“ਰੋਬੋਟਿਕਸ ਤੇ ਸਟੇਮ” ਵਿਸ਼ੇ ’ਤੇ ਕਰਵਾਈ ਵਰਕਸ਼ਾਪ

ਸੀਨੀਅਰ ਰਿਪੋਰਟਰ, ਪੰਜਾਬੀ ਜਾਗਰਣ, ਬਠਿੰਡਾ : ਪੰਜਾਬ ਕੇਂਦਰੀ ਯੂਨੀਵਰਸਿਟੀ (ਸੀਯੂ ਪੰਜਾਬ) ਦੇ ਈ-ਯੂਵਾ ਕੇਂਦਰ ਵੱਲੋਂ ਮਾਨਯੋਗ ਵਾਈਸ ਚਾਂਸਲਰ ਪ੍ਰੋ. ਰਾਘਵੇਂਦਰ ਪ੍ਰਸਾਦ ਤਿਵਾਰੀ ਦੇ ਸਰਪਰਸਤੀ ਹੇਠ ਆਈਆਈਸੀ ਦੇ ਸਹਿਯੋਗ ਨਾਲ “ਰੋਬੋਟਿਕਸ ਅਤੇ ਸਟੇਮ” ਵਿਸ਼ੇ ’ਤੇ ਇਕ ਦਿਨ ਦੀ ਵਰਕਸ਼ਾਪ ਦਾ ਆਯੋਜਨ ਕੀਤਾ ਗਿਆ। ਇਸ ਵਰਕਸ਼ਾਪ ਦਾ ਉਦੇਸ਼ ਸਕੂਲ ਅਤੇ ਕਾਲਜ ਵਿਦਿਆਰਥੀਆਂ ਵਿੱਚ ਵਿਗਿਆਨਕ ਸੋਚ, ਨਵੀਨਤਾ ਅਤੇ ਸਮੱਸਿਆ ਹੱਲ ਕਰਨ ਦੀ ਯੋਗਤਾ ਨੂੰ ਉਤਸ਼ਾਹਿਤ ਕਰਨਾ ਸੀ। ਵਰਕਸ਼ਾਪ ਦੌਰਾਨ ਵਿਦਿਆਰਥੀਆਂ ਨੂੰ ਅਨੁਭਵਾਤਮਕ ਸਿੱਖਿਆ ਰਾਹੀਂ ਰੋਬੋਟਿਕਸ ਦੀ ਪ੍ਰਯੋਗਾਤਮਕ ਜਾਣਕਾਰੀ ਦਿੱਤੀ। ਭਾਗੀਦਾਰਾਂ ਨੇ ਮੋਬਾਈਲ ਨਾਲ ਨਿਯੰਤਰਿਤ ਰੋਬੋਟ ਤਿਆਰ ਕਰਦੇ ਹੋਏ ਮਾਈਕਰੋਕੰਟਰੋਲਰ, ਵੱਖ-ਵੱਖ ਸੈਂਸਰਾਂ, ਮੋਟਰਾਂ ਅਤੇ ਉਨ੍ਹਾਂ ਦੇ ਵਿਵਹਾਰਿਕ ਉਪਯੋਗਾਂ ਬਾਰੇ ਸਿੱਖਿਆ ਪ੍ਰਾਪਤ ਕੀਤੀ। ਤਕਨੀਕੀ ਸੈਸ਼ਨ ਕੰਪਿਊਟਰ ਸਾਇੰਸ ਅਤੇ ਟੈਕਨੋਲੋਜੀ ਵਿਭਾਗ ਦੀ ਮੁਖੀ ਪ੍ਰੋ. ਅਮਨਦੀਪ ਕੌਰ ਵੱਲੋਂ ਲਿਆ ਗਿਆ, ਜਦਕਿ ਡੈਮੋਨਸਟ੍ਰੇਸ਼ਨ ਈ-ਯੂਵਾ ਕੇਂਦਰ ਦੇ ਪ੍ਰੋਜੈਕਟ ਅਸਿਸਟੈਂਟ ਇੰਜੀਨੀਅਰ ਵੀਨੂ ਜਿੰਦਲ ਵੱਲੋਂ ਦਿੱਤੀ ਗਈ। ਡੈਮੋਨਸਟ੍ਰੇਸ਼ਨਾਂ ਵਿੱਚ ਆਈਓਟੀ ਆਧਾਰਿਤ ਐਪਲੀਕੇਸ਼ਨ, ਅਲਟਰਾ ਸੌਨਿਕ ਸੈਂਸਰ ਰਾਹੀਂ ਦੂਰੀ ਮਾਪਣ ਪ੍ਰਣਾਲੀ, ਵੈੱਬ ਸਰਵਰ ਆਧਾਰਿਤ ਸਕ੍ਰੋਲਿੰਗ ਸੁਨੇਹਾ ਡਿਸਪਲੇ ਸਿਸਟਮ ਅਤੇ ਮੋਬਾਈਲ ਰਾਹੀਂ ਨਿਯੰਤਰਿਤ ਲਾਈਵ ਵੀਡੀਓ ਸਟ੍ਰੀਮਿੰਗ ਵਾਲਾ ਸਰਵੇਲੈਂਸ ਰੋਬੋਟ ਸ਼ਾਮਲ ਸਨ। ਇਸ ਵਰਕਸ਼ਾਪ ਲਈ 40 ਤੋਂ ਵੱਧ ਰਜਿਸਟ੍ਰੇਸ਼ਨ ਪ੍ਰਾਪਤ ਹੋਏ, ਜਿਨ੍ਹਾਂ ਵਿੱਚੋਂ 27 ਵਿਦਿਆਰਥੀਆਂ ਨੇ ਆਪਣੇ ਅਧਿਆਪਕਾਂ ਸਮੇਤ ਦਿੱਲੀ ਪਬਲਿਕ ਸਕੂਲ, ਬਠਿੰਡਾ, ਸੇਂਟ ਜੇਵਿਅਰਜ਼ ਸਕੂਲ ਬਠਿੰਡਾ ਅਤੇ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਝੁੰਬਾ ਤੋਂ ਹਿੱਸਾ ਲਿਆ। ਕਾਰਜਕ੍ਰਮ ਦੀ ਸ਼ੁਰੂਆਤ ਈ-ਯੂਵਾ ਕੇਂਦਰ ਦੀ ਪ੍ਰਿੰਸੀਪਲ ਇਨਵੈਸਟੀਗੇਟਰ ਪ੍ਰੋ. ਮੋਨੀਸ਼ਾ ਧੀਮਾਨ ਅਤੇ ਕੋ-ਪ੍ਰਿੰਸੀਪਲ ਇਨਵੈਸਟੀਗੇਟਰ ਪ੍ਰੋ. ਅਨਿਲ ਕੁਮਾਰ ਮੰਥਾ ਦੇ ਸਵਾਗਤੀ ਭਾਸ਼ਣ ਨਾਲ ਹੋਈ, ਜਿਨ੍ਹਾਂ ਨੇ ਕੇਂਦਰ ਦੀ ਗਤੀਵਿਧੀਆਂ ਬਾਰੇ ਜਾਣਕਾਰੀ ਦਿੱਤੀ। ਵਿਦਿਆਰਥੀਆਂ ਨੇ ਵਰਕਸ਼ਾਪ ਦੌਰਾਨ ਉਤਸ਼ਾਹ ਨਾਲ ਪ੍ਰਯੋਗਾਤਮਕ ਗਤੀਵਿਧੀਆਂ ਵਿਚ ਹਿੱਸਾ ਲਿਆ, ਵਿਸ਼ੇਸ਼ਗਿਆਨਾਂ ਨਾਲ ਸੰਵਾਦ ਕੀਤਾ ਅਤੇ ਰੋਬੋਟਿਕਸ ਤੇ ਸਟੇਮ ਤਕਨਾਲੋਜੀਆਂ ਦੇ ਨਵੇਂ ਉਪਯੋਗਾਂ ਬਾਰੇ ਜਾਣਕਾਰੀ ਹਾਸਲ ਕੀਤੀ। ਅੰਤ ਵਿੱਚ ਭਾਗੀਦਾਰਾਂ ਨੂੰ ਪ੍ਰਮਾਣ-ਪੱਤਰ ਵੰਡ ਕੇ ਕਾਰਜਕ੍ਰਮ ਦਾ ਸਮਾਪਨ ਕੀਤਾ ਗਿਆ।