ਸੁਲਤਾਨਪੁਰ 'ਚ ਦਿਲ ਕੰਬਾਊ ਹਾਦਸਾ: ਕਾਰ ਸਵਾਰ ਨੌਜਵਾਨ ਦੇ ਸੀਨੇ ਦੇ ਆਰ-ਪਾਰ ਨਿਕਲਿਆ ਲੋਹੇ ਦਾ ਸਰੀਆ, ਮੌਕੇ 'ਤੇ ਮੌਤ

ਜਾਸ, ਭਦੈਯਾ, ਸਲਤਾਨਪੁਰ: ਸੁਲਤਾਨਪੁਰ-ਵਾਰਾਣਸੀ ਫੋਰਲੇਨ ਹਾਈਵੇਅ 'ਤੇ ਮੰਗਲਵਾਰ ਦੇਰ ਰਾਤ ਵਾਪਰੇ ਇਕ ਭਿਆਨਕ ਸੜਕ ਹਾਦਸੇ ਵਿਚ ਇਕ ਨੌਜਵਾਨ ਦੀ ਮੌਤ ਹੋ ਗਈ, ਜਦਕਿ ਉਸ ਦੀ ਪਤਨੀ ਅਤੇ ਦਾਦਾ ਸਮੇਤ ਤਿੰਨ ਲੋਕ ਗੰਭੀਰ ਜ਼ਖ਼ਮੀ ਹੋ ਗਏ। ਇਹ ਪਰਿਵਾਰ ਪ੍ਰਤਾਪਗੜ੍ਹ ਦੇ ਮਨਗੜ੍ਹ ਭਗਤੀਧਾਮ ਤੋਂ ਦਰਸ਼ਨ ਕਰਕੇ ਘਰ ਪਰਤ ਰਿਹਾ ਸੀ। ਅਫ਼ਸੋਸ ਦੀ ਗੱਲ ਹੈ ਕਿ ਘਰ ਤੋਂ ਮਹਿਜ਼ 2 ਕਿਲੋਮੀਟਰ ਪਹਿਲਾਂ ਹੀ ਇਹ ਕਹਿਰ ਵਾਪਰ ਗਿਆ।

ਕਿਵੇਂ ਵਾਪਰਿਆ ਹਾਦਸਾ?

ਜਾਣਕਾਰੀ ਅਨੁਸਾਰ ਮੁਰਾਰਪੁਰ ਨਿਵਾਸੀ ਓਮ ਪ੍ਰਕਾਸ਼ ਪਾਂਡੇ ਦਾ ਪਰਿਵਾਰ ਵੈਗਨਆਰ ਕਾਰ ਵਿੱਚ ਸਵਾਰ ਸੀ। ਰਾਤ ਕਰੀਬ 10 ਵਜੇ ਜਦੋਂ ਉਹ ਲੋਹਰਾਮਊ ਪਿੰਡ ਕੋਲ ਪਹੁੰਚੇ, ਤਾਂ ਸੜਕ ਕਿਨਾਰੇ ਖੜ੍ਹੇ ਇੱਕ ਈ-ਰਿਕਸ਼ਾ ਨੂੰ ਬਚਾਉਣ ਦੀ ਕੋਸ਼ਿਸ਼ ਵਿੱਚ ਕਾਰ ਬੇਕਾਬੂ ਹੋ ਕੇ ਡਿਵਾਈਡਰ 'ਤੇ ਲੱਗੀ ਲੋਹੇ ਦੀ ਰੇਲਿੰਗ ਨਾਲ ਜਾ ਟਕਰਾਈ। ਹਾਦਸਾ ਇੰਨਾ ਭਿਆਨਕ ਸੀ ਕਿ ਕਾਰ ਪਲਟ ਗਈ ਅਤੇ ਪਿੱਛੇ ਤੋਂ ਆ ਰਹੀ ਇੱਕ ਹੋਰ ਕਾਰ ਨੇ ਵੀ ਇਸ ਨੂੰ ਟੱਕਰ ਮਾਰ ਦਿੱਤੀ।

ਸੀਨੇ ਵਿੱਚ ਖੁੱਭ ਗਿਆ 4 ਫੁੱਟ ਲੰਬਾ ਸਰੀਆ

ਕਾਰ ਦੀ ਅਗਲੀ ਸੀਟ 'ਤੇ ਬੈਠੇ 25 ਸਾਲਾ ਨੀਰਜ ਪਾਂਡੇ ਦੇ ਸੀਨੇ ਵਿੱਚ ਡਿਵਾਈਡਰ ਦੀ ਰੇਲਿੰਗ ਦਾ ਲਗਭਗ 4 ਫੁੱਟ ਲੰਬਾ ਲੋਹੇ ਦਾ ਸਰੀਆ ਆਰ-ਪਾਰ ਹੋ ਗਿਆ। ਨੀਰਜ ਦੀ ਮੌਕੇ 'ਤੇ ਹੀ ਦਰਦਨਾਕ ਮੌਤ ਹੋ ਗਈ। ਹਾਲਾਤ ਇੰਨੇ ਖ਼ਰਾਬ ਸਨ ਕਿ ਨੀਰਜ ਦੀ ਦੇਹ ਕਾਰ ਵਿੱਚ ਬੁਰੀ ਤਰ੍ਹਾਂ ਫਸ ਗਈ ਸੀ, ਜਿਸ ਨੂੰ ਪੁਲਿਸ ਨੇ ਗੈਸ ਕਟਰ ਦੀ ਮਦਦ ਨਾਲ ਕਾਰ ਕੱਟ ਕੇ ਬਾਹਰ ਕੱਢਿਆ।

ਪਰਿਵਾਰ ਦੀ ਹਾਲਤ ਗੰਭੀਰ

ਇਸ ਹਾਦਸੇ ਵਿੱਚ ਨੀਰਜ ਦੀ ਪਤਨੀ ਪ੍ਰੀਤੀ, ਉਸ ਦੇ ਦਾਦਾ ਫੂਲ ਚੰਦਰ ਪਾਂਡੇ ਅਤੇ ਚਾਲਕ ਸੂਰਜ ਉਪਾਧਿਆਏ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋ ਗਏ ਹਨ। ਉਨ੍ਹਾਂ ਨੂੰ ਤੁਰੰਤ ਮੈਡੀਕਲ ਕਾਲਜ ਵਿੱਚ ਭਰਤੀ ਕਰਵਾਇਆ ਗਿਆ ਹੈ। ਪੁਲਿਸ ਨੇ ਦੋਵਾਂ ਗੱਡੀਆਂ ਨੂੰ ਕਬਜ਼ੇ ਵਿੱਚ ਲੈ ਕੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।