ਮਜ਼ਦੂਰ ਦਿਵਸ ਦੇ ਸ਼ਹੀਦਾਂ ਨੂੰ ਸਮਰਪਿਤ ਕਰਵਾਇਆ ਕਵੀ ਦਰਬਾਰ

-ਕਵੀ ਦਰਬਾਰ ਦੌਰਾਨ ਹਰਭਜਨ ਸੇਲਬਰਾਹ ਦੀ ਪੁਸਤਕ ਕੀਤੀ ਰਿਲੀਜ਼

ਗੁਰਤੇਜ ਸਿੰਘ ਸਿੱਧੂ, ਪੰਜਾਬੀ ਜਾਗਰਣ, ਬਠਿੰਡਾ

ਸਾਹਿਤ ਸੱਭਿਆਚਾਰ ਮੰਚ ਬਠਿੰਡਾ ਵੱਲੋਂ ਸਾਹਿਤ ਸਭਾ ਰਜਿ: ਬਠਿੰਡਾ ਤੇ ਸਾਹਿਤ ਸਭਾ ਰਾਮਪੁਰਾ ਫੂਲ ਦੇ ਸਹਿਯੋਗ ਨਾਲ ਸਥਾਨਕ ਟੀਚਰਜ਼ ਹੋਮ ਵਿਖੇ ਅੰਤਰਰਾਸ਼ਟਰੀ ਮਜ਼ਦੂਰ ਦਿਵਸ ਨੂੰ ਸਮਰਪਿਤ ਇੱਕ ਪ੍ਰਭਾਵਸ਼ਾਨੀ ਸਮਾਗਮ ਤੇ ਕਵੀ ਦਰਬਾਰ ਕਰਵਾਇਆ ਗਿਆ। ਪ੍ਰਧਾਨਗੀ ਮੰਡਲ ਵਿੱਚ ਮੰਚ ਦੇ ਪ੍ਰਧਾਨ ਸ੍ਰੀ ਅਤਰਜੀਤ ਕਹਾਣੀਕਾਰ, ਜਸਪਾਲ ਮਾਨਖੇੜਾ ਨਾਵਲਕਾਰ, ਕਵੀ ਕੁਲਵਿੰਦਰ ਵਿਰਕ, ਟੀਚਰਜ਼ ਹੋਮ ਟਰੱਸਟ ਦੇ ਜਨਰਲ ਸਕੱਤਰ ਲਛਮਣ ਮਲੂਕਾ ਅਤੇ ਮਹੀਂਪਾਲ ਸ਼ਾਮਲ ਸਨ। ਸਮਾਗਮ ਦੀ ਸੁਰੂਆਤ ਕਰਦਿਆਂ ਅਤਰਜੀਤ ਨੇ ਲੋਕਾਂ ਲਈ ਦਿੱਤੀਆਂ ਸ਼ਹੀਦਾਂ ਦੀਆਂ ਕੁਰਬਾਨੀਆਂ ਨੂੰ ਯਾਦ ਕਰਦਿਆਂ ਕਿਹਾ ਕਿ ਜਮਹੂਰੀਅਤ ਜਿਹਨਾਂ ਦੇ ਹੱਥਾਂ ਵਿੱਚ ਹੁੰਦੀ ਹੈ ਉਹਨਾਂ ਲਈ ਹੀ ਹੁੰਦੀ ਹੈ, ਦੂਜਿਆਂ ਲਈ ਇਹ ਡਿਕਟੇਟਰਸ਼ਿਪ ਹੁੰਦੀ ਹੈ। ਅਜਿਹਾ ਹੀ ਭਾਰਤ ’ਚ ਹੋ ਰਿਹਾ ਹੈ। ਰਣਬੀਰ ਰਾਣਾ ਗ਼ਜ਼ਲਗੋ ਨੇ ਕਿਹਾ ਕਿ ਦੇਸ਼ ਦੇ ਹਾਲਾਤ ਬਦਤਰ ਹੋ ਚੁੱਕੇ ਹਨ ਤੇ ਲਿਖਣ-ਬੋਲਣ ’ਤੇ ਪਾਬੰਦੀਆਂ ਲਗਾਈਆਂ ਜਾ ਰਹੀਆਂ ਹਨ। ਇਸ ਲਈ ਲੋਕਾਂ ਵੱਲੋਂ ਅਮਲੀ ਰੂਪ ’ਚ ਸੰਘਰਸ਼ ਕਰਨ ਦੀ ਲੋੜ ਹੈ।

ਇਸ ਮੌਕੇ ਮੈਗਜ਼ੀਨ ਪਰਵਾਜ਼ ਦਾ ਬੱਤੀਵਾਂ ਨਵਾਂ ਅੰਕ ਰਿਲੀਜ਼ ਕੀਤਾ ਗਿਆ ਅਤੇ ਹਰਭਜਨ ਸਿੰਘ ਦੀ ਇਤਿਹਾਸਕ ਪੁਸਤਕ ‘ਜਿਲ੍ਹਾ ਬਠਿੰਡਾ ਦੇ ਪਿੰਡਾਂ ਦਾ ਇਤਿਹਾਸ’ ਅਤੇ ਹਰਮੀਤ ਕੋਟਗੁਰੂ ਦੇ ਇਨਕਲਾਬੀ ਗੀਤ ‘ਪਿੰਡਾਂ ਵਿੱਚੋਂ’ ਦਾ ਪੋਸਟਰ ਰਿਲੀਜ਼ ਕੀਤਾ ਗਿਆ। ਇਸਤੋਂ ਬਾਅਦ ਸਮਾਗਮ ਨੂੰ ਸੰਬੋਧਨ ਕਰਦਆਂ ਮਹੀਂਪਾਲ ਨੇ ਕਿਹਾ ਕਿ ਅੱਜ ਦੇ ਹਾਲਾਤ ਅਜਿਹੇ ਹਨ ਕਿ ਗਾਜ਼ਾ ਦੀਆਂ ਬੱਚੀਆਂ ਖੇਡਦੀਆਂ ਹੋਈਆਂ ਖਿਡੌਣਾ ਗੁੱਡੀ ਦੀ ਲਾਸ਼ ਲੈ ਕੇ ਸ਼ਮਸ਼ਾਨਘਾਟ ਵੱਲ ਜਾ ਰਹੀਆਂ ਹਨ। ਇਹ ਇੱਕ ਵੱਡਾ ਸੁਆਲ ਹੈ ਕਿ ਬੱਚਿਆਂ ਦੀ ਮਾਨਸਿਕਤਾ ਹਾਲਾਤ ਨੇ ਕਿਹੋ ਜਿਹੀ ਬਣਾ ਦਿੱਤੀ ਕਿ ਬੱਚੀਆਂ ਮੌਤ-ਮੌਤ ਖੇਡ ਰਹੀਆਂ ਹਨ। ਅਜਿਹੇ ਪ੍ਰਭਾਵਾਂ ਨੂੰ ਰੋਕਣ ਲਈ ਸ਼ਹੀਦਾਂ ਦਾ ਪਰਚਮ ਮੋਢਿਆਂ ਤੇ ਚੁੱਕਣ ਦਾ ਸਮਾਂ ਹੈ। ਹਰਭਜਨ ਸਿੰਘ ਸੇਲਵਰਾਹ ਨੇ ਆਪਣੀ ਪੁਸਤਕ ਬਾਰੇ ਗੱਲ ਕਰਦਿਆਂ ਕਿਹਾ ਕਿ ਇਹ ਉਸਦੇ 12 ਸਾਲਾਂ ਦੀ ਮਿਹਨਤ ਦਾ ਨਤੀਜਾ ਹੈ। ਲਛਮਣ ਸਿੰਘ ਮਲੂਕਾ ਨੇ ਬੜਾ ਪ੍ਰਭਾਵਸ਼ਾਲੀ ਭਾਸ਼ਣ ਕਰਦਿਆਂ ਕਿਹਾ ਕਿ ਦੇਸ਼ ਦੀ ਆਜ਼ਾਦੀ ਦੀ ਲੜਾਈ ਦੇ ਦੌਰ ’ਚ ਪ੍ਰਗਤੀਵਾਦੀ ਤੇ ਜੂਝਾਰਵਾਦੀ ਕਵਿਤਾ ਦੀ ਗੱਲ ਹੁੰਦੀ ਸੀ, ਪਰ ਅੱਜ ਦਾ ਸਾਹਿਤ ਮਜਦੂਰਾਂ ਦੀਆਂ ਕੁਰਬਾਨੀਆਂ ਦੇ ਹਾਣ ਦਾ ਨਹੀਂ ਹੈ। ਜਿਸਤੋਂ ਇਹ ਫਿਕਰ ਪੈਦਾ ਹੁੰਦਾ ਹੈ ਕਿ ਭਵਿੱਖ ਕਿਵੇਂ ਸੁਰੱਖਿਅਤ ਰਹਿ ਸਕੇਗਾ। ਸੰਤ ਰਾਮ ਉਦਾਸੀ, ਪਾਸ਼, ਬਿਸਮਿਲ ਫਰੀਦਕੋਟੀ ਵਰਗੇ ਕਵੀਆਂ ਸ਼ਾਇਰਾਂ ਵਰਗਾ ਸਾਹਿਤ ਰਚਿਆ ਜਾਣਾ ਚਾਹੀਦਾ ਹੈ, ਜੋ ਪਾਠਕ ਦੇ ਖੂਨ ਨੂੰ ਖੌਲ੍ਹਣ ਲਾ ਦੇਵੇ। ਉਹਨਾਂ ਕਲਮਾਂ ਤਿੱਖੀਆਂ ਕਰਕੇ ਲਿਖਤਾਂ ਵਿੱਚ ਹੋਰ ਜਜ਼ਬਾ ਭਰਨ ਦਾ ਸੱਦਾ ਦਿੱਤਾ। ਨਾਵਲਕਾਰ ਜਸਪਾਲ ਮਾਨਖੇੜਾ ਨੇ ਭਾਸ਼ਣ ’ਚ ਕਿਹਾ ਕਿ ਅੱਜ ਭਾਰਤ ਵਿੱਚ ਫਿਰਕਾਪ੍ਰਸ਼ਤੀ ਦਾ ਦੈਤ ਜਬਾੜ੍ਹੇ ਖੋਲੀ ਬੈਠਾ ਹੈ, ਲੋਕ ਵਿਰੋਧੀ ਬਿਲ ਲਿਆਂਦੇ ਜਾ ਰਹੇ ਹਨ, ਇਸ ਲਈ ਸ਼ਹੀਦਾਂ ਤੋਂ ਪ੍ਰੇਰਨਾ ਲੈ ਕੇ ਸੰਘਰਸ ਵਿੱਢਣੇ ਚਾਹੀਦੇ ਹਨ। ਫਲਸਤੀਨ ਦਾ ਦਰਦ ਭਾਰਤ ’ਚ ਵੀ ਮਹਿਸੂਸ ਕਰਨਾ ਚਾਹੀਦਾ ਹੈ। ਕੇਂਦਰ ਸਰਕਾਰ ਮਾਓਵਾਦ ਖਤਮ ਕਰਨ ਦੇ ਨਾਂ ਹੇਠ ਖੱਬੀ ਸੋਚ ’ਤੇ ਹਮਲੇ ਕਰਨ ਦੀ ਵਿਉਂਤਬੰਦੀ ਕਰ ਰਹੀ ਹੈ, ਜੋ ਦੇਸ਼ ਦੇ ਲੋਕਾਂ ਦੇ ਹਿੱਤ ਵਿਚ ਨਹੀਂ ਹੋਵੇਗੀ। ਇਸ ਮੌਕੇ ਕਵੀ ਦਰਬਾਰ ’ਚ ਕੁਲਵਿੰਦਰ ਵਿਰਕ, ਡਾ. ਅੰਮ੍ਰਿਤਪਾਲ ਸਿੰਘ, ਬਲਵਿੰਦਰ ਸਿੰਘ ਭੁੱਲਰ, ਕਮਲ ਬਠਿੰਡਾ, ਸੁਖਦਰਸ਼ਨ ਗਰਗ, ਤੇਜਾ ਸਿੰਘ ਪ੍ਰੇਮੀ, ਕੇਸਵ ਦੱਤ, ਸੁਖਵਿੰਦਰ ਜੀਦਾ, ਦਮਜੀਤ ਦਰਸ਼ਨ, ਦਿਲਬਾਗ ਸਿੰਘ, ਸੁਰਿੰਦਰਪਾਲ ਝੱਖੜਵਾਲਾ, ਜਸਕਰਨ ਕੋਟਗੁਰੂ, ਹਰਮੀਤ, ਬਲਕਰਨ ਕੋਟਸ਼ਮੀਰ, ਰਮੇਸ ਗਰਗ, ਗੁਰਤੇਜ ਘੁੱਦਾ, ਵਰਿੰਦਰ ਮਾਨ, ਅਵਤਾਰ ਬਾਹੀਆਂ ਨੇ ਕਵਿਤਾਵਾਂ, ਗ਼ਜ਼ਲਾਂ ਪੇਸ਼ ਕੀਤੀਆਂ। ਅੰਤ ਵਿੱਚ ਡਾ: ਅੰਮ੍ਰਿਤਪਾਲ ਸਿੰਘ ਨੇ ਸਭਨਾ ਦਾ ਧੰਨਵਾਦ ਕੀਤਾ। ਸਟੇਜ ਸਕੱਤਰ ਦੀ ਭੂਮਿਕਾ ਰਣਬੀਰ ਰਾਣਾ ਤੇ ਸੁਖਵਿੰਦਰ ਜੀਦਾ ਨੇ ਨਿਭਾਈ।