ਕੈਮਿਸਟ 20 ਮਈ ਨੂੰ ਦੁਕਾਨਾਂ ਰੱਖਣਗੇ ਬੰਦ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਮਾਨਸਾ : ਪੰਜਾਬ ਕੈਮਿਸਟ ਐਸੋਸੀਏਸ਼ਨ ਵੱਲੋਂ ਸੁਰਿੰਦਰ ਦੁੱਗਲ (ਪ੍ਰਧਾਨ ਪੰਜਾਬ ਕੈਮਿਸਟ ਐਸੋਸ਼ੀਏਸ਼ਨ) ਦੀ ਅਗਵਾਈ ਵਿੱਚ ਲੁਧਿਆਣਾ ’ਚ ਕੀਤੀ ਮੀਟਿੰਗ ਵਿੱਚ 20 ਮਈ 2026 ਨੂੰ ਬੰਦ ਰੱਖਣ ਅਤੇ ਕੈਮਿਸਟਾਂ ਦੇ ਹੋਰ ਮਸਲੇ ਵਿਚਾਰੇ ਗਏ। ਇਸ ਮੀਟਿੰਗ ਵਿਚ ਜੀਐਸ ਚਾਵਲਾ (ਜਨਰਲ ਸਕੱਤਰ ਪੀਸੀਏ), ਅਮਨਦੀਪ ਸਿੰਘ (ਖਜ਼ਾਨਚੀ ਪੀਸੀਏ) ਅਤੇ ਵੱਖ ਵੱਖ ਜ਼ਿਲ੍ਹਿਆਂ ਦੇ ਜ਼ਿਲ੍ਹਾ ਪ੍ਰਧਾਨ ਅਤੇ ਜਨਰਲ ਸਕੱਤਰ ਵੀ ਹਾਜ਼ਰ ਹੋਏ। ਸੁਰਿੰਦਰ ਦੁੱਗਲ ਨੇ ਮੀਟਿੰਗ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਪੰਜਾਬ ਕੈਮਿਸਟ ਐਸੋਸੀਏਸ਼ਨ ਹਰ ਤਰ੍ਹਾਂ ਨਾਲ ਇਸ ਬੰਦ ਨੂੰ ਪੁਰਜ਼ੋਰ ਸਫ਼ਲ ਕਰੇਗੀ ਅਤੇ ਕੇਂਦਰ ਸਰਕਾਰ ਨੇ ਜੋ ਨਵਾਂ ਪੋਰਟਲ ਬਣਾਇਆ ਹੈ। ਪੰਜਾਬ ਕੈਮਿਸਟ ਐਸੋਸ਼ੀਏਸ਼ਨ ਉਸ ਪੋਰਟਲ ਦੀ ਦੁਆਰਾ ਸਮੀਖਿਆ ਕਰਨ ਦੀ ਮੰਗ ਕਰਦੀ ਹੈ ਤਾਂ ਜੋ ਕਿਸੇ ਵੀ ਕੈਮਿਸਟ ਨੂੰ ਕੋਈ ਵੀ ਪ੍ਰੇਸ਼ਾਨੀ ਨਾ ਆਵੇ। 2021 ਦੀ ਡਰੱਗ ਪਾਲਿਸੀ ਵਿੱਚ ਸੋਧ ਕੀਤੀ ਜਾਵੇ। ਸੁਰਿੰਦਰ ਦੁੱਗਲ ਨੂੰ ਭਰੋਸਾ ਦਿਵਾਇਆ ਗਿਆ ਕਿ 20 ਮਈ ਨੂੰ ਮਾਨਸਾ ਜ਼ਿਲ੍ਹਾ ਵੀ ਪੂਰਨ ਤੌਰ ਤੇ ਬੰਦ ਰਹੇਗਾ। ਇਸ ਮੀਟਿੰਗ ਵਿਚ ਮਾਨਸਾ ਜ਼ਿਲ੍ਹੇ ਤੋਂ ਅਜੈ ਕੁਮਾਰ ( ਪ੍ਰਧਾਨ ਜ਼ਿਲ੍ਹਾ ਮਾਨਸਾ ਕੈਮਿਸਟ ਐਸੋਸ਼ੀਏਸ਼ਨ), ਸੰਜੀਵ ਗਰਗ( ਜਨਰਲ ਸਕੱਤਰ ਮਾਨਸਾ ਜਿਲ੍ਹਾ ਕੈਮਿਸਟ ਐਸੋਸ਼ੀਏਸ਼ਨ) ਅਤੇ ਭੁਪਿੰਦਰ ਜੋਗਾ ( ਖਜ਼ਾਨਚੀ ਜ਼ਿਲ੍ਹਾ ਮਾਨਸਾ ਕੈਮਿਸਟ ਐਸੋਸੀਏਸ਼ਨ) ਹਾਜ਼ਰ ਹੋਏ।