ਪੁੱਤ ਨੂੰ ਵਿਦੇਸ਼ ਭੇਜਣ ਦੇ ਚੱਕਰ 'ਚ ASI ਨੇ ਗੁਆਏ 40 ਲੱਖ, ਵਿਦੇਸ਼ ਤੋਂ ਪਰਤੀ ਨੂੰਹ ਬਹਾਨੇ ਨਾਲ ਘਰੋਂ ਲੈ ਗਈ ਲੱਖਾਂ ਦੇ ਗਹਿਣੇ; ਕੇਸ ਦਰਜ

ਜਾਗਰਣ ਸੰਵਾਦਦਾਤਾ, ਜਾਗਰਣ, ਤਰਨਤਾਰਨ: ਆਈਲੈਟਸ ਕੀਤੇ ਬਿਨਾਂ ਪੁੱਤ ਨੂੰ ਵਿਦੇਸ਼ ਭੇਜਣ ਦੇ ਚੱਕਰ ਵਿੱਚ ਪੰਜਾਬ ਪੁਲਿਸ ਦੇ ਏ.ਐੱਸ.ਆਈ. ਮਨਜਿੰਦਰ ਸਿੰਘ ਨੇ 40 ਲੱਖ ਰੁਪਏ ਗੁਆ ਦਿੱਤੇ। ਪੁੱਤ ਦਾ ਬਕਾਇਦਾ ਕੰਟਰੈਕਟ ਮੈਰਿਜ (ਇਕਰਾਰਨਾਮੇ ਵਾਲਾ ਵਿਆਹ) ਵੀ ਕਰਵਾਇਆ। ਵਿਦੇਸ਼ ਤੋਂ ਪਰਤੀ ਨੂੰਹ ਬਹਾਨੇ ਨਾਲ ਲੱਖਾਂ ਦੇ ਗਹਿਣੇ ਵੀ ਉਡਾ ਕੇ ਲੈ ਗਈ। ਸੱਤ ਮਹੀਨਿਆਂ ਦੀ ਜਾਂਚ ਤੋਂ ਬਾਅਦ ਥਾਣਾ ਸਿਟੀ ਦੀ ਪੁਲਿਸ ਨੇ ਮੁਟਿਆਰ ਸੰਜਮਪ੍ਰੀਤ ਕੌਰ ਅਤੇ ਉਸ ਦੇ ਮਾਤਾ-ਪਿਤਾ ਦੇ ਖ਼ਿਲਾਫ਼ ਧੋਖਾਧੜੀ ਦਾ ਕੇਸ ਦਰਜ ਕਰ ਲਿਆ ਹੈ। ਪਿੰਡ ਜਮਾਲਪੁਰ ਦੇ ਰਹਿਣ ਵਾਲੇ ਮੁਲਜ਼ਮਾਂ ਦੀ ਗ੍ਰਿਫ਼ਤਾਰੀ ਲਈ ਛਾਪੇਮਾਰੀ ਜਾਰੀ ਹੈ।

ਪੁਲਿਸ ਲਾਈਨ ਕਲੋਨੀ ਦੇ ਕੁਆਰਟਰ ਨੰਬਰ 105 ਵਿੱਚ ਰਹਿੰਦੇ ਪੰਜਾਬ ਪੁਲਿਸ ਦੇ ਏ.ਐੱਸ.ਆਈ. ਮਨਜਿੰਦਰ ਸਿੰਘ ਅੱਜਕੱਲ੍ਹ ਟ੍ਰੈਫਿਕ ਵਿੰਗ ਵਿੱਚ ਤਾਇਨਾਤ ਹਨ। 10 ਜੁਲਾਈ ਨੂੰ ਉਨ੍ਹਾਂ ਨੇ ਸ਼ਿਕਾਇਤ ਨੰਬਰ 642 ਦਿੱਤੀ। ਜਿਸ ਵਿੱਚ ਇਲਜ਼ਾਮ ਲਗਾਇਆ ਗਿਆ ਕਿ ਉਸ ਦੇ ਲੜਕੇ ਰਮਨੀਕ ਸਿੰਘ ਨੂੰ ਵਿਦੇਸ਼ ਲਿਜਾਣ ਦੇ ਚੱਕਰ ਵਿੱਚ ਪਿੰਡ ਜਮਾਲਪੁਰ ਦੀ ਨਿਵਾਸੀ ਸੰਜਮਪ੍ਰੀਤ ਕੌਰ ਨੇ ਠੱਗੀ ਮਾਰੀ ਹੈ। ਦਰਅਸਲ ਬਾਰ੍ਹਵੀਂ ਪਾਸ ਰਮਨੀਕ ਸਿੰਘ ਵਿਦੇਸ਼ ਜਾਣਾ ਚਾਹੁੰਦਾ ਸੀ, ਪਰ ਆਈਲੈਟਸ ਦੀ ਪ੍ਰੀਖਿਆ ਪਾਸ ਨਹੀਂ ਕਰ ਸਕਿਆ। ਇੰਟਰਨੈੱਟ ਮੀਡੀਆ (ਸੋਸ਼ਲ ਮੀਡੀਆ) 'ਤੇ ਰਮਨੀਕ ਦੀ ਦੋਸਤੀ ਸੰਜਮਪ੍ਰੀਤ ਕੌਰ ਨਾਲ ਹੋਈ। ਦੋਸਤੀ ਦਾ ਫ਼ਾਇਦਾ ਉਠਾਉਂਦੇ ਹੋਏ ਮੁਟਿਆਰ ਨੇ ਆਪਣੀ ਮਾਂ ਕੁਲਦੀਪ ਕੌਰ ਅਤੇ ਪਿਤਾ ਜਸਬੀਰ ਸਿੰਘ ਨਾਲ ਮਿਲ ਕੇ ਸਾਜ਼ਿਸ਼ ਰਚੀ। ਜਿਸ ਦੇ ਤਹਿਤ ਰਮਨੀਕ ਸਿੰਘ ਨਾਲ ਕੰਟਰੈਕਟ ਮੈਰਿਜ ਕਰਦਿਆਂ ਕਿਹਾ ਕਿ ਉਹ ਉਸ ਨੂੰ ਵਿਦੇਸ਼ ਵਿੱਚ ਸੈੱਟ ਕਰਵਾ ਦੇਵੇਗੀ।

ਮਨਜਿੰਦਰ ਸਿੰਘ ਨੇ ਆਪਣੇ ਪੁੱਤ ਨੂੰ ਵਿਦੇਸ਼ ਸੈੱਟ ਕਰਨ ਦੇ ਮਕਸਦ ਨਾਲ ਸੰਜਮਪ੍ਰੀਤ ਕੌਰ ਨੂੰ ਵਿਦੇਸ਼ ਭੇਜਣ ਲਈ 40 ਲੱਖ ਰੁਪਏ ਖ਼ਰਚ ਕੀਤੇ। ਕੁਝ ਸਮਾਂ ਕੈਨੇਡਾ ਰਹਿਣ ਤੋਂ ਬਾਅਦ ਸੰਜਮਪ੍ਰੀਤ ਕੌਰ ਵਾਪਸ ਪਰਤ ਆਈ। ਵਾਪਸੀ ਦਾ ਸਾਰਾ ਖ਼ਰਚਾ ਵੀ ਏ.ਐੱਸ.ਆਈ. ਮਨਜਿੰਦਰ ਸਿੰਘ ਨੇ ਹੀ ਕੀਤਾ। ਕਿਸੇ ਰਿਸ਼ਤੇਦਾਰ ਦੇ ਵਿਆਹ ਸਮਾਗਮ ਵਿੱਚ ਜਾਣ ਦਾ ਬਹਾਨਾ ਲਗਾ ਕੇ ਉਹ ਪੰਜ ਤੋਲੇ ਸੋਨੇ ਦੇ ਗਹਿਣੇ ਵੀ ਨਾਲ ਲੈ ਗਈ। ਕਈ ਦਿਨਾਂ ਤੱਕ ਜਦੋਂ ਸੰਜਮਪ੍ਰੀਤ ਵਾਪਸ ਨਹੀਂ ਪਰਤੀ ਤਾਂ ਮਨਜਿੰਦਰ ਸਿੰਘ ਨੇ ਪਾਸਪੋਰਟ ਅਤੇ ਦਸਤਾਵੇਜ਼ ਮੰਗੇ। ਜਿਸ ਦੌਰਾਨ ਸੰਜਮਪ੍ਰੀਤ ਕੌਰ ਨੇ ਕਿਹਾ ਕਿ ਉਸ ਨੇ ਪੜ੍ਹਾਈ ਛੱਡ ਦਿੱਤੀ ਹੈ। ਬਾਅਦ ਵਿੱਚ ਮਾਮਲਾ ਪੰਚਾਇਤ ਦੇ ਸਾਹਮਣੇ ਰੱਖਿਆ ਗਿਆ। ਆਪਣੇ ਬਚਾਅ ਲਈ ਮੁਟਿਆਰ ਨੇ ਸਥਾਨਕ ਅਦਾਲਤ ਵਿੱਚ ਤਲਾਕ ਦਾ ਕੇਸ ਦਾਇਰ ਕਰ ਦਿੱਤਾ।

ਮਨਜਿੰਦਰ ਸਿੰਘ ਦੀ ਸ਼ਿਕਾਇਤ 'ਤੇ ਡੀ.ਐੱਸ.ਪੀ. ਰੈਂਕ ਦੇ ਅਧਿਕਾਰੀ ਨੇ ਪੜਤਾਲ ਸ਼ੁਰੂ ਕੀਤੀ। ਜਿਸ ਵਿੱਚ ਦੋਵਾਂ ਪੱਖਾਂ ਦੇ ਬਿਆਨ ਦਰਜ ਕੀਤੇ ਗਏ। ਜਾਂਚ ਰਿਪੋਰਟ ਵਿੱਚ ਸੰਜਮਪ੍ਰੀਤ ਕੌਰ, ਉਸ ਦੀ ਮਾਂ ਕੁਲਦੀਪ ਕੌਰ ਅਤੇ ਪਿਤਾ ਜਸਬੀਰ ਸਿੰਘ ਦੇ ਖ਼ਿਲਾਫ਼ ਇਲਜ਼ਾਮ ਸਾਬਤ ਹੋਏ। ਸ਼ਨੀਵਾਰ ਦੀ ਸ਼ਾਮ ਨੂੰ ਪੁਲਿਸ ਨੇ ਤਿੰਨਾਂ ਦੇ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਹੈ।