ਨਵਾਂ ਕਾਨੂੰਨੀ ਮੋੜ: ਵਰਕਪਲੇਸ 'ਤੇ 'ਆਂਟੀ' ਕਹਿਣਾ ਪਿਆ ਭਾਰੀ, ਕੋਰਟ ਨੇ ਠੋਕਿਆ 1.8 ਲੱਖ ਦਾ ਜੁਰਮਾਨਾ

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਬ੍ਰਿਟੇਨ ਵਿੱਚ ਕਿਸੇ ਮਹਿਲਾ ਨੂੰ ‘ਆਂਟੀ’ ਕਹਿ ਕੇ ਬਲਾਉਣਾ ਹੁਣ ਮੁਸੀਬਤ ਵਿੱਚ ਪਾ ਸਕਦਾ ਹੈ। ਭਾਰਤ ਵਿੱਚ ਇਹ ਸ਼ਬਦ ਸਤਿਕਾਰ ਦਾ ਪ੍ਰਤੀਕ ਮੰਨਿਆ ਜਾਂਦਾ ਹੈ, ਪਰ ਯੂਕੇ (UK) ਦੇ ਵਰਕਪਲੇਸ 'ਤੇ ਇਸ ਨੂੰ ਉਮਰ ਅਤੇ ਲਿੰਗ ਆਧਾਰਿਤ ਉਤਪੀੜਨ (Harassment) ਕਰਾਰ ਦਿੱਤਾ ਗਿਆ ਹੈ।

ਟ੍ਰਿਬਿਊਨਲ ਜੱਜ ਨੇ ਸੁਣਾਇਆ ਫੈਸਲਾ

ਵੈਸਟ ਲੰਡਨ ਐਨ.ਐਚ.ਐਸ (NHS) ਟਰੱਸਟ ਨੂੰ ਭਾਰਤੀ ਮੂਲ ਦੀ ਹੈਲਥਕੇਅਰ ਅਸਿਸਟੈਂਟ ਇਲਡਾ ਐਸਟੇਵੇਸ (64) ਦੀਆਂ ਭਾਵਨਾਵਾਂ ਨੂੰ ਠੇਸ ਪਹੁੰਚਾਉਣ ਲਈ £1,425 (ਲਗਭਗ 1.8 ਲੱਖ ਰੁਪਏ) ਮੁਆਵਜ਼ਾ ਦੇਣ ਦਾ ਹੁਕਮ ਦਿੱਤਾ ਗਿਆ ਹੈ। ਇਮਪਲਾਇਮੈਂਟ ਟ੍ਰਿਬਿਊਨਲ ਦੇ ਜੱਜ ਐਲੀਟ ਨੇ ਇਹ ਫੈਸਲਾ ਸੁਣਾਇਆ ਹੈ।

ਕੀ ਸੀ ਪੂਰਾ ਮਾਮਲਾ?

ਮਾਮਲੇ ਅਨੁਸਾਰ, ਘਾਨਾ ਮੂਲ ਦੇ ਨਰਸ ਸਹਿਕਰਮੀ ਚਾਰਲਸ ਓਪੋਂਗ ਨੇ ਕੰਮ ਦੌਰਾਨ ਇਲਡਾ ਨੂੰ ਵਾਰ-ਵਾਰ 'ਆਂਟੀ' ਕਹਿ ਕੇ ਬੁਲਾਇਆ। ਇਲਡਾ ਨੇ ਉਸ ਨੂੰ ਕਈ ਵਾਰ ਟੋਕਿਆ ਅਤੇ ਅਜਿਹਾ ਨਾ ਕਰਨ ਲਈ ਕਿਹਾ, ਪਰ ਓਪੋਂਗ ਨਹੀਂ ਮੰਨਿਆ। ਜੂਨ 2023 ਵਿੱਚ ਓਪੋਂਗ ਨੇ ਇਹ ਵੀ ਕਿਹਾ ਕਿ ਇਲਡਾ 61 ਸਾਲਾ ਜਾਰਜ ਨਾਮਕ ਇੱਕ ਬਜ਼ੁਰਗ ਸਟਾਫ਼ ਮੈਂਬਰ ਲਈ ਵਧੀਆ ਪਾਰਟਨਰ ਬਣ ਸਕਦੀ ਹੈ।

ਟ੍ਰਿਬਿਊਨਲ ਵਿੱਚ ਓਪੋਂਗ ਨੇ ਦੋਸ਼ਾਂ ਤੋਂ ਇਨਕਾਰ ਕੀਤਾ, ਪਰ ਇਹ ਸਵੀਕਾਰ ਕੀਤਾ ਕਿ ਉਸ ਨੇ ਇੱਕ ਵਾਰ 'ਆਂਟੀ' ਕਹਿ ਕੇ ਬੁਲਾਇਆ ਸੀ। ਜੱਜ ਐਲੀਟ ਨੇ ਮੰਨਿਆ ਕਿ ਭਾਵੇਂ ਸੱਭਿਆਚਾਰ ਵਿੱਚ 'ਆਂਟੀ' ਬਜ਼ੁਰਗਾਂ ਪ੍ਰਤੀ ਸਤਿਕਾਰ ਦਾ ਸ਼ਬਦ ਹੈ, ਪਰ ਕਿਉਂਕਿ ਇਲਡਾ ਇਸ ਨੂੰ ਪਸੰਦ ਨਹੀਂ ਕਰਦੀ ਸੀ, ਇਸ ਲਈ ਇਹ ਉਸ ਲਈ ਅਪਮਾਨਜਨਕ ਸੀ।

'ਆਂਟੀ' ਕਹਿਣਾ ਉਤਪੀੜਨ ਮੰਨਿਆ ਗਿਆ

ਜੱਜ ਨੇ ਕਿਹਾ, "ਇਹ ਚੰਗਾ ਵਿਹਾਰ ਨਹੀਂ ਸੀ। ਵਰਕਪਲੇਸ ਵਿੱਚ ਕੀਤੀਆਂ ਗਈਆਂ ਟਿੱਪਣੀਆਂ ਨੇ ਮਹਿਲਾ ਨੂੰ ਠੇਸ ਪਹੁੰਚਾਈ ਹੈ। ਇਹ ਸ਼ਿਕਾਇਤਕਰਤਾ ਦੀ ਉਮਰ ਅਤੇ ਲਿੰਗ ਨਾਲ ਜੁੜਿਆ ਉਤਪੀੜਨ ਹੈ।" ਟ੍ਰਿਬਿਊਨਲ ਨੇ ਇਲਡਾ ਦੇ ਉਤਪੀੜਨ ਦੇ ਦਾਅਵੇ ਨੂੰ ਸਹੀ ਠਹਿਰਾਇਆ, ਹਾਲਾਂਕਿ ਉਸ ਦੀ ਪਛਾਣ ਗੁਪਤ ਰੱਖਣ ਦੀ ਮੰਗ ਨੂੰ ਖਾਰਜ ਕਰ ਦਿੱਤਾ ਗਿਆ।