ਮਥੁਰਾ ਕਿਸ਼ਤੀ ਹਾਦਸਾ: 4.5 ਘੰਟੇ ਬਾਅਦ 20 ਮੋਟਰਬੋਟਾਂ ਨਾਲ ਮੁੜ ਯਮੁਨਾ 'ਚ ਉਤਰੇ ਗੋਤਾਖੋਰ, 7 ਸ਼ਰਧਾਲੂ ਲਾਪਤਾ; 10 ਮ੍ਰਿਤਕ ਦੇਹਾਂ ਪੰਜਾਬ ਭੇਜੀਆਂ

ਮਥੁਰਾ: ਯਮੁਨਾ ਨਦੀ ਵਿੱਚ ਸ਼ੁੱਕਰਵਾਰ ਨੂੰ ਪੈਂਟੂਨ ਪੁਲ ਦੇ ਪੀਪੇ ਨਾਲ ਟਕਰਾ ਕੇ ਪਲਟੀ ਮੋਟਰਬੋਟ ਵਿੱਚ ਸਵਾਰ ਸੱਤ ਸ਼ਰਧਾਲੂਆਂ ਦਾ ਅਜੇ ਤੱਕ ਕੁਝ ਪਤਾ ਨਹੀਂ ਲੱਗ ਸਕਿਆ ਹੈ। ਰਾਤ ਇੱਕ ਵਜੇ ਤੱਕ ਬਚਾਅ ਕਾਰਜ ਕਰਨ ਤੋਂ ਬਾਅਦ, ਅੱਜ ਸਵੇਰੇ ਸਾਢੇ ਪੰਜ ਵਜੇ ਤੋਂ ਐਨ.ਡੀ.ਆਰ.ਐਫ (NDRF) ਅਤੇ ਐਸ.ਡੀ.ਆਰ.ਐਫ (SDRF) ਦੇ ਗੋਤਾਖੋਰ 20 ਮੋਟਰਬੋਟਾਂ ਨਾਲ ਮੁੜ ਯਮੁਨਾ ਵਿੱਚ ਉਤਰ ਗਏ ਹਨ।

ਲਗਪਗ 10 ਕਿਲੋਮੀਟਰ ਦੇ ਦਾਇਰੇ ਵਿੱਚ ਲਾਪਤਾ ਲੋਕਾਂ ਦੀ ਭਾਲ ਕੀਤੀ ਜਾ ਰਹੀ ਹੈ। ਪ੍ਰਸ਼ਾਸਨ ਦੀ ਸੂਚੀ ਵਿੱਚ ਪਹਿਲਾਂ ਪੰਜ ਲੋਕ ਲਾਪਤਾ ਸਨ, ਪਰ ਕੁਝ ਅਜਿਹੇ ਪਰਿਵਾਰਕ ਮੈਂਬਰ ਵੀ ਪਹੁੰਚੇ ਹਨ ਜਿਨ੍ਹਾਂ ਦੇ ਰਿਸ਼ਤੇਦਾਰ ਕਿਸ਼ਤੀ ਵਿੱਚ ਸਵਾਰ ਸਨ, ਜਿਸ ਕਾਰਨ ਲਾਪਤਾ ਸ਼ਰਧਾਲੂਆਂ ਦੀ ਗਿਣਤੀ ਹੁਣ ਸੱਤ ਮੰਨੀ ਜਾ ਰਹੀ ਹੈ।

ਕਿਵੇਂ ਵਾਪਰਿਆ ਹਾਦਸਾ?

ਸ਼ੁੱਕਰਵਾਰ ਦੁਪਹਿਰ ਨੂੰ ਪੰਜਾਬ ਦੇ ਲੁਧਿਆਣਾ ਤੋਂ ਸ਼ਰਧਾਲੂਆਂ ਦਾ ਜਥਾ ਵਰਿੰਦਾਵਨ ਦੇ ਕੇਸ਼ੀਘਾਟ ਤੋਂ ਯਮੁਨਾ ਪਾਰ ਦੇਵਰਾਹਾ ਬਾਬਾ ਦੇ ਸਮਾਧੀ ਸਥਲ ਦੇ ਦਰਸ਼ਨਾਂ ਲਈ ਜਾ ਰਿਹਾ ਸੀ। ਯਮੁਨਾ 'ਤੇ ਖੋਲ੍ਹੇ ਗਏ ਪੈਂਟੂਨ ਪੁਲ ਨੂੰ ਜੋੜਨ ਦੌਰਾਨ, ਤੇਜ਼ ਵਹਾਅ ਕਾਰਨ ਪੁਲ ਦਾ ਪੀਪਾ ਮੋਟਰਬੋਟ ਨਾਲ ਟਕਰਾ ਗਿਆ ਅਤੇ ਕਿਸ਼ਤੀ ਪਲਟ ਗਈ। ਉਸ ਵਿੱਚ ਸਵਾਰ 37 ਤੋਂ ਵੱਧ ਸ਼ਰਧਾਲੂ ਨਦੀ ਵਿੱਚ ਡੁੱਬ ਗਏ, ਜਿਨ੍ਹਾਂ ਵਿੱਚੋਂ ਗੋਤਾਖੋਰਾਂ ਨੇ 22 ਲੋਕਾਂ ਨੂੰ ਸੁਰੱਖਿਅਤ ਬਚਾ ਲਿਆ।

ਪੰਜਾਬ ਪਹੁੰਚੀਆਂ ਮ੍ਰਿਤਕ ਦੇਹਾਂ

ਹਾਦਸੇ ਵਿੱਚ ਜਾਨ ਗੁਆਉਣ ਵਾਲੇ 10 ਸ਼ਰਧਾਲੂਆਂ ਦੀਆਂ ਮ੍ਰਿਤਕ ਦੇਹਾਂ ਦੇਰ ਰਾਤ ਪੋਸਟਮਾਰਟਮ ਤੋਂ ਬਾਅਦ ਐਂਬੂਲੈਂਸਾਂ ਰਾਹੀਂ ਪੰਜਾਬ ਲਈ ਰਵਾਨਾ ਕਰ ਦਿੱਤੀਆਂ ਗਈਆਂ ਸਨ। ਲੁਧਿਆਣਾ ਦੇ ਨਿਵਾਸੀਆਂ ਦੀਆਂ ਦੇਹਾਂ ਸਵੇਰੇ 10 ਵਜੇ ਉਨ੍ਹਾਂ ਦੇ ਘਰ ਪਹੁੰਚ ਗਈਆਂ, ਜਦਕਿ ਜਗਰਾਓਂ ਦੇ ਸ਼ਰਧਾਲੂਆਂ ਦੀਆਂ ਦੇਹਾਂ ਦੁਪਹਿਰ ਤੱਕ ਪਹੁੰਚਣ ਦੀ ਉਮੀਦ ਹੈ। ਡੀ.ਐਮ ਸੀ.ਪੀ ਸਿੰਘ ਨੇ ਇਸ ਪੂਰੇ ਮਾਮਲੇ ਦੀ ਜਾਂਚ ਏ.ਡੀ.ਐਮ (ਵਿੱਤ) ਡਾ. ਪੰਕਜ ਵਰਮਾ ਨੂੰ ਸੌਂਪੀ ਹੈ।