ ਅਤੇ ਸਾਬਕਾ ਜ਼ਿਲ੍ਹਾ ਪ੍ਰਧਾਨ ਪਰਮਿੰਦਰ ਗੋਇਲ ਵੱਲੋਂ ਇਹ ਸੰਕਲਪ ਪੱਤਰ ਜਾਰੀ ਕੀਤਾ। ਪੱਤਰ ਵਿੱਚ ਨਗਰ ਨਿਗਮ ਨੂੰ ਪੂਰੀ ਤਰ੍ਹਾਂ ਭ੍ਰਿਸ਼ਟਾਚਾਰ ਮੁਕਤ ਬਣਾਉਣ, ਪਾਰਦਰਸ਼ੀ ਪ੍ਰਸ਼ਾਸਨ ਲਾਗੂ ਕਰਨ ਅਤੇ ਸ਼ਹਿਰ ਨੂੰ ਆਧੁਨਿਕ ਸੁਵਿਧਾਵਾਂ ਨਾਲ ਜੋੜਨ ਦੇ ਉਦੇਸ਼ ਨਾਲ ਕੁੱਲ 20 ਵੱਡੇ ਵਾਅਦੇ ਕੀਤੇ ਹਨ। ਸਿੰਗਲਾ ਨੇ ਕਿਹਾ ਕਿ ਭਾਜਪਾ ਦਾ ਉਦੇਸ਼ ਸਿਰਫ਼ ਚੋਣ ਜਿੱਤਣਾ ਨਹੀਂ, ਸਗੋਂ ਬਠਿੰਡਾ ਨੂੰ ਇਕ ਸਾਫ਼-ਸੁਥਰਾ, ਸੁਰੱਖਿਅਤ, ਆਧੁਨਿਕ ਅਤੇ ਸੁਵਿਧਾ ਸੰਪੰਨ ਸ਼ਹਿਰ ਬਣਾਉਣਾ ਹੈ। ਉਨ੍ਹਾਂ ਕਿਹਾ ਕਿ ਨਾਗਰਿਕਾਂ ਅਤੇ ਸਰਕਾਰ ਵਿਚਕਾਰ ਦੀ ਦੂਰੀ ਘਟਾਉਣ ਲਈ ਡਿਜ਼ੀਟਲ ਇੰਡੀਆ ਪਹਿਲਕਦਮੀ ਤਹਿਤ “ਕਮਲ ਸੁਵਿਧਾ ਕੇਂਦਰ” ਸਥਾਪਿਤ ਕੀਤੇ ਜਾਣਗੇ। ਹਰ ਪੰਜ ਵਾਰਡਾਂ ’ਤੇ ਇਕ ਕੇਂਦਰ ਖੋਲ੍ਹਿਆ ਜਾਵੇਗਾ, ਜਿੱਥੇ ਲੋਕਾਂ ਨੂੰ ਸਰਕਾਰੀ ਸੇਵਾਵਾਂ ਅਤੇ ਸ਼ਿਕਾਇਤ ਨਿਵਾਰਣ ਦੀ ਸਹੂਲਤ ਮਿਲੇਗੀ। ਸਫਾਈ ਕਰਮਚਾਰੀਆਂ ਦੇ ਬਕਾਇਆ ਅਤੇ ਤਨਖਾਹਾਂ ਦਾ 100 ਫ਼ੀਸਦੀ ਸਮੇਂ ਸਿਰ ਭੁਗਤਾਨ ਯਕੀਨੀ ਬਣਾਇਆ ਜਾਵੇਗਾ ਅਤੇ ਤਨਖਾਹ ਵਿੱਚ ਦੇਰੀ ਪ੍ਰਤੀ ਜ਼ੀਰੋ ਟਾਲਰੈਂਸ ਨੀਤੀ ਅਪਣਾਈ ਜਾਵੇਗੀ। ਸਫਾਈ ਕਰਮਚਾਰੀਆਂ ਦੀ ਸੁਰੱਖਿਆ ਲਈ ਉਨ੍ਹਾਂ ਨੂੰ ਹੈਵੀ ਡਿਊਟੀ ਦਸਤਾਨੇ, ਬਾਡੀ ਸੂਟ, ਐਨ-95 ਮਾਸਕ, ਸੇਫਟੀ ਐਨਕਾਂ ਅਤੇ ਪੀਪੀਈ ਕਿੱਟਾਂ ਮੁਹੱਈਆ ਕਰਵਾਈਆਂ ਜਾਣਗੀਆਂ।

ਕੇਂਦਰ ਸਰਕਾਰ ਦੀ “ਨਮਸਤੇ ਯੋਜਨਾ” ਤਹਿਤ ਸਾਰੇ ਸਫਾਈ ਕਰਮਚਾਰੀਆਂ ਨੂੰ ਅਧਿਕਾਰਤ ਜੌਬ ਕਾਰਡ ਜਾਰੀ ਕਰਨ ਅਤੇ ਅਸਥਾਈ ਕਰਮਚਾਰੀਆਂ ਨੂੰ ਪੱਕਾ ਕਰਨ ਦਾ ਵੀ ਭਰੋਸਾ ਦਿੱਤਾ ਗਿਆ। ਸੰਕਲਪ ਪੱਤਰ ਵਿੱਚ ਸ਼ਹਿਰ ਦੀ ਪਾਣੀ ਸਪਲਾਈ ਅਤੇ ਸਫਾਈ ਪ੍ਰਣਾਲੀ ਨੂੰ ਮਜ਼ਬੂਤ ਕਰਨ ਲਈ ਅਮਰੁਤ 2.0 ਯੋਜਨਾ ਤਹਿਤ ਪੁਰਾਣੀਆਂ ਵਾਟਰ ਪਾਈਪਲਾਈਨਾਂ ਦੇ ਨਵੀਨੀਕਰਨ, ਨਹਿਰੀ ਪਾਣੀ ਦੀ ਸਹੀ ਚੈਨਲਾਈਜ਼ੇਸ਼ਨ ਅਤੇ ਜਨਤਕ ਸਥਾਨਾਂ ’ਤੇ ਸੋਲਰ ਆਧਾਰਿਤ ਵਾਟਰ ਏਟੀਐਮ ਲਗਾਉਣ ਦੀ ਗੱਲ ਵੀ ਕੀਤੀ ਗਈ ਹੈ। ਭਾਜਪਾ ਨੇ ਡੰਪਿੰਗ ਯਾਰਡਾਂ ਨੇੜੇ “ਸ਼੍ਰਮ ਵਿਸ਼ਰਾਮ ਕੇਂਦਰ” ਬਣਾਉਣ ਦਾ ਐਲਾਨ ਵੀ ਕੀਤਾ ਹੈ, ਜਿੱਥੇ ਸਫਾਈ ਕਰਮਚਾਰੀਆਂ ਲਈ ਪੀਣ ਵਾਲੇ ਪਾਣੀ, ਪੱਖਿਆਂ ਤੇ ਆਰਾਮ ਦੀਆਂ ਸੁਵਿਧਾਵਾਂ ਉਪਲਬਧ ਹੋਣਗੀਆਂ। ਸਵੱਛ ਭਾਰਤ ਮਿਸ਼ਨ ਅਤੇ ਅਮਰੁਤ ਫੰਡਾਂ ਦੇ ਤਹਿਤ ਵਿਗਿਆਨਕ ਢੰਗ ਨਾਲ ਕੂੜਾ ਪ੍ਰਬੰਧਨ ਪ੍ਰਣਾਲੀ ਵਿਕਸਿਤ ਕਰਕੇ ਸ਼ਹਿਰ ਨੂੰ ਕੂੜਾ-ਮੁਕਤ ਬਣਾਉਣ ਦਾ ਦਾਅਵਾ ਵੀ ਕੀਤਾ ਗਿਆ। ਪ੍ਰਮੁੱਖ ਸਥਾਨਾਂ ’ਤੇ ਅਤਿ-ਆਧੁਨਿਕ “ਪਿੰਕ ਟਾਇਲਟ, “ਗਿਆਨ ਅਤੇ ਉਦਮ ਕੇਂਦਰ” ਸਥਾਪਿਤ ਕਰਨ ਦੀ ਗੱਲ ਕਹੀ ਹੈ, ਜਿੱਥੇ ਪੀਪੀਐਸਸੀ, ਐਸਐਸਸੀ, ਨੀਟ ਅਤੇ ਜੇਈਈ ਵਰਗੀਆਂ ਪ੍ਰਤੀਯੋਗੀ ਪ੍ਰੀਖਿਆਵਾਂ ਦੀ ਤਿਆਰੀ ਲਈ ਮੁਫ਼ਤ ਵਾਈ-ਫਾਈ ਅਤੇ ਅਧਿਐਨ ਸਮੱਗਰੀ ਉਪਲਬਧ ਕਰਵਾਈ ਜਾਵੇਗੀ। ਪੀਐੱਮ ਸਵੈਨਿਧੀ ਯੋਜਨਾ ਤਹਿਤ ਐੱਲਈਡੀ ਲਾਈਟਾਂ ਅਤੇ ਕੂੜਾ ਨਿਪਟਾਰਾ ਪ੍ਰਣਾਲੀ ਨਾਲ ਲੈਸ ਸਮਰਪਿਤ ਵੈਂਡਿੰਗ ਜੋਨ ਬਣਾਉਣ ਦੀ ਵੀ ਯੋਜਨਾ ਹੈ। ਹਰ ਵਾਰਡ ਵਿੱਚ ਸੀਸੀਟੀਵੀ ਕੈਮਰੇ ਲਗਾਏ ਜਾਣਗੇ। ਪ੍ਰਮੁੱਖ ਸੜਕਾਂ, ਬਾਜ਼ਾਰਾਂ ਤੇ ਜਨਤਕ ਸਥਾਨਾਂ ’ਤੇ ਵਿਸ਼ੇਸ਼ ਧਿਆਨ ਦਿੱਤਾ ਜਾਵੇਗਾ। ਖੇਡਾਂ ਨੂੰ ਉਤਸ਼ਾਹਿਤ ਕਰਨ ਲਈ “ਖੇਲੋ ਇੰਡੀਆ” ਯੋਜਨਾ ਤਹਿਤ ਕਬੱਡੀ ਸਟੇਡੀਅਮ ਅਤੇ ਮਿੱਟੀ ਦੇ ਅਖਾੜੇ ਬਣਾਉਣ ਦੀ ਗੱਲ ਕਹੀ ਗਈ ਹੈ। ਇਸ ਦੇ ਨਾਲ ਹਰ ਸਾਲ “ਨਗਰ ਨਿਗਮ ਕਬੱਡੀ ਪ੍ਰੀਮੀਅਰ ਲੀਗ” ਦਾ ਵੀ ਐਲਾਨ ਕੀਤਾ ਗਿਆ। ਸਰੂਪ ਸਿੰਗਲਾ ਨੇ ਕਿਹਾ ਕਿ ਲਾਈਨ ਪਾਰ ਖੇਤਰ ਵਿੱਚ ਬੱਚਿਆਂ ਅਤੇ ਖਿਡਾਰੀਆਂ ਲਈ ਸਟੇਡੀਅਮ ਬਣਾਇਆ ਜਾਵੇਗਾ ਤੇ ਸਮਾਜਿਕ ਤੇ ਸੱਭਿਆਚਾਰਕ ਗਤੀਵਿਧੀਆਂ ਲਈ ਸਮਰਪਿਤ ਕਮਿਊਨਿਟੀ ਸੈਂਟਰ ਵੀ ਵਿਕਸਿਤ ਕੀਤਾ ਜਾਵੇਗਾ। ਆਧੁਨਿਕ ਕਾਊਂਸਲਿੰਗ ਅਤੇ ਮੈਂਟਰਿੰਗ ਕੇਂਦਰ ਸਥਾਪਿਤ ਕਰਕੇ ਨਸ਼ੇ ਦੀ ਸਮੱਸਿਆ ਨਾਲ ਨਜਿੱਠਣ ਦੀ ਯੋਜਨਾ ਵੀ ਸੰਕਲਪ ਪੱਤਰ ਵਿੱਚ ਸ਼ਾਮਲ ਕੀਤੀ ਹੈ। ਦਿਵਿਆਂਗਜਨ ਲਈ ਇੰਟਰਲਾਕਿੰਗ ਕੰਕਰੀਟ ਬਲਾਕ, ਟੈਕਟਾਈਲ ਪੇਵਿੰਗ, ਵੀਲਚੇਅਰ ਅਨੁਕੂਲ ਢਲਾਣਾਂ ਅਤੇ ਬਿਹਤਰ ਸਟ੍ਰੀਟ ਲਾਈਟਿੰਗ ਨਾਲ ਸੁਵਿਧਾਜਨਕ ਫੁੱਟਪਾਥ ਅਤੇ ਵਾਕਵੇਅ ਬਣਾਏ ਜਾਣਗੇ।

ਭਾਜਪਾ ਨੇ ਸ਼ਹਿਰ ਵਿੱਚ ਇਲੈਕਟ੍ਰਿਕ ਏਅਰ ਕੰਡੀਸ਼ਨਡ ਮਿੰਨੀ ਬੱਸਾਂ ਚਲਾਉਣ ਅਤੇ ਨਗਰ ਨਿਗਮ ਪਾਰਕਿੰਗ ਸਥਾਨਾਂ ’ਤੇ ਈਵੀ ਚਾਰਜਿੰਗ ਸਟੇਸ਼ਨ ਸਥਾਪਿਤ ਕਰਨ ਦਾ ਵੀ ਵਾਅਦਾ ਕੀਤਾ ਹੈ, ਤਾਂ ਜੋ ਪ੍ਰਦੂਸ਼ਣ ਅਤੇ ਟ੍ਰੈਫਿਕ ਦੋਵਾਂ ਨੂੰ ਘਟਾਇਆ ਜਾ ਸਕੇ। ਦਿੱਲੀ ਹਾਟ ਦੀ ਤਰਜ਼ ’ਤੇ “ਪਿੰਡ ਵਿਰਾਸਤ ਹਾਟ” ਬਣਾਉਣ ਦੀ ਯੋਜਨਾ ਹੈ। ਏਆਰ/ਵੀਆਰ ਤਕਨੀਕ ਅਤੇ ਲੇਜ਼ਰ ਸ਼ੋਅ ਨਾਲ ਲੈਸ ਵਿਸ਼ਵ ਪੱਧਰੀ ਮਿਊਜ਼ੀਅਮ ਬਣਾਉਣ, ਮਹਾਰਾਜਾ ਰਣਜੀਤ ਸਿੰਘ, ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਅਤੇ ਸ਼ਹੀਦ-ਏ-ਆਜ਼ਮ ਭਗਤ ਸਿੰਘ ਦੀ ਵਿਰਾਸਤ ਨੂੰ ਪ੍ਰਦਰਸ਼ਿਤ ਕੀਤਾ ਜਾਵੇਗਾ। ਨਿਗਮ ਦੇ ਖਾਲੀ ਅਹੁਦਿਆਂ ਨੂੰ ਭਰਨ ਲਈ ਤੇਜ਼ ਭਰਤੀ ਮੁਹਿੰਮ ਚਲਾਉਣ ਕੀਤੀ ਜਾਵੇਗੀ। ਭਾਜਪਾ ਨੇ ਕਾਂਗਰਸ ਅਤੇ ਆਮ ਆਦਮੀ ਪਾਰਟੀ ਦੇ ਪਿਛਲੇ ਸ਼ਾਸਨਕਾਲ ਦੌਰਾਨ ਹੋਈਆਂ ਕਥਿਤ ਬੇਨਿਯਮੀਆਂ ਦੀ ਜਾਂਚ ਲਈ ਸੁਤੰਤਰ ਆਡਿਟ ਕਮੇਟੀ ਬਣਾਉਣ ਤੇ ਛੇ ਮਹੀਨਿਆਂ ਅੰਦਰ ਜਨਤਕ ਵਾਈਟ ਪੇਪਰ ਜਾਰੀ ਕਰਨ ਦਾ ਐਲਾਨ ਕੀਤਾ ਹੈ।