ਕੌਣ ਸਨ ਮਸ਼ਹੂਰ ਕਥਾਵਾਚਕ ਪ੍ਰੇਮ ਬਾਈਸਾ? ਉਲਝੀ ਮੌਤ ਦੀ ਗੁੱਥੀ, 6 ਮਹੀਨੇ ਪੁਰਾਣਾ ਵਿਵਾਦ ਵੀ ਆਇਆ ਸਾਹਮਣੇ

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਰਾਜਸਥਾਨ ਦੀ ਮਸ਼ਹੂਰ ਕਥਾਵਾਚਕ ਸਾਧਵੀ ਪ੍ਰੇਮ ਬਾਈਸਾ ਦੀ ਮੌਤ ਤੋਂ ਬਾਅਦ ਉਨ੍ਹਾਂ ਦੇ ਇੰਸਟਾਗ੍ਰਾਮ ਅਕਾਊਂਟ ਤੋਂ ਇਕ ਅਜਿਹੀ ਪੋਸਟ ਸਾਂਝੀ ਕੀਤੀ ਗਈ ਹੈ, ਜਿਸ ਤੋਂ ਬਾਅਦ ਉਨ੍ਹਾਂ ਦੀ ਮੌਤ ਸ਼ੱਕ ਦੇ ਘੇਰੇ ਵਿਚ ਹੈ। ਆਰ.ਐਲ.ਪੀ (RLP) ਨੇਤਾ ਹਨੂਮਾਨ ਬੇਨੀਵਾਲ ਸਮੇਤ ਕਈ ਜਨਪ੍ਰਤੀਨਿਧੀਆਂ ਅਤੇ ਉਨ੍ਹਾਂ ਦੇ ਸ਼ਰਧਾਲੂਆਂ ਨੇ ਸਾਧਵੀ ਪ੍ਰੇਮ ਬਾਈਸਾ ਦੀ ਰਹੱਸਮਈ ਮੌਤ ਦੀ CBI ਜਾਂਚ ਦੀ ਮੰਗ ਕੀਤੀ ਹੈ।

ਦਰਅਸਲ, ਬੁੱਧਵਾਰ ਸ਼ਾਮ ਨੂੰ ਪ੍ਰੇਮ ਬਾਈਸਾ ਦੀ ਸ਼ੱਕੀ ਹਾਲਾਤਾਂ ਵਿੱਚ ਮੌਤ ਹੋ ਗਈ। ਬਾਈਸਾ ਦੇ ਪਿਤਾ ਬ੍ਰਹਮਨਾਥ ਅਤੇ ਇੱਕ ਹੋਰ ਵਿਅਕਤੀ ਬੁੱਧਵਾਰ ਸ਼ਾਮ 5:45 ਵਜੇ ਉਨ੍ਹਾਂ ਨੂੰ ਬੇਹੋਸ਼ੀ ਦੀ ਹਾਲਤ ਵਿੱਚ ਹਸਪਤਾਲ ਲੈ ਕੇ ਪਹੁੰਚੇ, ਜਿੱਥੇ ਡਾਕਟਰਾਂ ਨੇ ਉਨ੍ਹਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ।

ਪ੍ਰੇਮ ਬਾਈਸਾ ਦੀ ਮੌਤ ਨੂੰ ਲੈ ਕੇ ਸਮਰਥਕ ਉਨ੍ਹਾਂ ਦੇ ਪਿਤਾ ਅਤੇ ਜੋਧਪੁਰ ਸਥਿਤ ਆਸ਼ਰਮ 'ਤੇ ਸਵਾਲ ਚੁੱਕ ਰਹੇ ਹਨ। ਦੇਰ ਰਾਤ ਹੀ ਪਾਲ ਰੋਡ ਸਥਿਤ ਸਾਧਨਾ ਕੁਟੀਰ ਆਸ਼ਰਮ ਦੇ ਬਾਹਰ ਵੱਡੀ ਗਿਣਤੀ 'ਚ ਸਮਰਥਕ ਇਕੱਠੇ ਹੋ ਗਏ ਅਤੇ ਸਾਧਵੀ ਦੀ ਮੌਤ ਦੇ ਕਾਰਨਾਂ ਦੀ ਜਾਂਚ ਦੀ ਮੰਗ ਕਰਨ ਲੱਗੇ। ਦੂਜੇ ਪਾਸੇ ਸਾਧਵੀ ਦੇ ਪਿਤਾ ਦਾ ਕਹਿਣਾ ਹੈ ਕਿ ਮੌਤ 'ਗਲਤ ਇੰਜੈਕਸ਼ਨ' ਲੱਗਣ ਕਾਰਨ ਹੋਈ ਹੈ।

ਮੌਤ ਤੋਂ ਬਾਅਦ ਇੰਸਟਾਗ੍ਰਾਮ ਅਕਾਊਂਟ 'ਤੇ ਪੋਸਟ

ਸਾਧਵੀ ਪ੍ਰੇਮ ਬਾਈਸਾ ਦੀ ਮੌਤ ਤੋਂ ਬਾਅਦ ਉਨ੍ਹਾਂ ਦੇ ਇੰਸਟਾਗ੍ਰਾਮ ਅਕਾਊਂਟ ਤੋਂ ਇਕ ਪੋਸਟ ਸਾਂਝੀ ਕੀਤੀ ਗਈ, ਜਿਸ ਵਿਚ ਲਿਖਿਆ ਸੀ: "ਮੈਂ ਹਰ ਇੱਕ ਪਲ ਸਨਾਤਨ ਦੇ ਪ੍ਰਚਾਰ ਲਈ ਜੀਵਾਂ, ਦੁਨੀਆ ਵਿੱਚ ਸਨਾਤਨ ਧਰਮ ਤੋਂ ਵੱਡਾ ਕੋਈ ਧਰਮ ਨਹੀਂ ਹੈ। ਅੱਜ ਆਖਰੀ ਸਾਹ ਤੱਕ ਮੇਰੇ ਦਿਲ ਵਿੱਚ ਸਨਾਤਨ ਹੀ ਹੈ। ਮੇਰੀ ਖੁਸ਼ਕਿਸਮਤੀ ਹੈ ਕਿ ਮੈਂ ਸਨਾਤਨ ਧਰਮ ਵਿੱਚ ਜਨਮ ਲਿਆ ਅਤੇ ਆਖਰੀ ਸਾਹ ਵੀ ਸਨਾਤਨ ਲਈ ਲਿਆ।"

ਪੋਸਟ ਵਿੱਚ ਅੱਗੇ ਲਿਖਿਆ ਸੀ: "ਮੇਰੇ ਜੀਵਨ ਵਿੱਚ ਆਦਿ ਜਗਤਗੁਰੂ ਸ਼ੰਕਰਾਚਾਰੀਆ ਭਗਵਾਨ, ਵਿਸ਼ਵ ਯੋਗ ਗੁਰੂਆਂ ਅਤੇ ਪੂਜਨੀਕ ਸੰਤ ਮਹਾਤਮਾਵਾਂ ਦਾ ਹਰ ਪਲ ਅਸ਼ੀਰਵਾਦ ਰਿਹਾ। ਮੈਂ ਆਦਿ ਗੁਰੂ ਸ਼ੰਕਰਾਚਾਰੀਆ ਅਤੇ ਦੇਸ਼ ਦੇ ਕਈ ਮਹਾਨ ਸੰਤਾਂ ਨੂੰ ਪੱਤਰ ਲਿਖਿਆ। ਅਗਨੀ ਪ੍ਰੀਖਿਆ ਲਈ ਬੇਨਤੀ ਕੀਤੀ, ਪਰ ਕੁਦਰਤ ਨੂੰ ਕੀ ਮਨਜ਼ੂਰ ਸੀ? ਮੈਂ ਇਸ ਦੁਨੀਆ ਨੂੰ ਹਮੇਸ਼ਾ ਲਈ ਅਲਵਿਦਾ ਕਹਿ ਰਹੀ ਹਾਂ, ਪਰ ਰੱਬ ਅਤੇ ਪੂਜਨੀਕ ਸੰਤਾਂ 'ਤੇ ਪੂਰਾ ਭਰੋਸਾ ਹੈ, ਮੇਰੇ ਜਿਉਂਦੇ ਜੀਅ ਨਹੀਂ ਤਾਂ ਮੇਰੇ ਜਾਣ ਤੋਂ ਬਾਅਦ ਨਿਆਂ ਜ਼ਰੂਰ ਮਿਲੇਗਾ।"

ਮੌਤ ਤੋਂ ਬਾਅਦ ਦੀ ਇਸ ਪੋਸਟ ਨੇ ਸਾਧਵੀ ਦੀ ਮੌਤ 'ਤੇ ਵੱਡੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।

ਕਿੱਥੋਂ ਦੀ ਰਹਿਣ ਵਾਲੀ ਸੀ ਸਾਧਵੀ ਪ੍ਰੇਮ ਬਾਈਸਾ?

ਸਾਧਵੀ ਪ੍ਰੇਮ ਬਾਈਸਾ ਮੂਲ ਰੂਪ ਵਿੱਚ ਬਾਲੋਤਰਾ ਜ਼ਿਲ੍ਹੇ ਦੇ ਪਰੇਊ ਪਿੰਡ ਦੀ ਰਹਿਣ ਵਾਲੀ ਸੀ। ਸਾਧਵੀ ਦੇ ਪਿਤਾ ਵੀਰਮਨਾਥ ਪੇਸ਼ੇ ਤੋਂ ਟਰੱਕ ਡਰਾਈਵਰ ਸਨ ਅਤੇ ਮਾਤਾ ਅਮਰੂ ਬਾਈਸਾ ਇੱਕ ਸਧਾਰਨ ਘਰੇਲੂ ਔਰਤ ਸੀ। ਮਾਂ ਦੀ ਮੌਤ ਤੋਂ ਬਾਅਦ ਪਿਤਾ ਵੀਰਮਨਾਥ ਬਚਪਨ ਵਿੱਚ ਪ੍ਰੇਮ ਬਾਈਸਾ ਨੂੰ ਜੋਧਪੁਰ ਦੇ ਗੁਰੂਕ੍ਰਿਪਾ ਆਸ਼ਰਮ ਲੈ ਗਏ ਸਨ। ਉੱਥੇ ਪ੍ਰੇਮ ਬਾਈਸਾ ਨੇ ਰਾਜਾਰਾਮ ਜੀ ਮਹਾਰਾਜ ਅਤੇ ਸੰਤ ਕ੍ਰਿਪਾਰਾਮ ਜੀ ਮਹਾਰਾਜ ਦੀ ਸਰਪ੍ਰਸਤੀ ਹੇਠ ਕਥਾ ਵਾਚਨ, ਭਜਨ ਅਤੇ ਅਧਿਆਤਮਿਕ ਗਿਆਨ ਪ੍ਰਾਪਤ ਕੀਤਾ।

ਜੱਦੀ ਪਿੰਡ ਵਿੱਚ ਬਣਾਇਆ ਆਸ਼ਰਮ

ਜਦੋਂ ਪ੍ਰੇਮ ਬਾਈਸਾ ਭਾਗਵਤ ਕਥਾ ਅਤੇ ਭਜਨ ਗਾਇਕੀ ਲਈ ਮਸ਼ਹੂਰ ਹੋਈ, ਤਾਂ ਉਹ ਗੁਰੂਕ੍ਰਿਪਾ ਆਸ਼ਰਮ ਤੋਂ ਵੱਖ ਹੋ ਕੇ ਜੋਧਪੁਰ ਵਿੱਚ ਪਾਲ ਰੋਡ ਨੇੜੇ ਸਾਧਨਾ ਕੁਟੀਰ ਆਸ਼ਰਮ ਵਿੱਚ ਰਹਿਣ ਲੱਗ ਪਈ। ਉਨ੍ਹਾਂ ਦੇ ਇਸ ਆਸ਼ਰਮ ਦੇ ਉਦਘਾਟਨ ਮੌਕੇ ਬਾਬਾ ਰਾਮਦੇਵ ਸਮੇਤ ਦੇਸ਼ ਦੇ ਕਈ ਪ੍ਰਮੁੱਖ ਸਾਧੂ-ਸੰਤ ਸ਼ਾਮਲ ਹੋਏ ਸਨ।

ਸਾਧਵੀ ਨੇ ਆਪਣੇ ਜੱਦੀ ਪਿੰਡ ਪਰੇਊ ਵਿੱਚ ਵੀ ਇੱਕ ਆਸ਼ਰਮ ਬਣਾਇਆ ਹੈ, ਜਿੱਥੇ ਸਮੇਂ-ਸਮੇਂ 'ਤੇ ਧਾਰਮਿਕ ਪ੍ਰੋਗਰਾਮ ਕਰਵਾਏ ਜਾਂਦੇ ਸਨ। ਹਾਲਾਂਕਿ, ਪਿੰਡ ਵਿੱਚ ਆਪਣੇ ਰਿਸ਼ਤੇਦਾਰਾਂ ਨਾਲ ਜ਼ਮੀਨੀ ਵਿਵਾਦ ਨੂੰ ਲੈ ਕੇ ਉਨ੍ਹਾਂ ਨੇ ਪੁਲਿਸ ਕੋਲ ਮਾਮਲਾ ਵੀ ਦਰਜ ਕਰਵਾਇਆ ਸੀ।

6 ਮਹੀਨੇ ਪੁਰਾਣਾ ਵਿਵਾਦ

ਛੇ ਮਹੀਨੇ ਪਹਿਲਾਂ ਸੋਸ਼ਲ ਮੀਡੀਆ 'ਤੇ ਉਨ੍ਹਾਂ ਦੀ ਇੱਕ ਵੀਡੀਓ ਵਾਇਰਲ ਹੋਈ ਸੀ, ਜਿਸ ਨੂੰ ਲੈ ਕੇ ਕਾਫੀ ਵਿਵਾਦ ਹੋਇਆ ਸੀ। ਵੀਡੀਓ 'ਚ ਸਾਧਵੀ ਅਤੇ ਉਨ੍ਹਾਂ ਦੇ ਪਿਤਾ ਦੇ ਗਲੇ ਲੱਗਣ 'ਤੇ ਸਵਾਲ ਚੁੱਕੇ ਗਏ ਸਨ, ਜਿਸ 'ਤੇ ਸਾਧਵੀ ਨੇ ਸਖ਼ਤ ਇਤਰਾਜ਼ ਪ੍ਰਗਟਾਇਆ ਸੀ।